Pego ya Kopano ya Kabinete ye e swerwego ka Laboraro la 11 Hlakola 2020 Ka Palamenteng Tuynhuys, Motsekapa 

A. Merero ye Bohlokwa Seemong sa Bjale

1. Coronavirus (COVID-19) 

1.1. Kabinete e netefaletša batho ka moka ka Afrika Borwa gore go tšewa magato ka moka a tlhokomelo go šireletša naga kgahlanong le phetetšo efe goba efe ya COVID-19. Tona ya Maphelo, Ngaka Zweli Mkhize, o begetše Kabinete gore go na le batho ba 13 bao ba fetetšwego ke COVID-19 ka Afrika Borwa. Mo mesong ya lehono, Tona ya Maphelo o tiišeditše gore go utollotšwe batho ba bangwe ba bane bao ba fetetšwego ke baerase ye, gomme se se tliša palo ya bao ba fetetšwego ke COVID-19 go ba 17. O tla fana ka dintlha go tšwela pele mo mosegareng. 

1.2. Kabinete e bušeletša boipiletšo bjo bo dirilwego ke Mokgatlo wa Maphelo wa Lefase le Tona ya Maphelo Mkhize, gore batho ka moka ka Afrika Borwa ba tšwele pele go diriša magato a thibelo ka nepo ya go thibela phetetšo le go phatlalatšwa ga baerase ye. Magato a thibelo a akaretša go hlapa diatla tša gago ka sesepa le meetse goba ba šomiše sanithaesa ya go ba le alekhohole, di akaretšwa gape go efoga go kgoma mahlo a gago, nko le molomo ka diatla tša go se hlapiwe le go pipa molomo wa gago ka thišu ge o gohlola goba o ethimola gomme ka morago ga fao wa lahla thišu yeo. Maswao ao a tlwaelegilego a baerase ye a akaretša, go fiša ga mmele, go gohlola le go hema gaboima. Ge ba na le maswao ao a hlalošitšwego ka mo godimo, batho ba amegago ba eletšwa go dula ka gae gomme ba nyake thušo ya kalafo.

1.3. Re ipiletša go batho ka moka go hlompha sephiri sa balwetši ba COVID-19 le ba malapa a bona. Gape re eletša batho kudu gore ba se ke ba phatlalatša tshedimošo efe goba efe ya maaka ye e amanago le baerase ye go realo e le go thibela go phatlalatša letšhogo, kgobošo le kgethologanyo ka setšhabeng sa rena. Batho bao ba amegilego ba ka letšetša mogala wa tšhoganetšo wa Sehlongwa sa Bosetšhaba sa Malwetši a go Fetela (NICD) mo go 0800 029 999 go hwetša tshedimošo ye e nepagetšego ya mabapi le COVID-19.

1.4. Kabinete e ba le Mopresidente Cyril Ramaphosa ge a lakaletša mahlatse go sehlopha sa go bušetša batho bao ba amilwego ke baerase ye ka mo nageng le bašomi ba Tirelo ya Difofane ya Afrika Borwa (SAA) bao ba sepetšego ka Labobedi go leba Toropokgolong ya Wuhan, ka Profenseng ya Hubei ka People’s Republic of China, go bušetša ka mo nageng maAfrika Borwa a 122. Sehlopha sa tša Kalafo go tšwa ka Kgorong ya Maphelo le Tirelo ya Mašole a Afrika Borwa le bona ba bopa karolo ya sehlopha sa go bušetša batho ba ka mo nageng. Kabinete e tšweleditše tebogo ya yona go SAA go thušo ya bona ye bohlokwa ka mo mošomong wa go bušetša batho ba ka mo nageng.

1.5. Sehlopha sa go bušetša batho ba ka mo nageng le maAfrika Borwa ao a bušetšwago ka mo nageng go emetšwe gore ba tla boa ka mo nageng ka Labohlano le la 13 Hlakola 2020. Ge ba boa, ba tla beelwa thoko ba nnoši mo nakong ye nnyane ya matšatši a 14 go fihla go nako ya matšatši a mantši a 21. Mo nakong ye, go sepela ga batho le diphahlo go tsena le go tšwa ka lefelong leo ba beetšwego thoko go lona ba nnoši go tla iletšwa.  

1.6. Re eletša batho kudu go se leke go ba kgauswi le lefelo leo batho ba ba beetšwego thoko go lona goba go leka go le etela. Ge nako ya go beela thoko batho ba e fela gomme diteko di tiišetša gore ga ba na phetetšo ya baerase ya COVID-19 ya magagaborena, ba tla lokollwa ba boela ditšhabeng tša gabobona. 

1.7. Kabinete e reta mošomo wo o dirilwego ke Komiti ya Ditona (IMC) ye e filwego mošomo wa go šoma ka COVID-19, yeo e etilwego pele ke Tona ya Maphelo ebile e šomišana le NICD, go latišiša le go laola baerase ye, mola ka go le lengwe e thuša bao ba amilwego ke yona le go tšwela pele go sedimoša setšhaba. 

1.8. Kabinete e lemoga gore diprofense tše ntši di fetišeditše kgokagano mabapi le baerase ye ya COVID-19 go Tona ya Maphelo ka lebaka la bohlokwa bja yona bja bosetšhaba le bja boditšhabatšhaba. Re ipiletša go diprofense tše dingwe ka moka go dira se go netefatša gore kgokagano ka ga baerase ye e dirwa lefelong le tee gomme go realo e le go efoga kgakanego efe goba efe ye e tla diregago e se ka maikemišetšo le melaetša yeo e sego ya kgokaganywa. 

1.9. Mopresidente Ramaphosa go se go ye kae o tla sedimoša mekgatlo ya dipolotiki yeo e emetšwego ka Palamenteng gammogo le baetapele ba dikereke ka ga COVID-19. Kopano ya Kabinete ye e kgethegilego ka ga COVID-19 e tla swarwa ka Lamorena la 15 Hlakola 2020, ka Tshwane. 

2.  Ekonomi

2.1. Kabinete e ahlaahlile go lokollwa ga pego ya Tirelo ya Dipalopalo ya Afrika Borwa ka ga Palomoka ya Letseno la ka Nageng (GDP), yeo e utollotšego gore ekonomi ya rena e phuhlamile go ya seemong sa go wa. Dipalopalo di laeditše gore GDP e theogile ka 1.4% ka go Kotara ya bone ya 2019. Se se latela go phuhlama ka 0.8% ka go Kotara ya boraro ya ona ngwaga woo.

2.2. Ka ntle le go lemoga diabe tše di sa kgahlišego tša go kgaotšwa ga mohlagase, Kabinete e tšwela pele go se tekateke go lokiša dilo tša motheo, go šala morago mafapha a bohlokwa a kgolo ya ekonomi le go diriša ditharollo tša tirišano le badirišani ka moka ba setšhabeng gore mmogo re beye ekonoming seemong sa kgolo. 

2.3. Re maatlafatša dipeeletšo tša rena gomme go fihla mo lebakeng le diprotšeke tše di nago le boleng bja peeletšo bja R9 pilione di phethilwe gomme diprotšeke tše 27 tša boleng bja go feta R250 pilione di dikgatong tša phethagatšo, gomme tše dingwe di tlo phethagatšwa mo ngwageng wo.

3. Ditheko tša datha tša Vodacom

3.1. Kabinete e amogela tsebišo ye e dirilwego ke Khomišene ya Diphenkgišano ka ga tumelelano ye bohlokwa ye e fihleletšwego le Vodacom mabapi le go fokotšwa ga ditheko tša datha tša morekiši yo. Se se latela Dinyakišišo tša Mmaraka wa Phenkgišano tšeo di dirilwego mabapi le ditirelo tša datha tšeo di kgopetšwego gore di dirwe ke Tona ya Tlhabollo ya Ekonomi Ebrahim Patel ka 2017, tšeo di utollotšego gore ditheko tša datha di godingwana go feta tša dinaga tše dingwe tše ntši le gore di kgethologanya badiriši bao ba hlokago. 

3.2. Tumelelano le Vodacom e thoma go šoma ka la 1 Moranang 2020 gomme e tla dira gore theko ya datha e fokotšege go dipantlele ka moka tša kgwedi le kgwedi, gomme ditheko tša dipantlele tša 1GB di tlo theogela fase go tloga go R149 go fihla go R99 (e lego phokotšo ya 34%), gomme diphokoletšo tše dingwe di tla dirwa mo ngwageng wo o tlago. Vodacom e tla dumelela gape phihlelelo ya go se lefišwe datha go badiriši ya go tsena go diwepsaete tšeo setšhaba se nago le kgahlego go tšona (tša go swana le tša GCIS, BizPortal ye mpsha le Wikipedia) le phihlelelo go diwepsaete tša diyunibesithi tša Afrika Borwa. Diphokoletšo tše dingwe di tla šoma go badiriši bao ba lego ka ditšhabeng tšeo di hlokago tša go feta tše 2 000 gomme badiriši ba tla ba le ‘kgwebišano ya motheo’ ya go hwetša melaetša ye mebedi ya go se lefelwe ya di-SMS letšatši le lengwe le le lengwe.

4. Go rekwa ga Pioneer Foods ke PepsiCo

4.1. Kabinete e amogela gape kgwebišano ye bohlokwa ya go maatlafatša bašomi yeo PepsiCo e lego karolo ya go reka khamphani ya dijo ya Afrika Borwa, e lego Pioneer Foods. PepsiCo e tshepišitše go hloma mešomo, peeletšo gammogo le maatlafatšo ya batho ba ka nanegng le borekedi. E dumetše gape gore dikantorokgolo tša yona tša ka Borwa bja Afrika di tla ba ka Afrika Borwa.

4.2. Bašomi ba Pioneer Foods ba 10 000 gape ba šireleditšwe go tahlegelo ya mešomo yeo e bakwago ke go kopantšhwa ga dikhamphani tše gomme PepsiCo e dumetše go tšwela pele ka maemo a magareng a go thwala bašomi mešomong go ba maemong a bjale mo lebakeng la mengwaga ye mehlano. Bašomi bao ba šomago mo khamphaning ye ba tla fiwa gape dišere tša go bitša R1.6 pilione ka PepsiCo tšeo di tlago šomišwa go hwetša setseka sa 13% ka go Pioneer Foods mo mengwageng ye mehlano.

5. Ntwa kgahlanong le tlaišo ya basadi le bana

5.1. Kabinete e amogela sephetho sa Kgorotsheko ya Godimo ya Gauteng ya go ganetša kgopelo ya go dira boipelaetšo ka molatong wa kgahlanong le sekatawane seo se bonwego molato Nicholas Ninow. Ngwageng wa go feta, Ninow o filwe kotlo ya bophelo ka moka kgolegong ka morago ga go kata mosetsana wa mengwaga ye šupa ka resturenteng ya Dros ka Silverton, Pretoria ka 2018.

5.2. Sephetho sa kgorotsheko, kahlolo le kganetšo ya go dira boipelaetšo, se romela molaetša o maatla go basenyi le batho bao e tlo bago basenyi ba tlaišo ya basadi le bana gore dihlongwa tša toka tša Afrika Borwa di tla ba rweša maikarabelo go ditiro tša bona tšeo di kgalengwago.

5.3. Mmogo re swanetše go fediša ditlaišo tšeo di nyatšago ditokelo tša botho tša motheo tša basadi le bana. Ka go diriša magato a rena ka moka re swanetše go netefatša gore ga go mosadi goba ngwana yo a tlaišwago ka thobalano, a bethwago, a katwago goba a hlaselwago kae goba kae ka mo nageng ya rena. 

6. Polokego mebileng

6.1. Kabinete e lebišitše mahloko go ba malapa a 25 mabapi le banamedi bao ba hlokofetšego ka kotsing ya pese ye e hlagilego kgauswi le Centane ka Kapa Bohlabela peleng mo kgweding ye. E rata gape go lakaletša banamedi ba 68 bao ba gobetšego gore ba fole ka pela.

6.2. Dinyakišišo tšeo di dirwago ke Koporasetaolo ya Sephethephethe sa Mebileng le Tirelo ya Maphodisa ya Afrika Borwa di swanetše go thuša go fana ka dikarabo mabapi le seo se bakilego masetlapelo a. Baabi ba dinamelwa ba na le maikarabelo a go dira se sengwe le se sengwe ka fao ba ka kgonago go netefatša gore banamedi ba a bolokega. 

6.3. Kabinete e dumeletše gore Molaokakanywaphetošwa wa Bosetšhaba wa Sephethephethe sa Mebileng wa 2019 o romelwe Palamenteng. Ge o se na go fetišwa go ba molao, Molaokakanywa wo o tla ba le seabe go fokotšeng ga dikotsi mebileng ya rena.

B. Dipheto tša Kabinete

1. Leano la Bosetšhaba la Togamaano (NSP) la Dikgaru tša go amana le Bong le Polao ya Basadi (GBVF)

1.1. Ka Manthole 2019, Kabinete e dumeletše GBVF-NSP. E tšwetše pele go alela sehlopha sa Ditona seo se bego se etilwe pele ke Tona ya Basadi, Bafsa le Bagolofadi ka Kantorong ya Mopresidente, Mohumagadi Maite Nkoana-Mashabane, go dira mošomo wo o tšeneletšego ka ga peakanyo ye e šišintšwego ya dihlongwa ya GBVF go hlokomela go tsenywa tirišong ga GBVF-NSP.

1.2. Ka ge e lemoga tšhoganetšo ya go sepediša le go hlokomela mošomo wa go thibela GBVF, Kabinete e dumeletše go hlongwa ga Lekgotla la Bosetšhaba la GBVF (NCGBVF). Lekgotla le le tla hlohleletša batho maemong a bosetšhaba, ka diprofenseng le maemong a selegae go eta pele le go thekga ditsenogare tša phetošo tša GBVF. Se tla rwala gape maikarabelo a go tsenya tirišong GBVF-NSP. 

1.3. Lekgotla la Bosetšhaba la GBVF le tla ikarabela go Mopresidente ka Tona Nkoana-Mashabane. Kabinete e dumeletše gape go hlongwa ga IMC ye e bopilwego ke Tona ya Maphodisa Bheki Cele; Tona ya Toka le Ditirelo tša Tshokollo ya Bagolegwa Ronald Lamola; Tona ya Tirelo ya Setšhaba le Taolo Senzo Mchunu; Tona ya Tlhabollo ya Leago Lindiwe Zulu le Tona Nkoana-Mashabane bjalo ka mokgokaganyi.

1.4. Kabinete e bušeleditše tšhoganetšo ya go nyaka magato a go tšea dipheto ka nepo ya go thibela dikgaruru tšeo di dirwago kgahlanong le maloko a setšhaba ao a lego kotsing. IMC e laetšwe go dira ka pela go hloma semmušo Lekgotla la Bosetšhaba la GBVF. Ba laetšwe gape go tšwela pele go utolla kgonagalo ya go dira gore setheo se se be sa molao.
 
1.5. Khomišene ya Tekatekano ya Bong – bjalo ka sehlongwa sa kgaolo ya bosenyane seo se nago le mošomo wo se filwego ke molaotheo wa go tšwetša pele tlhompho ya tekatekano ya bong le tšhireletšo, tlhabollo le phihlelelo ya tekatekano ya bong – se tla emelwa gape go tšwela pele go fela se sekaseka le go hlokomela kgatelopele ye e dirwago ka go tsenywa tirišong ga GBVF-NSP.

2. Lenaneo la Bahlomi ba Dikgwebo la Makheišeneng le ba Dinagamagaeng (TREP)

2.1. Kabinete e dumeletše go phethagatšwa ga TREP ka go diriša Sekhwama sa Bahlomi ba Dikgwebo ba Makheišeneng. Se ke go sepelelana le ditsenogare tša ekonomi ka nepo ya go maatlafatša le go godiša diekonomi tša makheišeneng le tša dinagamagaeng. 

2.2. Sekhwama se se tla fana ka thekgo le go netefatša gore go ba le mafelo a ekonomi ao a itšwetšago pele go ya go ile go sepelelana le Mokgwa wa Tlhabollo ya Dilete ka mafelong ao.

3. Tlhako ya Bosetšhaba ye e Bušeleditšwego ya Melawana ya Tshekatsheko (NEPF) ya 2019-2024

3.1. Kabinete e dumeletše NEPF ye e Bušeleditšwego ya 2019-2024 gotee le Leanotlhabollo la Bosetšhaba la 2020-2025, leo le kgontšhago tshepedišo ya tshekatsheko ka gare ga mmušo. Di tla maatlafatša bokgoni bja mušo bja go phethagatša Tlhako ya Togamaano ya Lebaka la Magareng ye e amogetšwego ya 2020-2024.

3.2. Dingwalwa tše ka bobedi di ka fihlelelwa go wepsaete ya Kgoro ya Tekodišišo le Tshekatsheko (ya www.dpme.gov.za). 

4. Leano la Anthakthika le la Lewatle la ka Borwa

4.1. Kabinete e dumeletšwe go phatlalatšwa ga Leano la Anthakthika le la Lewatle la ka Borwa gore setšhaba se fe ditshwaotshwao ka ga lona. Afrika Borwa ke botseno bja Anthakthika go mananeo a 10 a boditšhabatšhaba a Anthakthika. Mananeo a ka moka a tsenya letsogo go ekonomi ya Afrika Borwa.

4.2. Leano le le šišinya dikokwane tše hlano tše di latelago: (a) ditherišano le ditirišano tša boditšhabatšhaba; (b) dinyakišišo; (c) pabalelo le tšhomišo ya go ya go ile; (d) tlhabollo ya bokgoni le tlhahlo le (e) temošo ya batho. Leano le le arabela gape lenaneo la Kwano ya Anthakthika.

C. Melaokakanywa

1. Molaokakanywaphetošwa wa Bosetšhaba wa Sephethephethe sa Mebileng wa 2019

1.1. Kabinete e dumeletše gore Molaokakanywaphetošwa wa Bosetšhaba wa Sephethephethe sa Mebileng wa 2019 o romelwe Palamenteng. Molaokakanywa wo o šišinya gareng ga melao ye mengwe gore intasteri ya dikolo tša bootledi bja difatanaga e laolwe ebile o šišinya melawana ya maleba yeo baithutelabootledi ba swanetšego go rutwa yona. 

1.2. O bolela gape ka boradia le bomenetša ka lekaleng la sephethephethe sa mebileng, wa oketša dikotlo go bao ba palelwago ke go obamela melao ya tsela; wa iletša go nwa bjala ka baotledi le go šišinya melao ya bosetšhaba ya dinomoropolata.

1.3. Molaokakanywa wo o šišinya gape gore maatla a Tona ya Dinamelwa le a Malekgotlaphethiši ao a rwelego maikarabelo a dinamelwa ka diprofenseng a swanetše go phethagatšwa. 

2. Molaokakanywa wa Tefelo ya Dikgobalo tša Mešomong le Malwetši wa 2019

2.1. Kabinete e dumeletše gore Molaokakanywa wa Tefelo ya Dikgobalo tša Mešomong le Malwetši wa 2019 o romelwe Palamenteng.

2.2. Molaokakanywa wo o bolela ka ga diphetošo tše di šišinywago go Molao wa Tefelo ya Dikgobalo tša Mešomong le Malwetši (COIDA), wa 1993 (Molao wa 130 wa 1993). Molaokakanywa wo o oketša kakaretšo ya dikgobalo tša mešomong le malwetši go bašomi bao ba lego kotsing bao ba bego ba se ba akaretšwa mo nakong ye e fetilego gammogo le kaonafatšo ya dikholego tša tefelo go bašomi ka kakaretšo. 

2.3. Molaokakanywa wo bjale o akaretša gareng ga tše dingwe bašomi ba ka malapeng bjalo ka bao ba lego ka fase ga legoro la bašomi bao ba hwetšago dikholego go latela COIDA ya 1993. O šišinya gape tlhako ya dikeletšo le go bušetša mešomong ga bašomi bao ba gobetšego le/goba ba malapa a bao ba hlokofetšego. 

3. Molaokakanywa wa Mebušoselegae wa Karoganyo ya Mebasepala wa 2020

3.1. Kabinete e dumeletše go phatlalatšwa ga Molaokakanywa wa Mebušoselegae wa Karoganyo ya Mebasepala wa 2020 gore setšhaba se fe ditshwaotshwao ka ga ona. Ge o se na go fetišwa go ba molao, o tla phumola Molao wa bjale wa Mebušoselegae wa Karoganyo ya Mebasepala, wa 1998 (Molao wa 27 wa 1998).

3.2. Molaokakanywa wo o hlagiša gareng ga tše dingwe, go hlongwa le go sepediša ga Lekgotla la Karoganyo ya Mebasepala, dinyakwa le ditshepedišo tša karoganyo le tša karoganyoleswa ya mellwane ya mebasepala le ya diwate gammogo le go hlongwa ga Bolaodi bja Boipelaetšo. 

D. Ditiragalo tše di Tlago

1.  Kgwedi ya Ditokelo tša Botho 

1.1. Mopresidente Ramaphosa o tla fana ka polelo ya letšatši ka meketekong ya Letšatši la Ditokelo tša Botho la Bosetšhaba la 2020 yeo e tlogo swarwa ka Mokibelo wa la 21 Hlakola 2020 ka Lepatlelong la Dipapadi la Colesberg ka Kapa Leboa ka fase ga morero wa: “Ngwaga wa kopano, mpshafatšo ya ekonomi ya setšhaba le kago ya setšhaba.”

1.2.  Letšatši la Ditokelo tša Botho ka Afrika Borwa le tšwa ditiragalong tša histori tša ka Sharpeville (ka Gauteng) le tša ka Langa (ka Kapa Bodikela) tšeo di hlagilego ka la 21 Hlakola 1960, fao batho ba bantšhi kudu ba ilego ba bolawa ka go thunywa ba lwela ditokelo tša bona tša botho. 

1.3.  Kabinete e ipiletša go maAfrika Borwa go keteka Letšatši la Ditokelo tša Botho le go hlompha bao ba lobilego maphelo a bona ka nepo ya gore re fihlelele tokologo yeo re tšwelago pele go ipshina ka yona lehono. 

1.4. Mohlala wa ba bangwe ba batho bao ke moetapele yo a ikgafilego Ngaka Alfred Bathini Xuma, yo mongwe wa dingaka tša kalafo tša mathomo tša Bathobaso ka Afrika Borwa le Mopresidente wa peleng wa African National Congress. Mopresidente Ramaphosa o ketekile bophelo bja Ngaka Xuma ka go goeletša gore polokoleswa ya gagwe e be Poloko ya Semmušo ye e Kgethegilego ya Legoro la Pele ge mašaledi a gagwe a epollwa ka Brixton ka Johannesburg go ya lefelong leo a belegwego go lona motseng wa KwaManzana, Engcobo ka Kapa Bohlabela Lamorena leo le fetilego. 

2. Leeto la Mošomo la Mopresidente Ramaphosa go leba Repabliking ya Congo

2.1. Mopresidente Ramaphosa o tla tsenela Kopano ya Mathomo ya Sehlopha sa Kgokagano ka ga Libya yeo e tla swarelwago ka Oyo, ka Repabliking ya Congo ka la 11 le la 12 Hlakola 2020. O tla felegetšwa ke Tona ya Dikamano tša Dinaga tša Boditšhabatšhaba le Tirišano, Ngaka Naledi Pandor, Tona ya Tšhireletšo le Bagale ba Sešole, Mohumagadi Nosiviwe Mapisa-Nqakula le Tona ya Tšhireletšego ya Mmušo, Mohumagadi Ayanda Dlodlo. 

2.2. Mohlomphegi Denis Sassou N’Guesso, Mopresidente wa Repabliki ya Congo, o laleditše Mopresidente Ramaphosa go tsenela kopano ye bjalo ka Modulasetulo wa Mokgatlo wa Selekane sa Afrika (AU).

2.3. Kopano ya bo 33 ya Setlwaedi ya Kopanokgothekgothe ya AU e tšere sephetho sa go hloma Sehlopha sa Kgokagano, seo modulasetulo wa sona e lego Repabliki ya Congo gomme sona se akaretša maloko a Komiti ya Maemo a Godimo ya AU ka ga Libya ka nepo ya go fana ka boetapele bja sepolotiki le go tšwetša pele kgokagano ya maitapišo a boditšhabatšhaba ge go nyakwa tharollo ya Mathata a Libya.

3. Melaetša ya Matshedišo

3.1.  Kabinete e rometše matshedišo go ba lapa, bagwera le bašomimmogo ba monyakišišomogolo wa Lekala leo le Ikemego la Dinyakišišo tša Maphodisa, Morena Mandla Mahlangu (47), yo a bolailwego mo bekeng ye. Kabinete e romela gape matshedišo go ba lapa, bagwera le bašomimmogo ba bahlankedi ba babedi ba the Hawks e lego Letseka Seresanta Delene Grobelaar Koonin (44) le Setšene Wynand Herbst (42), bao ba bolailwego ka mothunyanong ka Leboa Bodikela.

3.2. Kabinete e kgalema go bolawa ga bahlankedi bao ba ikgafilego ba maphodisa, bao ba nago le maikarabelo a go šireletša maAfrika Borwa ka moka. Bjalo ka setšhaba, ka moka ga rena re swanetše go ema ka maoto re kgalemeng go bolawa ga banna le basadi ba rena ba maphodisa. 

4. Molaetša wa Ditebogišo

Kabinete e lebiša ditebogišo le mahlatse le mahlogonolo go: 

1.1. Mopresidente yo a kgethilwego, Mohlomphegi Morena Fauré Essozimna Gnassingbé, ge a kgethilwe gape bjalo ka Mopresidente wa Repabliki ya Togo ka Dikgethong tša Bopresidente tše di bego di swerwe ka la 22 Dibokwane 2020. Kabinete e ba le Mopresidente Ramaphosa gape ge a lebogiša batho ba Togo ge ba swere dikgetho tša khutšo.

5. Bao ba Thwetšwego Mešomong

Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.
1.    Maloko a Lekgotlataolo la Bolaodi bja Polokego ya Mawatle bja Afrika Borwa:
a.    Mohumagadi Nthato Minyuku (Modulasetulo).
b.    Mohumagadi Lindelwa Nonjabulo Dlamini;
c.    Morena Lucas Haluodi;
d.    Mohumagadi Eva Dorothy Khosa; le
e.    Morena Captain Bheka Clive Zulu.

Dipotšišo: Mohumagadi Phumla Williams
Seboleledi sa Kabinete sa Motšwaoswere 
Mogala: 083 501 0139