Nhlengeletano ya Khabinete yo Hlawuleka ya le moyeni yi khomiwile namuntlha, 15 Dzivamisoko 2020, ku kanela pulani ya nhlakarhelo wa ikhonomi na vanhu endzhaku ka ku Pfaleriwa ka Rixaka ka COVID-19.

Leswi swi landzela xitiviso lexi nyikiweke hi Phuresidente Cyril Ramaphosa mavhiki mambirhi lama nga hundza, leswaku Khabinete yi ta va na nkanelo wa vutalo ku ta na pulani ya nhlakarhelo wa ikhonomi ya tiko.

Ntlhanu wa miandlalo yi kumekile kusuka eka mitlawa leyi: (1) Nhluvukiso wa Tisekitara ta swa Ikhonomi, Vuvekisi, Mitirho na Swimakiwakulu; (2) Nhluvukiso wa Mafumelo, Vuswikoti bya Mfumo na Mihlangano; (3) Nsirhelelo wa Vanhu, Nhluvukiso wa Miganga na Vanhu; (4) Ntirhisano wa Matiko ya Misava, Mabindzu na Nsirhelelo; na (5) Vululami, Nsivelo wa Vugevenga na Nsirhelelo.

Miandlalo leyi a yi ri mahetelelo wa ntirho lowu endliweke hi mitlawa ya Khabinete, ku ri karhi ku kongomisiwa eka nhlakarhelo wa ikhonomi wa tiko tanihi xitandzhaku xa ntungukulu wa COVID-19 na ku yisiwa eka xiyimo xa le hansi loku ka ha ku vaka kona ka Afrika-Dzonga hi tiejensi to pima ta Moody’s na Fitch hi ku hambana ka tona. 

Khabinete yi boheke leswaku mikanelo yo yisa emahlweni na ku kombela switsundzuxo ya ha laveka pulani leyi katsanisiweke yo hetelela yi nga si pasisiwa leswaku yi avelaniwa na rixaka.  

Mitlawa ya Khabinete hinkwayo yi komberiwile ku tirhisana ku humesa tsalwa leri katsanisiweke rin’we hi swirhanganakulu swa pulani ya nhlakarhelo wa ikhonomi ya tiko, ku hetisiwa ku nga si va na Nhlengeletano ya Khabinete leyi landzelaka leyi kunguhatiweke ku va kona hi Musumbunuku, 20 Dzivamisoko 2020.

Khabinete yi tlhele yi lerisa Holobye wa Mabindzu ya Mfumo Pravin Gordhan ku lulamisa xiviko lexi pfuxetiweke hi mayelana na Vuhahisi bya Afrika-Dzonga, leswaku ku kaneriwa hi xona eka nhlengeletano leyi taka. Endzhaku ka swona, Khabinete yi ta hetisisa pulani ya nhlakarhelo wa ikhonomi ya tiko.

Khabinete yi khensa vanhu hinkwavo etikweni hinkwaro eka ku tshama ekaya hi nkarhi wa ku pfuleriwa. 

Swivutiso: Manana Phumla Williams – Muvulavuleri wa Khabinete wo Khomela
Selifoni: 083 501 0139