1. Leano la Phaloso go Kgwebo ya Tirelophofo tsa Aforika Borwa (SAA)

1.1. Kabinete e amogetse pegelo ya tswelopele ka ga tsamaiso phaloso go kgwebo ya SAA go tswa go IMC ka ga SAA, e e eteletsweng pele ke Tona ya Dikgwebo tsa Setšhaba, Rre Pravin Gordan.

1.2. Kabinete e dumela gore tlhopo e e namatsang go tswa go baadimisi go wetsa tsamaiso ya phaloso go kgwebo e santse e le itlhophelo e e maleba ebile e le bonako, go khamphani ya puso go fetola merero ya yona eo e tsenyeletsang kgwebo ya yona, sekoloto sa yona le maikarabelo a mangwe. Kabinete e dumela gore tirelophofo e e fetotsweng e tla latela lenaneo le le fetogileng jaaka tlhokagalo ya ditšhono go tsweledisa bakgweetsi ba difofane ba bathobantsho morago ga dingwaga di le 26 mo temokerasing ya rona.

1.3. E tshegetsa tshitsinyo ya tirelophofo e ntšhwa le maiteko a a akaretsang go batlana le matlole go tswa go metswedi e e farologaneng, go tsenyeletsa le babeeletsi ba ba ka nnang gona. Eno ke yona tsela e le nngwe fela eo go ka yona tirelophofo e ntšhwa, e e tswelelang, e e gaisanang e e ka neelanang ka ditirelo tse di gokagantsweng tsa selegae, kgaolo le tsa boditšhabatšhaba.

2.  Ikonomi

2.1. Kabinete e amogela tekanyetsokabo e e baakantsweng ya tlaleletso ya 2020/2021 e e tlhagisitsweng ke Tona ya Matlotlo, Rre Tito Mboweni ka Laboraro, 24 Seetebosigo 2020. Seno se bakilwe ke leroborobo la Bolwetse jwa Mogare wa Corona (COVID-19) le dipoelo tsa go wela tlase ga ikonomi. Tekanyetsokabo ya Tlaleletso e tlhagisa tselammapa go fokotsa sekoloto ka go tokafatsa mekgwa ya go reka le go tlhama motheo wa tsosoloso ya ikonomi.

2.2. Kabinete e na le tsholofelo ya gore maitlamo a a itsisitsweng ke Tona Mboweni a tla tsepamisa ikonomi ya rona go nna mo tseleng e e popota le go tswelela, bogolosegolo fa mongwe le mongwe a ikamaganya le puso mo go a tsenyeng titrisong.

3. Tsa sešweng ka ga COVID-19

3.1. Kabinete e amogetse pegelo ya tswelopele go tswa go Lekgotla la Naga le le Jarileng Maikarabelo a Mogare wa Corona. Jaaka karolo ya tsibogelo go Maemo 3 a kgonagalo e kgolo ya kotsi ya letsholo la taolo ya motsamao wa batho la bosetšhaba, go tlhagisitswe diphetolo go melao go ya ka melawana ya Molao wa Taolo ya Matlhotlhapelo, 2002 (Molao 57 wa 2002). 

3.2. Le fa Cabinete e itumelela tiro e e tswileng diatla e e tsweletseng go dirwa go tshola selekanyo magareng ga go tsweledisa matshelo le go a boloka, e atlenegisitse go tsenngwa mo kaseteng ga diphetolo tse di amanang le go bulwa ga diresetšhurente, dihotele le dikhasino.

3.3. Kabinete e boeletsa piletso go botlhe go dira mmogo go emisa go anama ga ditshwaetsego mo baaging ba rona ka go sala morago ditsamaiso tsa boitekanelo tse di jaaka go tlhapa diatla, sekgala go kamano ya loago le go rwala sesirasefatlhego fa ba le mo mafelong a botlhe.

4. Tirisodikgoka e e Ikaegileng ka Bong (GBV) 

4.1. Kabinete e tshwentswe ke go tlhagelela ga palo e e kwa godimo ya dikgetse tsa GBV go ralalal naga. Go latela dipolao tsa basadi le bana tse di sa tswang go tlhagelela, e ipileditse go batho botlhe mo Aforika Borwa  go tshwaragana le go dira mmogo go fedisa  dipolao tseno. Kabinete e akgola ditheo tsa molao mabapi le tiro ya bona e e bonako mo go tshwareng bangwe ba babelaelwa mme e kopile ditheo go tswelela go dira ka bojotlhe go tshwara botlhe ba ba nang le seabe mo dipolaong tseno tse di setlhogo. 

4.2. Kabinete e tsepame mo maitlamong a yona a go tsenya tirisong ka botlalo metseletsele ya ditsenogare tse di tlhagisitsweng ke Leanotogamaano la Bosetšhaba ka ga GBV le Dipolao tsa Basadi. Komiti ya Ditona e e eteletsweng pele ke Tona Mo Lefapheng la Moporesidente la Basadi, Bašwa le Digole, Moh Maite Nkoana-Mashabane, le tswelela go kgwetsa ditsenogare tsa mekgwamentsi tsa puso. Le fa go le jalo, tsenogare e e nonofileng go gaisa e batla Maaforikaborwa otlhe go tshameka karolo ya bona mo go fediseng setlwaedi sa tirisodikgoka ya maloko a a bokoa a setšhaba. 

5. Simphosiamo ya Tlhabololo go Tswelopele ya Mafaratlhatlha  mo Aforka Borwa (SIDSSA)

5.1. Kabinete e amogela pulo ya SIDSSA e e neng e tshwerwe ka go dirisa mafaratlhatlha a thekenoloji ya tlhaeletsano mo bekeng eno, ka fa tlase ga setlhogo: ”Go beeletsa go mafaratlhatlha go arolelana khumo: jaanong, go latela le go feta.” SIDSSA ke polatefomo e e tlisang mmogo batshameka karolo mo sebakeng sa peeletso go mafaratlhatlha, bao ba nang le phisego ka ga maikaelelomagolo a go itlhaganedisa leano pusetso la ikonomi e e eteletsweng pele ke mafatlhatlha. Ditsenogare tsa mafaratlhatlha e nna e ntse e le setshegetsi go leano la pusetso la ikonomi ya Aforika Borwa.

5.2. Ka go dirisa tsamaiso eno, palogotlhe ya diporojeke di le 276 e setse e tlhatlhobilwe. Tseno di dira diporojeke tse di tlhotlheletsang peeletso go mafaratlhatlha ka seabe se golang mo go tlhameng ditšhono tsa ditiro le go tsosolosa ikonomi.

5.3. Di le somearobedi le borobedi tsa diporojeke tseno di siametse peeletso mme di tsenyeletsa madirelo a a itshupileng go nna le seabe se se kwa godimo sa kgolo mo go tsa eneji; metsi; dipalangwa; mafaratlhatlha a thekenoloji ya tshedimosetso le tlhaeletsano; temothuo le thekenoloji ya temothuo.

5.4. Diporojeke tseno di tla bona matlole go tswa go nngwe ya metswedi e meraro- kgwebo, matlole a kopanetsweng le neelo ya matlole. Jaaka karolo ya letlole la thuso go ikonomi, mowa wa naga wa tirisano ya puso-poraefete o tswelela go tsepa mo go mekamekaneng le dipharologano go mafelonno, fetola ikonomi le go tlhama ditiro tseo di tlhokegang go gaisa.

Go thapiwa

Go thapiwa gotlhe go tla diragadiwa fa makwalothuto otlhe a netefaditswe mme go amogetswe tetlelelelo e e matshwanedi.

1. Maloko a Boto ya Boto e e Ikemetseng ya Taolo ya Baruni:

1.1. Moh Martie Janse van Rensburg (Thapilwe gape);
1.2. Rre Iqbal Motala (Thapilwe gape);
1.3. Rre Madoda Petros (Thapilwe gape);
1.4. Moh Nombulelo Gumata;
1.5. Moh Thembeka Semane;
1.6. Rre Roy Andersen;
1.7. Rre Preston Speckmann;
1.8. Moh Jesmane Boggenpoels;
1.9. Rre Shauket Fakie; and
1.10. Moporof Nirupa Padia.

2. Maloko a Boto ya Mokgatlho wa Inšorense ya Matshosetsi a a Kgethegileng ya Aforika Borwa:

2.1. Rre Moss Ngoasheng (Modulastilo);
2.2. Moh Priscilla Mokonyane (Motlatsa Modulasetilo);
2.3. Moh Moipone Ramoipone;
2.4. Rre Desmond Marumo;
2.5. Moh Japhtaline Mantuka Maisela;
2.6. Rre Christiaan Johannes van Dyk;
2.7. Rre Enos Ngutshane;
2.8. Rre Reginald Haman;
2.9. Rre Sathie Gounden;
2.10. Moh Margret Mosibudi Phiri;
2.11. Moh Refilwe Moletsane; le
2.12. Moh Nolwandile Mgoqi-Mbalo.

Dipotso:
Moh Phumla Williams – Sebueledi sa Kabinete 
Selulafouno: 083 501 0139