Kabinete e kopane ka Laboraro la 21 Phupu 2017, ka Tuynhuys, Motsekapa.

Merero ka seemong sa bjale

1.1. Kabinete e boletše ka ga ditsebišo tše di sa tšwago go dirwa ke ditheo tše kgolo tše tharo tša kelo ya maemo a dikoloto. Ditheo tše tharo tše ka moka di hlagišitše ditaba tša go swana tša mabapi le go nanya ga magato a peakanyoleswa ao a hlohleletšago kgolo ya ekonomi, go šoma ga dikgwebo tša mmušo (di-SOC) le dikotsi tša sepolotiki, gareng ga tše dingwe.

Kabinete e laeditše tshepo go ditsenogare tša yona tša togamaano mabapi le go rarolla mathata a ekonomi ka mo nageng gammogo le mošomo wo o dirwago go maatlafatša go šoma ga di-SOC. Mmušo o tšwela pele gabotse go hlokomela metheo ya ona ya ditšhelete, ka go netefatša gore go na le bonnete bja melaotshepetšo, le go šoma go netefatša gore go ba le kgolo ye e akaretšago mang le mang le phetošo ya ekonomi.

Kabinete e bušeletša gore motheo wa kgolo ya godimo ya ekonomi le tlhabollo ya ekonomi ya setšhaba o šetše o theilwe. E lebeletše kudu go kaonafatša tshepo ya babeeletši le ya badiriši ka go akgofiša go tsenywa tirišong ga dipeakanyoleswa tša metheo tša kgolo ya ekonomi.

Mopresidente Jacob Zuma o biditše wekešopo ya Lekgotlakeletšo la Maatlafatšo ya Bathobaso Dikgwebong (BEE) ka Labobedi la 20 Phupu 2017, leo le ilego la lebelela kudu phetošo ya motheo ya ekonomi ya setšhaba. Wekešopo ye, gareng ga tše dingwe, e boletše ka ga mathata a togamaano le a mafapha a phethagatšo ya Molao wa Maatlafatšo ya Bathobaso Dikgwebong yeo e Nabilego (BBBEE), wa 2003 (Molao wa 53 wa 2003) le ditšhišinyo tšeo di akantšwego tša go fihlelela maikemišetšo a mmušo mabapi le phetošo ya motheo ya ekonomi ya setšhaba.

Tirišano gareng ga mmušo, kgwebo, bašomi le setšhaba sa badudi e bohlokwa go thekga maemo a boitshepo, gore ge re šoma mmogo re kgone go hwetša leswa le go tšwetša pele dikelo tša maemo a peeletšo.

1.2. Ka ge Kgwedi ya Bafsa e le kgauswi le go fela, Kabinete e leboga makala ka moka ao a kgathilego tema ka ditiragalong tša bafsa go ralala le naga. Go kgatha tema ga diketekete tša bafsa ka ditiragalong tša mehutahuta tša maatlafatšo ya bafsa tša Kgwedi ya Bafsa tšeo di ilego tša swarwa ke dikgoro, dihlongwa tša mmušo le lekala la phraebete go a hlohleletša.

Ngwaga wo ke wa segopotšo sa bo 41 sa Dikgaruru tša Baithuti ka Soweto ka 1976 gomme go keteka dikgaruru tše ke segopotšo sa gore bafsa ka mo nageng ba be ba etile pele Ntwa ya rena ya go lwela tokologo.

Kabinete e ipiletša go bafsa go šomiša thekgo le methopo ka moka yeo mmušo o fanago ka yona ka nepo ya go kaonafatša maemo a bona le go tšwetša pele go kgatha tema ga bona ka ekonoming.

1.3. Kabinete e kgalema dikgaruru tšeo di sa tšwago go direga le go tšhošetšwa ga banamedi ka nakong ya boipelaetšo bjo bo bego bo dirwa ke beng ba dithekisi. Ditiro tša mohuta woo ga di molaong ka setšhabeng sa temokrasi. Ditsenogare tša khutšo ka ga taba efe goba efe di tla dula di na le mohola go bao ba amegago ka moka.

Tumelelano yeo e bilego gona ka moragonyana gareng ga Mokgatlo wa Bosetšhaba wa Dithekisi wa Afrika Borwa le SA Taxi Finance Holdings ke tiišetšo go tšwela pele ya gore ditherišano tša khutšo di ka kgona go rarolla mathata a go swana le a ka ntle le go ama batho bao ba se nago molato le go šitiša ekonomi. Kabinete e amogela sephetho se, ka ge se le kgahlegong ye kaone ya banamedi le ya intasteri ya dithekisi.

Kabinete e amogela poledišano yeo e swerwego mo lebakeng le gareng ga Kgoro ya Dinamelwa le boetapele bja intasteri ya dithekisi ka nepo ya go hwetša tharollo ya go ya go ile. Kgoro e tlo rerišana le ditheotlhabollo tša ditšhelete ka nepo ya go hwetša mekgwa ye mengwe ya thušo ya ditšhelete tša go reka dithekisi.

1.4. Kabinete e lebiša mahloko a yona a magolo go batho ka moka bao ba lahlegetšwego ke bao ba ba ratago ka masetlapelong ao a sa tšwago go hlaga ka Kapa Bodikela le ka Kapa Bohlabela. Badudi ba mmalwa le bona ba ile ba tšhaba dintlong tša bona le go lahlegelwa ke dithoto tša bona.

Kabinete e reta mokgwa wo o kopantšwego wa ka pejana le phetolo ye e tšwago go mmušo, go ba kgwebo le go tšwa go maAfrika Borwa ge ba thušitše malapa ao a amegilego. Kabinete e hlompha raditimamello wa mogale yo a bego a ithaopile Bradley Richards le mootledi wa lori John Blaaw bao ba thušitšego boraditimamello gomme bona ba lahlegelwa ke maphelo a bona ba leka go phološa setšhaba sa bona. Kabinete e tšwela pele go leboga ka fao go kgethegilego sehlopha sa Working on Fire seo se lwantšhitšego mello yeo ye šoro. Ke boikgantšho bja rena! Kabinete e lakaletša boraditimamello ba babedi bao ba gobetšego gore ba fole ka pela go akaretšwa Ian Barnard yo a gobetšego ge a be a leka go phološa Bradley Richards.

Mopresidente Zuma o etetše ditšhaba tša Wit Lokasie le tša Knysna Heights tšeo di amilwego kudu ke mello yeo. Mopresidente Zuma o tsenetše tirelo ya segopotšo ya Morena Richards. Ka moya wa mannete wa sehlopha sa boraditimamello, Morena Barnard o ile a kgona go tsenela tirelo ya segopotšo ya mošomimmogo wa gagwe Morena Richards.

Mopresidente o fane ka thekgo ya tša bobotlana le thekgo ye nngwe go mafelo ka moka ao a amegilego. Se se kgokagantšwe ka go diriša lekala la Bosetšhaba la Mohlakanelwa la Senthara ya Mešomo ya Taolo ya Masetlapelo, gomme le šomišana mmogo le Mmušo wa Profense ya Kapa Bodikela le dihlopha tša Taolo ya Masetlapelo tša ka Profenseng.

Kabinete e leboga mekgatlo ka moka ye e sego ya mmušo, lekala la phraebete, baithaopi le ditšhaba tšeo di thekgago ditšhaba tšeo di amegilego.

1.5. Kabinete e ipiletša go ditšhaba tša ka Limpopo tšeo di lego kgauswi le mollwane wa Zimbabwe go ntšha mahlo dinameng le go hlokmela leruo la bona la dikgogo. Se se latela pego ya gore go na le mokwehlwane wa dinonyana le dikgogo wo o bitšwagod H5N8. Kgwebišano ka ditšweletšwa tša dinonyana le tša dikgogo go tšwa ka Zimbabwe e fegilwe. Baerase ya H5N8 e baka malwetši kudu ebile e fetela kudu, gomme e feletša ka maemo a godimo a mahu. Balemi ba tša kgwebo le bona ba hlohleletšwa go oketša magato a bona a tšhireletšo ya tlhago dipolaseng tša bona.

1.6. Kabinete e amogetše kahlolo ya Kgorotsheko ya Godimo yeo e begilego gore Karolo ya 18 ya Molao wa Tshepedišo ya Bosenyi, wa 1977 (Molao wa 51 wa 1977) ga e sepelelane le molaotheo, ya fediša mollwane wa mengwaga ye 20 ya go bula melato ya bosenyi kgahlanong le bao ba pharwago ka melato ya tlaišo ya thobalano. Kahlolo ye e tla dira ka fao go tletšego seatla go maatlafatša bokgoni bja rena bja tirelo ya toka ya go tšea magato kgahlanong le bao ba dirago dikgaruru kgahlanong le basadi le bana.

1.7. Kabinete e amogela kopano ya setšhaba ye e sa tšwago go swarwa ya Internet for All ye e swerwego ka Kliptown, Soweto. Kopano ye – yeo e bego e etilwe pele ke Tona ya Mananeokgoparara a Dikgokagano le Ditirelo tša Poso Siyabonga Cwele, ka tirišano le Seboka sa Ekonomi sa Lefase, lekala la phraebete le setšhaba – e feleleditše ka go hlahlwa ga bafsa bao ba ka bago ba 500 ka ga mabokgoni a theknolotši ya tshedimošo le dikgokagano (ICT) tša motheo. Kwano ka ga Internet for All e amogetše sebopego sa boetapele le gape ya tšweletša dinepišo tša phethagatšo ya se mo dikgweding tše di tlago tše tshela.

Kabinete e tšwetše pele go amogela tsenogare ye e dirilwego ke Kgoro ya Mananeokgoparara a Dikgokagano le Ditirelo tša Poso ka go diriša Bolaodi bja Dikgokagano bjo bo Ikemego bja Afrika Borwa (Icasa) le Kgoro ya Tlhabollo ya Ekonomi ka go diriša Khomišene ya Diphenkgišano, go lebeledišiša tshenyegelo ya godimo ya go reka data yeo e tšwelago pele go ba selo seo se šitišago phihlelelo ye e oketšegilego ya di-ICT.

1.8. Kabinete e tshwenywa ke go šitišwa ga ditirelo ka mebušareng ya ka Gauteng ka lebaka la dithulano tšeo di tšwelago pele tša bašomi le bengmešomo. Ka lebaka la se, malapa ao a hlokofaletšwego ba palelwa ke go hwetša ditopo tša ba malapa a bona. Lehu la lapeng lefe goba lefe le tliša seemo sa go ba kotsing le mahloko go ba malapa bao ba šetšego. Bjalo ka setšhaba ga go thulano efe goba efe yeo e ka swanelago go baka go hloka lešoko ga mohuta woo. Kabinete e ipiletša go bao ba amegago ka mo dithulanong tše go hwetša tharollo ya ka pejana ya dithulano tša bona ka ntle le go ama ba malapa a bao ba hlokofaletšwego.

1.9 Kabinete e amogela go hlongwa ga Seboka sa Tlhabollo ya Bafsa sa Mebušoselegae. Foramo ye e tlo ba lentšu la kgatelopele ya bafsa ka go tsenya tirišong ga masolo a mehutahuta a tlhabollo ya bafsa ka gare ga mmušo wa selegae. Seboka se se swere khonferentshe ya sona ya mathomo ya tlhomamišo ka la 20-21 Phupu ka Muldersdrift, ka bodikela bja Johannesburg.

2. Dipheto tša Kabinete

2.1. Kabinete e dumeletše Sengwalwa sa Ditherišano ka ga Inšorentshe ya Maphelo ya Bosetšhaba (NHI), seo se tlago tsenywa ka gare ga kuranta ya mmušo bjalo ka sengwalwa sa molaotshepetšo. Sengwalwa se sa Ditherišano se batametša naga kgauswi le go netefatša gore maAfrika Borwa ba kgona go fihlelela tlhokomelo ya maphelo, go sa lebelelwe maemo a bona ka ekonoming ya setšhaba.

NHI ke lenaneo la thušo ya ditšhelete go tša maphelo leo le abago ditšhelete tša go aba phihlelelo go tlhokomelo ya maphelo. Se se sepelelana le maikemišetšo a Leanotlhabollo la Bosetšhaba (NDP) ao a nyakago go netefatša gore motho yo mongwe le yo mongwe o kgona go fihlelela tlhokomelo ya maphelo, go sa lebelelwe letseno la gagwe.

Kgoro ya Maphelo e tla swara kopano le bagaši ba ditaba ka la 29 Phupu 2017 ka nepo ya go fa tshedimošo ka botlalo mabapi le Sengwalwa se sa Ditherišano.

2.2. Kabinete e dumeletše Leanotlhabollo leo le Bušeleditšwego la Methopo ya Bašomi go lebilwe go 2030. Leano le le bušeleditšwego le rarolla mafokodi ao a bonwego mo mengwageng ye e fetilego ye mehlano ka dikarolong tše dingwe tša thuto le tlhahlo ebile le bone tlhokego ya kgokagano gareng ga dikarolo tše di fapafapanego tša lenaneo le.

Leano le bjale le sepelelana le NDP le Tlhako ya Togamaano ya Lebaka la Magareng ya 2014-2019. Gape le lebeletše kudu bakgathatema ka moka (mmušo, bašomi, mekgatlo ya baagi le Makala a phraebete) ka ga ditlhokego tša ekonomi le bohlokwa bja go thekga leano la diintasteri ka nepo ya go fihlelela kgolo le tlhabollo tšeo di amago mang le mang.

2.3. Kabinete e dumeletše go phatlalatšwa ga dikutollo tše bohlokwa tša diphatišišo tša 2015/16 ka ga thušo ya ditšhelete ka mmušo go Mediro ya tša Mahlale le Theknolotši. Sengwalwa sa Ditherišano sa 1996 ka ga Mahlale le Theknolotši se nyaka gore Kgoro ya Mahlale le Theknolotši e hlokomele thušo ya ditšhelete ye e dirwago ke mmušo go mafapha a mahlale le theknolotši, le seabe sa yona go kgolo le tlhabollo ya Afrika Borwa.

Dipoelo tša dikutullo tša dikgoro tša bosetšhaba tše 30 di laetša gore tšhelete ye e akanywago ya R23,4 pilione e ile ya šomišwa go tšwa ka ditšheleteng tša bosetšhaba ka ngwageng wa ditšhelete wa 2015/16. Kabinete e lemogile koketšego ye nnyane ya 6.6% ge e bapetšwa le ngwaga wo o fetilego ka lebaka la mathata a bjale a ditšhelete.

Palomoka ye ya peeletšo e emetše 1.7% ya palomoka ya ditekanyetšo tša bosetšhaba tša ngwaga woo. Kabinete e lebogile taba ya gore bontši bja ditšhelete tše di šomišitšwe ka ditirelong tša mahlale tšeo di thekgago kabo ya ditirelo ka mafapheng a bohlokwa a mošomo wa mmušo a go swana le thuto, maphelo, diminerale, enetši, temo le tikologo.

3. Melaokakanywa

3.1. Kabinete e dumeletše go phatlalatšwa ga Molaokakanywa wa Lebollo la Setšo gore setšhaba se fe ditshwaotshwao ka ga ona. Molaokakanywa wo o nyaka go šireletša, go tšwetša pele le go laola ditiro tša lebollo la setšo. Ge o šetše o dumeletšwe, Molaokakanywa wo o tla fana ka melawana le melaotshepetšo ye e amogelegago ya go sepetša ditiro tše tša setšo. O tla šomana le ditlaišo tša tiro ya lebollo, tšeo di bonwego go bašemane ba bannyane bao ba hlokofalago ka dikomeng.

Mmušo le dihlongwa tša baetapele ba setšo di amogetše seemo sa go se kgotlelele mahu a bao ba bolotšwago ka lebaka la ditro tša lebollo.

3.2. Kabinete e dumeletše Molaokakanywaphetošwa wa Setheo sa Dinyakišišo sa Bosetšhaba (NRF) wa 2017 gore o romelwe Palamenteng. Molaokakanywa wo o šetše o rerišanwe ka botlalo le setšhaba. Diphetošo tša ona di hlatholla maatla a Tona ya Mahlale le Theknolotši go setheo se gomme wa fana ka maikarabelo a NRF ka botlalo mabapi le taolo ya tša mahlale. Diphetošo tše di tla maatlafatša maatla a Tona go hlahla NRF gore e kaonafatše go šoma gabotse ga yona.

Di tla kaonafatša gape le maikarabelo le go šoma gabotse ga dinyakišišo, tlhabollo le tlhagišo ya boithomelo ka nepo ya go dira gore maphelo a maAfrika Borwa a be a boleng, ka go di sepelelanya bokaone le dilo tšeo mmušo o di beilego pele.

3.3. Kabinete e dumeletše Molaokakanywaphetošwa wa Bolaodi bja Difofane wa 2017 gore o romelwe Palamenteng. Molaokakanywa wo o maatlafatša polokego ya difofane, tšhireletšego le tlhako ya taolo ya tšhireletšo ya tikologo go netefatša go šoma go ya go ile le seemo sa go se tekateke sa intasteri ya bofofiši bja difofane.

Diphetošo tše di akaretša, gareng ga tše dingwe, tlhagišo ya boikemo bja phethagatšo ya mošomo wa dinyakišišo tša dikotsi le ditiragalo tša difofane; tlhagišo ya go hloma Lekgotla la Dinyakišišo tša Polokego ya Bofofiši bja Difofane. O tšwela pele go fetoša le go tsenya ditlhalošo tše itšego tša ka Molaong.

3.4. Kabinete e amogetše go phatlalatšwa ga Molaokakanywaphetošwa wa Mangwalotšhupo a Mafelo wa 2017 gore setšhaba se dire ditshwaotshwao ka ga ona. Diphetošo tše di mpshafatša go šoma, go phethagatša, tirišo le tshepdišo ya Molao wa Mangwalotšhupo a Mafelo, wa 1986 (Molao wa 95 wa 1986). Molao wa bjale wa Mangwalotšhupo a Mafelo wa 1986 o fa beng mangwalo a ditokelo tše ditšego ka go setlamo sa mangwalotšhupo a mafelo. Molaokakanywaphetošwa wo o šišintšwego o šišinya ditaolo tša ditokelo tše ka mokgwa wo o kwagalago.

3.5. Kabinete e dumeletše Molakakanywa wa go Dula Nageng ya Setšhaba wa 2017 gore o phatlalatšwe gore setšhaba se dire ditshwaotshwao ka ga ona. Molaokakanywa wo o nyaka go šireletša beng ba naga ya setšhaba, kudukudu bao ba lego kotsing ka metseng ya dinagamagaeng.

4. Ditiragalo tše di tlago

4.1. Mopresidente Zuma o tla tsenela Seboka sa Bohlano sa Mokgatlo wa Metšhelo wa Borwa bja Afrika seo se tlogo swarwa ka Swaziland ka la 23 Phupu 2017. Seboka se sa letšatši le tee se tla tsenelwa ke Dihlogo tša Dinaga le Mebušo ya dinagamaloko tša SACU, yeo e akaretšago Afrika Borwa, Botswana, Lesotho, Namibia le Swaziland.

Seboka se se tla ahlaahla merero ye e fapafapanego ye e amanago le kgwebišano le tlhomo ya diintasteri ka seleteng se le lenaneo la mošomo. Gape se tla lebeledišiša merero ye itšego ya tumelelano ya SACU le melawana ya yona ya go šoma, go realo e le go nolofatša tlhabollo ya diekonomi tša SACU. Ke ka lebaka la SACU fao e lego gore mebaraka ye e oketšegilego ya diphahlo le ya ditirelo go tšwa ka seleteng se e ka hwetšwago ka go diriša ditherišano tša mehutahuta tša kgwebišano tšeo di tšwelago pele tšeo di ikemišeditšego go tšwetša pele kopanyo ye kgolo ya ka seleteng le ya ka khonthinenteng.

4.2. Bjalo ka karolo ya Imbizo ye e tšwelago pele ya go lwantšha bosenyi, Mopresidente Zuma o tla etela Lenaneo la Mopresidente la Tekodišišo la Siyahlola ka Lusikisiki, ka Kapa Bohlabela ka Mokibelo wa 24 Phupu 2017.

4.3. Kabinete e hlohleletša maAfrika Borwa go thekga Mokete wo o tlago wa Knysna Oyster le Marathone wa ka Knysna. Wo ke o mongwe wa mekete ye e tumilego kudu wo o ipiletšago kudu go barati ba dipapadi le go ba malapa. Bakgathatema ka moka ba šoma mmogo go netefatša gore Knysna e šoma ka botlalo le gore e bula dikgwebo.

4.4. Letšatši la Mandela le ipiletša go rena ka moka, letšatši le lengwe le le lengwe, go dira gore lefase e be lefelo le lekaone. Morero wa Letšatši la Mandela ka la 18 Mosegamanye ke #ActionAgainstPoverty.

Go dira gore letšatši le lengwe le le lengwe e be Letšatši la Mandela ke go keteka bophelo le bohwa bja Madiba ka mokgwa wo o tšwelago pele go ya go ile wo o tlago tliša phetogo ya go se tekateke.

5. Melaetša ya mahloko

5.1. Kabinete e ba le Mopresidente Zuma ge a lebiša mahloko:

go Tona ya Thuto le Tlhahlo tša Godingwana, Ngaka Blade Nzimande, le ba lapa la gagwe ka go hlokofala ga mmagwe, Mohumagadi Nozipho Nzimande. Mma Nzimande yo a bego a ratega kudu o feditše mengwaga ye 90 kgweding ye e fetilego. O ile a amogela balwelatokologo ba South African Communist Party (SACP) le ba African National Congress (ANC) ka diatla tše borutho ka ntlong ya gagwe ka nakong ye boima ya dikgaruru tšeo di ilego tša tlala ka Pietermaritzburg ka KwaZulu-Natal le ka mafelong a kgauswi go ya mafelelong a bo 1980 le mathomong a bo 1990.
ka ga go hlokofala ga Lord Joel Joffe. Lord Joffe, yo a hlokofetšego a na le mengwaga ye 85, e be e le ramolao yo a bego e le mmoleledi ka ditshekong tša Rivonia le tša ka Little Rivonia. O ile a šireletša balwelatokologo ba twantšho ya kgethologanyo ka bogale, gomme a tloga a tsenya letsogo kudu ka protšekeng ya temokrasi ka Afrika Borwa.
go batho ba Namibia ka go hlokofala ga Morena Toivo ya Toivo, molwelatokologo ka ntweng ya go lwela tokologo ka Namibia le molwelatokologo kgahlanong le mmušo wa kgethologanyo. Tona ya Dikgokagano Ayanda Dlodlo o tla emela mmušo wa Afrika Borwa ka polokong yeo e tlago swarwa ka Mokibelo wa la 24 Phupu 2017.

6. Melaetša ya ditebogišo

6.1. Kabinete e lebogiša ramahlale wa tša maswika Tshiamo Legoale yo a dirilego histori ka go ba moAfrika Borwa wa mathomo wa go fiwa sefoka sa Nkgwete ya Boditšhabatšhaba ya FameLab ka protšekeng yeo e nyakišišitšego mokgwa wa go šomiša korong go buna gauta ka dilahlweng tša meepo. Legoale ke moholegi go le lengwe la mananeo a dithušo tša mašeleng a thuto tša mmušo gomme o sa tšwa go thopa sefoka se ka Moletlong wa tša Mahlale wa wo o bego o swaretšwe ka United Kingdom.

6.2. Kabinete e lakaletša Sehlopha sa Afrika Borwamahlatse le mahlogonolo ka Dipapading tše di tlago tša Bafsa tša Commonwealth tša 2017 ka Nassau, Bahamas go thoma ka la 19 go fihla ka la 23 Mosegamanye 2017.

Dipapadi tše ka go tšona Sehlopha sa Afrika Borwa se hweditše maemo a bobedi ka sekaleng sa dimetale, ka palomoka ya dimetale tše 35, ka dipapading tša 2015 ka Apia, Samoa.

Dipapadi tša Bafsa tša Commonwealth di tšwela pele go ba tiragalo ye bohlokwa ya dinaledi tša rena tša ka moso. Sehlopha sa Afrika Borwa ke tlhohleletšo go bafsa gore ba kgathe tema ka dipapading bjalo ka mokgwa wa go fetoša maphelo a bona gore a be kaone.

6.3. Kabinete e lebogiša di-Springbok tšeo di ralokilego gabotse ka go bobedi tlhaselong le ka tšhireletšong go thopa papadi ya bona ya diteko tše tharo kgahlanong le France.

6.4. Kabinete e lebogiša Tona ya Mahlale le Theknolotši Naledi Pandor ge a abetšwe Kgrata ya Bongaka ya tlhompho ke Yunibesithi ya Nova, ka Portugal.

6.5. Kabinete e lebiša mahlatse le mahlogonolo go Mamoselemo ka nageng ya rena le lefase ka bophara ka moketeng wa bona wa lethabo wa Eid-ul-Fitr ge ba feleletša Ramadaan. Ramadaan le go keteka ga Eid-ul-fitr go fa Mamoselemo sebaka sa moswananoši go maatlafatša kamano ya segwera le kopano ya malapa gareng ga bona le maAfrika Borwa.

Dipotšišo: 
Mohumagadi Phumla Williams – Molaodipharephare wa Motšwaoswere (GCIS)
Mogala: 083 501 0139