Muṱangano wa Khabinethe wo Khetheaho wo itwaho nga kha vidio wo farwa ṋamusi nga Ḽavhuraru, 15 Lambamai 2020, u amba nga ha pulane ya mvusuludzo ya ikonomi na matshilisano nga murahu ha Nyiledza u bva mahayani ya Lushaka ya COVID-19.

Hezwi zwi ḓa nga murahu ha nḓivhadzo ye ya itwa nga Muphuresidennde Vho Cyril Ramaphosa vhege mbili dzo fhiraho, uri Khabinethe i ḓo vha na nyambedzano nga vhuḓalo ya u wana pulane ya mvusuludzo ya ikonomi ya shango.

Mikumedzo miṱanu yo ṱanganedzwa u bva kha dzikiḽasita: Sekhithara dza zwa Ikonomi, Vhubindudzi, Mveledziso ya Themamveledziso na Mishumo; (2) Vhuvhusi, Mveledziso ya kha Zwiimiswa na Vhukoni ha Muvhuso; (3) Tsireledzo ya zwa Matshilisano, Mveledziso ya Vhathu na Tshitshavha; (4) Tshumisano na Dzitshaka, Vhutsireledzi na Mbambadzo; na (5) Vhulamukanyi, Thivhelo ya Vhugevhenga na Vhutsireledzi.

Mikumedzo yo vha khuvhanganyo ya mushumo wo itwaho nga kiḽasiṱa dza Khabinethe dzoṱhe, dzo sedza kha mvusuludzo ya ikonomi ya masiandaitwa a dwadze ḽa COVID-19 na u tsitselwa kha vhuimo ha fhasi ha Afrika Tshipembe zwenezwino nga madzhendedzi a u ela ikonomi a Moody na Fitch u ya nga u ralo.

Khabinethe yo tshea uri dziṅwe nyambedzano na vhukwamani zwi kha ḓi ṱoḓea phanḓa ha musi pulane yo ṱanganelaho ya u fhedzisela i tshi tendelwa uri i kovhelwe lushaka.

Kiḽasiṱa dzoṱhe dza Khabinethe dzo humbelwa uri dzi shumisane u itela u bveledza ḽiṅwalo ḽo ṱanganelaho nga ha zwithu zwa ndemesa zwihulwane zwa pulane ya mvusuludzo ya ikonomi ya shango, ḽine ḽa tea u khunyeledzwa phanḓa ha Muṱangano wa Khabinethe  u tevhelaho wo dzudzanyelwaho u vha hone nga Musumbuluwo, 20 Lambamai 2020.

Khabinethe yo dovha ya ṋea ndaela Minisṱa wa Mabindu a Muvhuso Vho Pravin Gordhan uri vha dzudzanye muvhigo wa mafhungo maswa maswa nga ha South African Airways, u itela nyambedzano kha muṱangano u khou ḓaho. Nga murahu, Khabinethe i ḓo khunyeledza pulane ya mvusuludzo ya ikonomi ya shango.

Khabinethe i livhuwa vhathu vhoṱhe u mona na shango kha u dzula havho mahayani nga tshifhinga tsha nyiledza u bva mahayani.

Mbudziso: Vho Phumla Williams – Muambeli wa Khabinethe o tou Farelaho
Luṱingothendeleki: 083 501 0139
Datumu: Ḽavhuraru, 15 Lambamai 2020