1. Tsebišo ya Seemo sa Coronavirus (COVID-19)

1.1. Kua kopanong ya yona ye swerwego ka Laboraro, 10 Phupu 2020, Kabinete e amogetše pego ya tshedimošo ya moragorago go tšwa go Lekgotlataelo la Bosetšhaba ka ga Coronavirus (NCCC). NCCC e šišintše ditšhišinyo tše bonagalago tša go amana le Maemo a Boraro ao a kaonafetšego a go lekanetšwa kgahlanong le kotsi mabapi le go tswalelwa ga naga ka bophara.

Ditšhišinyo tše di ikadile godimo ga ditlhagišo tše dirilwego ke mafapha a go fapafapana gotee le dipoledišano tše ahlaahlilwego ke Setheo sa Bosetšhaba sa Ditiragalo tša Mohlakanelwa le sa Bohlodi (NATJOINTS).

1.2. Le ge go le bjalo, Kabinete e tšeere sephetho sa go fega go dumelelwa ga ditšhišinyo tše go sa letetšwe pego yeo e feletšego ya phetleko ya maphelo go tšwa go Komitikeletšo ya tša Maphelo ya Tona Mabapi le COVID-19. Go letetšwe gore NCCC e amogele tlhagišo yeo e feletšego mathomong a beke ye tlago.

1.3. Kabinete e santše e dira boipiletšo le go hlohleletša maAfrika Borwa ka moka go latela le go ithaopa go obamela magato ao a hlomilwego go lwantšhana le go phatlalala ga COVID-19. Magato a a akaretša go hlapa matsogo kgafetšakgafetša, go šielana sekgala le go apara dimaseke ge ba tšwela ka ntle go kopana le batho.

2. Khamphani ya Bosetšhaba ya Petroleamo

2.1. Kabinete e sedimošitšwe ka mošomo wo kgatlampanago wa go gopodišiša makalakgwebo ka moka a petroleamo (a oli le a gase) a khamphani ya enetši ya ditirelokgwebo tša go fapafapana yeo e laolwago ke mmušo, e bago Central Energy Fund.

2.2. Pheletšo ya kgopodišišo ye e tla ba gore makalakgwebo a mararo (PetroSA, Strategic Fuel Fund le iGas) a momaganywe goba selo se tee e lego Khamphani ya Bosetšhaba ya Petroleamo. Se se kgontšha tsebagatšo ye dirilwego ke Mopresidente Cyril Ramaphosa Polelong ya gagwe ka Maemo a Setšhaba ya la 13 Dibokwane 2020, e lego go fetoša morero le go gopodišiša palo ye bonagalago ya dikgwebo tše laolwago ke mmušo go thekga kgolo le tlhabollo.

2.3. Kabinete e dumeletše go thwalwa ga khamphani ya ditsebi tša peakanyoleswa yeo e šomago fela ka dikhamphani tše momagantšwego gore e nyakolle mmotlolo wo o ka phethagatšwago kaonekaone wa Khamphani ye ya Bosetšhaba ya Petroleamo.

3. Tlhako ya Pholisi ya Dikgaruru tša go Ikala ka Bong (GBV) Dithutong tša ka Morago ga Marematlou le ka go tša ka Peakanyo ya Tlhahlo

3.1. Kabinete e dumeletše Tlhako ya Pholisi ya GBV Dithutong tša ka morago ga Marematlou le ka go tša ka Peakanyong ya Tlhahlo. Tlhako ye ya pholisi e šetšane le go arabela palo yeo e hlatlogetšego godimo ya melato ya go amana le GBV ditheong tša thuto ya godimo.

3.2. Tlhako ye ya pholisi e fana ka tlhahlo ya dihlongwa, mekgwa le ditshepedišo tšeo ditheo tša thuto ya godimo di swanetšego go di hloma go efoga ditiragalo tša GBV dikhamphaseng tša tšona. Go tlaleletša godimo ga go aba dihlongwa tša go lekola mošomo wo dirilwego, tlhako ye ya pholisi e gapeletša tšona ditheo tše go lemoša batho ka dipholisi tša tšona tša GBV.

4. Pego ka Dinyakišišo tša Kgonagalo ya go Aga Musiamo wa RLMM.

4.1. Kabinete e dumeletše Pego ka Dinyakišišo tša Kgonagalo ya go Aga Musiamo wa Ditiragalo tša go Ema Kgahlanong le Kgethologanyo le tša go Lwela Tokologo (RLMM). Musiamo wo o tla kgatha tema ya go babalela histori ya ditiragalo tša go Ema Kgahlanong le Kgethologanyo le tša go Lwela Tokologo ka mono Afrika Borwa.

4.2. Dinyakišišo tše, tšeo di dumeletšwego ke Kabinete ka 2015, di thomilwe go lebeletšwe seemo sa Protšeke ya Lesolo la Pabalelo le Bohwa bja Naga mo Ditiragalo tša go Ema Kgahlanong le Kgethologanyo le tša go Lwela Tokologo (RLHR). RLHR e thuša ka tlhabollo le go fetošwa ga merero ya bohwa nageng ya Afrika Borwa.

4.3. Ge o feditšwe go agwa, musiamo wo o tla lota tlhatlamano ya ditiragalo tša bohwa (tšeo di bonagalago le tša go se bonagale) le go fana ka tlhathollo yeo e swanago, kelelo ya tšona le maitemogelo a go amana le diphenkgišano tša tokologo ka mo Afrika Borwa.

5. Lesolo la Bosetšhaba la Bohwa bja Merafe ya Masarwa

5.1. Kabinete e dumeletše go phethagatšwa ga Lesolo la Bosetšhaba la Bohwa bja Merafe ya Masarwa, e lego protšeke ya bohwa bja bosetšhaba. Lesolo le  le tla hlaola, la laetša, la lota le go hlohleletša bohwa bja maKhoi, maNama, maGriekwa, maKhorana le maSan. Protšeke ye e tla thuša temogong ya histori ya Afrika Borwa yeo kgale e bego e hlaeditšwe mahlo le go phaelwa thoko.

5.2. Pabalelo ye e kgontšha gape le Molao wa Setšo le Magoši a Merafe ya Masarwa 2019 (Molao 3 wa 2019), wo o beago molaong temogo ya Magoši a Merafe ya Masarwa.

6. Meakanyetšo ya Dikhoine tša Meketeko ya 2021 le ya 2022

6.1. Kabinete e dumeletše meakanyetšo ya dikhoine tša phatlalatšo tša meketeko ya 2012 le ya 2022 tšeo di lokollwago ke Panka ya Resefe ya Afrika Borwa (SARB) le Khamphani ya Afrika Borwa ya go bopa Tšhelete.

6.2. Khoine ya R5 ya phatlalatšo ya meketeko le ya R5 ya morumo wa silibere le khoine ya serekelele sa gauta yeo e ka kgoboketšwago e tla lokollwa ka 2021 go keteka mengwaga ye lekgolo go tloga mola SARB e thakgolwago. Tatelano ya bone ya Khoine ya Tesimale ya Afrika Borwa, yeo e tla lokollwago ka 2022 e tla phatlalatšwa ka dikhoine tša 10c, 20c, 50c, R1, R2 le R5.   

Melaokakanywa

1. Molaokakanywaphetošwa wa 2020 wa Melao ya Lefapha la Ditšhelete

1.1. Kabinete e dumeletše tlhagišo Palamenteng ya Molaokakanywaphetošwa wa 2020 wa Melao ya Lefapha la Ditšhelete. Molaokakanywa wo o šišinya go bea SARB bjalo ka Lekgotlataolo la go Tšea Diphetho, le go kaonafatša magatotaolo a SARB a go phethagatša tlamego ye theilwego goya ka molao wa naga go netefatša boitsetsepelo bja peakanyo ya ditšhelete.

1.2. Molaokakanywa wo o šišinya tlhako ye mpsha ya go hwetša ditharollo ditheong tša ditšhelete, kudukudu dipanka, ge di lebagane le nako ye thata ya kgakanego ditšheleteng. Molaokakanywa wo o tsebagatša gape le sekimo sa mathomothomo sa Afrika Borwa sa inšorense yeo e ipheditšego ya bao ba tepositago tšhelete yeo e tla netefatšago gore batho ka moka bao ba tepositago ba lefelwa ditšhelete tša bona ge panka e folotša.

1.3. Sona sekimo se se tla šireletša batho bao ba tepositago bao ba ka bago kotsing le go netefatša gore go ba le ditšhitišo tše nnyane fela peakanyong ya ditšhelete le ikonoming ka bophara ge tšona ditheo tšeo di tsena ka gare ga kgakanego ya ditšhelete.

Bao ba Thwetšwego Mešomong

Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.

Mme Sekgothadi Kabelo bjalo ka Molaodi yo e sego leloko la Lekgotlaphethiši wa Molebeledi wa Maemakepe a Lekgotla la Afrika Borwa.

Dipotšišo: Mohumagadi Phumla Williams – Seboleledi sa Kabinete
Mogala: 083 501 0139