Kabinete e kopane ka Laboraro, 4 Mosegamanye 2018, ka Union Buildings, Pretoria.

A. Merero seemong sa bjale

1. Kgwedi ya Mandela

Kabinete e ipiletša go maAfrika Borwa go “Ba Bohwa” ge re lebile Letšatšing la Boditšhabatšhaba la Nelson Mandela ka la 18 Mosegamanye 2018. Kopanoditšhaba (UN) e amogetše letšatši le, leo le dumelelago maAfrika Borwa le setšhaba sa lefase go hlompha Mopresidente wa rena wa maloba wo gape e lego leswao la boditšhabatšhaba, Nelson Rolihlahla Mandela.

Mmušo o tsebišitše Mosegamanye bjalo ka Kgwedi ya Mandela, yeo e lego kgwedi ya matswalo a gagwe. Bjalo ka karolo ya meketeko ya letšatši la matswalo makala a go fapana a thomile mananeo a mmalwa go hlompha mošomo le bohwa bja Madiba. Ka Labohlano, go tla išwa tlhompho ya go ikgetha go dikgahlego tša gagwe ditabeng tša mešomo le bašomi ba bafsa, ge lenaneo la Wear South Africa, ka tirišano le Motheo wa Nelson Mandela (NMF) le Mokgatlo wa Bašomi wa Dilogwa le Diaparo wa Afrika Borwa, le thakgola T-šete ya Nelson Mandela ka Durban.

T-šete ye e dirilwego mo gae e gona mo mabenkeleng a kgwebjana a ketapele gomme dipoelo go tšwa thekišong ya yona di tla ya go NMF go thekga mešongwana ye e sepelelanago le pono le bophelo bja gagwe. Tona ya Tlhabollo ya Ekonomi, Morena Ebrahim Patel, o tla bolela le baeng legatong la mmušo. Kabinete e hlohleletša maAfrika Borwa go thekga lesolo la Reka tša Gae le go apara diaparo tše di dirilwego mo gae ka boikgantšho.

Kabinete e ipiletša go batho ka moka go ba karolo ya mogato wa phetogo. Ka go šoma mmogo bjalo ka setšhaba se se kopanego, sa go se be le kgethollo ya morafe le kgethollo ya bong, re ka thekga bohwa bja Madiba. Kabinete e ipiletša go maAfrika Borwa ka moka go gafa metsotso ye 67 ya nako ya bona ka la 18 Mosegamanye go kgatha tema go tlišeng phetogo maphelong a batho ba go hloka.

2. Peeletšo

Kabinete e amogela go bewa maemong a godimo a kgwebišano ga kgauswanyana ga Old Mutual go JSE. Go bewa lenaneong ga khamphani ya go ba le letlotlo la mmaraka la US$10bilione (R130 bilione) ke kgetho ye bohlokwa ya kholofelo ka Afrika Borwa le mebaraka ya ditšhelete ya gae.

Kabinete e leboga gore go bewa maemong a godimo a kgwebišano ka Afrika Borwa go bušetša Old Mutual medung ya yona ya Afrika gomme e fediša nako ya yona bjalo ka sehlopha sa ditirelo tša ditšhelete tšeo di lego ka London. Boikgafo bja Old Mutual bja go hlola matlotlo a R500 milione go godiša tlhabollo ya ekonomi ya gae, kudu ka dikgwebo tše nnyane tša bathobaso, e tla kaonafatša maitapišo a naga a go aga ekonomi ya kakaretšo. Re ipiletša go ditirišano tše dingwe mo dikarolong tša ditšhelete go dira didirišwa tše dingwe tša go swana tša matlotlo a tlhabollo ka poledišano le mmušo.

Dipoledišano tša Foramo ya Ekonomi ya Lefase tša kgauswanyana ka ga Peeletšo di beetšwe go bontšha bohlokwa bja Afrika Borwa bjalo ka lefelo la dipeeletšo tše di oketšegilego tše difsa. Dipoledišano di tsenetšwe ke kemedi ye kgolo ya bahlenkedibagolophethiši ba difeme tša mo gae le tša boditšhabatšhaba, bao ba šomišanego le Mopresidente Cyril Ramaphosa le kemedi ya Ditona tša Kabinete. Dipoledišano di thušitše ka go utolla ditekanyo go oketša magato a peeletšo gomme ke kgato ye bohlokwa go Khonferense ya Peeletšo yeo e tla beakanywago ke Mopresidente moragonyana ngwaga wo.

3. Go tšewa ga naga

Kabinete e leboga go thoma ga tshepetšo ya go kgatha tema ga setšhaba ya Palamente go sekaseka Karolo ya 25 ya Molaotheo wa Repabliki ya Afrika Borwa ya 1996, yeo e tla dumelelago go tšewa ga naga ntle le tefo. Palamente e hlomile Komiti ya Tshekatsheko ya Molaotheo go swara ditheeletšo tša setšhaba nageng ka bophara ka morago ga go fetiša kgato ya go tšea naga ntle le tefo. Ditheeletšo tše tša setšhaba di tla ba gona diprofenseng tše senyane ka moka go fihla ka Phato 2018.

Kabinete e ipiletša go mahlakore ka moka go kgatha tema ka khutšo mo ditheeletšong tše gomme e ipiletša go setšhaba go kgotlelelana mo dikgopolong tša go fapana tšeo di ka hlagišwago, go kgonthiša gore batho ka moka ba na le dibaka tša toka tša go kgatha tema mo ditheeletšong.

Kabinete e bontšhitše gape ka dingongorego tšeo di tšweleditšwego ke baetapele ba setšo ka ditaba tša naga. Ka lebaka leo, e kgethile sehlopha sa Ditona go dirišana le baetapele ba setšo go boledišana le go hwetša tharollo ye botse go dingongorego tša bona. Tona ya Tirišano ya Makala a Mmušo le Merero ya Setšo (Cogta), Ngaka Zweli Mkhize, ke mokgokaganyi gomme o thekgwa ke Tona ya Temo, Dithokgwa le Boreahlapi Senzeni Zokwana, Tona ya Tlhabollo ya Dinagamagae le Peakanyoleswa ya Naga Maite Nkoana-Mashabane le Tona ya Dikgokagano Nomvula Mokonyane.

4. Sehla sa motšhelo

Kabinete e hlohleletša balefamotšhelo go iša difomo tša bona tša metšhelo tša ngwaga le ngwaga tša sehla sa motšhelo sa 2017/18, seo se buletšwego go faelwa ka la 1 Mosegamanye 2018. Kgobokanyo ya matlotlo ye botse ya mohola e kgonthiša taolo ya ekonomi, gomme go iša difomo tšeo di tladitšwego gabotse ka nako go kgonthiša gore balefamotšhelo ba dula ba phethagatša. Matlotlo a motšhelo a thuša mmušo go thekga diprotšeke tša go aba ditirelo tša naga le mananeo a mangwe a tlhabollo ya ekonomi ya leago.

5. Theko ye e okeditšwego ya Petrolo

Kabinete e lemogile koketšo ya kgauswanyana ya dibešwa, yeo e latelago koketšo ye nngwe mo kgweding ya go feta. Go akanywa go tla ba le koketšo ye nngwe ya dibešwa kgwedi ye e tlago. Theko ye e boletšwego ya Tola ya Oli ye Tala e dutše e ama ditheko ka kakaretšo tša petrolo, tisele le parafini. Phetošetšo ya tswalo ya tšhelete go tola ya Amerika e fokotšegile ka go feta phesente ye tee go tloga mathomong a Mopitlo ngwaga wo.

Diphetogo tše tša tšhelete tša leboo, tšeo di dirago gore go be le theko ya go fetogafetoga, di bile le khuetšo ye mpe go badiriši, kudu bahloki. Koketšo ya theko ya petrolo e ama ditefo tša dinamelwa le ditheko tša dijo thwii, kudu theko ya dijo tša motheo le dihlare.

Kabinete e kgonthišetša maAfrika Borwa gore mmušo o swaragane le magato a go kaonafatša ditlhohlo tšeo ditšhaba tša go hloka di lebanego le tšona. Kgoro ya Ditšhelete tša Setšhaba e thwetše phanele ya maloko a senyane ya ditsebi go sekaseka lenaneo la gonabjale la dilo tšeo di sa lefišwego Motšhelo wa Dithoto leo gonabjale le nago le dijo tša motheo tše 19. Mopresidente Ramaphosa o etile pele sehlopha, seo se nago le baemedi go tšwa go bobedi dikarolo tša mmušo le tša praebete, go tliša babeeletši ba bantši ka mo nageng gore go godišwe ekonomi le go hlola mešomo ye mentši yeo e hlokegago, kudu go bafsa bao ba sa šomego.

Kabinete e ipiletša go lekala la praebete go thuša, ka go se oketše ditheko ka pela ka lebaka la koketšo ya theko ya dibešwa. Se e tla ba go šireletša bahloki, bao ba angwago thwii ke go fetogafetoga mo ga ditheko. Go godiša ekonomi go tla šireletša go se fetogefetoge ga ekonomi ya rena. Kabinete e ipiletša gape go lekala la praebete go dirišana le mmušo go hola maAfrika Borwa ka moka ao a amilwego, kudu bahloki.

6. Tefo ya tšhelete ya dithekgo tša leago

Kabinete e tsebišitšwe ke Tona ya Tlhabollo ya Leago, Mohumagadi Susan Shabangu, ka titelego ye e phatlaletšego ya kgauswanya ka ditefo tša leago tšeo di beakantšwego go baamogedi. Kabinete e leboga gore tšhelete ya thekgo ya leago e thuša maloko ao a hlokago thušo kudu a setšhaba sa rena ka gona bothata bjoo bo tloga bo swabiša kudu. E tšweleditše gore e kgopela tshwarelo ka nnete go baamogedi bao ba amilwego ka baka la tšhitišo ye.

Tona Shabangu o kgonthišeditše Kabinete gore mathata ao a sethekniki a hlotšwe ke phetogo ya ditefo go tloga mokgweng wa kgale go ya go mokgwa wa go Setheo sa Tšhireletšo ya tša Leago sa Afrika Borwa (SASSA)/Poskantoro ya Afrika Borwa (SAPO). O kgonthišeditše Kabinete gore bontši bja baamogedi bao ba amilwego ba lefilwe. Go sale bjale, dihlopha tša go ikgafa di šoma ka maatla go kaonafatša mekgwa go thibela go ipoletša ga dititelego tšeo ka moso.

7. Dinyakišišo tša Maphelo

Kabinete e amogela go lokollwa lehono ga pego ya nakwana ka Dinyakišišišo tša Mmaraka wa Phadišano mo intastering ya tlhokomelo ya maphelo ya praebete. Dinyakišišo di be di etilwe pele ke Moahlodimogolo wa maloba Sandile Ngcobo gomme o kwele bohlatse go tšwa go bakgathatema ba mmalwa mo mengwageng ye meraro ya go feta. Pego ya nakwana e tla bulwa gore setšhaba se swayeswaye nako ya dikgwedi tše pedi. Pego ya mafelelo e tla išwa go Tona ya Tlhabollo ya Ekonomi mafelelong a 2018 gomme e tla išwa palamenteng.

8. Pego ya Khartoum

Kabinete e amogela tumelelano ya peomarumofase ya sa ruri gare ga Mopresidente wa Sudan Leboa Salva Kiir le Riek Machae, le go saenwa ga Pego ya Khartoum. Se se fa tshepo ya tumelelano ya go fediša ntwa ya naga ya bona ye kotsi.

Pego e bolela gore peakanyo ya peomarumofase e akaretša, karogano, go arogantšha mašole mafelong a kgauswi, go tlošwa ga mašole ka moka ao a kopantšwego, go bula ditsela tša tlhokomelo le go lokollwa ga bagolegwa ba ntwa le bagolegwa ba dipolotiki. Tumelelano e dumelela gape maloko a Kopano ya Afrika (AU) le Taolo ya Mebušotsenelano ka Tlhabollo go iša mašole go lekola go emišwa ga ntwa.

Kabinete e hlohleletša mahlakore ka moka go šoma mmogo go kgonthiša gore peomarumofase mafelelong e iša go go fedišwa ga ntwa le go kgonthiša go bušwa ga khutšo le tlhabollo ya ekonomi ka Sudan Leboa.

9. Lefelo la Kgwebo ye e Lokologilego la Kontinente ya Afrika (AfCFTA)

Kabinete e amogela go saena ga Afrika Borwa tumelelano ya AfCFTA le AU. Go saenwa ga tumelelano ye ke Afrika Borwa go tliša palo ya dinaga tšeo di saennego go 49.

AfCFTA e iša kontinente kgauswi le go hlolwa ga lefelo la kgwebo ye e lokologilego ye kgolo go feta ka moka. Go letetšwe gore e tšweletše dikholego tše dikgolo tša ekonomi ya leago go dinaga ka moka mo kontinenteng.

Go ya ka UN, go akantšwe gore AfCFTA e tla kaonafatša kgwebišano ya ka gare ga Afrika ka 53% ka go fediša mešongwana ya ntle le mellwane ya go se lefe metšhelo. Tumelelano ye e beakantšwe ka kgonagalo go hlola mmaraka wa Afrika wa batho ba 1.2 bilione ka ekonomi ya US$2.5 trilione.

Tona ya Kgwebo le Intasteri, Ngaka Rob Davies, o tla thoma ka tshepetšo ya gore tumelelano e dumelelwe ke Palamente.

10. Lenaneo la Afrika

Kabinete e amogela Samiti ya Mokgatlo wa Lekgetho la Dinaga tša Borwa bja Afrika (SACU) yeo e swerwego ka la 29 Phupu 2018 ka Botswana, yeo e bego e tsenetšwe ke Mopresidente Ramaphosa. Samiti e gateletše bohlokwa bja lenaneo la tirišano ya dilete leo le godišago tirišano ya ekonomi, kgolo le phapantšho tša ekonomi ya diekonomi tša SACU.

Mopresidente Ramaphosa o etile gape kemedi ya Repabliki ya Mauritanania ya Islamo, ya Kopano ya Mehleng ya bo 31 ya Kopano ya Dihlogo tša Mebušo le Pušo tša AU. Samiti e bile go tloga ka la 1 go fihla ka la 2 Mosegamanye 2018 ka fase ga morero “Go thopa Ntwa ya Bomenetša: Tsela ya Go swarelela ya Phetogo ya Afrika”. E abile sebaka sa moswananoši sa go bontšha le go šogana le ditlhohlo tše di itšego tšeo di amanago le ntwa kgahlanong le bomenetša ka Afrika.

Mopresidente Ramaphosa gona bjale ke monggae wa Ketelo ya Semmušo ka modirišani le yena wa Ghana, Nana Addo Dankwa Akufo – Addo, go tloga ka la 4 go fihla ka la 5 Mosegamanye 2018, go tiišetša gape dikamano tša mahlakore a mabedi gare ga dinaga tše pedi. Afrika Borwa le Ghana di tšwela pele go ipshina ka dikamano tše maatla tšeo di šireleditšwego ke histori ya segwera le kopano. Tirišano ya kgwebo le dipeeletšo gare ga dinaga tše tše pedi di akaretša, meepo, kgwebjana, inšorense, saense le theknolotši, dinamelwa, boeti, dipanka, mananeokgoparara a dikgokagano, kago, ditirelo, tokelokgetho, tšweletšo, boreahlapi, papatšo, bofofane le enetši.

B. Diphetho tša Kabinete

11. Kabinete e amogetše letlakala la kgopolo le leano la Letšatši la Kgwedi ya Bosetšhaba ya Basadi ka Phato 2018. Morero wa ngwaga wo ke “Mengwaga ye 100 ya Albertina Sisulu: Basadi ba Kopane Go tšwetša Afrika Borwa Pele”. Lenaneo la ngwaga wo le dumelelana le matswalo a mararo a Tata Nelson Mandela, Mama Albertina Sisulu le go hlongwa ga Mokgatlo wa Basadi wa ba Baso.

Mešongwana ya Kgwedi ya Basadi e tla beakanya setšhaba gomme ya aga ditirišano go šogana gabotse le ditaba tše bohlokwa tšeo di lebanego le basadi le basetsana, kudu dikgaruru tšeo di lebanego le bong, matlafatšo ya ekonomi ya basadi, phihlelelo ya naga, ditiro tše kotsi le ditaba tše dingwe tša dikarolo ka go Leanotlhabollo la Bosetšhaba (NDP) le boikgafo bja boditšhabatšhaba bja Afrika Borwa. Tona ka Ofising ya Mopresidente yoo a nago le maikarabelo a Basadi, Mohumagadi Bathabile Dlamini, o tla hlatholla lenaneo ka botlalo moragonyana.

C. Melaokakanywa

12. Kabinete e dumeletše go išwa Palamenteng ga molaokakanywa wo o Mpshafaditšwego wa Tekomahlatse ya Bosetšhaba wa 2018. Molaokakanywa wo o šetše o išitšwe go setšhaba go boledišana ka wona le bakgathatema ka moka ba maleba.

Molaokakanywa wo o tsenagare go tekomahlatse ya elektroniki, papatšo ya tekomahlatse le go bea meago ya tekomahlatse. O ema legato Boto ya Tekomahlatse ya Bosetšhaba ya gonabjale ka Taolo ya Tekomahlatse ya Bosetšhaba (NGR). Go šoma le balaodi ba profense, NGR e tla tšweletša mekgwa ya go šoma ya motheo yeo e tla šomago bjalo ka metheo ye mennyane go hlahla mekgatlo yeo e itaolago go swana le ka lekaleng la mekato ya dipere.

13. Kabinete e dumeletše go išwa ga molaokakanywa wo o Mpshafaditšwego wa Phadišano wa 2018. Mpshafatšo e fa katološo ya taolelo ya balaodi ba phadišano le Balaodiphethiši go šogana le magato a godimo a temogo ya ekonomi, phetogo ye nnyane ka ekonoming ya Afrika Borwa le tlaišo ya maatla a mmaraka ke difeme tše dikgolo.

Molaokakanywa o šetše o ngwadilwe kuranteng ya mmušo gore setšhaba se swayeswaye le go boledišana le bakgathatema ka moka ba maleba.

D. Ditiragalo tše di tlago

14. 100 Men March

Ka fase ga thekgo ya bosetšhaba ya lesolo la “Roma Nna – Thuma Mina” leo le etilwego pele ke Tshepetšo ya Dikgokagano le Tshedimošo ya Mmušo (GCIS), Histori ya “Mengwaga ye 100 ya Nelson Mandela le Albertina Sisulu: Matšhe wa Banna kgahlanong le Dikgaruru go Basadi le Bana” o tla ba gona ka la 10 Mosegamanye 2018.

Matšhe, woo o kgokaganywago ke GCIS, o tla thoma ka 10:00 go tloga Church Square gomme wa felela Union Buildings ka Pretoria. Kabinete e laletša banna ka moka le bašemane go arabela go “Roma nna – Thuma Mina” boipiletšo bja tirišano ka go kgatha tema matšheng, le go tšea kgato thogakong ya dikgaruru kgahlanong le basadi le bana. Banna go tšwa dikarolong tša go fapana, botšong bja morafe, dipolotiki le ditumelo ba tla kopana maemong a bona a go emiša dikgaruru kgahlanong le basadi le bana.

15. Beke ya Nepišo ya Imbizo ya Bosetšhaba

Mmušo o tla swara Beke ya Nepišo ya Imbizo ya Bosetšhaba go tloga ka la 9 go fihla ka la 12 Mosegamanye 2018, moo maloko a Balaodiphethiši ba mmušo ba tla boledišanago thwii le badudi go phatlala le naga.

Ye nngwe ya metheo ya temokrasi ya Afrika Borwa e dutše e le boikgafo bja mmušo bja go tshepega go akaretša dipholisi tša mmušo le maano.

Kabinete e hlohleletša ditšhaba ka moka ka moya wa “Thuma Mina” go kgatha tema go izimbiso le bahlenkedi ba mmušo gomme ba šomiše sebaka go šogana le ditlhohlo tša kabo ya ditirelo.

16. Samiti ya bo 10 ya BRICS

Afrika Borwa e lokile go ba monggae ka moya wa Ubuntu (Botho), wa samiti

ya bo 10 ya kopano ya Brazil, Russia, India le Afrika Borwa (BRICS) go tloga ka la 25 go fihla ka la 27 Mosegamanye 2018, mo Senthareng ya Dikopano ya Sandton ka Gauteng. Ka Labohlano, 6 Mosegamanye 2018, Mopresidete Ramaphosa o beakantše go boledišana le Sehlopha sa Afrika Borwa mo nakong ya difihlolo ka ga go lokela go ba monggae wa Samiti ya BRICS ya bo 10.

Morero: “BRICS ka Afrika: Tirišano ya Kakaretšo ya Kgolo le Katlego ya Kabelano go Phetogo ya Diintasteri”, e bontšha bohlokwa bja motheo bja maloko a BRICS, kudu go bontšha le ka go hlola setšhaba sa kakaretšo le ditirišano tša lefase tšeo di tla tlišago katlego go batho ka moka. Morero o kopanya le go kgonthiša mokgwa wa go tšwela pele ka bodulasetulo bja Afrika Borwa go bobedi Dinaga tše di Hlabologago tša Borwa bja Afrika (SADC) le Mokgatlo wa Dinaga tše di lego Ntlheng ya Lewatle la India.

Afrika Borwa e tla šomiša bodulasetulo bja yona go kgonthiša go tšwela pele ga BRICS le go tliša nepišo ye e itšego go dibaka tša Phetogo ya Diintasteri ya Bone.

17. Dipoledišano tša Ditona tša Afrika tša Bokgabo le Setšo

Kgoro ya Bokgabo le Setšo e swara dipoledišano tša Ditona tša Afrika tša Bokgabo le Setšo ka Durban go tloga ka la 5 go fihla ka la 6 Mosegamanye 2018. Tiragalo e nyaka go bega ka ga phihlelelo ya tshedimošo go bega ka ga khuetšo ya ditirelo tša bokgobapuku le tshedimošo ka maemo a Lenaneo la AU 2063, leo e lego tlhako ya mokgwa wa phetogo ya ekonomi ya leago ya Afrika mo mengwageng ye 50 yeo e tlago.

18. Thelesekoupo ya MeerKAT/ Arei ya Sekwerekilometara (SKA)

Mopresidente Ramaphosa o letetšwe go thakgola thelesekoupo ya radio ya dibjana tše 64, yeo e tsebjago ka MeerKAT, bjalo ka motheo wa thelesekoupo ya SKA. MeerKAT e dutše dikilomitara tše 90 ka ntle ga torotswana ya Carnarvon ka Kapa Leboa.

Thelesekoupo ya MeerKAT e tla ba sedirišwa ka go oketša tsebo ye bohlokwa ya ka moo Lefase le hlolegilego, ka moo le šomago le ka moo le ka bopago bokamoso bja lona. Go phethwa ga sedirišwa ke leswao le bohlokwa leo le swanetšego go ketekwa ke Afrika Borwa le Afrika ka bophara.

E. Melaetša

Mahloko

19. Kabinete e romela melaetša ya mahloko go tšwa boteng bja pelo go Mopresidente wa maloba Jacob Zuma, lapa la gagwe le bagwera ka lehu la morwa wa gagwe, Vusi Nhlakanipho Zuma, pejana mo bekeng.

20. Kabinete e romela melaetša ya mahloko go lapa le bagwera ba motšeadiswantšho wa go tuma yo a hlokafetšego, David Goldblatt. Naga ya rena e dula e ikgantšha ka mošomo wa gagwe woo o utollago tlhorišo le bošoro bja mmušo wa kgatelelo.

21. Kabinete e romela melaetša ya mahloko go lapa le bagwera ba mošomi wa meepo yoo a hlokafetšego Moepong wa Khomani wa Sibanye-Stilwater ka Driefontein ka Mpumalanga gomme e dula e ngongorega ka polokego ya bašomi ba meepo mo meepong.

Ditebogišo

22. Kabinete e lebogiša Bokgobapuku bja Bosetšhaba bja Afrika Borwa (NLSA), bjoo bo ketekilego mengwaga ye 200 bo le gona. Pejana ngwaga wo, NLSA e dirile leswao ka go swara pontšho yeo e buletšwego bohle yeo thaetlele ya yona e lego “Ntlo ya Letlotlo la Tsebo”.

23. Kabinete e amogela sephetho sa Mokgatlo wa Thuto, Saense le Setšo wa UN go tsebiša Dithaba tša Makhonjwa ka Mpumalanga, tšeo di tsebegago gape ka leina la Barberton Greenstone Belt, bjalo ka Lefelo la Bohwa la Lefase. Le ke Lefelo la Bohwa la Lefase la bo 10 la Afrika Borwa.

Kabinete e ipiletša go bakgathatema ka moka ka karolong ya boeti go bapatša mafelo ka moka a bohwa ka Afrika Borwa ka ge boeti e le ye nngwe ya diakgofiši go godišeng ekonomi ya rena le go hlolela batho ba gae mešomo.

24. Kabinete e gopola ka boikgantšho matswalo a bo 63 a go amogela ga histori ga Lengwalo la Tumelelo la Tokollogo (Freedom Charter) leo le dirilego motheo wa Molaotheo wa Repabliki ya Afrika Borwa.

Lehono melao ya motheo ya lona e tšweletšwa ka melaong ya Mokgatlo wa Kopano ya Afrika ya maloba (yeo gonabjale e bitšwago AU) gomme UN e kopantše Pego ya yona ya Lefase ya Ditokelo tša Batho tša melao ye.

F. Bao ba thwetšwego mešomong

Batho ka moka bao ba thwetšwego mešomong mangwalo a bona a dithuto a tla tiišetšwa le go netefatšwa ka maleba.

25. Morena Sibusiso E Bukhosini bjalo ka Mohlankedimogolophethiši wa Taolo ya Phaka ya iSimangaliso Wetland.

26. Moatbokheiti Mmadikeledi Suzan Malebe bjalo ka Motlatšamolaodiphethiši (DDG): Taolo ya Diminerale, ka Kgorong ya Methopo ya Diminerale (DMR).

27. Mohumagadi Buyisiwe Faith Ntokozo Ngcwabe bjalo ka DDG: Dipholisi tša Diminerale le Kgodišo, ka DMR.

Kabinete e thwetše gape batho ditheong tše di latelago:

27.1. Khansele ya Maemo a Pego ya Ditšhelete.
27.2. Boto ya Institute ya Payotaebesithi ya Bosetšhaba ya Afrika Borwa (SANBI).
27.3. Diphaka tša Bosetšhaba tša Afrika Borwa (SANParks).
27.4. Sekhwama sa Dikotsi tša Tseleng (RAF).

Katološo ya nako ya maloko a Khansele ya Maemo a Pego ya Ditšhelete:

a. Morena Garth Dennis Coppin;
b. Mohumagadi Dumisani Manana;
c. Mohumagadi Christine Ramon (Motlatšamodulasetulo);
d. Mohumagadi Dawn Earp;
e. Morena Khaya Dludla;
f. Morena Bruce Mackenzie;
g. Mohumagadi Tania Wimberley;
h. Ngaka Suresh P Kana (Modulasetulo); le
i. Moatbokheiti Rory Wayne Voller.

Boto ya SANBI:

a. Ngaka Lesley Thulani Luthuli;
b. Mohumagadi Thandiwe Godongwana;
c. Profesa Brian William van Wilgen;
d. Ngaka Crispian Garth Olver;
e. Mohumagadi Ntsoaki Mngomezulu;
f. Mohumagadi Venete Jarlene Klein;
g. Mohumagadi Beryl Ferguson;
h. Mohumagadi Judy Hermans;
i. Moemedi wa Kgoro ya Saense le Theknolotši;
j. Mohumagadi Skumsa Mancotywa (Moemedi wa Kgoro ya Merero ya Tikologo (DEA)); le
k. Ngaka Moshibudi Rampedi.

Maloko a Boto ya SANParks:

a. Mohumagadi Joanne Yawitch;
b. Ngaka Kungeka Njobe;
c. Mohumagadi Sophie Molokoane;
d. Mohumagadi Tanya Abrahamse;
e. Moatbokheiti Tshepiso Mphahlane;
f. Mohumagadi Tasneem Essop;
g. Ngaka Urshanie Govender;
h. Profesa Elizabeth Mokotong;
i. Morena Tale Daniel Motsepe;
j. Morena Lourence Benard Mokgakane (Moemedi wa Batho le Diphaka);
k. Morena Shonisani Munzhedzi (Moemedi wa DEA); and
l. Morena Fundisile Mketeni.

Balaodi bao e sego ba phethagatšo mo Botong ya RAF:

a. Ngaka Peter Mathebula – Modulasetulo;
b. Mohumagadi Koko Mashigo;
c. Ngaka Fanie Bale;
d. Morena Moses Nyama;
e. Ngaka Nomonde Mabuya-Moloele;
f. Morena Thulani Tshabalala;
g. Mohumagadi Dineo Molefe;
h. Ngaka Mohamed Fazel Randera;
i. Morena Khotso Mothobi (o thwetšwe leswa); le
j. Ngaka Maria Peenze (o thwetšwe leswa).

Dipotšišo:
Mohumagadi Phumla Williams – Seboleledi sa Kabinete sa Motšwaoswere
Selefouno: 083 501 0139