A.  Mafhungo a Zwino kha Shango

1.  Mulaedza wa nga ha Tshiimo tsha Lushaka (SoNA)

1.1.  Khabinethe yo khwaṱhisedza khuwelelo ye Phresidennde Vho Cyril Ramaphosa vha i ita kha Mulaedza wavho wa nga ha Tshiimo tsha Lushaka wa ṅwaha wa 2023 ya uri hu vhe na tshumisano kha vhadzulapo vhoṱhe vha Afrika Tshipembe na uri hu si vhe na ane a salela murahu zwenezwo musi hu tshi khou lingedzwa u tandulula khaedu dzine shango ḽashu ḽa khou ṱangana nadzo.  

1.2.  Maga aya o khwaṱhaho a Phresidennde ndi ane a vhea mafhungo a zwa fulufulu phanḓa kha pulane dza u shuma dza muvhuso kha uno ṅwaha u itela u lwa tshoṱhe na zwa u khaulwa ha muḓagasi nga u sielisana khathihi na u swikela nyimele ya nḓisedzo ya fulufulu ya tshifhinga tshilapfu.  

1.3.  Khabinethe i khou dovha hafhu ya ṱuṱuwedza sekhithara dzoṱhe dza tshitshavha uri dzi tikedze maga o sumbedziswaho kha SoNA nga Phresidennde ane a vha maga a ndeme kha u ita uri ri kone u bvela phanḓa na ndingedzo dzashu dza u fhungudza u shayea ha mishumo, vhushai khathihi na zwa u engedzea ha mitengo ya zwirengwa hu tshi katelwa na u fhelisa vhugevhenga na zwiito zwa vhuaḓa.  

1.4.  Muvhuso wo ḓiimisela u engedza luvhilo kha mishumo ine ya vha kati zwazwino u itela uri hu vhe na u engedzea ha nḓisedzo ya fulufulu kha sisteme ya nḓisedzo ya muḓagasi ya lushaka nahone vhuḓifhinduleli hashu ndi u fhelisa zwikhukhulisi zwoṱhe zwine zwa ri ima phanḓa kha u swikela mvelaphanḓa yeneyo.  

1.5.  Kha vhege dzi si gathi dzi ḓaho, miṱangano ya zwigwada zwa mihasho i kwameaho i ḓo ṋetshedza zwidodombedzwa nga vhuḓalo nga ha Mbekanyamushumo ya Mashumele (PoA) ya muvhuso kha ṅwaha u tevhelaho sa zwe zwa sumbedziswa nga Phresidennde Vho Ramaphosa kha mulaedza wavho wa SoNA.  Mugaganyagwama wa Lushaka une wa ḓo ṋetshedzwa nga Ḽavhuraru, ḽa 22 Luhuhi 2023 u ḓo ṋetshedza zwidodombedzwa zwinzhi nga ha PoA ya muvhuso. 

2.  Indaba ya zwa Migodi ya ḽa Afrika ya ṅwaha wa 2023 

2.1.  Khabinethe yo dzhiela nṱha mawanwa a Indaba ya zwa Migodi ya ḽa Afrika ye ya farelwa fhaḽa Sentharani ya zwa Miṱangano ya Dzitshaka ya Cape Town u bva nga ḽa 6 u swika ḽa 9 Luhuhi 2023 nga fhasi ha thero ine ya ri: “U bvukulula Vhubindudzi ha zwa Migodi ya ḽa Afrika: Vhudziki, Tsireledzo na Nḓisedzo”. 

2.2.  Indaba ya zwa Migodi ya ḽa Afrika yo kuvhanganya fhethu huthihi zwiimiswa zwi shelaho mulenzhe kha nḓowetshumo iyi u bva kha dzhango ḽa Afrika na ḽifhasi ḽoṱhe nga u angaredza he ya fhedza nga u khwaṱhisa vhuimo hayo ha u vha muṱangano muhulwane wa vhubindudzi kha zwa migodi kha dzhango. Migodi i khou bvela phanḓa na u shela mulenzhe muhulwane kha zwa mveledziso na vhubveledzanḓowetshumo kha dzhango ḽoṱhe. Ndi nḓowetshumo ine ya shela mulenzhe wa ndeme kha u sikwa na u vhulungwa ha mishumo, hune ya sika mishumo ya vhukuma i swikaho hafu ya miḽioni khathihi na miṅwe ya nga thungo i swikaho miḽioni fhano Afrika Tshipembe.      

2.3.  Ṅwaha wo fhelaho vhubveledzi ha zwa migodi fhano Afrika Tshipembe ho swika kha rekhodo ya nṱhesa ya masheleni a linganaho R1.18 triḽioni, zwe hezwi zwa engedza zwibveledzwa zwashu zwa fhano hayani, thundu dzine dza rengiselwa nnḓa khathihi na mbuelo. Khabinethe i khou ita khuwelelo kha vhoṱhe vha kwameaho kha nḓowetshumo iyi ya uri vha bvele phanḓa na u shumisana na muvhuso u itela u bveledza nḓowetshumo ya maimo a nṱha ḽifhasini nahone ine ya engedza nyaluwo ya ikonomi, u sika mishumo khathihi na u ṱuṱuwedza nyaluwo ya tshifhinga tshilapfu.   

3.  Miḓalo 

3.1.  Khabinethe yo ṱahisa maipfi ayo a ndiliso kha vha miṱa ye ya ṱutshelwa nga vhafunwa vhavho nga tshifhinga tsha miḓalo ya tshinyalelo khulwane ya zwenezwino ye ya kwama zwipiḓa zwo fhambanaho zwa shango ḽashu. 

3.2.  Ri khou livhuwa vha tshumelo dzashu dza shishi na dza phuluso u mona na shango vhe vha shuma vha sa neti u itela u vhulunga matshilo. Kha ri vhe tshithu tshithihi sa lushaka u itela uri ri kone u ṋetshedza thuso kha avho vhane vha vha na ṱhoḓea khulwane ya thikhedzo na ndondolo. 

3.3.  Khabinethe yo eletshedza vhathu uri vha dzule ngomu nḓuni dzavho arali hu na mutsho wa mvula khulwane na zwirulu, ya dovha hafhu ya tsivhudza avho vhane vha dzula kha vhupo ho tselaho fhasi uri vha vhe na ṱhogomelo khulwane vhukuma.  

3.4.  Vhathu vha khou tsivhudzwa uri vha songo tshimbila, u bambela kana u reila ngomu kha maḓi a mikumbela ane a khou elela nga luvhilo kana u pfuka vhukati ha bada, dziburoho na milambo yo ḓalaho maḓi. Khabinethe yo dovha hafhu ya tsivhudza miraḓo ya tshitshavha uri vha vhone uri vhana vhavho vha khou dzula vho tsireledzea kha u nga kumbiwa nga maḓi musi hu na miḓalo. 

4.  Khakhathi dza zwigidi  

4.1.  Khabinethe yo ṱahisa maipfi ayo a ndiliso kha vha muṱa na dzikhonani dza muimbi wa muzika wa hip-hop Vho Kiernan Forbes, vhe vha vha vha tshi ḓivhiwa sa AKA khathihi na mubikimakone Vho Tebello Motsoane, vhe vha thuntshwa vha lovha zwenezwino fhaḽa ḓoroboni ya Durban. 

4.2.  Khabinethe yo dovha hafhu ya ṱahisa maipfi ayo a ndiliso na kha vha muṱa na dzikhonani dza Vho Ayob Mungalee, vhe vha vha vha tshi lwa na zwiito zwa vhugevhenga vhane vha kha ḓi tou bva u thuntshwa vha vhulawa zwenezwino fhaḽa Eldorado Park kha ḽa Johannesburg. Vho vha vhe mulangi wa lushaka wa tshigwada tshi ḓivhiwaho sa People Seeking Justice Action Group, ḽine ḽa vha dzangano ḽi ṱuṱuwedzaho miraḓo ya tshitshavha uri vha imedzane na zwiito zwa dzigennge khathihi na u rengiswa ha zwidzidzivhadzi.  

4.3.  Khabinethe yo dovha hafhu ya ṱahisa maipfi a ndiliso na kha vha miṱa na dzikhonani dza avho vhe vha vhulawa kha zwiito zwa zwenezwino zwa u thuntshwa ha vhathu vhanzhi ngei Kapa Vhukovhela, KwaZulu-Natal na Kapa Vhubvaḓuvha. Haya mabulayo a tshiṱuhu nahone a ofhisaho ngaurali ane a kha ḓi vha nga fhasi ha ṱhoḓisiso nga vha maanḓalanga a zwa mulayo, a bvisela khagala u anda ha khakhathi dza zwigidi khathihi na masiandaitwa a hone kha zwitshavha zwashu. 

4.4.  Khabinethe yo dovha hafhu ya fulufhedzisa vhadzulapo vha Afrika Tshipembe uri Tshumelo ya Mapholisa ya Afrika Tshipembe (SAPS) i khou khwaṱhiswa u itela u thivhela vhugevhenga. Hezwi zwi katela u rumelwa ha mapholisa manzhi zwiṱaraṱani khathihi na u vhumbwa ha zwigwada zwo khetheaho zwine zwa ḓo sedzesa nga maanḓa kha tshaka dza vhugevhenga ho khetheaho. Afrika Tshipembe ḽi ḓo dovha hafhu ḽa shumisa maitele ane a shumisa data nga nḓila i songo ḓoweleaho u itela u ṱalusa na u posa iṱo kha vhupo vhune ha vha tshivhilela tsha zwiito zwa vhugevhenga.   

4.5.  Vha ha SAPS vha khou khwaṱhisa mafulo avho a u wanulusa na u dzhia zwigidi na dzigulu zwi siho mulayoni u bva kha ndango ya zwigevhenga. Mapholisa kha tshifhinga tsha miṅwedzi ya 12 yo fhiraho vho kona u dzhia lwa tshoṱhe zwigidi zwe zwa vha zwi tshi khou monamona na shango zwi linganaho 65 519. 

4.6.  Muvhuso u khou ita khuwelelo kha vhadzulapo vhoṱhe khathihi na madzangano a zwitshavha ya uri vha shumisane na vha SAPS ya henefho vhuponi ha havho u itela u fhelisa vhugevhenga kha zwitshavha zwavho. Arali vha na zwidodombedzwa zwine zwa nga thusa kha u bvisela khagala vhathu vhane vha khou ḓidzhenisa kha zwiito zwi siho mulayoni, kha vha founele Crime Stop kha 0800 10111. 

5.  Masipala Wapo wa Enoch Mgijima (EMLM)

5.1.  Minisṱa vha Tshumisano ya Mavhusele na Mafhungo a zwa Sialala Vho Nkosazana Dlamini Zuma na Minisṱa wa zwa Gwama Vho Enoch Godongwana vho ḓivhadza Khabinethe nga ha miṱangano ya vhukwamani ya zwenezwino ye ya farwa na vhashelamulenzhe vha ndeme khathihi na vhoṱhe vha kwameaho kha mafhungo a fhaḽa EMLM.    

5.2.  Nga ṅwedzi wa Lambamai 2022, Khabinethe yo tendela hu tshi shumiswa maga a u dzhenelela fhaḽa EMLM u ya nga Khethekanyo 139(7) ya Ndayotewa ya Riphabuḽiki ya Afrika Tshipembe ya ṅwaha wa 1996, musi i tshi vhalwa khathihi na Khethekanyo 150 ya Mulayo wa Ndangulo ya zwa Masheleni a ha Masipala, wa 2003 (Mulayo 56 wa 2003). Hoyu Masipala Wapo wa Enock Mgijima wo ḓi dzulela u ṱangana na thaidzo khulwane vhukuma dza u kundelwa siani ḽa zwa masheleni khathihi na nḓisedzo ya tshumelo lwa tshifhinga tshilapfu phanḓa ha musi hu tshi vha na maga aya a u dzhenelela.    

5.3.  Khabinethe yo sumbedza u takalela zwa u bviselwa khagala ha nyimele iyi i vhavhaho ye ya ṱaluswa nga vhathu vha kwameaho nahone yo fulufhedzisa vhadzulapo vha EMLM uri tsheo ya nga ha uri khaedu idzi dzine dza vha hone zwazwino kha masipala uyu dzi ḓo tandululwa hani, i ḓo ḓivhadzwa hu si kale.  

6.  Tsireledzo zwikoloni 

6.1.  Tsireledzo ya zwikolo fhano Afrika Tshipembe i kha ḓi vha tshipikwa tshihulwane tsha muvhuso nahone mivhigo ya zwiito zwa dzikhakhathi dzi bvelelaho vhukati ha vhagudi na vhadededzi ndi thaidzo khulwane vhukuma. 

6.2.  Naho muhasho wa Pfunzo dza Mutheo wo vhea maga o teaho a u fhelisa thaidzo iyi, ndi vhuḓifhinduleli ha vhabebi na vhaunḓi uri vha shumisane na vhurangaphanḓa ha zwikolo khathihi na vhagudi u itela u vhona uri zwikolo zwi khou dzula zwi fhethu ho tsireledzeaho hune vhana vhashu vha nga kona u aluwa na u vha vhadzulapo vha re na vhuḓifhinduleli. U tsireledzea ha vhadededzi vhashu zwikoloni ndi zwithu zwa ndeme. 

7.  Tsireledzo dzibadani 

7.1.  Khabinethe i kha ḓi pfa yo kwamea vhukuma nga tshivhalo tsha khombo dza badani dzine dza khou bvelela u mona na shango. Muvhuso u ḓo lavhelesa kha u sima miṅwe milayo miswa ya u thusa u fhelisa khombo dzi vhangwaho nga maṱhiraka, hune muṅwe wa hone wa ḓo vha u bviswa badani ha mihwalo ya thundu ya vho ḓo thoma u endedzwa nga tshiporo muhumbulo u wa uri zwi ḓo thusa u fhungudza mutsiko kha mihwalo ya thundu dzi endedzwaho nga bada.   

7.2.  Khabinethe i khou ita khuwelelo kha vhashumisi vha bada vhoṱhe ya uri vha tevhedze milayo ya badani nga u vha na ṱhogomelo, u humbulela vhaṅwe vhathu khathihi na u sa fhelela mbilu vhaṅwe vhashumisi vha bada. Vhareili vhane vha reila vho kambiwa kana vho shumisa zwidzidzivhadzi khathihi na vhareili vhane vha reila nga u sa londa hu tshi katelwa na avho vhane vha reila nga luvhilo lwo kalulaho, ndi vhone vhane vha vhanga vhunzhi ha khombo dza badani. 

B.  Milayotibe

1.  Mulayotibe wa Mukaṋo wa Shango wa Mishumo Minzhi (OSBP) wa ṅwaha wa 2022  

1.1.  Khabinethe yo ṱanganedza Mulayotibe wa OSBP hu tshi itelwa uri hu kone u vha na vhupfiwa ha nnyi na nnyi. Mulayotibe uyu u khou vha hone nga murahu ha u ṱanganedzwa ha mbekanyamaitele ya OSBP khathihi na maano a u thoma u shumiswa hayo nga ṅwadzi wa Ṱhafamuhwe 2022. Ndi une wa khou lavhelela u leludza zwa u enda ha vhathu na thundu vhukati ha mikaṋo ya shangoni ya Afrika Tshipembe na mashango a vhahura. 

1.2.  Hezwi zwi ḓo fhungudza tsitsikano ine ya vha hone zwazwino kha mikaṋo yashu i vhangwaho nga vhaendi na vhavhambadzi vha pfukekanyaho mikaṋo. Haya maga a dovha a vha a ndeme kha ndingedzo dza shango dza u ṱuṱuwedza Thendelano dza Vhupo ha Mbambadzo yo Vhofholowaho ya Dzhango ḽa Afrika (AfCTA). 

1.3.  Thendelano dzine dza khou lavhelelwa kha Mulayotibe dzi ḓo ita uri zwa u senguluswa ha thundu, zwiendedzi na vhathu zwi itwe nga nḓila yo leluwaho nahone ya tshihaḓu. Mulayotibe u dovha hafhu wa elana na zwishumiswa zwa milayo zwa ḽifhasi zwo teaho zwine zwa amba nga ha u tshimbidzwa ha mbambadzo khathihi na u enda ha vhathu na thundu. 

2.  Mulayotibe wa Ṱhalusavhuṋe na Vhuḓiṅwalisi wa Lushaka wa ṅwaha wa 2022 

2.1.  Khabinethe yo ṱanganedza u anḓadzwa ha Mulayotibe wa Ṱhalusavhuṋe na Vhuḓiṅwalisi ha Lushaka wa ṅwaha wa 2022 u itela vhuḓipfi ha tshitshavha. Hoyu mulayotibe ndi une wa ita uri Mbekanyamaitele ya Ndangulo ya Ṱhalusavhuṋe ya Tshiofisi i thome u shuma nahone u khou lavhelela u ṋetshedza sisteme nthihi ya ṱhalusavhuṋe ya lushaka ya didzhithaḽa, i katelaho nahone yo ṱanganelaho kha vhathu vhoṱhe vhane vha dzula kana vhe vha vhuya vha dzula kha ḽino shango.   

2.2.  Iyi mvetamveto ya Mulayotibe i ḓo ita uri hu kone u vha na u dzudzanywa khathihi na u vhulungwa ha redzhisiṱara ya vhadzulapo hu tshi itelwa vhathu vhane vha vha na tshidzulapo tsha fhano khathihi na avho vhane vha tou vha vhadzuli vha tshoṱhe kha ḽino. I ḓo dovha hafhu ya ita uri hu kone u bveledzwa dathabeizi ya ṱhalusavhuṋe hu tshi itelwa tshiṅwe tshigwada tsha vhabvannḓa vhane vha dzula kha ḽino lwa tshifhinganyana. I dovha hafhu ya ita uri hu vhe na Sisteme ya Vhuṋe ya Lushaka (NIS) i shumisaho magunwe ine ya ḓo ita uri hu vhe na tsenguluso nthihi ya muthu nga u tou ṋetshedza zwidodombedzwa zwine zwa tea u dzheniswa kha redzhisiṱara ya vhadzulapo khathihi na dathabeizi ya ṱhalusavhuṋe.   

2.3.  NIS i ḓo dovha hafhu ya kona u shumisana na dziṅwe sisteme dza vhuṋe dza sekhithara ya muvhuso na ya phuraivethe. 

2.4.  Vhuvhili hayo, Mulayotibe wa OSBP wa 2022 na Mulayotibe wa Ṱhalusavhuṋe na Vhuḓiṅwalisi wa Lushaka wa 2022 i ḓo anḓadzwa kha webusaithi ya Muhasho wa zwa Muno ine ya vha: www.dha.gov.za.  Miraḓo ya tshitshavha i khou ṱuṱuwedzwa uri vha rumele vhupfiwa havho nga u tou ṅwala kha aḓirese i tevhelaho: Mulangi Muhulu wa Muhasho wa zwa Muno, Private Bag X114, Pretoria, 0001. 
Nomboro ya luṱingo: 012 406 4353.

C.  Vhuṱambo vhune ha khou ḓa 

1.  Muṱangano wa Mbumbano ya Afrika (AU)

1.1.  Phresidennde Vho Cyril Ramaphosa vha ḓo dzhenela Dzulo Zwaḽo ḽa vhu36 ḽa Guvhangano ḽa Vharangaphanḓa vha Mashango na Mivhuso ḽa Mbumbano ya Afrika ḽine ḽa ḓo farwa u bva nga ḽa 18 u swika ḽa 19 Luhuhi ngei ḓoroboni ya Addis Ababa, kha ḽa Ethiopia.

1.2.  Guvhangano ḽa AU, ḽine ḽa ḓo farwa nga fhasi ha thero ine ya ri “U ṱavhanyedziswa ha u thoma U shumiswa ha AfCFTA ”, ḽi ḓo rangelwa phanḓa nga Dzulo Zwaḽo ḽa vhu42 ḽa Khorotshitumbe u bva nga ḽa 15 u swika ḽa 16 Luhuhi 2023. Avha Vharangaphanḓa vha Mashango na Mivhuso vha AU vha ḓo shumisa thero iyi kha u ombedzela vhuḓiimiseli havho kha zwa u thoma u shumiswa ha AfCFTA nga nḓila yo fhelelaho. 

2.  Madalo a Muvhuso nga Phresidennde wa shango ḽa Uganda

2.1.  Muṱhomphei Phresidennde Vho Yoweri Kaguta Museveni vha shango ḽa Uganda vha ḓo vha na madalo a Muvhuso kha shango ḽa Afrika Tshipembe nga Ḽavhuvhili, 28 Luhuhi 2023 nga murahu ha thambo u bva kha mushumisani navho, Phresidennde Vho Ramaphosa. Tshipikwa tsha aya Madalo a Muvhuso ndi u khwaṱhisa vhushaka vhukati ha mashango aya mavhili. Madalo aya a ḓo fhedza nga u vha na muṱangano wa Foramu ya zwa Mabindu hune ha ḓo lingedzwa u lavhelesa kha khonadzeo dza thendelano dza mbambadzo na vhubindudzi vhukati ha mashango aya mavhili.  

3.  Pfufho dza zwa Nyanḓadzamafhungo dza Mashango a Tshitshavha tsha Mveledziso a Tshipembe ha Afrika (SADC) dza ṅwaha wa 2023
 
3.1.  Khabinethe i khou tsivhudza zwiimiswa zwoṱhe zwa nyanḓadzamafhungo uri zwa u dzhenela muṱaṱisano uyu wa Pfufho dza Nyanḓadzamafhungo dza ṅwaha wa 2023, zwine zwa khou vala nga Ḽavhuvhili, ḽa 28 Luhuhi 2023, zwazwino zwo vula kha vhoramafhungo vhoṱhe u bva kha mashango a miraḓo ya SADC. 

3.2.  Hedzi Pfufho dza Nyanḓadzamafhungo dza SADC dzi dzhiela nṱha mishumo ya khwinesa ya zwa nyanḓadzamafhungo kha masia a fanaho na khanḓiso, zwifanyiso, theḽevisheni na radio kha zwa u phaḓaladzwa ha mafhungo kha vhupo ha SADC u itela u tikedza maitele a tshumisano khathihi na u ṱanganelana ha dzingu. 

D.  U fhululedza

1.  Khabinethe i khou ṱahisa maipfi ayo a u fhululedza na u tamela mashudu mavhuya kha: 

• Vho Nomcebo Zikode, Vho Zakes Bantwini na Vho Wouter Kellerman nge vha thuba pfufho ya u vha tshigwada tsha khwinesa kha khethekanyo ya muzwika wa ḽifhasi nga luimbo lwavho, Bayethe, kha vhuṱambo ha nga Ṅwaha ha Grammy Awards ha vhu65. 

E.  Ndiliso 

Khabinethe yo ṱahisa maipfi a ndiliso kha vha muṱa na dzikhonani dza: 

•  vhathu vhe vha lovha zwenezwino musi basi ye vha vha vho i ṋamela i tshi thulana na veni ya u endedza tshelede nga tsha phanḓa kha gondo ḽa N1 highway fhaḽa Limpopo. Khabinethe i khou tamela mashudu avho vho huvhalaho kha khombo yeneyo uri ngavhe vha tshi fhola nga u ṱavhanya.
• Vho John Moeti (56), mutambi bola ya milenzhe wa kale wa Bafana Bafana na Orlando Pirates, vhe vha vha tshipiḓa tsha ndeme tsha thimu ye ya ḓo wina muṱaṱisano wa Tshiphuga tsha Dzitshaka dza Afrika nga ṅwaha wa 1996. 
• Khabinethe yo ṱahisa maipfi ayo a ndiliso kha muvhuso na vhathu vha shango ḽa Türkiye na ḽa Syria vhe vha welwa nga ndozwo khulwane ya matshilo a vhathu khathihi na tshinyalelo khulwane kha themamveledziso ya zwa matshilisano na ikonomi nga murahu ha mudzinginyo wa shango muhulu nga ḽa 6 Luhuhi 2023 we wa vha na tshikalo tsha 7.8 kha Tshikalo tsha Richter. Mbilu dzashu dzi khou humbula miṱa ye ya xelelwa nga vhafunwa vhayo kana ine ya kha ḓi vha kati na u ṱoḓana na mashaka ayo. Khabinethe i khou fhululedza vha madzangano a thuso ya zwa vhuthu a Afrika Tshipembe e na one a ḓidzhenisa kha maga a thuso ya ḽifhasi. Khabinethe yo dovha hafhu ya fhululedza miraḓo ya tshigwada tsha zwa dzimmbwa tsha vha Tshumelo ya Mapholisa ya Afrika Tshipembe tshi ḓivhiwaho sa K-9 vhe u shuma havho nga vhuhali, ha thusa vhukuma kha u phulusa mukegulu wa miṅwaha ya 80 vhe vha tshila nga fhasi ha maḓinga lwa tshifhinga tsha maḓuvha a fhiraho a malo ngei kha ḽa Türkiye.

F.   U tholiwa

U tholiwa hoṱhe hu ḓo khunyeledzwa nga murahu ha u senguluswa ha ndalukano khathihi na u ṱanzwiwa madzina ho teaho.

1. Mufumakadzi Vho Azola Mayekiso sa Muofisiri Mutshimbidzi Muhulwane (CEO) wa Koporasi ya zwa Masheleni a zwa Dzinnḓu ya Lushaka. 
2. Vho Lucas Thabiso Thiti sa Muthusa Mulangi Muhulu (DDG): Mveledziso na Thikhedzo ya Tshiimiswa kha Muhasho wa zwa Vhulamukanyi na Mveledziso ya Ndayotewa. 
3. Mufumakadzi Vho Boitumelo Mosako sa CEO wa Bannga ya Mveledziso ya Tshipembe ha Afrika. 
4. Vho Kabelo Rikhotso sa Mulanguli Muhulwane wa Bodo ya Koporasi ya Vhubindudzi ha Muvhuso. 
5. Vho Matsemela Moloi sa Muṅwalisi wa Zhendedzi ḽa Vhutshinyi ha zwa Vhuendi ha Badani.
6. Muambeli Vho Sonwabile Mancotywa sa Mulangulizwawe na Mudzulatshidulo wa Bodo ya zwa Vhuendi ha Badani vhu Pfukekanyaho Mikaṋo.  

Mbudziso:
Vho Michael Currin – Muambeli wa Khabinethe o tou Farelaho 
Luṱingothendeleki: 082 462 7896