Ngiyanibingelela maSewula Afrika Wekhethu,
 
Solo kuthome inyanga kaMrhayili, nasithoma ukugedlisa kancani kancani imithetholawulo yokuqinteliswa kweminye imisebenzi namakhambo ngenca yengogwana i-corona, abantu abanengi bathomile ukubuyela emsebenzini. 
 
Njengengcenye yehlelo lokuvuselela umnotho ngeengaba ngeengaba, iinkhamphani emabubulweni athileko ziphumelele ukubuyisela ingcenye yomsebenzi wazo ekusebenzeni laphokhunye zabuyela ngokupheleleko ekusebenzeni kwazo.                                                                                                                                                     
 
Isigaba esikiso njenganje elizweni loke ngobujamo bengogwana i-corona siGaba sesiNe, okutjho ukuthi solo isasebenza imithetholawulo yokutjheja siyelele ukukhandela ukurhatjheka kwengogwana i-corona emiphakathini yekhethu.

Umnqopho wethu kukwehlela esigabeni esingenzasi ngokuyelela senzele ukuthi bangandi abantu abatheleleka ngengogwana le ngahlanye sibe silungiselela nehlelo lethu lezamaphilo ukuthi lilungele ukuqalana nokukhuphuka kwenani labantu abazakungenwa ngilengogwana, njengoba ukukhuphuka kwenani lelo kungeze kwabalekelwa nje.                                                                                                                                                     
 
Njengoba imithetholawulo yokuqinteliswa kweminye imisebenzi namakhambo igedliswa kancani kancani nje, kancani kancani sizakubuyela epilweni ejayelekileko. Kodwana nanyana kunjalo, angeze kusaba yipilo leya esiyaziko.                                                                                                                                                      
 
Nanyana kusese kunengi nje okungakaziwa ngobulwelobu, izazi kwanje ziyavumelana ukuthi kusezakuthatha isikhatjhana ingogwana le isolo iyingozi kezamaphilo wabantu ephasini loke.                                                                                                                                                       
 
Ngalokho-ke kufuze samukele ukuthi sisezakuhlala nayo ingogwana i-corona isikhathi esingaba mnyaka namkha esingaphezu kwalokho.                                                                                                                                                     
 
Kumele silungele ukwamukela iqiniso elitjha elithi ukulwa ne-COVID-19 kuzakuhlala kukhona kuyingcenye yepilo yethu yangamalanga.                                                                                                                                                             
 
Ekugcineni, ipumelelo yethu yokwehlula ingogwana i-corona izakulawulwa matjhuguluko wokuziphatha kwethu esiwenzako.                                                                                                                                                  
 
Ngitjho nangemva kokuphela kwesikhathesi sokuqinteliswa kweminye imisebenzi namakhambo – kusezakufuneka sihlale maqalanga, sizivale ngamamaski, sihlale sihlamba izandla, sibalekele nokuthintana nabanye abantu.         
                                                                                                                                      
Kuzakufuneka sizihlele ngobutjha iindawo lapho sisebenzela khona, eenkolweni, emayunivesithi, emakholiji nakezinye iindawo zokuhlanganela komphakathi kobanyana sizokuphungula amathuba wokutheleleka kwabantu ngengogwana le.                                                                                                                                                         
 
Kuzakufuneka sijayele iindlela ezitja zokukhonza, zokuhlangana nabanye abantu, zokuzelula umzimba kunye nezokubamba imihlangano, iindlela eziphungula amathuba wokurhatjheka kwengogwana.       
                                                                                                                                            
Lobu bujamo bezinto amazwe ephasini loke aqalene nabo. Ngitjho nawo lawomazwe asele athomile ukugedlisa imithetholawulo yokuqinteliswa kweminye imisebenzi namakhambo begodu enza lokho ngokuyelela okukhulu, begodu  kusese kulinga okungenziwa.                                                                                                                                                         
 
Njengoba senzile, amazwe amanengi asebenzisa amahlelo wokuvuselela kobanyana kuzokuqiniswa amakoro wawo wezamaphilo, kusekeleke amabubulo abogabogako nabasebenzi bakhona bekusizwe namakhaya acaphazeka lula.                                                                                                                                              
 
Njengekhethwapha, kufuneke ukuthi amazwe la alalele iimphakamiso ezithi imisebenzi yomnotho ayivulwe. Njengezakhamuzi zekhethu, abantu bamazwe lawo bahlezi macuphe baphelelwe nanga lithemba ngokuqinteliswa kwekululeko yomuntu ngamunye yokwenza izinto abajayele ukuzenza.    
                                                                                                                                               
Khona khonapho, izazi zezamaphilo ephasini loke ziyelelisa ngokuthi kungabuya ‘umzombe wesibili’ wokutheleleka abantu nababuyela epilweni ejayelekileko. Amazwe amanengi, ekubalwa kiwo iJarimani, i-Iran ne-China, andelwe kutheleleka kwabantu ngobutjha ngengogwana le solo athome ukugedlisa imibandela ethileko.                                                                                                                                                          
 
Nathi-ke angeze sehluke. Kungenzeka begodu kufanele silindele ukuthi sikhuphuke isibalo sabantu abatheleleka ngengogwana le njengoba kwanda abantu ababuyela emsebenzini nje. Kumele samukele ubujamo bezinto, sibulungiselele, silungele ukubujayela.                                                                                                                                                          
 
Isigaba esilandelako segadango esilithathako njengelizwe siphathelene nokuragela phambili namatjhuguluko nanyana amandla wokusungula. Sizokwandisa amahlelo wokupopola, wokuhlola newokulawula ubulwele. Sizokuthoma nokusebenzisa neendlela ezitja esizawenza uphumelele ngcono umsebenzi wokulandelela abantu abakhe baba seduze nomuntu osolwa ngokutheleleka namkha osele athelelekile.   

 Kuzakufuneka iindawo ekusetjenzelwa kizo emsebenzini, izinto ezithutha umphakathi nezinye iindawo ezihlanganela umphakathi zihlanzekiswe kungatjhiywa litho.                                                                                                                                                         
 
Solo kwathoma ukusebenza kwemithetholawulo yokuqinteliswa kweminye imisebenzi namakhambo, ubunengi bamaSewula Afrika ayayithobela imilayelo ebekiweko ngoba aligadango lokuphepha kwawo nepilo yawo ehle. Azithathele lesisiqunto esifaneleko, ngokwazi ukuthi kuyafuneka lokhu epilwenawo nepilweni yabantu abahlanu kwabo.                                                                                                                                               
 
Njengoba igedliswa nje imibandela yemisebenzi yomnotho neyepilo yangamalanga, kuqakathekile ukuthi woke amaSewula Afrika ahlale ababantu abaphila ngokuzitjheja. Kikho koke esikwenzako, epilweni yethu yangamalanga kumele sibabalele ipilwethu sibabalele nepilo yabanye.                                                                                                                                                         
 
Nanyana sibabantu ngamunye ngamunye, sibaqatjhi, sibasebenzi, singurhulumende, simphakathi,simayuniyoni namkha simabhizinisi, soke sizakusolo siragela phambili ngokuba nendima esiyilimako ekulweni nobulwele obuthuwelelekobu.                                                                                                                                                      
 
Njengoba kwafuneka ukuthi sitjhugulule indlela esiziphatha ngayo ukukhandela ukurhatjheka kweNgogwana yeNtumbantonga (i-HIV), kwanjesi-ke kumele sitjhugulule indlela esiziphatha ngayo ukukhandela ukurhatjheka kwengogwana i-corona.                                                                                                                                                      
 
Ukubeka umlayelo wokuqinteliswa kweminye imisebenzi namakhambo elizweni loke kunikele ilizwe lekhethu ubuhle bokuhlelela izinto. Kusinikele isikhathi esiqakatheke khulu ukulungiselela ihlelo lethu lezamaphilo kwabe kwabeka namagadango wokulawula.  Lokhu-ke kuphungule ukutheleleka kwabe kwahlenga nepilo.                                                                                                                                                  
 
Ukweyamela esigabeni esilandelako sokulwa nengogwana i-corona, isigaba sokuvuselela, kuzakuba budisi ukudlula kilesisigaba esikiso njenganje. Buzokuphakama ubungozi bokwehla kobulwelobu. Bazokwanda nabantu abafuna isizo emitholapilo yekhethu, neembhedlela zekhethu kunye nakibodorhodere bekhethu.                                                                                                                                                        
 
Ngikho-ke kungakafaneli ukuthi ukugedliswa kwemithetholawulo yokuqinteliswa kweminye imisebenzi namakhambo kwenze abantu baziphathe budlabha namkha amabhizinisi aziphathe budlabha ngoba ancamele ukubuyela emsebenzini ukube ngahlanye kuliseleleka ipilo yomuntu.                                                                                                                                                            
 
Umraro we-coronavirus uzakudlula. Kodwana nayisese yingozi epilweni yabantu bekhethu, kumele sihlale sitjhejile siyelele, sijame ngeenyawo besizitjheje. 

Nje-ke, khulu kunaphambilini, isiphetho sethu soke sisekuziphatheni komunye nomunye umuntu.
                                                                                                                                                   
Nginifisela Okuhle,