Kabinete e kopane ka Laboraro la 26 Phupu 2019, Tuynhuys ka Motsekapa.

A. Merero ye bohlokwa seemong sa bjale

1. Polelo ya maemo a setšhaba (SoNA)

1.1. SoNA ya mathomo ya pušo ya botshelela ya temokrasi ya Mopresidente Cyril Ramaphosa mo bekeng ye e fetilego, e hlohleleditše le go fa maatla maAfrika Borwa ka moka go šomela gore ba fihlelele bokamoso bja bona ka moka bjo bo atlegilego. SoNA 2019 e beakanya leano la go phethagatša thomelo ya bakgethi yeo e amogetšwego ke mokgatlo wo o bušago go tšwa go batho ba rena.

1.2. Se se laetša gore ge re šoma mmogo, re tla kaonafatša maphelo a maAfrika Borwa le go godiša ikonomi ya naga ya rena, ka go rarolla dihlobaboroko tša tlhokego ya mešomo, tša bohloki le tša tlhokego ya tekatekano tšeo di ganeletšego. Boipiletšo bja Mopresidente Ramaphosa bja tumelelano ye mpsha ya setšhaba bo nyaka go tsenya letsogo ga maAfrika Borwa ka moka ka go šoma mmogo go fenya  ditlhohlo tša rena le go bea naga ya rena seemong sa kgolo ya godingwana.

1.3. Se se akaretša go oketša lekala la diintasteri, go maatlafatša intasteri ya meepo, go thekga lekala la temo, go kaonafatša bokgoni bja bafsa ba rena le go dira gore go be bonolo go baeti ba rena go etela naga ye. Bjalo ka maAfrika Borwa, re swanetše go tšwela pele go hlohleletša le go thekga diintasteri tša ka mo nageng le go reka ditšweletšwa tša ka nageng.

1.4. Go šoma kudu ga mmušo go theilwe go dilo tše šupa tše bohlokwa tšeo di tlago pele tšeo mmušo o tlago di šala morago mo mengwageng ye e tlago ye mehlano, le go phethagatša Leanotlhabollo la Bosetšhaba (NDP) le maikemišetšo a rena a go fihlelela Nepo ya 2030.

1.5. Dingangišano tša ka Palamenteng ka ga SoNA di laeditše bohlokwa bja gore re swanetše go lokiša ikonomi le go lokiša dikarolo tše di robegilego tša phethagatšo ya mmušo wa rena ka go tsenya tirišong ga thomelo ya bakgethi. Se se tla re thuša gore re fihlelele Afrika Borwa yeo re e nyakago le Afrika Borwa ya ditoro tša rena ka ge go hlagišitšwe ka go Nepo ya 2030 ya NDP.

1.6. Kabinete e ipiletša go badirišani ba rena ka moka ba setšhaba, ba kgwebo, bašomi, badudi le mekgatlo ya dipolotiki, go maatlafatša leswa masolo a yona a tirišano go dira gore naga ya rena e be lefelo le lekaone go bohle le gore ka moka ga yona e rwale maikarabelo ka nepo ya go potlakiša leano la kgolo la naga.

1.7. Ka lehlakoreng la rena bjalo ka mmušo re tla oketša gabedi le go oketša gararo maitapišo a rena ka ge re laetšwe ke mopresidente go tloša mapheko a kgolo ya ikonomi ya rena  le go aga bokgoni bja ditheo tša rena tša mmušo go abela batho ba rena ditirelo. Ka Mosegamanye, Ditona tša dikgoro tše di fapafanego di tla ala polelo ya tšona ya Ditekanyetšo, tšeo ka go tšona maanophethagatšo a tlago tsebišwa ka nepo ya go fihlelela nepo yeo Mopresidente a e adilego pele ga setšhaba.  

2. Kgwedi ya Bafsa

2.1. Kgwedi ya Bafsa ya Phupu ke segopotšo seo se lego nyanyeng sa tema ye e kgathilwego ke bafsa ba rena ka nepo ya go hloma seemo seo pheletšo ya sona e bilego tokologo ya rena. SoNA ya Mopresidente e bea go godiša ikonomi le go hloma mešomo bjalo ka dilo tše bohlokwa kudu ka mošomong wa Pušo ya Botshelela. Mopresidente o boledišane le makala a mehutahuta a bafsa go akaretšwa bao ba phelago ka bogolofadi, bafsa bao ba lego ka dikgwebong, ka lekaleng la tša bokgabo le dirutegi pele ga ge a ka fa polelo ya gagwe ya SoNA gomme dipoledišano tše di rulagantšwe ke Setheo sa Bosetšhaba sa Tlhabollo ya Bafsa ka fase ga morero wa: “Mengwaga ye 25 ya temokrasi – re keteka go lwela ditokelo ga bafsa”. Poledišano ye ya Mopresidente le Bafsa e tiišeleditše leswa boima bjo bo tšwetšego pele le ditlhohlo tšeo bafsa ba rena ba lebanego le tšona gomme tšona di hloka bonamodi bja tšhoganetšo ka mmušo wa rena.

2.2. Mabapi le se re rata go tiišetša gore mananeo a mehutahuta a mmušo, go akaretšwa Lenaneo la Sebaka sa Bobedi la Kgoro ya Thuto ya Motheo, Tirelo ya Bafsa ya Bosetšhaba le Lesolo la Tirelo ya Go Thwala Bafsa Mešomong, a dira fao go tletšego seatla go lokišetša bafsa ba rena go tsena mešomong.

2.3. Le ge go le bjalo re swanetše go oketša gabedi maitapišo a rena le go a oketša gararo bjalo ka naga go hlomela bafsa ba rena mešomo ye e nyakegago kudu. Gore re kgone go dira se go tšwa go rena go hlohleletša kgolo ya ikonomi ya rena go ya ka fao re laetšwego ke Mopresidente wa rena. Re a tseba gore ga go tlo ba bonolo, re a tseba gore go ka se be le ditharollo tša ka pela tša go fetoša seemo sa ikonomi eupša re a tseba gape gore se se swanetše go direlwa naga ya rena le bafsa ba rena.

2.4. Kabinete e ipiletša go makala ka moka go tšea keletšo go tšwa go Mopresidente le go rerišana le bafsa go šoma mmogo go hwetša ditharollo tše di bonagalago tša ditlhohlo tšeo ba itemogelago tšona. Re tla dira ka fao re ka kgonago ka gona go kaonafatša go šoma gabotse ga ikonomi ya rena gore e hlomele bafsa ba rena mešomo.

3. Go beakanya leswa mmušo

3.1. MaAfrika Borwa a file pušo ye ya botshelela thomelo ye e kwešišegago ya go potlakifiša kgolo ya ikonomi ye e akaretšago mang le mang, go šoma ka tšhoganetšo go lwantšha bohloki, go kaonafatša ditirelo tša mmušo, go lwantšha bomenetša le go fediša go gogwa ga mmušo ka nko.

3.2. Kabinete e tiišetša gore go beakanya leswa ga mmušo kudu go tla tsenya tirišong le go kaonafatša kabo ya ditirelo go batho ba rena ka go diriša mmušo wa go hloka mathata, wa go seketša tšhelete le wa go šoma gabotse wo o arabelago kudu dinyakwa tša maAfrika Borwa.

4. Ditumelelano tša kgwebišano

4.1. Kabinete e amogela go saenwa ga ditumelelano tše masomesenyanetharo (93) gareng ga baabi ba Afrika Borwa le dikhamphani tša China, go reka ditšweletšwa tša ka nageng go tla go romelwa ka China, tša boleng bja konteraka bja R27 bilione, gomme se se tla maatlafatša kgolo le go hloma mešomo.

Godimo ga fao, ye nngwe ya ditumelelano tšeo di saennwego e bile tumelelano ya peeletšo yeo e akaretšago peeletšo ya Koporase ya Intasteri ya Difatanaga ya Beijing  ka pholanteng ya go tšweletša difatanaga ka lefelong la tlhabollo ya diintasteri la Coega. Ke peeletšo ya go dira difatanaga ka Afrika Borwa di direlwa bareki ba Afrika Borwa le bareki ba bangwe go gongwe. Ditumelelano tše ke karolo ya boikgafo bjo bo tšweletšego go tumelelano ya bjale ya tirišano ya togamaano ya kakaretšo ya 2010, le boikgafo bjo bogolo bja dikarolo tše seswai  bjo bo dirilwego ka Sebokeng sa Tirišano ya China le Afrika.

5. Dipalopalo tša Kotara ka ga tlhomo ya mešomo

5.1. Tirelo ya Dipalopalo ya Afrika Borwa e lokolotše Dinyakišišo tša Tlhomo ya Mešomo ya Kotara tša kotara ya mathomo ya 2019 mo bekeng ye e fetilego.

5.2. Dikutollo di laetša koketšego ya mešomo ye 22 000 (+0.2%) go tloga go 10 152 000 go fihla go 10 174 000 ka lekaleng la kgwebo la semmušo leo e sego la temo. Se ke kudu ka lebaka la dikoketšego ka diintastering tše di latelago: ditirelo tša setšhaba, meepo le makgwara, botšweletši le ditirelo tša kgwebo.

5.3. Palomoka ya go thwala batho mešomong e oketšegile ka 76 000 goba ka 0,8% ngwaga ka ngwaga gareng ga Hlakola 2018 le Hlakola 2019. 

5.4. Kabinete e lemoga tiragalo ye kaone ye eupša e tšwela pele go dumela gore tsela e sa le ye telele go kaonafatša go šoma gabotse ga makala ka moka a ikonomi ya rena le go hloma mešomo ye e nyakegago kudu ka nageng ya rena.  Go fihla mo lebakeng le Kabinete e ikgafile go šoma le makala ka moka a setšhaba sa Afrika Borwa go akaretšwa lekala la praebete.

6. Sehla sa Metšhelo

6.1. Letseno leo le tšweleditšwego go motšhelo wa letseno le netefatša gore mmušo o kgona go aba ditirelo tše di nyakegago kudu le thekgo ya leago go dimilione tša ditšhaba tšeo di hlokago.

6.2. Kabinete e hlohleletša maAfrika Borwa go lokiša dingwalwa tša bona tša motšhelo tša sehla sa motšhelo sa 2018/19. Kgoboketšo ya motšhelo ya maleba le ya go hloka mathata e kgontšha mmušo go netefatša gore go ba le boikemo ka ga ditšhelete.

6.3. Balefamotšhelo bao ba ingwadišeditšego eFiling goba bao ba šomišago MobiApp ye ntshwa ya Tirelo ya Motšhelo ya Afrika Borwa ba ka faela dingwalwa tša bona tša motšhelo go thoma ka la 1 Mosegamanye 2019. MaAfrika Borwa ao a hwetšago letseno la ka fase ga R500 000 ka ngwaga gomme ba fihlelela dinyakwa tše itšego, ga go hlokege gore ba faele dingwalwa tša bona tša motšhelo.

7. Go lwantšha bosenyi

7.1. Kabinete e lemogile ebile e hlobaetšwa ke ditiragalo tša dipolao tša maloko a maphodisa. Ka Lewedi 2018, maphodisa a masomepediseswai (28) go begilwe gore a bolailwe. Go tloga mathomong a 2019, maphodisa a masomepeditshela (26) a bolailwe. 

7.2. Ditiragalo tšeo di sa tšwago go direga ke tša polao ya Setšene Zephania Dladla, Mokonstabole Nomasonto Mhlanga le Mokonstabole Nhlamulo Vukeya. Kabinete e lebiša mahloko a yona ka pelo ye bohloko go ba malapa a bona, go bagwera le go bašomimmogo.

7.3. Kabinete e kgalema ka bogale ditlhaselo le dipolao tše. Maphodisa a bea maphelo a bona kotsing go šireletša ditšhaba. Ka moka ga rena re swanetše go šoma mmogo le ditheo tša phethagatšo ya molao go netefatša gore badiri ba bosenyi bjo bošoro bjo ba a golegwa le go lebana le letsogo le maatla la molao.

7.4. Kabinete e reta tirelo ya molao yeo e feleleditšego ka gore badiri ba bosenyi bjo ba senyane ba fiwe kotlo ya bophelo ka moka kgolegong, mo ngwageng wo fela.

8. Tiragalo ya go thunyana ka mollwaneng wa Mozambique

8.1. Kabinete e lemogile gore Mmušo wa Afrika Borwa o rometše sehlopha sa maemo a godimo ka Mozambique ka morago ga tiragalo ya go thunyana fao maphodisa a mabedi a Mozambique a hlokofetšego ka mollwaneng wa KwaZulu-Natal. 

8.2. Sehlopha se se bopilwe ke maloko a Lebotho la Mašole a Bosetšhaba la Afrika Borwa (SANDF) le Tirelo ya Maphodisa ya Afrika Borwa (SAPS), gomme ba tla kopana le badirišanimmogo ka bona ba Mozambique. Ba etilwe pele ke Hlogo ya Mabotho a Mohlakanelwa ya SANDF Moleftenentepharephare Barney Hlatshwayo le Motlatšamokhomišenare wa Bosetšhaba Moleftenentepharephare Sehlahle Masemola.

8.3. Sehlopha se se lesolong la go nyaka go tseba kudu ka ga tiragalo ye ya go thunyana. Go emetšwe gore se tla, gareng ga tše dingwe, boledišana ka ga sehlopha sa mohlakanelwa sa dinyakišišo gareng ga Mozambique le Afrika Borwa.

8.4. Kabinete e kgopela maAfrika Borwa ka moka go emela sephetho le dipoelo tša dinyakišišo tše tša mohlakanelwa. Re dula re ikgafile go šoma le mmušo wa Mozambique bjalo ka moagišane yo mokaone go kaonafatša go phela gabotse ga badudi ba rena ka moka.

9. Khonferentshe ya Mokgatlo wa Bašomi wa Boditšhabatšhaba

9.1. Kabinete e amogela go kgatha tema ga Mopresidente Ramaphosa ka Kopanong ya bo 108 (ya Ngwagakgolo) ya Khonferentshe ya Mokgatlo wa Bašomi ya Boditšhabatšhaba yeo e swerwego ka la 10 le la 21 Phupu 2019. Mopresidente o rometše semmušo pego ya Khomišene ya Lefase ka bophara ka ga Bokamoso bja Mošomo, yeo a bilego modulasetulommogo wa yona le Tonakgolo ya Sweden, Mohlomphegi Stephan Lofven, ka fao khonferentsheng.

9.2. Tona ya Kgoro ya Go thwala batho mešomong le ya Bašomi, Morena Thulas Nxesi, o felegeditše Mopresidente gomme gape a eta pele kemedi ya seboka sa boraro seo se kgathilego tema ka dikomiting tšeo di fapanego tša khonferentshe yeo le ka dikopanong tša boitokišetšo tšeo di ahlaahlilego pego ya Molaodipharephare wa Mokgatlo wa Bašomi wa Boditšhabatšhaba.

9.3. Dipoelo tše bohlokwa tša khonferentshe ye di akareditše Kwano ya mohlakanelwa ya Ngwagakgolo ya mekgatlo ye e bego e tsenetše khonferentshe. Godimo ga fao, khonferentshe e amogetše Kwano ye mpsha ka ga Dikgaruru le Tlaišo ka Mešomong yeo e hlametšwego go maatlafatša tšhireletšo ya bašomi bao ba lego kotsing. Dipoelo tše di bohlokwa go hloma metheo le ditlhahlo tša boditšhabatšhaba ka nepo ya go tšwetša pele le go šireletša ditokelo tša bašomi le melawana.

B. Diphetho tša kabinete

1. Seboka seo se Kgethegilego sa bo 12

1.1. Kabinete e sedimošitšwe ka ga Seboka seo se Kgethegilego sa bo 12 go tsebiša semmušo kgato ya phethagatšo ya mošomo ya Lefelo la Kgwebišano ya go se Lefelwe la Khontinente ya Afrika (AfCFTA) le Kopano ya Mathomo ya Kgokaganyo ya Gare ga Ngwaga ya Mokgatlo wa Dinagakopano (AU) le Ditšhaba tša Ikonomi ya Dilete (RECs).

1.2. Mopresidente Ramaphosa go rulagantšwe gore o tla eta pele baemedi ba Afrika Borwa ge Seboka seo se Kgethegilego sa bo 12 se swarwa ka la 7 Mosegamanye 2019 ka Niamey, Niger. 

1.3. Afrika Borwa e tla tšea Bodulasetulo bja AU ka kopanong ya go huetša ditiragalo ge khontinente e tla be e tsenya tirišong AfCFTA, yeo e tlago dira mmaraka o mogolo kudu wa bohle wa Afrika lefaseng. AfCFTA e tla thekga kgwebišano ya ka gare ga Afrika, ya hlohleletša leswa tlhomo ya diintasteri, le go lokišetša kopanyo ye bohlokwa ya Afrika ka botšweletšing bja mehutahuta bja lefase ka bophara le go ikonomi ya lefase ka kakaretšo.

1.4. Afrika Borwa e tšwela pele go ikgafa go Lenaneo la Afrika, le go thekga kopanyo ya ikonomi le dipolotiki tša ka seleteng. Se se akaretša go maatlafatša kgokaganyo gareng ga Khomišene ya AU le RECs ka nepo ya go fihlelela tlhabollo ya go ya go ile ka Afrika ya khutšo le šebešebe ka ge go ukangwe ka go Lenaneo la 2063.

1.5. Afrika Borwa e ikgafile ka botlalo go tshepedišo ya AfCFTA mabapi le bohlokwa bja yona bja togamaano ka go lenaneo la kopanyo ya ikonomi ya khontinente ya Afrika le lenaneotlhabollo la Afrika Borwa.

2. Dikgetho tša Mebasepala tša 2021

2.1. Ge e itokišetša Dikgetho tša Mebasepala tša 2021, Kabinete e dumeletše go hlongwa ga Komiti ya Ditona (IMC) ka ga Dikgetho tša Mebasepala, gammogo le seboka sa tša sethekniki go e thekga.

2.2. Dikgetho tša Mebasepala tša 2021 e tla ba dikgetho tša bohlano tša mohuta woo go tloga mola go bago le temokrasi. IMC e tla šoma le Khomišene ya Dikgetho ye e Ikemego le dihlongwa tše dingwe tša maleba ka nepo ya go netefatša gore tshepedišo ye e feletšago ka dikgetho tša mebušoselegae e tšwela pele gabonolo. 

2.3. Maloko a IMC a tla bopša ke Ditona tše di latelago: ya Pušo ya Tirišano le Merero ya Setšo (Modulasetulo); ya Merero ya Selegae; ya Toka le Ditirelo tša Tshokollo ya Bagolegwa; ya Ditšhelete; ya Tšhireletšo ya Mmušo le Tona ka Kantorong ya Mopresidente.   Sehlopha sa Thekgo ya tša Sethekniki e tla ba Balaodipharephare ba dikgoro tše.

C. Ditiragalo tše di tlago

1. Seboka sa Baetapele ba Dinaga ba Masomepedi (G20)

1.1. Mopresidente Ramaphosa o etile pele baemedi ba Afrika Borwa – bao ba akaretšago Tona ya Dikamano tša Boditšhabatšhaba le Tirišano, Ngaka Naledi Pandor; Tona ya Ditšhelete, Morena Tito Mboweni, le Tona ya Kgwebišano le Diintasteri, Morena Ebrahim Patel – bao ba tlago kgatha tema ka Sebokeng sa 2019 sa Baetapele ba 2019.

1.2. Mopresidente Cyril Ramaphosa le yena o tla eta pele baemedi bao e lego bahlankedi le dikhuduthamaga tša dikgwebo tša Afrika Borwa ka poledišanong le dikhuduthamaga tša dikgwebo tšeo di etilego pele ka Japan. Poledišano ye e tla ikemišetša go tšwetša pele temošo ya dibaka tša kgwebišano le tša peeletšo ka Afrika Borwa, ya rarolla dipelaelo tša badirišani ba kgwebo ba ka Japan, le go tseba le go hlabolla dibaka tša kgwebišano le tša peeletšo tše di kgonagalago.

1.3. Poledišano ye e phethagatšwa ka tirišano le Lekgotla la Dikgwebo la Kwešišano ya Boditšhabatšhaba (BCIU), e lego setheo sa boditšhabatšhaba sa dikgwebo sa ka Amerika seo se etilego pele, le Mokgatlo wa Kgwebišano le Dinaga tša ka Ntle wa Japan (Jetro).

1.4. Poledišano ye e bonwa e kgokagane le tiragalo ya ka moso, yeo e tlago swarwa ka Khonferentsheng ya Boditšhabatšhaba ya ka Tokyo ka ga Tlhabollo ya Afrika (TICAD) yeo e tlago swarwa go tloga ka la 28 go fihla ka la 30 Phato 2019 ka Yokohama, Japan. Japan ke modirišani yo mogolo kudu wa diromelwantle wa bohlano le modirišani yo mogolo kudu wa dithoto tše di tsenywago ka nageng wa bosenyane le Afrika Borwa.

1.5. Go kgatha tema ga Afrika Borwa go hlahlwa ke dikokwane tše bohlokwa tše di latelago: Go tšwetša pele kgahlego ya bosetšhaba ka nepo ya go fihlelela maikemišetšo a ka nageng; Go kaonafatša Lenaneo la Afrika le go tšwetša pele tlhabollo ya go ya go ile ya Afrika; Go huetša bohlami bja dinaga tše ntši lefaseng ka bophara; le go Tšwetša pele lenaneo la dinaga tša Borwa ka Tirišano ya Afrika Borwa le Dinaga tša Borwa le Poledišano ya Dinaga tša ka Leboa le tša ka Borwa.

2. Kgwedi ya Mandela

2.1. Ge re lebile go segopotšo sa ngwaga wa bo 10 sa Letšatši la Boditšhabatšhaba la Nelson Mandela ka Mosegamanye, Kabinete e ipiletša go maAfrika Borwa ka moka go šomiša kgwedi ye go phethagatša bohwa bja Madiba, ka fase ga morero wa: “Tšea Kgato, Hlohleletša phetogo, Dira gore letšatši le lengwe le le lengwe e be Letšatši la Mandela”, ka go tšea kgato ya mohlakanelwa kgahlanong le bohloki.

2.2. MaAfrika Borwa a ka kgatha tema ka ditiragalong tša go šoma ga badudi ka go ba le ditšhaba tša bona le mekgatlo ya mehutahuta yeo e tlago tsenela masolo a go fediša tlala le go hloka magae, ka go aga ditšhaba tše di bolokegilego le go netefatša gore bana ba fihlelela thuto.

2.3. Ka moka ga rena a re kgatheng tema ka lesolong le la lefase ka bophara leo le reetšwego ka yo mongwe wa baetapele ba rena ba go tuma re ageng mananeo a go ya go ile ao a bago gona le ka morago ga kgwedi ya Mosegamanye. A re tšeyeng kgato, re hlohleletšeng phetogo le go dira gore letšatši le lengwe le le lengwe e be letšatši la Mandela.

D. Melaetša

1. Mahloko

1.1. Kabinete e lebiša mahloko a yona ka pelo ye bohloko go ba malapa ka moka ao a hlokofaletšwego le bagwera bao ba lahlegetšwego ke bao ba ba ratago ka lebaka la dikotsi tša mebileng. Ka kotsing ya tsela ya R81 ka Maphalle, Limpopo yeo e bakilego tahlego ya maphelo a bafsa ba bantši, go dikotsi tša mebileng tšeo di sa felego tšeo maAfrika Borwa a itemogelago tšona nageng ka bophara. Kabinete e ipiletša go bašomiši ba ditsela ka moka go obamela melao ya tsela, yeo e nyakago gore ba ntšhe mahlo dinameng le maitshwaro a mabotse go bašomiši ba bangwe ba ditsela.

2. Ditebogišo

Kabinete e retile bao ba latelago:

2.1. Sehlopha sa basadi sa kgwele ya maoto sa bosetšhaba, Banyana Banyana, ka go phagamišetša folaga ya rena godimo ge ba kgatha tema la mathomo ka Phadišanong ya Sebjana sa Lefase sa Basadi sa FIFA.

2.2. Morena Botha Msila, mothekgi wa dipapadi wa Afrika Borwa, yo a gorogilego ka Egepeta ka nako pele ga ge go thoma pulo ya Phadišano ya Sebjana sa Kgwele ya Maoto sa Afrika sa 2019. Morena Msila, yo a ilego a kgopela go nametšwa dinamelwa go tloga Motsekapa, o ile a thušwa ke mogaši wa dipapadi, Morena Robert Marawa, go namela sefofane sa go tloga Kenya go leba Cairo go ya go thekga Bafana Bafana.

2.3. Seopedi sa Afrika Borwa le mongwadi wa dikoša Mohumagatšana Sho Madjozi, yo a thopilego Sefoka sa Modiragatši yo Mokaone yo Moswa wa Boditšhabatšhaba ka Difokeng tša BET tša 2019 ka Los Angeles, USA.

2.4. Sehlopha sa baithuti ba tshela ba kgrata ya mathomo ba Afrika Borwa (go tšwa ka Yunibesithing ya Cape Town le ka Yunibesithing ya Witwatersrand) bao ba thopilego sefoka sa maemo a pele kgahlanong le dihlopha tše 13 ka Khonferentsheng ya Boditšhabatšhaba ya Tirišo ye maatla ya dikhomphutha ka Frankfurt, Germany.

Sehlopha se se be se hlokometšwe ke Lekgotla la Senthara ya Dinyakišišo tša Mahlale le tša Diintasteri la Dikhomphutha tše Maatla, e lego lesolo la boithomelo la Kgoro ya Thuto ya Godingwana, Mahlale le Theknolotši, ebile ke le lengwe la dikokwane tše tharo tša Tshepedišo ya mananeokgoparara a inthaneteng.

2.5. Junior Springboks, bao moya wa bona wa go lwa o dirilego gore ba hwetše metale wa porontshe ka Diphadišanong tša Lefase tša Rakbi tša ba mengwaga ya ka fase ga ye 20.

Kabinete e lakaleditše mahlatse le mahlogonolo go bao ba latelago:

2.6. Sehlopha sa bosetšhaba sa kgwele ya maoto sa banna, Bafana Bafana, ka Phadišanong ya Sebjana sa Afrika sa 2019 ka Egepeta.

2.7. Sehlopha sa bosetšhaba sa kgwelentlatlana sa di-Proteas, ge ba phadišana ka Phadišanong ya Sebjana sa Lefase sa Kgwelentlatlana yeo e swarwago ka Liverpool, England, go tloga ka la 12 go fihla ka la 21 Mosegamanye 2019. Sehlopha sa bosetšhaba sa kgwelentlatlana mo lebakeng le se maemong a pele ka Afrika gomme sa ba maemong a bohlano lefaseng ka bophara. Tona ya Dipapadi, Bokgabo le Setšo, Morena Nathi Mthethwa, o felegeditše di-Proteas go thekga bobedi sehlopha se gammogo le go amogela kamogetšo ya ge Afrika Borwa e itokišetša go tlo ba monggae wa Phadišano ya bo 16 ya Sebjana sa Lefase sa Kgwelentlatlana ka 2023.

Dipotšišo:
Mohumagadi Phumla Williams – Seboleledi sa Kabinete sa Motšwaoswere
Sellathekeng: 083 501 0139