1. Sincumo seNkantolo lePhakeme yaseNyakatfo neGauteng sangaLesibili, mhla ti-2 Inhlaba 2020

1.1. Umhlangano weKhabhinethi lokhetsekile lobanjwa kumavidiyo bewubanjiwe lamuhla, ngaLesine, mhla ti-4 Inhlaba 2020, kukhulunyiswana ngalokuchubekako mayelana nemitamo yeNingizimu Afrika yekusindzisa timphilo nekuvikela tindlela tekutiphilisa ngalesikhatsi salolubhubhane lwe-COVID-19. Njengencenye yaletingcoco, Ikhabhinethi ikhulume ngesincumo seNkantolo lePhakeme yaseNyakatfo neGauteng lesetfulwe nguJaji Norman Davis ngaLesibili, mhla ti-2 Inhlaba 2020, lesimemetele kutsi lemitsetfomgomo yekumiswa-nsi kwemisebenti netiminyakato nekuhlala ekhaya kwavelonkhe ye-COVID-19 kusigaba sesitsatfu nesesine ayihambisani nemtsetfosisekelo futsi ilite.

1.1.1. Ngemuva kwekutfola teluleko tetemtsetfo nekulalela tiphakamiso letinyenti temalunga emkhakha wetemtsetfo mayelana nalesincumo, Ikhabhinethi inembono wekutsi lenye inkantolo ingaba nesiphetfo lesehlukile mayelana naloludzaba.

1.2. Ikhabhinethi ngako-ke seyincume kusendlulisela embili lesincumo seNkantolo lePhakeme yaseNyakatfo neGauteng.

1.3. Hulumende utawucela kutsi loludzaba lolwendlulisiwe lutekwe ngalokuphutfumako kute kutsi atfole kuciniseka mayelana nalemitsetfomgomo. Indvuna yeTekubusa Ngekubambisana Netendzabuko, Dkt. Nkosazana Dlamini Zuma, kulokwendluliswa kwaloludzaba utawube akanye naMengameli Cyril Ramaphosa neNdvuna yeTemphilo, Dkt. Zweli Mkhize.

1.4. Ikhabhinethi itsandza kucinisekisa sive kutsi tonkhe letingenelelo letingenisiwe kusukela Mengameli Ramaphosa amemetela Simo seNhlekelele saVelonkhe ngeNdlovulenkhulu 2020 beticondziswe-ngco ekusindziseni timphilo.

1.5. Ekufezekiseni letingenelelo, ngaso sonkhe sikhatsi hulumende abeloku abonisana nayo yonkhe imikhakha yemmango, njengobe lokulwa ne-COVID-19 kungumtamo wavelonkhe lodzinga kutsi kusetjentwe ngekubumbana emkhatsini wahulumende nabo bonkhe bantfu baseNingizimu Afrika.

1.6. Ngalesikhatsi hulumende andlulisela embili lesincumo senkantolo, lemitsetfomgomo lekhona kwamanje iyachubeka nekusebenta, futsi sicela siphindze futsi sincenga bonkhe bantfu bakitsi kutsi bagcine tonkhe tindlelanchubo tetemphilo letibekiwe, kufaka ekhatsi kugezwa kwetandla njalo-nje, kukhweshelana, kugcoka tifonyo etindzaweni temmango kanye nekucilongwa nekwendluliselwa ekuhlolweni, lapho kunesidzingo khona.

2. Kwelulwa kweSikhatsi seSimo seNhlekelele yaVelonkhe

2.1. Ikhabhinethi ikuvumile kwelulwa kwesikhatsi seSimo seNhlekele yaVelonkhe ngenyanga yinye kusukela mhla ti-15 Inhlaba kuya kumhla ti-15 Kholwane 2020. Umtsetfo uyakuvumela kutsi Simo seNhlekelele yaVelonkhe singatsatsa emalanga lange-90.

3. Kwesuleleka nge-COVID-19 kwaseNshonalanga Kapa

3.1. Ikhabhinethi iyachubeka nekukhatsateka mayelana nekushuba nekukhula ngemandla kwekwesuleleka nge-COVID-19 eNshonalanga Kapa. Mayelana naloku, Mengameli Ramaphosa utawuvakashela lesifundza ngaLesihlanu, mhla ti-5 Inhlaba 2020, ayokhulumisana naNdvunankhulu Alan Winde nesigungu lesiphetse salesifundza  mayelana nalesimo, kanye nekubuka kulungela kwalesifundza kulawulwa lokuchubekako kwalolubhubhane.   

3.2. Mengameli Ramaphosa utawube aphekeletelwa yiNdvuna Mkhize; Indvuna yeMbutfo weTekuvikela neTemphi Nosiviwe Mapisa-Nqakula; Indvuna yeTemfundvo Lesisekelo Angie Motshekga; Indvuna yeTemaphoyisa Bheki Cele; Indvuna yetekuhlaliswa Kwebantfu, Temanti Nekuhlanteka Lindiwe Sisulu kanye neNdvuna neTemisebenti Yesive Nesakhiwonchanti Patricia de Lille.

4. Liviki Lekuvikelwa Kwebantfwana

4.1. Ikhabhinethi ikhumbuta sive kutsi leli Liviki Lekuvikelwa Kwebantfwana, licale ngeLisontfo, mhla tinge-31 Inkhwekhweti futsi litawuphela ngeLisontfo, mhla ti-7 Inhlaba 2020. Liviki Lekuvikelwa Kwebantfwana lihlose kuphakamisa tindzaba tekuvikelwa kwebantfwana umnyaka wonkhe. Ingcikitsi yalomnyaka itsi: “Sonkhe Asivikele Bantfwana, Ngesikhatsi se-COVID-19 neKwendlula lapho”. 

5. Kweswelakala kwemanti

5.1. Ikhabhinethi ikucaphele kwehla kwemazinga emanti emadamini lokusandza kwenteka, ikakhulu eNshonalanga Kapa. Njengelive leleswela emanti, kwehla kwemazinga emadamu kunelifutse lelibi kutidzingo tetfu temanti.
Ikhabhinethi-ke iyasicela sonkhe kutsi sisebentise kahle emanti ngekuwonga.

Imibuto ingacondziswa ku:
Mk. Phumla Williams – loKhulumela Ikhabhinethi
Makhalekhikhini: 083 501 0139