Kabinete e kopane ka kopanong ya yona ya mafelelo ya 2017 ka Union Buildings ka Pretoria.

A. Dipheto tša Kabinete

1. Kabinete e dumeletše Leano la Bosetšhaba la Lekala la tša Boeti (NTSS) la 2016-2026 gore le tsenywe titišong. NTSS e theilwe go dikokwane tše hlano tša togamaano, e lego kwalakwatšo, go nolofatša phihlelelo ye bonolo go baeti, go maatlafatša maitemogelo a baeng, taolo ya mafelo a boeti le dikholego tše di akaretšago mang le mang.

Sengwalwa ka botlalo se hwetšagala wepsaeteng ya Kgoro ya Boeti ya: www.tourism.gov.za

2. Kabinete e dumeletše tlhako ya go hlongwa ga Khamphani ya Bosetšhaba ya Netweke ya Protepente. E tla hlongwa ka morago ga go kopanywa ga Sentech le Broadband Infraco. Se se tla nolofatša go tsenywa tirišong ga dikarolo tše di amanago ka mokgwa wo o kgokagantšwego le go hloma khamphani ya bosetšhaba ye e etilego pele ka tša diprotepente.

3. Kabinete e dumeletše Pego ya Mathomo ya Kgatelopele ya Ngwaga ka Ngwaga ka ga go Tsenywa tirišong ga Sengwalwa seo se Sekasekwago ka ga Ditokelo tša Batho ba Bagolofadi (WPRPD). Pego ye e akaretša lebaka la nako go tloga ka la 1 Pherekgong go fihla ka la 31 Manthole 2016.

Pego ye e fana ka tshekatsheko ya maemo a godimo ya ka fao dikgoro tša mmušo di thomilego go diriša ditaelo tša melaotshepedišo ya WPRPD ka go dipeakanyo tša tšona, ka ditekanyetšong, le ka kabong ya ditirelo le ka mananeong a go fa dipego.

4. Kabinete e dumeletše go phatlalatšwa ga Tlhako ya Togamaano ya Melawana ka ga Bagolofadi ya Lenaneo la Thuto le Tlhahlo tša ka Morago ga ge Sekolo se Phethilwe gore setšhaba se fe ditshwaotshwao ka ga yona.

5. Kabinete e sedimošitšwe ka ga dipoelo tša Tekodišišo ya Lenaneo la Peakanyoleswa ya Dithekisi yeo e dirilwego ka Dibatsela 2015 go fihla ka Lewedi 2016. Lenaneo le ke karolo ya Leanokakaretšo la Dinamelwa tša Setšhaba, leo le ikemišeditšego go fana ka lenaneo leo le kopantšwego la dinamelwa tše di bolokegilego le tše di šomago gabotse ka Afrika Borwa.

Kabinete e dumeletše gore go swanetše go rerišanwa kudu gomme le mošomo o swanetše go dirwa le dikgoro tša maleba pele ga ge Kgoro ya Dinamelwa ya Bosetšhaba e ka phethagatša mokgwa wo o bušeleditšwego.

6. Kabinete e dumeletše go lokolla go setšhaba kgatišo ya boseswai ya Dilaetši tša Tlhabollo (ya 2016). Pego ya Dilaetši tša Tlhabollo e lebeletše kudu tlhabollo ya Afrika Borwa go tloga mola go bago le temokrasi ebile e hlokometše phethagatšo ya Leanotlhabollo la Bosetšhaba (NDP): Nepo ya 2030.

7. Kabinete e dumeletše magato a go maatlafatša taolo ya maitshwaro a makaone a bašomi ba mmušo mabapi le bahlankedi bao ba dirago kgwebo le ditheo tša mmušo. Se se dira gore go be le Melawana ya Tirelo ya Mmušo ya 2016, yeo e iletšago bašomi ba mmušo go dira kgwebo le Mmušo. Go tloga ka la 1 Hlakola, Kgoro ya Ditšhelete ya Bosetšhaba, e thekgilwe ke Kgoro ya Tirelo ya Setšhaba le Taolo (DPSA), di tla hlokomela dingwadišo tše diswa ka moka Lenaneong la Bogareng la Baabi kgahlanong le Lenaneo la Persal.

8. Kabinete e dumeletše Lenaneo le Leswa la Taolo ya Phethagatšo ya Mošomo le Tlhabollo la Kgoro ye, leo le laetšago kgokagano ka go nepagala gareng ga motho le mošomo wa kgoro. Le tla thoma go šoma ka la 1 Moranang 2018.

9. Kabinete e dumeletše go tsebagatšwa le go tsenywa tirišong ga Tlhako ya Setlamo sa go Thwala Dialoga tša Thuto ka go Tirelo ya Mmušo. Se se bopa karolo ya lenaneotlhabollo ka gare ga Tirelo ya Mmušo ka nepo ya go thwala dialoga tša thuto tše di nago le talente ka Tirelong ya Mmušo.

Tlhako ye e akaretša go diriša persente ya dikgoba tša mošomo tša kgoro ye nngwe le ye nngwe gore go thwalwe dialoga ka mešomong yeo e sa hwetšagalego gabonolo. Tona ya DPSA e tla amanya gape tlhako ye le Lenaneo la Tirelo ya go Thwala Bafsa Mešomong.

10. Kabinete e dumeletše gore go phatlalatšwe Ditsebišo tše di latelago ka gare ga Kuranta ya Mmušo tša mabapi le Peakanyoleswa ya Tirelo ya Molao ya Dikgorotsheko, yeo e ikemišeditšego go oketša phihlelelo go toka go batho bao ba hlokišitšwego dibaka mo nakong ye e fetilego le go metse ya dinagamagaeng yeo e hlokago ditirelo. Peakanyoleswa ye e ka dileteng tša maseterata ka Foreisetata le ka Kapa Leboa, le go tlošwa ga Dilete tše dingwe tša Maseterata ka Karolong ya Gauteng ya Kgorotsheko ya Godimo le go di bea ka fase ga tirelo ya molao ya Karolo ya Leboa Bodikela ya Kgorotsheko ya Godimo.

11. Kabinete e dumeletše Taolo ya Melawana ya Poelanyo go latela Molao wa Tšhireletšo ya Dipeeletšo wa 2015 (Molao wa 22 wa 2015). Melawana ye e hlagiša gore ge mmeeletši a na le pelaelo mabapi le kgato ye e tšerwego ke mmušo ye e amago peeletšo, a kgopele Kgoro ya Kgwebišano le Diintasteri (dti) go tsena gare ka kgonagalo ya go diriša mokgwa wa poelanyo.

12. Kabinete e dumeletše go kgokaganywa le go swarwa ga dikhonferentshe tše di latelago:

Khonferentshe ya Bosetšhaba ya Ditherišano ya Lenaneo la Bašomi ba Tlhabollo ya Setšhaba ya 2018 ka DPSA.
Khonferentshe ya Boditšhabatšhaba ya bo 23 ya Ngwaga ka Ngwaga ya Mokgatlo wa Basekiši, ye monggae wa yona e tla bago Bolaodi bja Bosetšhaba bja Bosekiši ka Lewedi 2018.
Seboka sa Lefase sa tša Mahlale sa 2021 seo se tlago swarwa ka Afrika Borwa. Kgoro ya Mahlale le Theknolotši e tla rerišana le Komiti ya Lebakanyana ya Seboka sa Lefase sa tša Mahlale mabapi le kgonagalo ya go ba monggae wa seboka se.
Poledišano ya Maemo a Godimo ya 2017 ya Mokgatlo wa Selekane sa Afrika (AU), ye monggae wa yona e tla bago DPSA go tloga ka la 6 go fihla ka la 8 Manthole 2017.

13. Kabinete e dumeletše gore go dirwe molokoloko wa ditšhelete tša tšhipi tša go hlangwa le go keteka tšeo di tlago phatlalatšwago setšhabeng ka 2018.

Ditlhamo tše tša ditšhelete tša tšhipi, tšeo di nago le dikgoeletšo, di tla gatišwa ka gare ga Kuranta ya Mmušo:

Krugerrand ya gauta ya 2018 2oz, ya 22-carat;
Molokoloko wa ditšhelete tša tšhipi tša Natura tša 2018 tša 24-carat (Go hlaga ga Kgolomodumo – Archosauria);
Molokoloko wa ditšhelete tša tšhipi tša gauta tša R1 tša 2018 tša 24-carat (Digagabi tša Afrika Borwa –khudu);
Tšhelete ya tšhipi ya R5 ya dimetale tše pedi ya 2018 yeo e tlago šomišetšwa go rekia ka yona (Ngwagakgolo wa Mandela);
Molokoloko wa ditšhelete tša tšhipi tša gauta tša 24-carat tša 2018 le tša silibere ya steling tša Phrotea (Bophelo bja Mogale – Nelson Mandela);
Molokoloko wa Kheraone ya R2 ya silibera ya steling tša 2018 le Teke ya 2 ½ (Dihlangwa tša Afrika Borwa – Popego ya Diswantšho tša X-ray Khomphuteng); le
Molokoloko wa ditšhelete tša tšhipi tša silibere ya steling tša 2018 tšeo mafelelong a tšona di kgabišitšwego ka mebalabala (Dinonyana le Matšoba a Lefelo la Bolotatlhago bja Diphedi tša Tikologo).

B. Merero seeming sa bjale

14. Dipoelo tša Palomoka ya Letseno la ka Nageng (GDP)

Kabinete e thabišwa ke kgolo ya ekonomi ya Afrika Borwa ye e gotšego ka 2% ngwaga ka ngwaga ka kotareng ya boraro ya 2017, go tloga go 2.8% ye e bušeleditšwego ka kotareng ya bobedi. Go šoma gabotse go feta ka fao go bego go emetšwe ga ekonomi go bakilwe kudu ke kgolo ye maatla ya ka lefapheng la temo, leo le bilego le seabe sa 0.9 ya dintlha tša dipersente go kgolo ya kakaretšo ya ka morago ga 44.2% ya kgolo ya kotara ka kotara.

Go šoma ka maatla ga lefapha la temo, leo le bilego le kgolo ya godimo ka go latelana ga dikotara tše tharo, go bakilwe ke tšweletšo ya godimo ya dibjalo tša ka mašemong (tša go swana le lefela) ka mafelong ao a nelwago ke dipula tša selemo le ditšweletšwa tša ka dirapaneng. Lefapha la meepo le la botšweletši le tšona di bile le seabe go kgolo ye e bonwego, fao lefapha la meepo le la go epa makgwara le bilego le kgolo ye e oketšegilego ka 6.6% gomme la ba le seabe ka 0.5 ya dintlha tša dipersente go kgolo ya ekonomi.

Lefapha la mohlagase le bile le phuhlamo ye kgolo, ka ge le theogetše fase ka 5.5%. Kgolo ka tšhomišong ya ka malapeng ya 2.6% e bakilwe kudu ke go šomiša tšhelete go dithoto tša boleng bja godimo, gomme go tsentše letsogo ka 1.6 ya dintlha tša dipersente tša kgolo ya 2.6%. Kgolo ya go feta ka fao go emetšwego le pušeletšo ya go ya godimo ka go dipoelo tša kgolo ya kotara ya bobedi e ra gore kgolo e ka fihla go 0.9% ka 2017.

Se ke palo ya godingwana go feta 0.7% ye e bego e emetšwe ka nako ya Polelo ya Melawana ya Ditekanyetšo tša Lebaka la Magareng. Mmušo o swanetše go netefatša gore kgolo ye e tšwetšwa pele ka go tšwela pele go tsenya tirišong magato a 14 a go thuša boitshepo ao a agago go go kaonafatša boitshepo bja badiriši gomme a ka bušetša sekeng boitshepo bja kgwebo.

15. Sehlongwa sa Merero ka Moka ya Dipeeletšo sa InvestSA

Kabinete e amogela go tsebagatšwa semmušo ga Sehlongwa sa Merero ka Moka ya Dipeeletšo sa InvestSA ka KwaZulu-Natal ke Mopresidente Jacob Zuma bjalo ka karolo ya masolo a go kaonafatša bonolo bja go dira kgwebo ka Afrika Borwa. Se ke Sehlongwa sa Boraro sa Merero ka Moka ya Dipeeletšo se se tsebagaditšwego semmušo ka mo nageng. Le ikemišeditše go hlama seemo se sekaone ka go fana ka lefelo le bohlokwa la go kopana le babeeletši ka nepo ya go hwetša ditirelo ka moka ka nepo ya go akgofiša diprotšeke le go fokotša mollwane wo o beilwego ke mmušo ge ba thoma kgwebo.

16. Dikamano tša Afrika Borwa le Angola

Kabinete e amogela ditumelelano tše di saenetšwego nakong ya ge Mopresidente wa Angola João Manuel Gonçalves Lourenço a be a etetše Semmušo ka mo Afrika Borwa. Ditumelelano tše di latelago di saenetšwe: Memorantamo wa Tirišano (MoU) ka ga tlhamo ya Khomišene ya Dipresidente tša dinaga tše ka bobedi, MoU ka ga Tirišano ka Lefapheng la Tikologo, Ditlhahli tša Phethagatšo ya go fedišwa ga visa, Tshepedišo ka ga Tirišano ya Maphodisa le Tumelelano ka ga Thušano ya Bolaodi ka Mererong ya Metšhelo ya Dithoto.

17. Seboka sa Bohlano sa AU le Mokgatlo wa Selekane sa Yuropa (EU)

Kabinete e amogela dipoelo go tšwa go Seboka sa Bohlano sa AU le EU. Seboka se se file Afrika Borwa sebaka sa go maatlafatša dikamano tša togamaano mabapi le ekonomi le tša botseta ka go diriša ditherišano tša mehutahuta ka samiting le ka dikopanong tša ka thoko tša go swana le Seboka sa tša Kgwebo le Seboka sa Bafsa, go lebeletšwe kgolo ya ekonomi ye e akaretšago mang le mang, go thwala bafsa mešomong le bohlomi bja dikgwebo.

18. Go kgweba ka bana ba thari ye ntsho ba bafaladi ba Afrika bjalo ka makgoba

Kabinete e ba le setšhaba sa boditšhabatšhaba ge se kgalema dipego tša go fantisa bana ba thari ye ntsho ba bafaladi ka Libya bjalo ka makgoba. Ditiro tšeo di sego tša botho di kgahlanong le ditlhologelo tša AU, le melao ya maleba ya Afrika le ya boditšhabatšhaba, go akaretša Tšhata ya Afrika ka ga Ditokelo tša Botho le tša Batho.

Kabinete e amogela go tsebagatšwa ga bolaodi gore ba tla hloma lefelo la dinamelwa le la go tloga ka Tripoli go bafaladi le batšhabi bao ba hlokago tšhireletšo ya boditšhabatšhaba.

19. Go phatlalala ga bolwetši bja Listeriosis

Kabinete e ipiletša go batho ka moka go ba le šedi kudu ka fao go kgonagalago – go swana le go hlapa diatla tša bona pele ga ge ba apea dijo le go efoga go ja dijo tše tala goba tše di sego tša apeiwa – ka nepo ya go fediša go phatlalala ga Listeriosis, mola e le gore diphatišišo di tšwela pele go hwetša seo se bakago paktheria ye.

Bolwetši bjo bo bakwa ke paktheria ye e hwetšwago ka mobung, ka meetseng, ka dimeleng le ka go ditšweletšwa tša maswi tšeo di sego tša apeiwa, gomme bjona bo ka feletša ka maswao a go swana le a mokhwehlane le letšhologo. Bo ka alafšwa ka katlego ka dianthipayothiki, ge bo ka utollwa e sa le nako.

Kabinete e ipiletša go maAfrika Borwa go tšwele pele go šomiša meetse ka go a seketša ka ge naga e sa tšwela pele go itemogela komelelo. Go sa balwe dipula tše di sa tšwago go na, maemo a matamo nageng ka bophara a tšwela pele go phuhlama. Se ke ka lebaka la dithempheretšha tša godimo gammogo le gore ga se ra hlwa re eba le dipula tše di nago nako le nako.

Kabinete e hlohleletšwa ke ditherišano tše di tšwelago pele le mebasepala ye e tsenego dikolotong kudu ka nepo ya go hwetša tharollo ya dikoloto tša mebasepala.

C. Melaokakanywa

20. Kabinete e dumeletše go romelwa ga Melaokakanywa ye e latelago Palamenteng:

20.1. Molaokakanywaphetošwa wa Thušo ya tša Leago wa 2017

Molaokakanywa wo o hlagiša dikholego tše di kaonafetšego mabapi le ditšhelete tša mmušo tša kgodišo ya bana go bana bao ba hlokofaletšwego ke batswadi le bao ba lego kotsing, go akaretšwa bao ba dulago ka malapeng ao a hlokometšwego ke bana.

20.2. Molaokakanywa wa Bašomi ba Dintlo wa 2017

Molaokakanywa wo o fediša Molao wa bjale wa Merero ya tša Dintlo wa 1976 (Molao wa 112 wa 1976). O hloma seemo seo se kgontšhago sa taolo go maatlafatša tiragalo ya ekonomi ka intastering ya dintlo mola ka go le lengwe o rarolla tlhokego ya go netefatša gore go ba le phetogo ka lefapheng le.

20.3. Molaokakanywaphetošwa wa Tlhako ya Mangwalo a Dithuto a Bosetšhaba (NQF) wa 2016

Molaokakanywa wo o maatlafatša Molao wa Bjale wa NQF wa 2008 (Molao wa 67 wa 2008). O tsebagatša magato a go šoma ka mathata a ge batho ba bolela maaka gore ba na le mangwalo a dithuto ebile o hlagiša ditlamorago tšeo batho bao ba bolelago maaka gore ba na le mangwalo a dithuto ba tlago lebana le tšona goba go ditheo tša thuto tšeo di fanago ka mangwalo a dithuto ao a sego molaong.

20.4. Molaokakanywa wa Bosenyi bja Boditšhabatšhaba wa 2017

Molaokakanywa wo o hlagiša tlhako ya melao ye e kaonafetšego ya go šoma ka bosenyi bjo bo dirilwego ka Afrika Borwa le go ralala le mollwane wa rena. O hlagiša gape tšhireletšo le toka tše di kaonafetšego go batšwasehlabelo ba bosenyi bja boditšhabatšhaba.

D. Melaetša

21. Kabinete e lebogišitše:

21.1. Mopresidente Uhuru Kenyatta ge a hlomamišitšwe semmušo bjalo ka Mopresidente wa Repabliki ya Kenya le lebakanako la gagwe la bobedi ka mmušong bjalo ka mopresidente. Kabinete e letetše go aga go kamano ye e tiilego yeo dinaga tša rena ka bobedi di nago le yona.

21.2. Mopresidente Emmerson Dambudzo Mnangagwa ge a hlomamišitšwe semmušo bjalo ka Mopresidente wa Repabliki ya Zimbabwe. Kabinete e letetše go tšwetša pele kamano ye e tiilego ya tšhomišano le Mmušo wa Zimbabwe.

21.3. Majoro Seitebatso Pearl Block ge a thopile Sefoka sa Mokgatlo wa Dinagakopano (UN) sa Mohlohleletši wa Ngwaga wa tša Bong ka Mašoleng. Sefoka se se lemoga boikgafo le maitapišo a motlišakhutšo ge a tšwetša pele metheo ye ka gare ga Kwano ya bo 1325 ya Lekgotlatšhireletšo la UN, leo le ipiletšago go batho ka moka bao ba nago le dithulano go šireletša basadi le basetsana go dikgaruru tša thobalano le tše di amanago le bong.

21.4. Sehlopha sa Ladysmith Black Mambazo, seo se hweditšego ditšhišinyo tše pedi tša maina go Difoka tša Grammy tša 2018. Tšhišinyo ya mathomo e ka legorong la Alepamo ye Kaone ya Mmino wa Lefase ka alepamo ya bona ya Shaka Zulu Revisited: 30th Anniversary Celebration, gomme tšhišinyo ya bobedi e ka legorong la Alepamo ye Kaone ya Bana ka Songs of Peace & Love for Kids & Parents around the World. Difoka tša Grammy di rulagantšwe gore di tlo swarwa ka la 28 Pherekgong 2018.

21.5. Chad Le Clos, ge a bile moruthi wa mathomo wa monna nageng ya rona wa go thopa dithaetlele tše nne diphadišanong tša Sebjana sa Lefase sa Go Rutha tša FINA. Re ikgantšha ka phihlelelo ya gagwe ebile re na le boitshepo bja gore o tla tšwela pele go emela Afrika Borwa ka bokgoni bjo bogolo.

21.6. SuperSport United, ge e fihleletše makgaolakgang a Sebjana sa Khonfetereišene ya Kgwele ya Maoto ya Afrika.

21.7. Masebotsana wa Afrika Borwa, Demi-Leigh Nel-Peters, ge a filwe sefoka sa Masebotsana wa Lefase ka phadišanong ya bo66 ya bomasebotsana ka Amerika (USA) mo nakong ye e sa tšwago go feta.

21.8. Ngaka Nkosazana Dlamini-Zuma, yo a abetšwego Sefoka sa Phihlelelo ya Bophelo Ka moka ke Seboka sa Lefase ka Bophara sa Baetapele ba Dipolotiki ba Basadi.

22. Kabinete e lebiša mahloko a yona go:

22.1. Mmušo le go batho ba Egepeta ka morago ga tlhaselo ya botšhošetši go mosque ka Pheninsuleng ya Sinai yeo e bolailego batho ba go feta ba 300 gomme ya gobatša ba bangwe ba mmalwa. Kabinete e kgalema tlhaselo ye e sa kwagalego go badudi bao ba se nago le molato.

22.2. Mmušo le batho ba Nigeria ka morago ga go thuthupa ga pomo ya moipolai ka la 21 Dibatsela 2017 ye e bolailego batho ba 50 gomme ya gobatša ba bangwe ba bantši. Kabinete e bušeletša kgalemo ya yona ya mabapi le maitshwaro le ye e kwešišegago gabotse go ditiro tša botšhošetši le tša magogelathoko ao a dirago dikgaruru.

22.3. Ba lapa le bagwera ba Ngaka Mochubela ‘Wesi’ Seekoe, mogale wa molwelatokologo le Motseta wa peleng wa Afrika Borwa ka Fetereišeneng ya Russia. O šometše naga ye ka bokgoni bjo bogolo bjalo ka Motseta wa Afrika Borwa ka Russia le bjalo ka Modulasetulo wa Koporase ya Enetši ya Nyutleleara ya Afrika Borwa. Mopresidente Zuma o begile gore a direlwe Poloko ya Semmušo ye e Kgethegilego ya Profense.

22.4. Ba lapa le bagwera ba mogale wa Ntwa ya tokologo le mogolegwa wa peleng wa Robben Island, Morena Eddie Daniels, yo a sa tšwago go hlokofala mo nakong ye e sa tšwago go feta. O tla gopolwa ka boikgafo bja gagwe bja go direla setšhaba le go direla batho ba Afrika Borwa.

22.5. Ba lapa le bagwera ba Tona ya Tšhireletšo le Bagale ba Ntwa, Mohumagadi Nosiviwe Mapisa-Nqakula, ka go hlokofala ga tatagwe, Morena Douglas Mapisa. O hlokofetše Sepetleleng sa Cecilia Makiwane ka East London, Kapa Bohlabela a na le mengwaga ye 96.

E. Ditiragalo tše di tlago

23. Go ketekwa ga mengwaga ye lekgolo ya Nelson Mandela

Kabinete e ba le maAfrika Borwa ge ba keteka segopotšo sa bone sa go hlokofala ga Nelson Mandela ka la 5 Manthole 2013. Ka 2018 naga ye e tla keteka mengwaga ye lekgolo ya bophelo bja Mandela gomme maAfrika Borwa ka moka a hlohleletšwa go tsenela moketeko wa ngwaga ka moka ge re gopola yo mongwe wa barwa ba bakaonekaone ba Afrika.
Kabinete e leboga maAfrika Borwa ka moka ge ba kgathile tema ka ditiragalong tša mehutahuta tša go keteka OR Tambo go ralala le naga ebile e letetše maemo a go swana le a a go kgatha tema ge re gopola mogale wa rena le Mopresidente wa mathomo wa Afrika Borwa yo a kgethilwego ka tsela ya temokrasi, Madiba.

24. Sehla sa Matswalo a Morena

Kabinete e lakaletša maAfrika Borwa ka moka sehla sa matswalo a morena sa lethabo le seo se bolokegilego. Re ipiletša go bao ba tla bego ba tšea maeto go netefatša gore difatanaga tša bona di loketše tsela. Bašomiši ba ditsela ka moka, baotledi le basepelakamaoto ba swanetše go obamela melao ya tsela.

Tona ya Dinamelwa, Morena Joe Maswanganyi, o tsebagaditše semmušo lesolo la Arrive Alive ka Bela-Bela, Limpopo ka la 5 Manthole. Tirelo ya Maphodisa ya Afrika Borwa (SAPS) e tsenya tirišong lesolo la yona la naga ka bophara la sehla sa Matswalo a Morena seo se bolokegilego gomme ka moka re rwele maikarabelo a go thekga SAPS ka go obamela molao le go itshwara ka maikarabelo.

Kgoro ya Merero ya Selegae e tla tsebagatša maano a sehla sa Matswalo a Morena sa 2017/18 sa seemo sa mellwane ya Afrika Borwa. Se ke go dira gore go be le nolofatšo ye e hlokago mathata le taolo ye e maatlafaditšwego ya go sepetšwa ga batho le dithoto go tsena le go tšwa ka Afrika Borwa mo lebakeng le la go tlala ga batho mellwaneng.

Re ipiletša gape go batswadi le go bahlokomedi ba bana gore ba se tlogele bana ba se ba hlokomelwa ka ge e le mošomo wa rena wa go hlokomela bana ba rena.

Kabinete e thabile ge ditlhahlobo tša Marematlou di tšwetše pele ka ntle le ditiragalo tše kgolo ebile e lakaletša baithuti ba marematlou ba 2017 mahlatse le mahlogonolo ge ba emetše dipoelo tša bona tša mafelelong a ngwaga.

F. Bao ba thwetšwego mešomong

Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.

25. Mohumagadi Ilise Karg bjalo ka moemedi wa dti ka go Lekgotlakeletšo la Boitlhamelo la Bosetšhaba.

26. Lekgotla la Dithrasti la Sekhwama sa Maatlafatšo sa Bosetšhaba:

26.1. Mohumagadi Nonkqubela Helen Maliza;
26.2. Mohumagadi Lerato Cynthia Molefe;
26.3. Mohumagadi Nthabiseng Mateboho Moleko;
26.4. Morena Ernest Kwinda; le
26.5. Morena Sipho Zikode (moemedi wa dti).

27. Morena Sandile Mkhize, bjalo ka Mohlankedimogolophethiši (CEO) wa Magalies Water.

28. Morena Wiseman Mkhize, bjalo ka leloko la Lekgotla la Molaodi wa Bosetšhaba wa Enetši wa Afrika Borwa (NERSA).

29. Morena Phakamani Buthelezi, bjalo ka CEO ya Overberg Water.

30. Moatbokheiti Samuel Vukela, bjalo ka Molaodipharephare (DG) wa Kgoro ya Mešomo wa Setšhaba.

31. Mohumagadi Brenda Sibeko, bjalo ka Motlatša Molaodipharephare (DDG) wa Tšhireletšego ya tša Leago ka Bophara ka go Kgoro ya Tlhabollo ya Leago.

32. Morena Zephania Nhleko, bjalo ka DDG wa Peakanyo ya Ekonomi le Kgokaganyo ka go Kgoro ya Tlhabollo ya Ekonomi.

33. Morena Mandla Victor Ngcobo, bjalo ka DDG: Mohlankedimogolo wa Tshedimošo wa Mmušo ka go DPSA.

Dinyakišišo:
Mohumagadi Phumla Williams – Molaodipharephare wa Motšwaoswere (GCIS)
Mogala: 083 501 0139