Kabinete e kopane ka Laboraro la 13 Lewedi 2017, ka Tuynhuys, Motsekapa.

1. Merero Seemong sa Bjale

1.1.   Ekonomi

1.1.1.  Kabinete e amogela kgolo ye kaone ka go Palomoka la Letseno la ka nageng (GDP) ya 2.5% ka kotareng ya bobedi ya 2017, yeo e tlošitšego naga go go phuhlama ga ekonomi. Mo bekeng ye e fetilego, Kgoro ya Dipalopalo tša Afrika Borwa e lokollotše dipalopalo tšeo di emetšego kgolo ya ngwaga ka ngwaga ya 1.1%.

1.1.2. Le ge e le gore e na le kholofelo yeo e nago le šedi, Kabinete e na le bonnete bja gore naga e bona dika tše kaone tša mathomo tša seo ka kholofelo e lego mathomo a go tsoga ga ekonomi ya naga fao go theilwego kudu go go tsenywa tirišong ga Leano la Dintlha tše Senyane, leo le ikemišeditšego go godiša ekonomi ya Afrika Borwa le go hloma mešomo ye e hlokegago kudu.
Se se feleleditše ka go tsebagatša semmušo ga mafelo a diintasteri a mane le go hlatloga ga palomoka ya letseno la dirimelwantle tša ditšweletšwa tša temo tšeo di sego tša hlwa di šongwa ka palogare ya 14.6% ka ngwaga go tloga ka 2012.

1.1.3. Lenaneo la Bahlomi ba Diintasteri ba Bathobso le thekgile diprotšeke tše 62 tšeo di gokeditšego R26 pilione ya dipeeletšo gomme ya hloma mešomo ye 19 859 go fihla mo lebakeng le. Go thekga botšweletši bja ka mo nageng, ditšweletšwa le mafapha a 21 a hlomilwe gore a tšweletše ditšweletšwa tša ka mo nageng.

Operation Phakisa go fihla mo lebakeng le e abile tšhelete ye e akanywago go ba R24.6 pilione ya peeletšo ka ekonoming ya mawatle, gomme Mmušo ona o tsentše letsogo ka R15 pilione ya tšhelete ye. Le ge e le gore dipeeletšo tše di kudu ka go tlhabollo ya mananeokgoparara a maemakepe, ka botšweletšing bja go amana le mawatle kudukudu ka go ageng ga dikepe, ka go diphedi tša lewatleng le ka go dinyakišišo tša mahlale ka lefapheng la oli le gase, dikgoro tše mmalwa tša Mmušo di bile le seabe se segolo go netefatša gore go ba le kgolo ka mo lefapheng le. Palomoka ya mešomo ye 6 517 e hlomilwe ka mafapheng a mehutahuta.

1.1.4. Kabinete e bušeletša boipiletšo go mafapha ka moka a setšhaba, kudukudu a mmušo, dikgwebo le setšhaba ka kakaretšo, go aga go dikatlego tše kaone tšeo di fihleletšwego ka nakong ya kotare ya bobedi go tšwetša pele dikelo tša godingwana tša kgolo ya ekonomi le tlhabollo, le go thuša go boloka mešomo.

1.1.5. Tona ya Ditšhelete, Morena Malusi Gigaba, o tšwela pele go rerišana le mafapha a mehutahuta ka ga leanotiro la kgolo ya ekonomi ye e akaretšago bohle, leo le hlametšwego go hlohleletša tshepo go naga ye. Tona o tla tšwela pele go hlatholla leano le ge a aba Polelo ya Melawana ya Ditekenyetšo tša Lebaka la Magareng ka Palamenteng, Motsekape, ka la 18 Diphalane 2017.

1.2. Lefelo la go Etelwa ke Setšhaba la InvestSA – Kapa Bodikela

1.2.1. Kabinete e retile go tsebagatšwa semmušo ga Lefelo la go Etelwa ke Setšhaba la InvestSA,

Mopresidente Jacob Zuma o tsebagaditše semmušo Lefelo la go Etelwa ke Setšhaba la InvestSA ka Kapa Bodikela gomme a tiišetša boikgafo bja mmušo bja go kaonafatša seemo sa dipeeletšo ka Afrika Borwa, e lego lefelo leo le goketšago babeeletši ba ka moso.

1.2.2. Lefelo la go Etelwa ke Setšhaba la InvestSA le fokotša tshenyegelo ya go dira kgwebo ebile le nolofatša go dira kgwebo ka mo nageng ka go fana ka tlhahlo ya togamaano, ka go fokotša go se sepetšwe gabotse ga taolo le go tloša mellwane ye e beetšwego babeeletši.

1.2.3. Lefelo la Bosetšhaba la Mmušo la go Etelwa ke Setšhaba la InvestSA le tsebagaditšwe semmušo ka Hlakola mo ngwageng wo gomme ka go diriša Kgoro ya Kgwebišano le Diintasteri (dti), Lefelo la go Etelwa ke Setšhaba la InvestSA le tla hlongwa ka diprofenseng tše senyane ka moka – la mathomo ka Kapa Bodikela gomme gwa latela KwaZulu-Natal le Gauteng ka go latelana.

1.3. Segopotšo sa Bohlano sa Leanotlhabollo la Bosetšhaba (NDP)

1.3.1. Kabinete e ba le maAfrika Borwa ge ba keteka Segopotšo sa Bohlano sa NDP, yeo e amogetšwego ke Palamente ka la 12 Lewedi 2012 bjalo ka motheo wa tlhabollo ya ekonomi ya setšhaba ka mo nageng ka nepo ya go rarolla ditlhohlo tše tharo e lego bohloki, tlhokego ya mešomo le tlhokego ya tekatekano go ya ngwageng wa 2030.

1.3.2. Bjalo ka leano la naga go lebile go katlego, NDP ke ya maAfrika Borwa ka moka ebile e emetše dikholofelo le ditlhologelo go tšwa go mafapha ka moka a setšhaba, ka nepo ya go fihlelela Afrika Borwa ye kaone.

1.3.3. Kabinete e ipiletša go maAfrika Borwa ka moka go thekga Ponelopele ya NDP ya 2030.

1.4. Seboka sa BRICS

1.4.1. Kabinete e lemogile ka ga Seboka sa Bosenyane seo se atlegilego sa dinaga tša Brazil, Russia, India, China le Afrika Borwa (BRICS), seo se bego se swaretšwe ka Xiamen ka Repabliking ya Batho ba China (PRC) go tloga ka la 3 go fihla ka la 5 Lewedi 2017 ka fase ga morero wa: “BRICS: Selekane se Tiilego go fihlelela Bokaomoso bjo Bokaone”.

1.4.2. Seboka se se bea motheo o bohlokwa ka nepo ya go aga tumelelano le tirišano ye e tiilego gareng ga mebaraka ye e tšwelelago le dinaga tšeo di hlabologago ka nepo ya go phethagatša Leano la 2030 la Tlhabollo ya Go ya go ile.

1.4.3. Tirišano ya Afrika Borwa ka go BRICS e theilwe go go tšwetša pele dikgahlego tša bosetšhaba tša naga ye, go tšwetša pele kopanyo ya selete se le go hlohleletša tshepedišo ya pušo ya lefaseng ka bophara ye e akaretšago mang le mang.

1.4.4. Palomoka ya kgwebišano gareng ga dinaga ka bobedi gareng ga Afrika Borwa le dinaga tše dingwe tša BRICS e fihlile go US$29 pilione mo ngwageng wo o fetilego. Naga yeo Afrika Borwa e romelago ditšweletšwa tša yona kudu ka go BRICS e sa le China, gwa latela India, Brazil le Russia. Kgwebišano ye e bonagala gape ka go ditšweletšwa tšeo di romelwago ka nageng ye, fao e lego gore China e tšwelago pele go ba mothopo o mogologolo wa ditšweletšwa tšeo di romelwago ka Afrika Borwa. Le ge e le gore Afrika Borwa e na le methopo e mentši ya tlhago, go bohlokwa go hloma mananeo a tlhwekišo ya diminerale ka nepo ya go thekga molawana wa rena wa tlhomo ya diintasteri.

1.4.5. Go amogelwa ga Kwano le Leanotiro tša BRICS tša ka Xiamen go laeditše motheo wo o tiilego wo BRICS e o dirilego mabapi le go hloma mekgwa ya tshepedišo ya dihlongwa ka nepo ya go fihlelela tirišano ye e kwagalago.

1.4.6. Kabinete e ikwa e hlomphegile ge Afrika Borwa e le Modulasetulo yo a tšeago marapo wa BRICS ebile e maatlafatša maikemišetšo a yona bjalo ka moetapele ka nepo ya go aga lenaneo la tlhabollo le katlego la BRICS la dinaga tšeo re dirišanago le tšona, ge e itokišetša go ba monggae wa Seboka sa bo 10 sa BRICS ka 2018.

1.5. Afrika Borwa le Russia di saena tumelelano

1.5.1. Kabinete e tšwela pele go amogela tumelelano ye e saennwego gareng ga Afrika Borwa le Russia ka Sebokeng sa bo Senyane sa BRICS, yeo e tlago tšweletša tšhelete ye e ka bago US$400 milione yeo e beeletšwago ka tlhabollong ya lefapha la oli le gase la Afrika Borwa.

1.5.2. Khamphani ya bosetšhaba ya go tšweletša oli, e lego PetroSA, le khamphani ya dinyakišišo tša maswika ya Fetereišene ya Russia, e lego Rosgeo, di dumelelane go hloma mafelo a kutollo ya karolo ya senyane le ya 11a ka ntle ga Lebopo la Borwa la Afrika Borwa.

1.5.3. Go nyaka methopo ya oli le ya gase ka Afrika Borwa e tloga e le togamaano ya godimo ya tšhireletšego ya enetši ka mo nageng.

1.5.4. Rosgeo ya Russia e tla dira mošomo wa dinyakišišo tša maswika gammogo le go bora dipetse tša dinyakišišo ka ga maswika. Protšeke ye e ka feletša ka go rafša ga dikhubikimetara tše dimilione tše nne tša gase letšatši le lengwe le le lengwe gomme ka moragonyana tša romelwa lefelong la go fetošetša Gase go ya go Diela la PetroSA ka Mossel Bay, ka Lebopong la Borwa.

1.6. Mebaraka ya diromelwantle ya Afrika Borwa

1.6.1. Kabinete e lebogiša dti ge e etile pele sehlopha sa dikhamphani tše 20 tša Afrika Borwa go leba pontšhong ya Dijo ya Lefase ka Moscow ya 2017, yeo e kgatlampanago go fihla ka la 15 Lewedi 2017.

1.6.2. Le ge di tšwetša pele intasteri ya go šoma ditšweletšwa tša temo tša ka Afrika Borwa, go kgatha tema ga dikhamphani tše tša ka mo nageng go tšwa ka lefapheng la go šoma ditšweletšwa tša temo, go tiišetša le go hloma go ba gona ga mebaraka ya Afrika Borwa ka Russia.

1.6.3. Go kgatha tema ga tšona go kgontšhitšwe ke Setlamo sa Mebaraka ya Diromelwantle le Thušo ya Dipeeletšo sa dti, seo se šomišwago go hlabolla mebaraka ya diromelwantle ya ditšweletšwa le ditirelo tša Afrika Borwa, gammogo le go goketša peeletšo ye mpsha ya dinaga tša ka ntle ka mo nageng.

1.6.4. Kgwebišano gareng ga Afrika Borwa le Russia e hlatlogile kudu go tloga go R5 pilione ka 2012 go ya kgauswi le R8 pilione ka 2016. Bontši bja diromelwantle tša Afrika Borwa di akaretša dikenywa le dinawa, borale bja mankanese, dino, digalagala le binika, beine, metšhene le ditlabelo tša mohlagase.

1.7. Tšhomišo ya bana mešomong

1.7.1.  Kabinete e hlobja boroko ke ditiragalo tše di sa tšwago go hlaga tša go šomiša bana mešomong fao bana ba ilego ba hwetšwa ba šoma dipolaseng ka profenseng ya Leboa Bodikela le ka Foreisetata. Kabinete e kgalema tlaišo le tšhomišobošaedi ye e sa amogelegego ya bana bao ba lego kotsing.

1.7.2.  Kabinete e reta maloko a setšhaba ao a tsebišitšego Kgoro ya Bašomi yeo, gammogo le Kgoro ya Tlhabollo ya Setšhaba, e tšerego magato ka pela go šomana le mokgwa wo wa bosathane wa tlaišo ya bana.

1.7.3. Kabinete e thabile ge bana bao ba amegilego ba hudušeditšwe mafelong a polokego le gore Kgoro ya Bašomi e tla maatlafatša mešomo ya yona ya ditlhahlobo tša mešomong le go šoma mmogo le ditheo tša phethagatšo ya molao go golega bao ba dirago ditiro tše.

1.7.4. Bana ba rena ke bokamoso bja naga. Kabinete e kgalema mekgwa ka moka ya tšhomišo ya bana mešomong gomme e ipiletša go maAfrika Borwa ka moka go dula ba ntšhitše mahlo dinameng ka dinako ka moka le go bega bao ba tshelago melawana ya Molaotheo wa rena.

1.7.5. Molao wa Dikolo wa Afrika Borwa, wa 1996 (Molao wa 84 wa 1996), gammogo le Molao wa Bana, wa 2005 (Molao wa 38 wa 2005), o tloga o laela ka fao go kwagalago gore bana ka moka ba mengwaga ya gareng ga ye šupa le ye 15 ba swanetše go tsena sekolo. Go ya ka molao wo, batswadi le bahlokomedi ba bana ba swanetše go netefatša gore baithuti ba sehlopha se sa mengwaga ba a ngwadišwa le go tsena sekolo ka mehla goba ba lebane le ditlamorago tša gore ga ba obamele molao.

1.8. Komelelo

1.8.1. Kabinete e leboga bao ka Afrika Borwa ba hlomphilego boipiletšo bja go seketša meetse.

1.8.2. Afrika Borwa ke naga yeo e nago le tlhokego ya meetse gomme maemo a komelelo ao a ganelelago ka dikarolong tša naga ke segopotšo go batho ka moka gore ba boloke meetse ka go a šomiša ka bohlale le ka go a seketša.

1.8.3. Le ge e le gore masolo a mabapi le go seketša meetse a thuša go imolla kgatelelo go methopo ya meetse, pula ya selemo ye e bilego ka fase ga fao go tlwaelegilego ye e begilwego ka Kapa Bodikela le ka KwaZulu-Natal ke taetšo ya gore tše ntši di swanetše go dirwa go seketša meetse.

1.8.4. Sehlophatšhomo sa Ditona ka ga Komelelo, seo se etilwego pele ke Kgoro ya Pušo ya Tirišano le Merero ya Setšo, se tšwela pele go hlokomela maemo a komelelo le go fana ka thekgo ye e nyakegago ka go diriša dikgoro tša maleba go fokotša seemo se.

1.8.5. Mmušo o abile R74 milione ka sekhwameng sa kimollo ka nepo ya go arabela seemo sa komelelo seo se ganelelago ka Kapa Bodikela.

1.8.6. Kgoro ya Meetse le Kelelatšhila le yona e ba le kgatelopele ka go lokišetša go tsenywa tirišong ga Setlamo sa Kaonafatšo ya Noka ya Berg go leba ka Setlamong sa Kgodišo ya Voelvlei. Pego ya sephetho sa Tekolo ya Seabe go Tikologo e swanetše go fiwa go ya mafelelong a Lewedi. Tona ya Meetse le Kelelatšhila, Mohumagadi Nomvula Mokonyane, o laetše Bolaodi bja Trans-Caledon Tunnel go nyaka mašeleng le go phethagatša protšeke ye. Ba šetše ba thomile go rerišana le bašomiši ba bagolo gomme mo nakong ye e sa fetšego pelo ba tla itebanya le Tona gore a kwane le Tona ya Ditšhelete mabapi le go adima tšhelete ya go sepediša protšeke ye.

1.8.7.  Kabinete e bušeletša boipiletšo go batho ka moka ka Afrika Borwa go netefatša gore go seketša meetse go a dirwa bjalo ka karolo ya maphelo a rena a ka mehla.

1.9. Lesotho

1.9.1. Kabinete e ba le Mopresidente Zuma ge a kgalema polao ye e sa kwagalego ya Molaodi wa Mašole a Lesotho, Motšenerale Khoantle Motšomotšo.

1.9.2. Tiragalo ye ya moragorago ya dikgaruru ga e amogelege. Bjale go tšwa go batho le go baetapele ba Lesotho go netefatša gore seemo sa khutšo le seo se tlwaelegilego se bušetšwa sekeng ka Nageng ya Kgoši ka tšhoganetšo.

1.9.3. Re dula re holofela gore Lesolo la Go Utolla Ditaba leo le bopilwego ke Ditona la Dinaga tše di Hlabologago tša Borwa bja Afrika (SADC) le tla kgona go thuša Lesotho go tseba ditsenogare tša maleba. SADC e tšwela pele go se tekateke ka maikemišetšong a yona a go tiišetša, go šireletša le go tšwetša pele temokrasi, khutšo, tšhireletšo le šebešebe ka seleteng se ka go dirišana mmogo le baetapele ba Lesotho.

1.10. Libya

1.10.1. Kabinete e amogela dipoelo go tšwa ka Komiting ya Maemo a Godimo ya Mokgatlo wa Selekane sa Afrika (AU) ka ga Libya maemong a Dihlogo tša Dinaga le Mmušo, yeo e bego e swaretšwe ka Brazzaville, ka Repabliking ya Congo.

1.10.2. Mopresidente Zuma o kgathile tema ka mo Komiting ye ya Maemo a Godimo, yeo e ahlaahlilego le go lekodišiša masolo a go hwetša tharollo ya go ya go ile go dithulano tša bjale ka Libya.

1.10.3. Bjalo ka leloko la Komiti ya Maemo a Godimo go Libya, Afrika Borwa e thekga masolo ka moka a AU ao a ikemišeditšego go tliša tharollo ya khutšo go mathata a ka Libya.

1.10.4. Kabinete e bušeletša seo se boletšwego ke Mopresidente Zuma ge a re Afrika Borwa e itokišitše go thuša Libya ka masolong a go Agaleswa le Tlhabollo ka morago ga dikgaruru tša naga ye le go fana ka maitemogelo a naga ya rena a mabapi le poelano, go ngwala molaotheo le phetošo ya Mmušo ka temokrasi.

1.10.5. Kabinete e bušeletša bohlokwa bja ditherišano tša boditšhabatšhaba tšeo di kgokagantšwego le tšeo di nyalantšhitšwego ka Libya.

1.11. Khonferentshe ya Mekgatlo (CoP13)

1.11.1. Kabinete e lemoga gore Afrika Borwa, bjalo ka naga ye e saenetšego Kwano ya Mokgatlo wa Dinagakopano (UN) ya go Lwantšhana le go Rema Mehlare, e kgatha tema ka Kopanong ya bo 13 ya COP13 yeo mo lebakeng le e swaretšwego ka Ordos, PRC go tloga ka la 6 go fihla ka la 16 Lewedi 2017.

1.11.2. Go emetšwe gore khonferentshe ye e tla feleletša le go amogela tlhako ye mpsha ya motheo ya 2018-2030 yeo e rulagantšwego ka fase ga morero wa “Re šomela Naga ye Kaone go Meloko ya Lehono le ya ka Moso”. Afrika Borwa e tla šoma go netefatša gore melawana e fetošwa ditiro tše di bonagalago.

1.11.3. Afrika Borwa e tla šoma le dinaga ka moka tša ka Afrika go tšwetša pele maemo a naga ye le a khonthinente. Karolo ya Maemo a Godimo ya khonferentshe ye e tla lekodišiša le go fana ka tlhahlo ya sepolotiki go mathata a merero yeo e tšwelelago a mabapi le go rema mehlare, go mpefatša naga le komelelo.

1.11.4. Kabinete e ipiletša go maAfrika Borwa ka moka go šireletša le go hlokomela tikologo ka nepo ya go e bolokela meloko ya ka moso.

1.12. Basepediši ba dinamelwa tša bohle

1.12.1. Kabinete e kgalema ditiro tša dikgaruru, go tšhuma ga difatanaga tša dithekisi tša bohle le ditiro tša botšhošetši gareng ga Basepediši ba Dithekisi tša Dimetara le E- Hailing Partners tšeo di hlagilego ka Sandton, ka Johannesburg.

1.12.2. Kabinete e ipiletša go ditheo tša phethagatšo ya molao go šomana le badiri ba dikgaruru le bao ba tšhošetšago go lebeletšwe ditlhagišo tša Molaotheo.

1.12.3. Ditiragalo tše di phamoga go masolo ao a kopantšwego a ka mo nageng a go hloma seemo sa kgwebo ye e lokologilego le phadišano ye kaone.

1.13. Makhanselara

1.13.1.1. Kabinete e kgalema ditlhaselo le dipolao tša makhanselara ka diprofenseng tše dingwe ebile e lebiša mahloko a yona a magolo go ba lapa le go bagwera ba bao ba bolailwego. Se se kgahlanong le ditlhagišo tša Molaotheo, ebile di phamoga go temokrasi ya rena ya tlhabollo le tokelo ya batho ya go kgetha baemedi ba bona ba setšhaba.

1.13.2. Go tloga mathomong a ngwaga, go bile le mahu a mmalwa ka KwaZulu-Natal gomme mo nakong ye e sa tšwago go feta, go begilwe gape mahu ka Kapa Bohlabela.

1.13.3. Dikgaruru tše di tšere maphelo a balwelatokologo ba bafsa, go akaretšwa Mongwaledi Pharephare wa peleng wa Mokgatlo wa Bafsa wa African National Congress (ANCYL) Sindiso Magaqa, yo a bego a sa na le tše ntši tšeo a ka thušago ka tšona go ageng ga Afrika Borwa ye e atlegilego.

1.13.4. Re ipiletša go mekgatlo ya dipolotiki gore e tšwetše pele kgotlelelano gareng ga maloko a yona ebile re ipiletša go ditšhaba go thekga Tirelo ya Maphodisa ya Afrika Borwa go dira dinyakišišo tša bona.

1.14. Kgwedi ya Bohwa

1.14.1. Kabinete e hlohleletša maAfrika Borwa ka moka go tšwela pele go hlompha Kgwedi ya Bohwa ya ngwaga wo ka fase ga morero wa: “Ngwaga wa Oliver Reginald Tambo: Re Keteka Bohwa bja Rena bja Tokologo”.

1.14.2. Kgwedi ye e sepelelana le segopotšo sa mengwaga ye lekgolo go tloga mola OR Tambo a belegwago, yo e lego motho yo a bego a Šireletša Afrika, yo a laeditšego boikgafo bja go se tekateke bja go direla batho ba Afrika Borwa, khonthinente le lefase. Re ketekile gape le segopotšo sa mengwaga ye 40 go tloga mola Steve Bantu Biko a hlokofalago, yo a bolailwego gabohloko ke mmušo wa kgethologanyo.

1.14.3. Tona ya Bokgabo le Setšo, Morena Nathi Mthethwa, o lokollotše lenaneo la go keteka kgwedi ye.

2. Diphetho tša Kabinete

2.1.Kabinete e sedimošitšwe ka ga dipego tša mathomo tša kgatelopele ya phethagatšo ya mošomo tša kotara tša 2017/18 ka ga go tsenywa tirišong ga dipoelo tše di tlago pele tša nako ya gareng ga Moranang le Phupu 2017.

2.2. Mmušo o tšwela pele go ba le kgatelopele ye kgolo ya go tsenya tirišong dipolelo tše di tlago pele tše 14, tšeo di tšwago go Tlhako ya Togamaano ya Lebaka la Magareng ya 2014-2019, yeo e re batametšago go go fihlelela Ponelopele ya NDP ya 2030.

2.3. Kabinete e sedimošitšwe gape ka ga makala ao a itemogetšego dititelego tša go tsenya tirišong gomme ya sedimošwa ka ga dikgato tše di nyakegago gore go akgofišwe kabo ya ditirelo.
Ditshedimošo tša bagaši ba ditaba ka Sehlopha sa Ditona di tla swarwa go fana ka tshedimošo mabapi le dipoelo tša dipego tše ka bekeng ya la 6 Diphalane go fihla ka la 15 Diphalane 2017. Thulaganyo ye e tla fetošwa kgafetšakgafetša gomme ya bewa go www.gov.za.

2.4. Kabinete e dumeletše tšhišinyo ya gore Afrika Borwa e be monggae wa Pontšho ya Boditšhabatšhaba ya Lefase ya Mokgatlo wa Dikgokagano tša Megala ka Lewedi 2018. Ye ke pontšho ya ngwaga ka ngwaga ebile ke seboka sa mmušo le baetapele ba diintasteri go utolla mathata, dilekane le ditharollo, le go tseba dibaka tša peeletšo le ditiro tše kaone tša tlhabollo ya ekonomi ya setšhaba ka go diriša Ditheknolotši tša Tshedimošo le Kgokagano (di-ICT).

Se e tla ba la mathomo tiragalo ye e swarelwa ka Afrika. Ka tiragalong ye, intasteri ya ICT ya Afrika Borwa e tla fiwa sebaka sa go bontšha ditšweletšwa tša yona. Lekala la boeti la ka mo nageng le lona le tla holega ka nakong ye.

3. Ditiragalo tše di tlago

3.1.Mopresidente Zuma o tla eta pele kemedi ya Afrika Borwa go leba Kopanong ya Mehleng ya bo 72 ya Kopanokgothekgothe ya UN ka fase ga morero wa “Re nepišitše Batho: Re Lwela Khutšo le Bophelo bjo Bokaone go Bohle ka Pholaneteng ya Go ya Go ile” ka New York, ka Amerika. Afrika Borwa e tla tšwela pele go šoma gore e fihlelele dipeakanyoleswa ka UN ka ge e kgatha tema ka Kopanong ya bo 72.

3.2. Mopresidente Jacob Zuma bjalo ka Modulasetulo wa Dinaga tše di Hlabologago tša Borwa bja Afrika (SADC), o tla bitša Seboka seo se sego sa mehleng sa Dihlogo tša Dinaga le Mmušo sa Double Troika ka la 15 Lewedi 2017 ka Pretoria

Seboka sa Double Troika Summit se swarwa ka lebaka la ditiragalo tša sepolotiki le tša tšhireletšego tše di sa tšwago go hlaga ka Nageng ya Kgoši ya Lesotho.

3.3. Kemedi ya maemo a godimo ya Afrika Borwa e tla dira tlhagišo ya yona ya mathomo ya phenkgišano ya go swara Phadišano ya Sebjana sa Lefase sa Rakbi ka 2023 ka London ka la 25 Lewedi 2017.

Afrika Borwa e na le maitemogelo ao a tiilego ao a bonwego a go swara ditiragalo tša mohuta wo. Kabinete e rata go bušeletša thekgo ya yona ye e tiilego go Phenkgišano ye gomme e ipiletša go maAfrika Borwa go thekga Phenkgišano ye yeo e tlago tsenya letsogo kudu go tirišano ya setšhaba le kago ya setšhaba gomme e tla šoma bjalo ka seo se hlohleletšago tlhabollo ya dipapadi.

4. Melaetša

4.1.Kabinete e lakaletša badudi ba Jeremane mahlatse le mahlogonolo ge ba itokišetša dikgetho tša Bofeterale tšeo di tlago swarwa ka la 24 Lewedi 2017 go kgetha maloko a Bundestag ya bo 19, yeo le yona ka moragonyana e tlago kgetha Motšhanselara le go bopa mmušo o moswa. Jeremane ke mmeeletši o mogolo ka Afrika Borwa, gomme e lebeletše gore go be le dikamano tše di tšwelago pele, tirišano le selekane.

4.2.Kabinete e lebiša kwelobohloko ya yona go selete sa Caribean gammogo le go dikarolo tša Cuba le Unites Sates ka morago ga tshenyo ye kgolo ye e bakilwego ke Ledimo le Maatla la Irma. Mahloko a magolo a lebišwa go bao ba bego ba ratwa ke bao ba lahlegetšwego ke maphelo a bona le dithoto tša bona ka mo masetlapelong a.

4.3. Kabinete e ba le setšhaba ge se lebogiša Kevin Anderson ge a fihleletše makgaolakgang a US Open. Ke moraloki wa mathomo wa Afrika Borwa wa go fihlelela makgaolakgang a phadišano ye kgolo ya thenese go tloga ka 1994. Re na le tshepo ya gore o tla tšwela pele go aga go phihlelelo ya gagwe ya go phadima gomme a hlohleletša bafsa ba bangwe ba maAfrika Borwa bao ba nago le talente.

4.4. Kabinete e lebogiša Trevor Noah ge a thopile Sefoka sa Emmy ka legorong la Best Short Form Variety Series ka ga kgašo ya gagwe ye e kgethegilego ye e ralokago go YouTube, ya The Daily Show: Between the Scenes.

Dinyakišišo:
Mohumagadi Phumla Williams – Molaodipharephare wa Motšwaoswere (GCIS)
Mogala: 083 501 0139