A. Ditaba tše di Amago Badudi

1. Mohlagase

1.1. Tona ya Dikgwebo tša Mmušo Pravin Gordhana o begetše kabinete ka bokgoni bja Eskom bja go fokotša go kgaotšwa ga mohlagase ga nako le nako gape e filwe pego ya seo se šetšwego se dirilwe go tšwa Komiting ya Semmušo ya Komiti ya Mathata a Mohlagase ya Setšhaba.

1.2. Go tla dirwa ditsebišo tše dingwe go latela go phethwa ga dipoledišano tša go tsenelela tša dipego tše.

1.3. Kabinete e tšweleditše manyami ka tšhitišo le mathata ao a hlolwago ke go kgaolwa ga mohlagase go dikgwebo le magae, kudu di direga ka nako yeo mmušo o swaraganego le ditsenogare tšeo di tsebišitšwego ke Mopresidente Cyril Ramaphosa ka Mosegamanye 2022.

2. Peeletšo

2.1. Kabinete e amogela go thakgolwa ga Lefelo le lefsa la Tšweletšo la Sandvik Khomanani ka Kempton Park, leo e bego e le karolo ya peeletšo ya R350 milione yeo e tshepišitšwego mo Khonferenseng ya bone ya Dipeeletšo ya Afrika Borwa (SAIC) yeo e bego e swerwe Senthareng ya Dikopano ya Sandton ka Johannesburg ka la 24 Hlakola 2022.

2.2. Mothopo wo mofsa wa dikwere metara tše 62 000 o kopanya ditshepetšo tšeo di thomilwego pele mo mafelong a go fapana a mahlano gomme di akaretša bašomi bao e ka bago ba 550. Ke ye nngwe ya methopo ye megolo go feta ka moka ya Sandvik gape ya maemo a godimo lefaseng ka moka, gomme e na le bokgoni bja go tšweletša metšhene ya go laiša ya ka fase ga mabu ya go ba le ditšweletšwa tša Afrika Borwa tša 60%.

2.3. Kabinete e amogela gape ketelo ya tekolo ya Mopresidente Ramaphosa ka KwaZulu-Natal nakong ya thakgolo ya mothopo wa tšweletšo wa Hesto Harnesses ka Stanger, KwaDukuza ka la 13 Lewedi 2022. Mothopo wo ke wo mongwe wa diprotšeke tša dipeeletšo tša tšhelete tše hlano tšeo di dirago karolo ya boikgafo bja R1.4 bilione bja Metair Investments Limited go thekga katološo le go dira Ford Ranger ye mpsha ya gae.

2.4. Mopresidente o tsenetše gape go bulwa ga mpshafatšo le katološo ya protšeke ya Sappi Saiccor Mill ye e bitšago R7,7 bilione ka Umkomaas, yeo maikemišetšo a yona e lego go godiša bokgoni le katlego ya lefase ya khamphani mola ka go le lengwe e hlola dibaka tša mošomo tša nako ye kopana le nako ye telele.

2.5. Dipeeletšo tše di dira karolo ya maikano ao a dirilwego ke boraintasteri mo SAIC. Peeletšo ye nngwe le ye nngwe ye mpsha ka nageng ya rena e thuša go kagolefsa le kaonafatšo ya ekonomi ya rena, gomme e tšwela pele go akaretša Afrika Borwa bjalo ka nepo ya peeletšo ya kgetho.

3. Tlhabollo ya infrastraktšha

3.1. Kabinete e amogela go bulwa ga karolo ye mpsha ya Tsela ya Manyokenyoke ya Musina ka Limpopo yeo e tla dirago gore go be bonolo go batho go sepela ka Musina, gomme ya dumelela gape mešongwana ya kgwebo le ekonomi gare ga Afrika Borwa le dinaga tša Ditšhaba tša Tlhabollo tša Borwa bja Afrika. Protšeke ya R640 milione e hlotše mešomo ye 275 ya go ya go ile ya batho ba gae gomme ya aba dibaka go ditšhaba tša gae le dikgwebo tše dinnyane le tše dikgolo gammogo le dikgwebopotlana (di-SMME).

3.2. Go agwa ga Tsela ya Manyokenyoke ya Musina ke karolo ya lenaneo la infrastraktšha ya mmušo, ka ERRP, yeo e nyakago go hlola kgolo ya kakaretšo le dibaka tša mešomo go phatlalala le makala le ditšhaba.

4. Masetlapelo a Jagersfontein

4.1. Kabinete e rometše melaetša ya mahloko go malapa a bao ba lahlegetšwego ke maphelo a bona ka morago ga tirigalo ya masetlapelo ya go palega le go tšhologa ga leraga mo moepong wa selegae wo o tlogetšwego o sa šome ka Jagersfontein ka Freistata mo maseng a Lamorena, 11 Lewedi 2022. Masetlapelo a tlogetše gape infrastraktšha ya selegae, dithoto tša batho tša go swana le dikoloi le magae a mmalwa a senyegile kudu.

4.2. Nakong ya ketelo ya gagwe mo lefelong la masetlapelo ka Mošupologo, 12 Lewedi 2022, Mopresidente Ramaphosa o lebogile maitapišo a go phološa le go hwetša batho le dithoto ao a dirilwego mo lefelong la masetlapelo. O ikanne gape gore mmušo o tla fa thekgo yeo e hlokegago go badudi bao ba amegilego ba Jagersfontein. Kabinete e hlohleletšwa ke gore beng ba moepo ba re ba ikemišeditše go aba thušo ye e hlokegago le thekgo go mmušo ge e ka kgopelwa ke Khansele ya Diminirale ya Afrika Borwa.

4.3. Intasteri ya meepo e dula e le mothekgi yo bohlokwa wa ekonomi ka go thwala thwii goba go se thwale thwii, megolo ya kišontle, le peeletšo ya thwii ya dinaga tša ka ntle, gomme e kgatha tema ye bohlokwa mo go kaonafatšeng maphelo a ditšhaba tša meepong.

4.4. Mmušo le mekgatlo ye mengwe yeo e sego ya mmušo ba tsene ka bogare ka bjako ka go fa batho bao ba amegilego madulo a nakwana a tšhoganetšo, thobamatswalo ya kgatelelo ya monagano le letšhogo le dilo tšeo di hlokegago go swana le mapai, materase le diphuthelwana tša dijo. Kabo ya meetse le mohlagase mo lefelong e bušeditšwe sekeng.

4.5. Go letetšwe gore dientšenere di dire tekolo ya dibopego tša dintlo, ge lefelo la masetlapelo le hlwekišitšwe. Kabinete e leboga ditirelo tša tšhoganetšo, mekgatlo ya setšhaba ya segae le maloko a setšhaba ka tema yeo ba e kgathilego ye kgolo le thušo yeo ba e filego batšwasehlabelo.

5. Ekonomi

5.1. Kabinete e tšweleditše maemo a ekonomi ka nageng ka morago ga ge dipalolopalo tša kgauswanyane tša Kgoro ya Dipalopalo ya Afrika Borwa (Stats SA) di bontšha gore palomoka ya tšweletšo ya gae (GDP) ya kotara ya bobedi ya 2022 e fokotšegile ka 0,7%. Dilo tšeo di hueditšego phokotšego ye di akareditše kgaotšo ya mohlagase, ntwa ya Russia le Ukraine, le maemo a go phela a go bitša tšhelete ye ntši le inflešene.

5.2. Ditsenogare tšeo di dirilwego ke Leano la Kaonafatšo le Kagolefsa ya Ekonomi (ERRP) di fokoditše kudu naga go dikhuetšo tša boditšhabatšhaba, gape tša šireletša mešomo le letseno. Ditsenogare tše maatla tša ekonomi tša mmušo di thoma go tšweletša dipoelo tše dibotse, bjale ka ge go hlatsetšwe ka go dipoelo tša Dinyakišišo tša Bašomi tša Kotara ye nngwe le ye nngwe tša Stats SA, tšeo di bontšhitšego gore go bile le mešomo ye 648 000 mo kotareng ya mathomo le ya bobedi tša 2022.

B. Diphetho tša Kabinete

1. Tlhako ya Tlhahlobo le Tekolo (M&E) ya Pholisi ya Bafsa ya Setšhaba (NYP)

1.1. Kabinete e dumeletše tlhako ya M&E yeo e tla kgontšhago tlhahlobo le kelo ya khuetšo ya dintlha tša bohlokwa tša NYP ya 2020-2030. Tlhako e fa ditaetši tša legato la godimo tše hlano tšeo di sepelelanago le dintlha tša bohlokwa tša NYP.

1.2. Ditaetši di dirilwe le bakgathatema ba maleba bao ba nago le kgahlego mo tlhabollong le matlafatšong ya bafsa ka mo nageng. Tshedimošo e tla kgoboketšwa ka go aroganywa ka dikarolo go ya ka mengwaga, bong, bogolofadi, sehlopha sa merafe le tikologo ya thutafase ya ditsenogare tše.

1.3. Dikgato tše tša go dira ditlhahlobo di tla dirwa ka mafelong ka moka a mmušo, ka ditheong ka moka le lekaleng la praebete. Dipego tša tšona di tla dirwa kotareng ye nngwe le ye nngwe gomme tša phatlalatšwa gabedi ka ngwaga.

2. Tlhako ya Pholisi ya Peakanyo ye e Kopantšwego

2.1. Kabinete e dumeletše Tlhako ya Pholisi ya Peakanyo ye e Kopantšwego ya mmušo, yeo e nyakago go šogana le mafokodi a peakanyo ya pholisi ao a utollotšwego mo lenaneong la peakanyo la gonabjale.

2.2. Ditsenogare tšeo di šišintšwego di tla re gare ga tše dingwe tša šogana le tlhokego ya tlhopo ya peakanyo mo dikarolong tše tharo tša mmušo. Ditsenogare di tla tsebiša mokgwa wa tlhahlobo wo o theilwego go bohlatse. Tlhako ya pholisi e tsebišitše gape kakanyo ye bonolo ka peakanyo ya nako ye telele go ya magareng le peakanyo ya nako ye kopana go phatlalala le mmušo.

2.3. E tla šomela go thoma dimpshafatšo tša melao go kaonafatša kopano le kakanyo mo peakanyong le tlhahlobong ya mmušo.

3. Tumelelo ya Tumelelano ya go Thongwa ga Mokgatlo wa Dihlare tša Seafrika (AMA)

3.1. Kabinete e dumeletše go saenwa ga Tumelelano ya go Thongwa ga AMA le go išwa ga yona Palamenteng go ka dumelelwa. Se se tla phetha tumelelano yeo e amogelwago ke Kopano ya Tumelelano ya Afrika ka 2019. Tumelelano e thoma semmušo AMA ya kontinente. Mokgatlo o tla laola ditšweletšwa tša dihlare, gomme wa kaonafatša polokego le bokgoni bja ditšweletšwa tša dihlare ka kontinenteng.

3.2. Go saenwa le go dumelelwa ga tumelelano ye go tla kaonafatša boikgafo bja Afrika Borwa mo lefaseng le mo kontinenteng mo go matlafatšeng lenaneo la taolo ya kontinente mo go ditšweletšwa tša maphelo.

4. Pego ka ga Lenaneo la Tlhohleletšo ya Motšhelo la Phethagatšo ya Dinyakišišo le Tlhabollo (R&D) – 2019/20 le 2020/21

4.1. Kabinete e dumeletše go išwa ga Lenaneo la tlhohleletšo ya Motšhelo la R&D Palamenteng mo mengwageng ye mebedi ya go feta (2019/20 le 2020/21). Se se sepelelana le karolo ya 11D (17) ya Molao wa Motšhelo wa Letseno, wa 1962 (Molao wa 58 wa 1962), woo o nyakago go alwa ga dipego tše ka Palamenteng.

4.2. Lenaneo la tlhohleletšo ya motšhelo le nyaka go hlohleletša dikhamphani tša praebete go beeletša mo go R&D gore go hlohleletšwe kgolo ya ekonomi, le go godiša katlego.

4.3. Kabinete e thabela gore pego e bontšha gore dikhamphani tše difsa di dirile kgopelo ya tlhohleletšo ya motšhelo. E hlohleletša dikhamphani tše dintši go hwetša setlamo se bjalo ka karolo ya go godiša dipeeletšo tša bona le go hlohleletša kgolo ya ekonomi.

4.4. Dikhamphani tše nne tša godimo tšeo di hweditšego tlhohleletšo ya motšhelo di ka makaleng a tshepetšo ya ditšweletšwa tša temo; kaonafatšo ya meepo; dikhemikhale, dibotsefatši, dihlare le elektrotheknikhale le Theknolotši ya Tshedimošo tšeo Kabinete e di dumeletšego bjalo ka dikarolo tše bohlokwa mo Leanong la Katlego ya Pholisi ya Intasteri. Pego ka botlalo e ka hwetšwa mo wepsaeteng ya Kgoro ya Saense le Kaonofatšo: www.dst.gov.za.

5. Foramo ya Molao wa Dibaka le Kgolo ya Afrika (AGOA) - 2023

5.1. Kabinete e dumeletše go swarwa ga Foramo ya AGOA ka 2023. AGOA e dumeletšwe ke Amerika (USA) ka 2000 go fa phihlelelo ya go ikgetha ya kgwebo ya go ikema go bontši bja dinaga tša Afrika tša Borwa bja Sahara le mebaraka ya gae ya USA.

5.2. Dikišontle tša Afrika Borwa ka fase ga AGOA di akaretša dienywa tša go butšwa, dimake, dikoloi, didirišwa, tšhipi, setala le ditšweletšwa tša khemikhale. Tšatšikgwedi la nnete le lefelo di sa tlo tsebišwa.

6. Samiti ya Ditona ya Sehlopha sa Ditlhahlobo tša Lefase (GEO) – 2023

6.1. Kabinete e dumeletše gore Afrika Borwa e sware Samiti ya Ditona ya GEO ka Motsekapa ka 2023. GEO ke mokgatlo wa mebušo ya boditšhabatšhaba woo o hlomilwego ka 2003 ka morago ga Samiti ya Lefase ya Tlhabollo ya go Swarelela. E šoma bjalo ka sefala sa kopano moo dinaga di kgathago tema ka go ithaopa go fihlelela nepo ya go swana ya go aga mananeo a GEO.

6.2. Gonabjale GEO e na le mebušo ya bosetšhaba ya go feta 113, ye 30 ya yona e tšwago ka Afrika gomme mekgatlo ye e ka bago 140 e kgatha tema, gomme ye 11 ya yona e tšwa Afrika. Afrika Borwa e dutše e le leloko la Komitiphethiši go tloga ka 2005 gomme boramahlale ba rena gonabjale ba kgatha tema mananeong a dinyakišišo a mmalwa ao a etilwego pele ke GEO.

7. Kgwedi ya Dinamelwa ya Diphalane (OTM) – 2022

7.1. Kabinete e dumeletše go thakgolwa ga lesolo la OTM ka Mokibelo, 1 Diphalane 2022, ka fase ga morero: “Sishov’ingolovane: mmogo re aga infrastraktšha ya dinamelwa yeo e agago mešomo ya go swarelela”.

7.2. OTM ya ngwaga le ngwaga e šomišwa go godiša temošo ka dinamelwa bjalo ka dikarolo tše bohlokwa mo kgolong ya ekonomi le tlhabollo ya mahlakore a mararo. Go tla ba le ditiragalo tše mmalwa go bontšha dikarolo tše mmalwa tša infrastraktšha ya dinamelwa ka go difofane, dikepe, dinamelwa tša bohle le ditsela. Ditiragalo di lemoša gape ka polokego le tšhireletšo ya dinamelwa. Go tla akaretšwa gape bakgathatema go boledišana ka ditlhohlo tša go fapana mo lekaleng la dinamelwa.

7.3. Mmušo o dula o ikgafile mo go kaonafatšeng infrastraktšha ya dinamelwa ya naga, bobedi mo mafelong a segae le a setoropong, gore go sepetšwe tshepelo ye botse gape ya bokgoni ya dithoto le batho.

8. Kopano ya Lenaneo la Magae la Bodulo bja Batho (UN-HABITAT) la Kopanoditšhaba (UN)

8.1. Kabinete e dumeletše go swarwa ga kopano ya maloko a UN-HABITAT ka Johannesburg ka la 16 Diphalane 2022.

8.2. Kgoro ya Bodulo bja Batho e tla sepetša kopano ye ya matšatši a mabedi yeo e tla tsenelwago ke ditsebi tša dipolotiki, ditsebi le banyakišiši, go akaretša malokomagolo a Komiti ya go ya go ile ya Baemedi ba UN-HABITAT bao ba lego Nairobi, Kenya. Ditaba tše bohlokwa tšeo go tla bolelwago ka tšona di tla akaretša ditsenogare tša phetogo go badudi ba mekhukhung le metsesetoropo go tlala kudu.

8.3. Dipoelo tša dipoledišano tše di tla phethwa mo thakgolong ya Tlhako ya Leano la Katlego la Lefase, yeo e tla alwago Kopanong ya UN-HABITAT gore e dumelelwe ka 2023.

C. Melaokakanywa

1. Molaokakanywa wa Khansele ya Setšhaba ya Dikgaruru tša Bong le Dipolao tša Basadi le Bana (GBVF) wa 2021

1.1. Kabinete e dumeletše go išwa ga Molaokakanywa wa Khansele ya Setšhaba ya 2021 Palamenteng gore go šoganwe le wona. Molaokakanywa wo o fa tlhako ya molao mo go hlongweng ga mokgatlo wa molao gore go be le tsenogare ye e nepišago mo go šoganeng le GBVF.

1.2. O dumelela gape go thongwa ga Boto ya Khansele yeo e tla fago taolo yeo e beakantšwego gomme ya laola phethagatšo ya Leano la Taolo ya Setšhaba ka ga GBVF, leo le dumeletšwego ke Kabinete ka Diphalane 2020 go phethagatšwa. Boto e tla le kemedi ya 51 go tšwa go setšhaba sa gae le 49% go tšwa mmušong. Molaokakanywa o šetše o swayaswayilwe ke setšhaba.

2. Molaokakanywa wa Ditšweletšwa tša Motšoko le Didirišwa tša go Kgoga Motšoko tša Elektroniki wa 2018

2.1. Kabinete e dumeletše go išwa palamenteng Ditshwayotshwayo tša Molaokakanywa wa Ditšweletšwa tša Motšoko le Didirišwa tša go Kgoga Motšoko tša Elektroniki wa 2018, tšeo di nyakago go phumola Molao wa gonabjale wa go Laola Ditšweletšwa tša Motšoko, (Molao wa 83 wa 1993) go ya le ka moo o mpshafaditšwego ka gona.

2.2. Molaokakanywa o nyaka go matlafatša magato a maphelo a setšhaba a naga gomme o dire gore o sepelelane le Tumelelano ya Tlhako ya Mokgatlo wa Maphelo a Lefase ka ga Taolo ya Motšoko. Molaokakanywa o šišinya gare ga tše dingwe, gore go se sa folelwa ka gare ga meago le mafelo a mangwe a ka ntle ga meago; go fedišwa ga thekišo ya sekerete mo metšheneng ya go rekiša, le go thekga taba ya diphuthelwana tša disekerete le maswao a temošo.

2.3. Molaokakanywa o fetišitšwe dikgatong tša go tsenelela tša go nyaka maikutlo a setšhaba a go fapana, go akaretša a intasteri ya metšoko, a mekgatlo ya badudi le a dikgoro tša mmušo tša maleba.

D. Ditiragalo tše di Tlago

1. Kopano ya bo 77 ya Kopanokakaretšo ya UN (UNGA77)

1.1. Afrika Borwa e kgatha tema ka go UNGA77 yeo e lego ka go dikantorokgolo tša UN ka Toropokgolong ya New York ka USA go tloga ka la 27 Lewedi 2022 ka fase ga morero: “Nako ya mathata: Go tšweletša ditharollo go kgokaganya ditlhohlo”.

1.2. Go Borwa bja lefase, khuetšo ya ekonomi le ekonomi ya leago ya leuba la Bolwetši bja Coronavirus (COVID-19) e bile bothata kudu malebana le tsošološo go Leboa leo le hlabologilego gomme se se nyaka maitapišo ao a kopanetšwego go tšwa dinageng ka moka go kgonthiša gore ga go na yoo a tlogetšwego morago.

1.3. Pele ga Ngangišano ya Kakaretšo ya UN, Mongwaledikakaretšo wa UN, Morena António Guterres, o tla beakanya samiti ka ga “Go fetoša Thuto” le go swara kopano ya maemo a godimo yeo e nepišago Dinepo tša Tlhabollo ya go Swarelela (di-SDG). Kopano ya di-SDG e swanelwa ke go nyakišiša ditsela tšeo go ka tsošološago maatla le go potlakiša phethagatšo.

2. Letšatši la Bohwa

2.1. Mopresidente Ramaphosa o tla fa polelokgolo mo meketekong ya Letšatši la Bohwa la Setšhaba mo Union Buildings ka Mokibelo, 24 Lewedi 2022. Moletlo o tla swarwa ka fase ga morero: “Go keteka Bohwa bja Solomon Linda le Mmino wa Setšo wa Afrika Borwa”.

2.2. Kgwedi ye ya Bohwa e nepiša mmino wa setšo wa Afrika Borwa ka nepišo ya mmino wa Isicathamiya le tema yeo o ikgathago go dipapadi, bokgabo, setšo le bohwa. Morero o hlompha matswalo a bo 60 a go hlokofala ga rammino, seopedi le motšweletši Solomon Popoli Linda (1901-1962), yoo a tsebegago gape bjalo ka Solomon Ntsele, yoo a tsebegago kudu bjalo ka motšweletši wa koša ya, “Mbube”.

3. Moletlo wa go Lebana wa Letšatši la Dikepe la 2022

3.1. Afrika Borwa e tla be e swara Moletlo wa go Lebana wa Letšatši la Dikepe la 2022 ka Durban go tloga ka la 14 Diphalane 2022. Moletlo o tla swarwa nakong ya OTM, woo le wona e tla bago karolo ya go godiša tsebo ya lekala la rena la dikepe. Moletlo o tla tliša baemedi go tšwa dinageng tša go fapana bao ba tla itemogelang intasteri ya dikepe ya Afrika Borwa. Afrika Borwa e bile leloko la Mokgatlo wa Dikepe wa Boditšhabatšhaba go tloga ka 1995, woo o lego mokgatlo wa go ikgetha wa UN wa go laola dikepe.

4. Kgwedi ya Boeti

4.1. Kgwedi ya Boeti ngwaga wo e ketekwa ka fase ga morero wa Letšatši la Boeti la Lefase (27 Lewedi) wa “Nagana gape ka Boeti”. Boeti bja gae bo bohlokwa kudu mo go tsošološeng lekala la boeti, leo le kgathago tema kudu go GDP ya Afrika Borwa le go hlola mošomo.

4.2. Kabinete e thabišwa ke gore lekala la kamogelo ya baeti le begile kgolo ya baeti ka morago ga nako ya COVID-19. Go tšerwe maeto a gae a 15.2 milione mo seripeng sa mathomo sa 2022 e begile koketšego ya 114% ge go bapetšwa le nako ya go swana ka 2021. Se se bontšha kaonafalo ya mmaraka ya nako ya go swana ka 2019, yeo e bonego maeto ao a tšerwego a gae a 8.6 milione. Bjalo ka karolo ya go keteka Kgwedi ya Boeti, Kabinete e hlohleletša maAfrika Borwa go tšea maeto a ‘Shortleft’ go ya diprofense tša rena tša go fapana.

4.3. Kabinete e amogela gape sephetho sa Air Belgium go fofiša difofane tša sehla go ya Afrika Borwa, go thoma kgwedi yona ye (Lewedi), seo se tla matlafatšago boeti gomme sa tiišetša maemo a rena bjalo ka nepo ya boeti ya kgetho. Se tla akaretša difofane tša beke ye nngwe le ye nngwe go ya Motsekapa le Johannesburg.

E. Melaetša

1. Ditebogišo

Kabinete e lebogiša le go lakaletša tše dibotse go:

- Mopresidente William Samoei Ruto wa Repabliki ya Kenya, yoo a hlomamišitšwego ka Labobedi, 13 Lewedi 2022, go latela dikgetho tša bosetšhaba tša khutšo tšeo di swerwego ka la 9 Phato 2022. Motlatšamopresidente David Mabuza o tsenetše tlhomamišo legatong la Mopresidente Ramaphosa, le mmušo le batho ba Repabliki ya Afrika Borwa.

- South African Rugby Union le Toropokgolo ya Motsekapa go swara phadišano ya bo seswai ya Rugby World Cup Sevens gare ga 9 le 11 Lewedi 2022. E be e le lekga la mathomo tiragalo ye ye bohlokwa e swarwa ke naga ya Afrika gomme barati ba diketekete bao ba e tsenetšego ba ilwe ba thabišwa ka dijo tša rugby le kamogelo ye e lemogwago ya Afrika Borwa.

2. Mahloko

Kabinete e romela melaetša ya mahloko go malapa le bagwera ba:

- Bana ba sekolo ba 18 le batho ba bagolo ba babedi bao ba hlokofetšego mo kotsing ye šoro ka Pongola, KwaZulu-Natal ka Labohlano, 16 Lewedi 2022 ka morago ga go thulana ga lori le bene yeo e bego e nameditše bana ba sekolo.

F. Bao ba Thwetšwego Mešomong

1. Batho ka moka bao ba thwetšwego mešomong mangwalo a bona a dithuto a tla tiišetšwa le go netefatšwa ka maleba.

a. Morena Makgothi Samuel Thobakgale bjalo ka Molaodimogolophethiši (DG): Mokhomišinare wa Setšhaba wa Kgoro ya Ditirelo tša Tshokollo.
b. Ngaka Malixole Percival Mahlati bjalo ka Motlatšamolaodimogolophethiši (DDG: lefapheng la go šoma ka merero ya Dikolo tša Maokelo tša Thuto ya Godimo ka moka le ya Tlhabollo ya Bašomi mo Kgorong ya Maphelo.
c. Morena Siyabonga Blessing Mdubeki bjalo ka Mohlahlobimogolophethiši mo Kgorong ya Temo, Tsošološo ya Naga le Tlhabollo ya Dinagamagae
d. Morena Phaswa Phineas Mamogale bjalo ka Mohlankedimogolo wa Ditšhelete mo Kgorong ya Maphelo.

2. Kabinete e dumelelana le go thwalwa ga batho ba mešomong:

a. Morena Tshediso Matona bjalo ka Mokhomišinare wa Khomišene ya Matlafatšo ya Ekonomi ya Bathobaso ka Kakaretšo.
b. Maloko a Kgorotsheko ya Boipiletšo a Boto ya Difilimi le Diphatlalatšo:

- Morena Siyazi Tyamtyam (Modulasetulo);
- Mohumagadi Sohani Natasha Chundhur;
- Mohumagadi Sisanda Nkoala;
- Mohumagadi Shandukani Mulaudzi;
- Mohumagadi Nomaswazi Rachel Shabangu-Mndawe;
- Ngaka Litheko Modisane;
- Morena Phuti Nehemia Phukubje;
- Morena James Shikwambana; le
- Mohumagadi Manko Thalitha Bufffel (o thwetšwe gape).

Dipotšišo: Mohumagadi Phumla Williams – Seboleledi sa Kabinete

Mogala: 083 501 0139