Bantfu baseNingizimu Afrika labatsandzekako,
 
Kusukela ekucaleni kwenyanga yeNkhwekhweti, ngesikhatsi sicala sicekisa kancane imitsetfo yekuvimbela yeluvalelo lwavelonkhe lweligciwane i-corona, bantfu labanengi sebacale kubuyela emuva emsebentini.
 
Njengencenye yekuvusetela kabusha umnotfo ngetigaba, tinkampani etimbonini letitsite tikhonile kucala incenye nome konkhe kusebenta kwato.
 
Lizinga lekucaphela ligciwane i-corona lavelonkhe nyalo lime kulizinga lesine, lokusho kutsi tinyatselo letisetulu kakhulu tekucaphela tisasenjalo kute kuvinjelwe kwendluliseleka kummango kwalesifo. Injongo yetfu kutsi sinciphise kancane lizinga lekucaphela ngekutsi kugcinwe lizinga lekutseleleka liphasi kanye nekwenta luhlelo lwetfu lwetemphilo kutsi lulungele kwenyuka kwetehlakalo tekutseleleka letingeke tigwemeke.
 
Njengaloku loluvalelo lwavelonkhe lucekiswa kancane kancane, imphilo itawubuyela esimeni kancane. Kodvwa ngeke kube yimphilo njengaloku besiyati ngaphambilini.
 
Njengaloku kusasekunyenti lokungatiwa ngalolubhubhane, tati tiyavumelana nyalo kutsi leligciwane lisawuba bungoti kutekuvikela tetemphilo yemmango emhlabeni wonkhe kwesikhashana.
 
Ngako-ke kufanele kutsi sitilungiselele kuchubeka siphile naleligciwane emkhatsini wetfu umnyaka nome ngetulu.
 
Kufanele kutsi sitilungiselele kubukana neliciniso lelisha lekulwa ne-COVID-19 njengencenye yekuphila kwemihla imihla nemihla.
 
Kuphumelela kwetfu ekuncobeni leligciwane i-corona kutawuya ngetingucuko lesitentako ekutiphatseni kwetfu ekugcineni.
 
Ngisho nangemuva kweluvalelo lwavelonkhe – ikakhulu emva kweluvalelo – kutawudzinga kutsi sisolo sikuhlonipha kuchelelana ngekwenhlalo, sifake tifonyo tebuso, sigeze tandla njalo, futsi sikugweme kutsintsana nalabanye bantfu.

Kutawudzingeka kutsi sihlelembise kabusha tindzawo tekusebenta, tikolo, manyuvesi, emakolishi kanye naletinye tindzawo temmango kute sivimbele kwendluliseka kwaleligciwane.
 
Kutawudzingeka kutsi sitetayete tindlela letinsha tekukhonta, tekutijabulisa, kutivocavoca kanye netekubamba umhlangano tekunciphisa ematfuba ekutsi leligciwane libhebhetseke.
 
Leli liciniso emave emhlabeni wonkhe lekumele kutsi abukane nalo. Ngisho nalawo mave lasacale kucekisa imitsetfo yawo yeluvalelo yekuvimbela enta njalo kwesikhashana futsi ngekucophelela lokukhulu.
 
Njengaloku sentile, emave lamanengi acala kufezekisa sivusamfutfo lesikhulu selusito sekucinisa imikhakha yawo yetekunakekela ngemphilo, kusekela timboni letiwako kanye netisebenti kanye nekunika lusito emakhaya lahlaseleka lula.
 
Njengatsi, batilalele ticelo tekutsi kucale kubuyelwe emsebentini. Njengetakhamuti tetfu, emananibantfu awo aphatseke kabi futsi akhungatsekile ngekuvinjelwa kwekukhululeka kwawo.

Ngaso leso sikhatsi, tati tetemphilo emhlabeni wonkhe tecwayisa “ngencenye yesibili” yekwesuleleka njengaloku imphilo yesive seyicala futsi. Emave lamanengi lokufaka ekhatsi laseJalimane, i-Iran kanye neShayina abone kwenyuka ekwesulelekeni lokusha kusukela nje acekise imitsetfo letsite yekuvimbela.
 
Ngeke sehluke. Kufanele futsi silindzele kutsi kwesuleleka kwenyuke njengaloku bantfu labanengi babuyela emisebentini. Kufanele kutsi silemukele leliciniso futsi sitetayete nalo.
 
Sigaba lesilandzelako sekuphendvula kwetfu kakhulu kumayelana nekuchubeka njengaloku kumayelana nengucuko nome umcondvo lomusha. Sitakwenyusa lizinga lweluhlolokuhlunga lwetfu, luhlelo lwekuhlola kanye nekulawula tehlakalo. Sitakwetfula tinyatselo letinsha tekwenta kutsi kulandzelela kwebantfu kube yimphumelelo kakhulu.

Kutawudzingeka kutsi sifezekise kuhlantwa ngendlela lebanti tindzawo tekusebenta, titfutsi temmango kanye naletinye tindzawo lapho kutfolakala khona bantfu
 
Kusukela loluvalelo lwavelonkhe lwelive lwacala, linengi lebantfu baseNingizimu Afrika liyihloniphile lemitsetfosimiso lekhona bakwentela timphilo tabo kanye nekuvikeleka kwabo. Batsatse sincumo sekuba nelwatiso sekwenta njalo, ngekuvisisa kutsi kudzingekile ngenca yetimphilo tabo kanye netimphilo talabo labasedvutane nabo.
 
Njengaloku imitsetfo levimbelako yekuchuba temnotfo kanye nemphilo yemihla ngemihla icekiswa, kubalulekile kutsi bonkhe bantfu baseNingizimu Afrika bawugcine lowo mcondvo wesibopho lesicinile. Kuko konkhe lesikwentako, kunome ngabe ngumuphi umkhakha wemphilo, kufanele kutsi sinakekele imphilo yetfu kanye nemphilo yalabanye.
 
Akukhatsalekile nome ngabe ngulowo nalowo, bacashi, tisebenti, hulumende, inhlangano yemmango, tinyonyana tetisebenti nome ngemabhizinisi, sitawuchubeka sonkhe sidlale indzima ekulweni nalolubhubhane.
 
Ngendlela lefananako kutsi kwadzingeka kutsi sigucule kutiphatsa kwetfu kute sivikele kubhebhetseka kwe-HIV, nyalo kudzingeka kutsi sigucule kutiphatsa kwetfu kute sivimbe leligciwane i-corona.
 
Kumemetela luvalelo lwavelonkhe lwelive kwanika live letfu lisubuciko leliyinzuzo. Kwasinika sikhatsi lesibalulekile sekulungiselela luhlelo lwetfu lwetemphilo kanye nekubeka tinyatselo tekulawula. Loku kwehlise lizinga lekundluliseleka kwaleligciwane futsi kwasindzisa netimphilo tebantfu.
 
Kuntjintjela esigabeni lesilandzelako sekuphendvula kuleligciwane i-corona, lese sekuvusetela kabusha, sitawuba lukhuni kakhulu kwengca lesi lesikhona njenganyalo. Bungoti bekubhedvuka kwekusuleleka kutakwandza. Kufuneka kwemitfolamphilo kanye netibhedlela kanye netisebenti tetemphilo kutawukhula.
 
Kungaleso sizatfu-ke kutsi kucekisa imitsetfo yeluvalelo lwavelonkhe lwelive yekuvimbela akukafaneli kutsi kuholele ekutseni bantfu batiphatse ngekunganakekeli nome kwenta tintfo ngekungacopheleli kwemabhizinisi ngekucala imisebenti yetemnotfo bafake timphilo tebantfu engotini.
 
Inkinga yeligciwane i-corona itakwendlula. Kodvwa ikakhulu nje nangabe lisaseyingoti etimphilweni tebantfu bakitsi, kufanele kutsi sihlale njalo sicaphele, sikhutsale futsi sitibophelele.
 
Nyalo, kakhulu kunakucala, sekutawuya ngekutiphatsa kwalowo nalowo lokutawuncuma kutsi sonkhe sitawuphelelaphi.
 
Nginifisela tilokotfo letinhle,