A.    Merero ye Bohlokwa Seemong sa Bjale 

1.    Lenaneo la Lesolo la Meento

1.1.    Lenaneo la Lesolo la Mafelo a go Hlaba Meento ya bolwetši bja Coronavirus (COVID-19) la Sisonke a okediditšwe go ba a 54 go kgabaganya naga ka bophara. Go fihla tšatšing la lehono, batho ba go feta 207 808 ba entilwe ka lona lenaneo le. 

1.2.    Dikgato tše tharo tša Lenaneo la Afrika Borwa la lesolo la meento le eme ka tsela ye: 

• Kgato ya 1: E gare e ya phethagatšwa mo dikgweding tše tharo go thoma ka Dibokwane go fihla ka Moranang 2021, nepo e le go enta bašomedi ba tša maphelo ba go feta milione le seripa (ba 608 295 ba bona ba ingwadišitše) nageng ka bophara. Kgoro ya Maphelo e gata ka mošito wa maleba go enta bašomedi ka moka ba tša maphelo pele ga ge Kgato ya 1 e fihla mafelelong.
• Kgato ya 2: Kgato ye e tlo phethagatšwa mo dikgweding tše tshela, go thoma ka Mopitlo go fihla ka Diphalane 2021. Kgato ye e tlo akaretša dihlopha tša batho ba 13 350 140 bao ba lego kotsing ya leuba le, bašomedi ba bohlokwa le ba legoro la tša maphelo le polokego mafelong a mešomo; bašomedi bao ba šomang ka mafapheng ao a lego bohlokwahlokwa go boetša ikonomi madulong a yona go swana le meepo, kamogelabaeng, intasteri ya dithekisi, mabenkele a kgoparara le diphatsa, bagwebi ba merogo le dienywa, babegaditaba le ba bangwe ba maleba. 

Mafelo a go hlaba meento Kgatong ya Bobedi le ya Boraro a tlo rotošetšwa go 2 085 ebile a tlo akaretša gape mafelo a lefapha la praebete go kaonafatša bokgoni le lebelo la lenaneo le la lesolo la meento.

• Kgato ya 3: Kgato ye e tlo phethagatšwa mo dikgweding tše tharo (Dibatsela 2021 – Dibokwane 2022) mo go tlo entwago batho ka moka ba Afrika Borwa bao ba šetšego, go akaretšwa le bao ba sa kago ba entwa Kgatong ya Bobedi, nepo e le go fihlelela batho ba 22 600 640.

1.3.    Kabinete e thabela go bona go goroga ditseka tša moento wa Johnson & Johnson (J&J) ka mo nageng, tšeo di netefatšago gore go ba le kgatelopele phethagatšong ya Kgato ya Mathomo ya lenaneo la lesolo la meento la Sisonke. 

1.4.    Kabinete e santše enale boitshepho bja kgatelopele ye makatšago yeo e fihleletšwego ke Lekgotla la Afrika Borwa la Taolo ya Ditšweletšwa tša Maphelo (SAHPRA) ge le dumeletše moento wa J&J gore o ka šomišwa go enta batho ka bontši. Sephetho sa moragorago sa SAHPRA sa go dumelela moento wa COVID-19 wa Pfizer/BioNTech se swanetše go fa naga ye monyetla wa go ikhweletša meento ye mengwe ya go phološa maphelo a batho. 

1.5.    Kabinete e rata go netefaletša maAfrika Borwa gore Kgoro ya Maphelo, ka go šomišana le le lefapha la praebete, e tla kgona go phethagatša lesolo la go enta batho ka bontši ge Kgato ya Bobedi e thoma.

1.6.    Kabinete e amogetše gape ketelo ya goya Senolofatšing sa go Dira Diokobatši sa Biovac gola Kapa Bodikela ka Labone, 18 Hlakola 2021 ka Modulasetulo wa Komiti ya gare ga Ditona (IMC) e bago Motlatšamopresidente David Mabuza mabapi le Meento ya COVID-19. Ketelo ye e lekotše mabokgoni a senolofatši se, mananeokgoparara le dipeeletšo tša go thekga go dirwa ga diokobatši le tlhabollo. 

1.7.    Tšhomišanommogo magareng ga Biovac le khamphani ye lego gola Amerika ya meriana ya go loutša mašole a mmele gore a lwantšhe malwetši ya go bitšwa ImmunityBio, go hlabolla mabokgoni a Afrika Borwa a go dira meento ya COVID-19, e tla dira gore go be le mohutatšweletšo wa bobedi wa moento wa COVID-19 wo o tlo tšweletšwago ka mo nageng.

1.8.    Kabinete e dira boipiletšo go maAfrika Borwa ka moka le motho mang le mang mo nageng go kgatha tema tša bona le go obamela dikiletšo tša kiletšo ya mesepelo – kudukudu mo nakong ye ya meketeko ya sedumedi ya Pesach, ya Paseka le ya Ramadan go fokotša go boya gape ga diphetelo tša COVID-19 le go efoga lephoto la boraro leo go ka diragalago gore le be gona.

1.9.    Kabinete e gateletše gape bohlokwa bja go latela ditshepedišo tša maphelo tša go se diriše meriana ya ka dikhemising go thibela phetelo ya COVID-19 ka go tšwelapele go apara dimaseke mafelong a bohle, go šielana sekgala seo e ka bago mithara o tee le seripa, go dula re hlapa matsogo ka meetse le ka sesepe goba go šomiša sanithaesa sa go ba le alekhohole, le go efoga dikgobokano tše kgolo tša batho. 

2.    Enetši

2.1.    Kabinete e tseba gabotse ditlamorago tše mpe tša ikonomi maphelong a batho, tlhakatlhakano le tšhitelo yeo e hlotšwego ke go kgaotšwa ga mohlagase go badudi ba naga ye le dikgwebo mo dibekeng tše mmalwa tša go feta.

2.2.    Re leka ka botšohle go rarolla ditlhotlo tša bjale tša enetši le go tsentšha batšweletši ba baswa ba mohlagase ka nako ye kopana ka fao go kgonagalago e lego se bohlokwa go boetša sekeng ikonomi ya Afrika Borwa. Go sale bjalo, mmušo o tšwelapele go thekga matsapa a mohlakanelwa a go bušetša Eskom sekeng le go e phagamiša gabotse gore e tle e kgone go golela pele ka tsela ye e swarelelago.

2.3.    Kabinete e amogetše tsebagatšo ya Tona ya Methopo ya Diminirale le Enetši Gwede Mantashe ya baphenkgišanetšakgwebo ba mamomoratwa ba seswai bao ba kgethilwego go bangwe ka bona go aba tekano ya tlaleletšo ya go lekana 2 000 MW ya mohlagase wa tšhoganyetšo wo o tla re thušago go thekga kabo ya mohlagase maemong a bosetšhaba mo nakong ye ye kopana.

2.4.    Baphenkgišanetšakgwebo ba ba mamoratwa go tšwa Lenaneong la Batšweletši ba Mohlagase ba go Ikema go letetšwe gore ba hwetše enetši go tšwa go seetša sa mohlagase wa letšatši, seetša sa mohlagase wa phefo, dikgase tša tlhago tšeo di fetotšwego go ba diela le ka polokelo ya mohlagase ka peteri. Ditlhomesetšo tša mathomo godimo ga megala ya bosetšhaba ya kabo ya mohlagase e theilwe go thoma ka Phato 2022.

2.5.    Diprotšeke tše seswai tše di tlo tsenya R45 bilione ka gare ga ikonomi, ka palomoka ya diprotšeke tša go lekana 50% tša ka mo nageng le go hlola menyetla ya mešomo ye 3 800 nakong ya kago. Menyetla ye mengwe ya mešomo ye 13 500 e tla hlolwa nakong ya Paka ya Mengwaga ye 20 ya Kwano ya go Reka Mohlagase go batšweletši ba go ikema.
 
2.6.    Magato a a logetšwego maano ao mmušo o wa dirago go beakanyalefsa le go maatlafatša peakanyo ya mohlagase a tlo kaonafatša kudu bokgoni ba naga bja go fehla mohlagase. Kgatelopele ye bonagalago yeo e fihleletšwego e laetša gabotse gore matsapa a rena a go swaragana le ditlhotlo tša enetši a thoma go ba le mošito.

2.7.    Kabinete e dira boipiletšo go rena ka moka go thekga magato a go maatlafatša go šoma gabotse ga Eskom ka go bega go ditheo tša phethagatšo ya molao ditiragalo tša go ikgogela mohlagase go se mo molaong, go nota mabone le thekišo ya bofora ya diboutšhara tša mohlagase. Ka moka ga rena re swanetše go ba badiriši ba mohlagase ba maikarabelo ka go lefela mohlagase kgwedi ka kgwedi.

3.    Kwano ya Ditefo tša Diyunibesithi 

3.1.    Kabinete e santše e ikgafetše go tla ka tharollo yeo e swarelelago ya goyagoile ya thekgo ya ditšhelete ya dithuto tša godingwana, go netefatša gore baithuti ka moka bao ba swanelago ke go amogetšwa thuto ga ba tswalelelwe ka ntle. 

3.2.    Kwano ya ditefo yeo e fihleleletšwego magareng ga Kgoro ya Thuto ya Godimo le Tlhahlo (DHET) le ditheo tša thuto ya godimo e tsamaišana le infleišene, bjalo ka karolo ya go dira gore ditefo tša thuto ya godimo di be fase. 

3.3.    Kabinete e hlobaetšwa ke dikoloto tša kgale tša baithuti tšeo di golelago godimo peakanyong ya thuto ya godimo. Gabjale DHET e gare e kgoboketša tshedimošo ka diprofaele tša baithuti ba go angwa ke sekoloto se, e lego tshedimošo ye e tla bago karolo ya tshekatsheko yeo e rulagantšwego ya pholisi ya go thekga baithuti ka ditšhelete go tsebagatša mokgwa wa thekgo ya ditšhelete wa goyagoile thutong ya godimo. 

3.4.    Go sa le bjalo, Kabinete e hlohleletša ditheo tša thuto ya godimo go rerišana le makgotla a baithuti go hwetša ditharollo tšeo di tla dumelelago baithuti ba bantši go ingwadiša. 

3.5.    Kabinete e amogela dinyakišišo tša ka pejana le go golegwa ga maphodisa a mane bao go begwago ba bolaile Morena Mthokozisi Ntumba wa mengwaga ye 35 nakong ya boipelaetšo bja baithuti malobanyana ka ntlenyana ga Yunibesithi ya Wits gola Johannesburg. Go feta mo, Kabinete e amogetše go golegwa ga bao ba nago le seabe sa dikgaruru tša phatlalatša ebile ba tšwetše pele go hlasela maphodisa nakong ya boipelaetšo. 

3.6.    Kabinete e hlompha ditokelo tša molaotheo tša go ipelaetša ka moya wa khutšo ntle le go tshela molao. Le ge go le bjalo, ditheo tša phethagatšo ya molao di ka se dumelele mahodu go šomiša gampe monyetla wa boipelaetšo bja makgonthe le go hlola tlhakatlhakano ka go fiša le go senya thoto ya praebete le ya mmušo.

4.    Dipolao tša Maphodisa

4.1.    Kabinete e santše e hlobaetšwa ke ditlhaselo tšeo di begilwego tša maloko a Ditrelo tša Maphodisa a Afrika Borwa. Maphodisa ba bea maphelo a bona kotsing tšatši ka tšatši go netefatša polokego ya setšhaba sa gaborena le naga ka moka.

4.2.    Mo kgweding ya go feta, ga e sale go thoma ka la 25 Dibokwane 2021, palomoka ya maphodisa a 12 a bolailwe ga sehlogo ba le mešomong le ge ba se mešomong dikarolong tša go fapafapana tša naga.

4.3.    Ditiragalo ka moka tša dikgaruru le tša polao tšeo di lebantšwego maphodiseng ga se fela tša bofšega eupša ke tša go hloka potego, ebile ga se tša swanela go kgotlelelwa le gatee setšhabeng sa gaborena. Kabinete e dira boipiletšo go ditheo tša phethagatšo ya molao go netefatša gore dipolao tša maphodisa ga e be sepa la bošego. 

4.4.    Bjalo ka setšhaba sa go obamela molao le sa go rata khutšo, anke ka moka re laetše go šišimiša ke dipolao tša maphodisa ka go bega babonwamolato le bao ba tšhabilego go ditheo tša phethagatšo ya molao. Ga gona le lephodisa le tee leo le swanetšego go loba bophelo. 

5.    Letšatši la Ditokelo tša Botho
5.1.    Kabinete e lebogile maAfrika Borwa ka moka ge ba tsenetše meketeko ya naga ye ya Letšatši la Ditokelo tša Botho ka Lamorena, 21 Hlakola 2021 ka fase ga morero wo: “Ngwaga wa Charlotte Maxeke: Hlohleletšo ya Ditokelo tša Botho Mehleng ya COVID-19”. Meketeko ya ngwaga wo e lebane le anibesari ya bo-25 ya go amogelwa ga Molaotheo wa Rephabliki ya Afrika Borwa wa 1996.

5.2.    Letšatši le le re gopoditše ka mošomo wa rena wa setho wa go tšwetšapele phenkgišano kgahlanong le semorafe, kgethollo ya bong, lehloyo la batšwantle le mafokodi ka moka a go hloka kgotlelelo a go amana le a, go akaretšwa le dikgaruru tša go ikala ka bong le phure yeo e sa šaletšego ya sehlogo sa go šomiša dikgoka ga maphodisa baduding. 

5.3.    Kabinete e dirile boipiletšo go maAfrika Borwa ka moka go šomiša matšatši ao a šaletšego a Kgwedi ya Ditokelo tša Botho go hlola phedišano ye kgolo setšhabeng, go aga setšhaba le go ba batho ba tee setšhabeng. 

B.    Diphetho tša Kabinete

1.    Pholisi ya Bosetšhaba ya Polokelo ya Tshedimošo Lefaufaung ka Inthanete

1.1.    Kabinete e dumeletše phatlalatšo kuranteng ya mmušo ya Pholisi ya Bosetšhaba ya Polokelo ya Tshedimošo Lefaufaung ka Inthanete gore setšhaba se fe ditshwayotshwayo tša sona. Pholisi ye e šeditše go lebantšha dipholisi le melao ye lego gona go netefatša gore naga ye e holwa ke dikgatelopele tše lego gona ikonoming ya titšithale. 

1.2.    Ditirelo tša Tshedimošo le tša Polokelo Lefaufaung ka Inthanete ke tšona tše bohlokwa tša go kgontšha ikonomi ya titšithale. Pholisi ye e šeditše gape go netefatša gore naga ye e kgatha tema ka botlalo mo mehleng ye ya tshedimošo ye mpsha. Ge e šetše e amogetšwe, pholisi ye e tlo maatlafatša mabokgoni a Mmušo a go abela badudi ba ona ditirelo.

2.    Seakanywa sa Matsapa a go Hlangwa ke Naga ka Bophara (NDC) go Lebeletšwe Magato a Lefaseng ka Moka Godimo ga Phetogo ya Leratadima

2.1.    Kabinete e dumeletše seakanywa seo se fetlekilwego sa NDC go lebeletšwe magato a phetogo ya leratadima gore setšhaba se fe ditshwayotshwayo tša sona. Kwano ya Paris phetogong ya leratadima e nyaka gore Afrika Borwa e romele di-NDC ka morago ga nako ye itšego tšeo di hlathollago nepo ya go fokotša dihlahlameši tša digase tše šoro tikolong. 

2.2.    Go tloga mola go amogelwago Kwano ya Paris ka Manthole 2015, Afrika Borwa e fihleletše kgatelopele ye bonagalago ya go gatela pele tlhabollong le phethagatšong ya di-NDC tša yona.

2.3.    Seakanywa seo se fetlekilwego sa NDC se sekegela maemo a bosetšhaba a Afrika Borwa, dinyakwa tša semolao tša Kwano ya Paris, tekatekano le mahlale a moragorago.

3.    Komiti ya Gare ga Ditona (IMC) ya Mogopo wa 2023 wa Kgwele ya Diatla (NWC)

3.1.    Kabinete e dumeletše go hlongwa ga IMC ya NWC ya 2023 gore go tle go swarwe NWC ka mo nageng. IMC e tla sepediša mošomo wa boitukišetšo tiragalong ye. 

3.2.    Afrika Borwa, e lego naga ya mathomothomo mo Afrika Borwa go ba monggae wa NWC, e tla ba monggae wa phenkgišano ya dinaga tše 16.

4.    Dipontšho tša Boditšhabatšhaba tša Kgoboketšo ya Ditempe (IPEX)

4.1.    Kabinete e dumeletše go swarwa ga IPEX ka mo nageng, yeo e tsebagalago gore ke pontšho ya ditempe, kua Motsekapa go thoma ka la 9 go fihla ka la 19 Manthole 2021 ka fase ga morero wo: ‘‘Leeto leo re le sepetšego go fihlela re bona temokrasi’’. Federeišene ya Boditšhabatšhaba ya Kgoboketšo ya Ditempe (FIP) e be e rulagantše mathomong go swarela tiragalo ye kua Motsekapa go thoma ka la 17 go fihla ka la 20 Hlakola 2021 eupša tiragalo ye ya šutišetšwa letšatšing la 9 go fihla ka la 19 Manthole ngwaga wo ka baka la COVID-19. 

4.2.    Kgoro ya Dikgokagano le Ditheknolotši tša Ditšithale e tla beakanya le go swara tiragalo ye ka tšhomišano le komitipeakanyo ya FIP. 

4.3.     Ditempe tšeo di kgobokeditšwego di tla laetša ditiragalo tše bohlokwa tša kgale, batho ka noši le ditiragalo tšeo di kgathilego tema ge temokrasi e thoma ka mo Afrika Borwa. Baeng bao ba letetšwego go ba tiragalong ye ba tla kgatha tema mererong ya tša boeti ya naga ye, ba maatlafatša ikonomi ya ka mo nageng, le go hlohleletša setšo le phedišano setšhabeng. 

5.    Leanophethagatšo la Mengwaga ye Lesome la Saense, Theknolotši le Boihlamelo (Leanophethagatšo la STI la Mengwaga ye Lesome)

5.1.    Kabinete e dumeletše Leanopeakanyo la Mengwaga ye Lesome la STI la 2021-2031 godimo ga phethagatšo ya mahlale le boihlamelo. Thulaganyo ya leano le e gata mohlaleng wa Sengwalwa sa Makgoraditsela sa Mahlale le Boihlamelo seo se dumeletšwego ke Kabinete ka 2019.

5.2.    Pholisi ye e arabela dikgatelopele tše akgofilego tša theknolotši le go bea sekeng STI godimo ga kgatelopele ya naga ye. Thulaganyo ye ya Mengwaga ye Lesome e tla šoma bjalo ka thulaganyo ya mmušo ya motheo yeo e tlo akaretšago dikgoro tše dingwe go swana le Kgoro ya Temo, Peakanyolefsa ya Naga le Tlhabollo ya Dinagamagae; Kgoro ya Methopo ya Diminirale le Enetši; Kgoro ya Maphelo, Kgoro ya Kgwebišano, Intasteri le Diphadišano. Phethagatšo ya thulaganyo ye e tla dirwa ka tšhomišano le dikgoro tše dingwe tše maleba.

C.    Ditiragalo tšeo di Tlago

1.    Tlelapo ya Mopresidente ya go Bala ka Dikgokagano tša Bidio

1.1.    Kabinete e hlohleleditše maAfrika Borwa ka moka go tsenela kopano ya bone ya Tlelapo ya Mopresidente ya go Bala ka Labone, 25 Hlakola 2021 go thoma ka 16:30 go fihla ka 18:30, ka dikgokagano tša inthanete tša Microsoft Teams (https://nrc.org.za/(link is external)).

1.2.    Kopanong ye go tlo balwa dipuku tše kaonekaone tša mehla yohle tše di ngwadilwego ke MaAfrika Borwa e lego The Suit ya go ngwalwa ke Can Themba le I am not a Tramp ya go ngwalwa ke Leslie Sehume. 

1.3.    Go tloga mola e tsebagatšwago ka 2019, Kgwerano ye ya Bosetšhaba ya go Bala e thekgile Lesolo la Balela go ba Moetapele le boipiletšo bja Mopresidente Cyril Ramaphosa bja go kaonafatša go bala setšhabeng go tloga ka diphaphošing tša dikolo go fihla diphaphošing tšeo re phelago go tšona ka mehla. 

1.4.    Ka go šomišana mmogo re ka tšwetšapele bokgoni bjo bja motheo le go kgona go fihlelela dibaka tša mešomo bokamosong.

D.    Melaetša

1.    Ditebogišo

Kabinete e lebiša ditebogišo tša yona le go lakaletša bao ba latelago mahlogonolo: 

• Ngaka Patrice Motsepe, rakgwebo wa go tuma kudu yo a bilego MoAfrika Borwa wa mathomo wa go kgethwa bjalo ka Mopresidente wa Khonfetereišene ya Kgwele ya Maoto ya Afrika. 
• Kabinete e lakaleditše maAfrika Borwa ka moka maikhutšo a lethabo le a polokego, le balatedi ba tša bodumedi meketeko ya go hlomphega le semoya ya Pesach.

2.    Mahloko 

Kabinete e lebiša mahloko a yona go malapa le bagwera ba: 

• Kgošikgolo Goodwill Zwelithini kaBhekuzulu, yo a tsoramego bogoši bja Setšhaba sa maZulu lebaka le le telele. Mopresidente Ramaphosa o neile Kgošikgolo Poloko ya go Ikgetha ya Mmušo ya maemo a Legoro la 1, yeo e akareditšego meketeko ya go laetša hlompho ka sešole sa naga ye. Kgošikgolo ye ya go hlomphega o tla gopolwa bjalo ka moetapele wa bogoši yo a kopantšhitšego setšhaba sa maZulu, baetapele ba setšo le yo a kgathilego tema ya gagwe ka botlalo gore morafe wa maZulu o atlege.
• Mohlomphegikgolo Mopresidente John Pombe Magufuli wa Rephabliki ye Kopantšwego ya Tanzania. Afrika Borwa e kopanetše mahloko a le mmušo le batho ba Tanzania ge ba kopane le mathata a a boima. Ge a be a efa polelo ya go gopola Mopresidente Magufuli, Mopresidente Ramaphosa o boletše gore: “Re hweditše tokologo ya rena ka baka la bopelotelele le go ikuna tše ntši ga batho ba Tanzania. Ke ka baka la histori ya rena ye swanago le ya bona yeo e dirago gore rena bjalo ka maAfrika Borwa, re ikwe lehu la Mopresidente Magufuli le re hlabile pelong ebile le re ama kudu. Tanzania e lahlegetšwe ke tatago yona le ngwana wa mmu, Afrika e lahlegetšwe ke moetapele wa ponelopele, mola Afrika Borwa yona e lahlegetšwe ke mogwera wa go ratega.” 
• Morena Menzi Ngubane, mmapadi wa mahlwaadibona yo a thopilego difoka yo e bego e le modiragatši wa bokgoni le sebapadi sa makgonthe. O kgathile tema ye kgolo kudu tlhabollong ya bokgabo bja tiragatšo, mo dithelebišeneng le mo difaleng ka bobedi ga tšona. Mošomo wa gagwe bjalo ka mmapadi o santše o tšwelapele go hlohleletša ba bantši intastering ya bokgabo.
• Mohumagadi Noxolo Maqashalala, yo e bego e le mmapadi wa moswa wa bohlale yo a bego a kgabaganya dithelebišeneng tša rena go laetša bokgoni ba gagwe bja maemo a godimo. 
• Ngaka Nawal El Saadawi, Moegepeta wa go lwela ditokelo tša basadi, molweladitokelo tša botho, mongwadi le ngaka ya kgopolo. O kgathile tema ka dingwalwa tša gagwe le seabe sa gagwe sa bolwelatokologo twantšhong ya go gatelelwa ga basadi go ya ka setšo sa bona, bodumedi le sebopego sa maemo a bona setšhabeng. O be a tumile lefaseng ka bophara ka mošomo wa gagwe wa go lwantšha setlwaedi sa go ripa ditho tša basadi tša bong.
• Morena Pathasarvasan Govender, wa go tsebega bjalo ka “Charm Govender”, Molwelatokologo wa go tšwa Chatsworth gola KwaZulu-Natal, yo e bego e le leloko la Natal Indian Congress ebile e le molwelatokologo wa ka sephiring wa African National Congress (ANC).
• Morena Cecyl Esau, yo e bego e le molwelatokologo wa potego le mogolegwa wa sepolotiki wa peleng wa Robben Island ebile e le leloko la kgale la lebotho la sešole la ANC, Umkhonto we Sizwe. Morena Esau o šomišitše bophelo bja gagwe bjalo ka moswa le bjalo ka motho yo mogolo go lwela Afrika Borwa ya tokologo, ya go hloka semorafe le ya go se hlaole batho goya ka bong ba bona.
   

E.     Bao ba Thwetšwego Mešomong

Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.

1.    Mohumagadi Nolwazi BK Gasa bjalo ka Motlatša Molaodipharephare (DDG): Peakanyo, Dipholisi le Togamaano mo go DHET.
2.    Morena Samuel Zamokuhle Zungu bjalo ka DDG: Thuto le Tlhahlo ya Mešomo ya Matsogo le ya Bothekniki mo go DHET.
3.    Mohumagadi Pretty Nozipho Makukule bjalo ka Mohlankediphethišimogolwane mo go DHET. 
4.    Mohumagadi Memme Sejosengwe, yo kontraka ya gagwe bjalo ka Mongwaledipharephare ka Kantorong ya Moahlodimogolo e okeditšwego. 

Dipotšišo:
Mohumagadi Phumla Williams – Seboleledi sa Kabinete 
Mogala: 083 501 0139