Xitatimente hi Nhlengeletano ya Khabinete ya le Moyeni leyi khomiweke hi Ravumune, 4 Khotavuxika 2020
 

1. Xiboho xa Khoto ya le Henhla ya Gauteng-N’walungu xa Ravumbirhi, 2 Khotavuxika 2020

1.1. Nhlengeletano ya Khabinete ya le moyeni yo hlawuleka a yi khomiwile namuntlha, Ravumune, 4 Khotavuxika 2020, ku kanela leswi humelelaka hi matshalatshala ya Afrika-Dzonga ku ponisa vutomi na ku sirhelela vutihanyisi exikarhi ka ntungukulu wa COVID-19. Tanihi xiphemu xa nkanelo lowu, Khabinete yi kambisisile xiboho xa Khoto ya le Henhla ya Gauteng-N’walungu lexi rhuliweke hi Muavanyisi Norman Davis hi Ravumbirhi, 2 Khotavuxika 2020, lexi tiviseke swinawana swa ku pfaleriwa ka COVID-19 eka tilevhele ta 3 na tanihileswi hambanaka na vumbiwa na ku nga amukeleki.

1.1.1. Endzhaku ka ku kuma switsundzuxo swa xinawu na ku yingisela swibumabumelo swo tala leswi nyikiweke hi swirho swa xiyenge xa swa nawu hi ku angula eka xiboho lexi, Khabinete yi na mavonelo ya leswaku khoto yin’wana yi nga ha fikelela mahetelelo yo hambana eka nandzu lowu.

1.2. Hikokwalaho Khabinete yi tekile xiboho xa ku aphila xiboho xa Khoto ya le Henhla ya Gauteng-N’walungu.

1.3. Mfumo wu ta kombela leswaku aphili ya wona yi yingiseriwa hi xihatla ku endlela leswaku wu kuma ntiyisiso hi swinawana leswi.  Holobye wa Mfumontirhisano na Timhaka ta Ndhavuko, Dkd Nkosazana Dlamini Zuma, u ta tikatsa eka aphili leyi na Phuresidente Cyril Ramaphosa na Holobye wa Rihanyo, Dkd Zweli Mkhize.

1.4. Khabinete yi navela ku tshembisa rixaka leswaku miphalalo hinkwayo leyi tivisiweke kusukela loko ku tivisiwile Xiyimo xa Rixaka xa Mhangu hi Nyenyanyana 2020 hi Phuresidente Ramaphosa yi kongomisiwile ngopfungopfu eka ku ponisa vutomi.

1.5. Eka ku simeka miphalalo leyi, mfumo wu kanerisanile hi ndlela yo fanana na tisekitara hinkwato ta rixaka, tanihileswi nyimpi ehenhla ka COVID-19 yi nga matshalatshala ya rixaka lama ma lavaka vun’we exikarhi ka mfumo na maAfrika-Dzonga hinkwavo.

1.6. Loko mfumo wa ha aphila xiboho lexa khoto, swinawana swa nkarhi wa sweswi swi tshama swa ha ri eku tirheni, naswona hi kombela na ku hlohlotela vanhu va ka hina hinkwavo ku landzelela milawu ya swa rihanyo hinkwayo leyi yi simekiweke, ku katsa na ku hlamba swandla, ku siya mpfhukanyana exikarhi ka vanhu, ku ambala swipfalaxikandza evanhwini xikan’we na ku hleriwa na ku kongomisiwa ku ya kamberiwa, laha swi faneleke.

2. Ku Engeteriwa ka Xiyimo xa Rixaka xa Mhangu

2.1. Khabinete yi pasisile ku engeteriwa ka Xiyimo xa Rixaka xa Mhangu hi n’hweti kusuka 15 Khotavuxika kufika 15 Mawuwani 2020. Nawu wu pfumelela Xiyimo xa Rixaka xa Mhangu ku heta 90 wa masiku.

3. Ntluletavuvabyi wa COVID-19 wa Kapa-Vupeladyambu

3.1. Khabinete yi tshama ya ha vilerisiwa hi mayelana na ntikelo na ntlakuko wa mitluletavuvabyi wa COVID-19 eKapa-Vupeladyambu.  Hi mayelana na swona, Phuresidente Ramaphosa u ta endzela xifundzakulu lexi hi Ravuntlhanu, 5 Khotavuxika 2020, ku kanerisana hi xiyimo lexi na Phurimiya Alan Winde na huvonkulu ya xifundzakulu, na ku hlahluva vulungheki bya xifundzakulu lexi eka malawulelo lama yaka emahlweni ya ntungukulu lowu.   

3.2. Phuresidente Ramaphosa u ta heleketiwa hi Holobye Mkhize; Holobye wa Vusirheleri na Khale ka Masocha Nosiviwe Mapisa-Nqakula; Holobye wa Dyondzo ya Masungulo Angie Motshekga; Holobye wa Maphorisa Bheki Cele; Holobye wa Vutshamiso bya Vanhu, Mati na Mbhasiso Lindiwe Sisulu na Holobye wa Mitirho ya Mfumo na Miako Patricia de Lille.

4. Vhiki ra Nsirhelelo wa Vana

4.1. Khabinete yi tsundzuxa vaaki leswaku vhiki leri i Vhiki ra Nsirhelelo wa Vana, leri ri sunguleke hi Sonto, 31 Mudyaxihi naswona ri hela hi Sonto, 7 Khotavuxika 2020. Vhiki ra Nsirhelelo wa Vana ri lava ku boxa timhaka ta nsirhelelo wa vana elembeni hinkwaro. Nkongomelo wa nan’waka wu ri: “A Hi Sirheleleni Vana, Hi Nkarhi wa COVID-19 na Ku Hundza”.  

5. Nkayivelo wa mati

5.1. Khabinete yi lemukile ku ehla loku ka ha ku vaka kona eka tilevhele ta madamu, ngopfungopfu eKapa-Vupeladyambu, tanihi tiko leri nga na vukalo bya mati, tilevhele ta madamu ti na nkhumbo wo homboloka eka swidingo swa hina swa mati. Hikokwalaho, Khabinete yi endla xikombelo eka hina hinkwerhu ku tirhisa mati hi vukheta.

Swivutiso: Mnn Phumla Williams – Muvulavuleri wa Khabinete
Selifoni: 083 501 0139