Kopano ya Kabinete ye e Kgethegilego yeo e bego e swerwe ka go šomiša Ditlabakelo tša Theknolotši e swerwe lehono ka la 15 Moranang 2020, go ahlaahla leano la tsošološo ya ekonomi ya setšhaba ka morago ga go Tswalelwa ga Naga ka lebaka la COVID-19.

Se se latela tsebišo ye e dirilwego ke Mopresidente Cyril Ramaphosa dibeke tše pedi tše di fetilego, ya gore Kabinete e tla boledišana ka botlalo gore e tle ka leano la tsošološo ya ekonomi la naga ye.

Ditlhagišo tše hlano di amogetšwe go tšwa go dihlopha tše: (1) Lekala la Ekonomi, Peeletšo, Tlhomo ya Mešomo le Tlhabollo ya Mananeokgoparara; (2) Pušo, Bokgoni bja Mmušo le Tlhabollo ya Dihlongwa; (3) Tšhireletšo ya Setšhaba, Tlhabollo ya Setšhaba le Batho; (4) Tirišano ya Boditšhabatšhaba, Kgwebišano le Tšhireletšo; le (5) Toka, Thibelo ya Bosenyi le Tšhireletšo.

Ditlhagišo tše di dirwa ka morago ga mošomo wo o dirilwego ke dihlopha ka moka tša maloko a Kabinete, go lebeletšwe tsošološo ya ekonomi ya naga ye ka lebaka la leuba la COVID-19 le go theošwa ga maemo a dipeeletšo tša Afrika Borwa fao go sa tšwago go dirwa ke ditheo tša kelo ya dipeeletšo e lego Moody’s le Fitch ka go latelana.

Kabinete e tšere sephetho sa gore dipoledišano tše dingwe le ditherišano di sa nyakega pele ga ge leanotiišetšo la mafelelo le ka dumelelwa go ka tsebišwa setšhaba.

Dihlopha tša maloko a Kabinete ka moka di kgopetšwe go šoma mmogo ka nepo ya go tšweletša sengwalwa se tee seo se tiišeditšwego ka ga dilo tše bohlokwa tšeo di tlago pele tša leano la tsošološo ya ekonomi ya naga ye, seo se swanetšego go phethwa pele ga Kopano ya Kabinete ye e latelago ye go rulagantšwego gore e tla swarwa ka Mošupologo wa la 20 Moranang 2020.

Kabinete e laetše gape Tona ya Dikgwebo tša Mmušo Pravin Gordhan go lokiša pego ya moragorago ka ga Tirelo ya Difofane ya Afrika Borwa, go tla go ahlaahlwa ka kopanong ye e tlago. Ka morago ga fao, Kabinete e tla feleletša leano la tsošološo ya ekonomi la naga ye.

Kabinete e leboga batho ka moka go ralala le naga ge ba dutše ka gae ka nakong ya go tswalelwa ga naga.

Dipotšišo: Mohumagadi Phumla Williams – Seboleledi sa Kabinete sa Motšwaoswere
Mogala: 083 501 0139