A.    Merero Seemong sa Bjale

1.    Lenaneo la Moento wa Bolwetši bja Coronavirus (COVID-19)

1.1.    Lenaneo la bosetšhaba la moento la Afrika Borwa le thomile go phethagatšwa ka lebelo ka botlalo ebile lefapha la maphelo (ka lekaleng la mmušo le la phraebete) le entela palo ya fasefase ya batho ba milione o tee mo matšatšing a mararo. Go fihla mo lebakeng le, maAfrika Borwa a go feta dimilione tše seswai ba šetše ba entetšwe. Ka lebelo la bjalo la moento, Mopresidente o swanetše gore mo nakong ye e sa fetšego pelo a tsebagatše letšatšikgwedi leo le nepišitšwego la go bušeletšwa gore naga ye e fihle go setšhaba seo se nago le boitšhireletšo baeraseng ye.

1.2.    Kabinete e tšwela pele go ipiletša go maAfrika Borwa go entelwa, ka ge go tšwela pele go ba sebetša sa rena seo se šomago gabotse kudu ka ntweng kgahlanong le COVID-19. Batho bjale ba ka kgona go ya lefelong lefe goba lefe la go entela ba swere dipukwana tša bona tša boitsebišo, le ge e le gore ga se ba dira dipeelano tša go tla fao, go ingwadiša le go entelwa semeetseng.

1.3.    Kabinete e amogetše go tlišwa ga mabotlelwana a meento a Pfizer a 5.6 milione mo bekeng ye ao a abilwego ke United States of America, ao a tlago netefatša gore go ba le kabo ye e lekanego ya meento ka nepo ya go maatlafatša lenaneo la rena la go entela batho. 

1.4.    Ka la 1 Lewedi 2021, batho ba mengwaga ya magareng ga ye 18 le ye 34 ba tlo ba le maswanedi a go entelwa.

1.5. Kabinete e lemogile go theogela fase ga dipalopalo tša batho bao ba fetelwago ke baerase ye ka Afrika Borwa ka morago ga ge naga ye e fetile semmušo tlhatlogo ya godimodimo ya diphetetšo tše diswa tša lephoto la boraro. Le ge go le bjale, diprofense tše nne – e lego ya Kapa Bodikela (le ge e le gore e sa tšwa go tsebagatša tlhatlogo ya godimodimo), Kapa Leboa, Leboa Bodikela le Foreisetata – di bile le ditlhatlogo ka go dipalopalo tša diphetetšo tša letšatši ka letšatši. 

1.6. Kabinete e bušeleditše boipiletšo bja yona go batho ka moka ka Afrika Borwa go tšwela pele go obamela melawana ya thobelo ya baerase ya go Apara Dimaseke, Go hlapa Diatla, Go tlogela sekgoba sa metara le seripagare magareng ga batho le go efoga fao go kgobokanego batho ba bantši. 

2.    Go Bulwa ga Dikolo

2.1.    Kabinete e amogetše go bulwa ga dikolo ka ntle le mathata, kudukudu go boela ga baithuti ba dikolo tša phoraemari sekolong letšatši le lengwe le le lengwe. Kabinete e ipileditše go dikolo ka moka go tšwela pele go šoma ka go diriša melawana ye e hlomilwego ya maphelo ka ga COVID-19. 

2.2.    Sepheto sa go bušetša baithuti ba dikolo tša phoraemari sekolong letšatši le lengwe le le lengwe se tšerwe ka morago ga go hlokomela dikgahlego tše kaone tša ngwana gomme se se tla thuša go hwetša gape nako ya go ithuta ye e lobilwego ka nakong ya kiletšo ya mesepelo ye e bego e tsirimeditšwe.

3.    Tumelelano ka ga Meputso ya Bašomi ba Mmušo

3.1.    Kabinete e lebogile bašomi ba mmušo le bao ba bego ba kgatha tema ka ditherišanong tša meputso ge ba beile naga ya rena le batho ba yona pele, ka morago ga ge go sa tšwa go saenwa tumelelano ye e amago mahlakore ka moka ka ga dikoketšo tša meputso ka tirelong ya Mmušo.

3.2.    Kabinete e thabile ge mekgatlo ye e amegago ka moka e laeditše boetapele bja seboka le sephetho seo se nago le maikemišetšo go hwetša tharollo yeo e holago bašomi ba mmušo le badudi, le go ipiletša go yo mongwe le yo mongwe go tšwela pele ka moya wo wa tirišano le go rata naga ya gabo bona.

4.    Tshedimošo ya Moragorago ka ga Seemo sa Tšhireletšo 

4.1.    Kabinete e amogetše matsapa ao a tšerwego ke lekala la phethagatšao ya molao go bušetša seemo sa khutšo sekeng ka Diprofenseng tša KwaZulu-Natal le Gauteng. 

4.2.    Kabinete e retile gape ditheo tša phethagatšo ya molao ka ga kgatelopele yeo di e dirago go golega bao ba rwelego maikarabelo a go hlohleletša dikgaruru ebile e rata go netefaletša leswa maAfrika Borwa gore e tla dira tšohle ka fao e ka kgonago ka gona go tliša bao ba rwelego maikarabelo go dikgaruru tše di diregilego ka diprofenseng tše pedi pele ga molao.

4.3.    Go fihla mo lebakeng le, bagononelwa ba tshela ba golegilwe gomme ba tšwelela ka dikgorotshekong tša mehutahuta ka lebaka la ge ba pharwa ka molato wa go hlohleletša dikgaruru gomme ditheo tša phethagatšo ya molao tša mmušo le tša phraebete le Tirelo ya Bosekiši ya Bosetšhaba di filwe mošomo wa go netefatša gore ditshekišo tša batho ba di atlege. 

4.4.    Kabinete e lemogile gore palo ya mahu ao a bakilwego ke dikgaruru tše e bušeleditšwe gomme bjale e fihla go ba 354, gomme dipalo tša bao ba hlokofetšego ka lebaka la dikgaruru tše ka Gauteng ga se tša fetoga di dutše go ba 79 le ba 275 ka KwaZulu-Natal go fihla maabane ka la 4 Phato 2021.

4.5.    Go palo ya mahu ao a begilwego ka KwaZulu-Natal, Toropokgolo ya eThekwini e na le palo ya godimodimo ya batho bao ba hlokofetšego ba 122. Go mahu ao a begilwego ka eThekwini, ba 36 ba begilwe gore ba hlokofetše ka Phoenix fao e lego gore ba 29 ba bolailwe gomme dipolao tša ba šupa di a nyakišišwa, gomme go fihla mo lebakeng le, bagononelwa ba 22 ba golegilwe go dipolao tša ka Phoenix ebile ba tšweletše pele ga kgorotsheko. 

4.6.    Kabinete e ipiletša go ditšhaba ka KwaZulu-Natal go šomišana mmogo le go thekga matsapa a mmušo a go rarolla dithulano tša semorafe le mengunanguno tšeo di tšhošetšago go nyatša ditlhologelo tšeo bahlomi ba Afrika Borwa ya temokrasi, ya go hloka semorafe le ya tekatekano ba di gafetšego tokologo le maphelo a bona go tšona. 

5.    Go Aga Ekonomi Leswa

5.1.    Kabinete e amogetše thekgo ya kimollo ya ekonomi ya R36 pilione go tšwa go mmušo bjalo ka lenaneo la bobedi la ditsenogare tša go bušetša naga seemong sa tsošološo ka morago ga seabe sa leuba la COVID-19 leo le mpefaditšwego go fetišiša ke dikgaruru le tshenyo ya dithoto tša kgwebo tšeo di diregilego ka KwaZulu-Natal, Gauteng le ka dikarolong tše dingwe tša Mpumalanga (le ge e le gore mo di diregile gannyane). 

5.2.    Bontši bja kimollo ye ke Thušo ya Ditšhelete tša Kimollo go Masetlapelo a tša Leago ya R350 ka nepo ya go fediša bohloki le tlala gareng ga bao ba itlhokelago kudu ka setšhabeng le mananeo a thekgo go bašomi le go dikgwebo. Mmušo o tšwela pele go nyaka thekgo ya tlaleletšo go netefatša gore go ba le tsošološo ya ekonomi ya ka pela go sepelelana le Leano la Kagoleswa le Tsošološo ya Ekonomi.

5.3.    Mošomo wa go aga leswa ekonomi ke wa maAfrika Borwa ka moka. Kabinete e ipileditše go modudi yo mongwe le yo mongwe le lekala la phraebete go tsenela matspapa a rena a bosetšhaba go aga leswa mmogo Afrika Borwa ye kaone, ye e atlegago ka lebelo le ya tekatekano. 

6.    Mohlagase

6.1.    Kabinete e amogetše go phethwa ga Seteše sa Mohlagase sa Medupi fao e lego gore makala a tshela ka moka a tšweletšo ya mohlagase a dirišwa ka botlalo ka tšweletšong ya mohlagase maemong a bosetšhaba. Se se tla thuša kudu go fediša kgatelelo ka kabo ya mohlagase maemong a bosetšhaba gomme mmušo o tšwela pele go nepiša go netefatša gore mohlagase ga o sokodiše. 

6.2.    Kabinete e rata go lebogiša Mohumagadi Zandi Shange, Molaodi wa Protšeke ya Seteše sa Mohlagse sa Medupi ge a kgonne go dira gore seteše se se segolo sa mohlagase se šome. Ka ge histori ya boentšeneere bja boagi e ngwadilwe, basadi ba ka mo nageng ya rena ba tla emelwa ka botlalo ka ge Mohumagadi Shange e le mosadi wa mathomo wa mothomoso ka Afrika wa go phethagatša protšeke ye kgolo ka tsela ye.

6.3.     Mmušo o ipileditše go bobedi bolaodi le bašomi ba ESKOM go šoma kudu le go aba diteše tša mohlagase tšeo di sa šaletšego go akaretšwa le mohlagase wa go dirišwa leswa.

7.    Maemo a Bolekodi bja Iseraele ka go Khomišene ya Mokgatlo wa Selekane sa Afrika (AUC)

7.1.    Kabinete e ganetšana ka bogale le sepheto seo se sego sa loka seo se tšerwego ke modulasetulo wa AUC a nnoši go fa Iseraele maemo a bolekodi ka go AU. AU ke moemedi wa semolao wa dinagamaloko ka moka tša Afrika yeo go swanetšego go rerišanwa le yona mabapi le dipheto tša mohuta wo. 

7.2.    AU e akaretšwa ditlhologelo tša maAfrika ka moka ebile e rwele leswao la tshepo go boetapele bja yona bja Batho ba Afrika. Ka fao, e swanetše go ikemišetša go tšea dipheto tšeo di sa thulanego le melawana ya Tšhata ya AU.

7.3.    Go tšwela pele ga Iseraele go tsena ka mollwaneng wa Palestine go tšwela pele go se be molaong ebile go a nyatšega, ebile se se tšeela Mapalestina ditokelo tša bona. Sepheto se, se se tšerwego ke motho o tee, se tla ka morago ga ditlhaselo tšeo di sego tša loka tšeo di sa tšwago go direga go Mapalestina ao a se nago le molato ka Iseraele ka Bohlabela bja Jerusalem le Gaza.

7.4.    Kabinete e ipiletša go AU go lebeledišiša leswa sepheto sa yona seo e se tšerego e nnoši sa go fa Iseraele maemo a bolekodi ka go AU. E tšwela pele e sa tekateke go ikgafa go matsapa ao a ikemišeditšego go tsošološa tshepedišo ya sepolotiki yeo e tlago feletša ka go hlongwa ga mmušo wa Palestina wo o kgonagalago, wo o tla bago gona ka go phedišana ka khutšo le Iseraele. 

B.     Dipheto tša Kabinete 

1.    Moketeko wa Kgwedi ya Basadi 

1.1.    Kabinete e dumeletše morero le ditiragalo tša moketeko wa ngwaga wo wa Kgwedi ya Basadi, wo o gopolago basadi ba go feta ba 20 000 bao ba ilego ba gwantela meagong ya Union Buildings ka Pretoria ka la 9 Phato 1956 ba dira ditšhupetšo kgahlanong le katološo ya Melao ya Dipasa go basadi. 

1.2.    Ditiragalo tša ngwaga wo di tla ketekwa ka fase ga morero wa: “Ngwaga wa Charlotte Maxeke: Re fihlelela Ditokelo tša Basadi. Morero wo o sepelelana le moketeko wa ngwaga ka moka wa segopotšo sa ngwaga wa bo 150 sa mahlwaadibona wa ntwa ya tokologo Charlotte Mannya Maxeke. 

1.3.    Ditiro tša tšeo di dirilwego ke basadi ba ba bomahlwaadibona di re hlohleletša gore re age leswa setšhaba sa rena gore se tiye ka morago ga dikgaruru tša phatlalatša tše di sa tšwago go direga ka KwaZulu-Natal le ka Gauteng, le go ba le seabe go ekonomi ya setšhaba le go maphelo ka lebaka la COVID-19. Ditiragalo tše di laeditše gore ge re le mmogo bjalo ka setšhaba seo se ratago khutšo le seo se obamelago molao, re ka kgona go fenya tlhohlo efe goba efe yeo e re amago.

1.4.    Le ge e le gore setšhaba sa rena se fihleletše tše ntši mabapi le ditokelo tša basadi, tše ntši di sa nyakwa go dirwa gore re fihlelele tekatekano ya bong le go lwantšha bothata bja dikgaruru tša bong le tlaišo ya basadi ka setšhabeng sa rena. 

1.5.    Kabinete e ipiletša go makala ka moka a setšhaba go dira gore melawana ya rena ya mabapi le tekatekano ya bong e phethagatšwe le go dira se sengwe kgahlanong le dikgaruru tšeo di aparetšego basadi ka go bega bao ba dirago dikgaruru kgahlanong le basadi setešeng sa maphodisa sa kgauswi.

2.    Pego ya Komiti ya Ditona (IMC) ya Diphatišišo ka ga Setlamo sa Bosetšhaba sa Thušo ya Ditšhelete tša Thuto go Baithuti (NSFAS) 

2.1.    Kabinete e dumeletše go lokollwa ga pego ya Diphatišišo tša IMC mabapi le NSFAS. Komiti ye e thwetšwe ka Mopitlo 2020 go lebelela ditshepedišo, mananeo le bokgoni bja NSFAS mabapi le go kgona go phethagatša mošomo wo e filwego ona. 

2.2.    Dinyakišišo di lebeletše kudu dilo tšeo di bakago mathata ao NSFAS e itemogelago ona le go phethagatša setlamo se seswa sa thušo ya ditšhelete ya dithuto go tloga ka 2018. Dinyakišišo tše di fane ka ditšhišinyo tše bohlokwa mabapi le go kaonafatša go šoma ga NSFAS. 

2.3.    Kabinete e lebogile ge tše dingwe tša ditšhišinyo tše di šetše di phethagaditšwe. Pego ye e ka fihlelelwa go wepsaete ya Kgoro ya Thuto ya Godingwana le Tlhahlo ya: www.dhet.gov.za.

3.    Leano la Bosetšhaba la Mananeokgoparara (NIP) 2050

3.1.    Kabinete e dumeletše go phatlalatšwa ga NIP 2050 gore setšhaba se fe ditšhwaotshwao ka ga yona. Leano le le hlohleletša peeletšo ya ka mo nageng go mananeokgoparara, leo gape le kopanyago diekonomi tša Afrika ka go diriša tše dingwe tša diprotšeke tša lona.

3.2.    Godimo ga go hlohleletša kgolo ya ekonomi, le tla rarolla gape mašaledi a nako ya kgethologanyo a ditiro tša go se loke tša go aroganya batho go ya ka merafe ya bona. Le theilwe go go kgatha tema ga mmušo, dikgwebo, dihlongwa tša mmušo le go badudi. 

3.3.    Makala a lona ao a beilwego pele a akaretša la enetši, la dinamelwa tša merwalo, meetse le dikgokagano tša titšithale. NIP 2050 mo nakong ye e sa fetšego pelo e tla ngwalwa ka gare ga kuranta ya mmušo gore setšhaba se fe ditshwaotshwao ka ga yona.

4.    Go Tsenywa ga Setheo sa Thekgo ya Ditšhelete go Dikgwebopotlana (SEFA) le Setheotlhabollo sa Dipanka tša Mohlakanelwa (CBDA) ka go Setheotlhabollo sa Dikgwebopotlana (SEDA) 

4.1.    Kabinete e dumeletše go tsenywa ga SEFA le CBDA ka go SEDA. Go kopanywa ga dihlongwa tše go tla kgontšha thekgo ye e kopantšwego ya mmušo go dikgwebopotlana, go dikgwebo tše nnyane le go dikgwebo tša magareng gammogo le dikgwebo tša mohlakanelwa go thoma ka la 1 Moranangl 2022. 

4.2.    Setheo se tee seo se šišintšwego se tla fana ka bobedi thekgo ya ditšhelete le ye e sego ya ditšhelete go dikgwebo tše. Ka go kopanyo methopo ka moka, setheo se se tla ba le seabe kudu le go fihlelelega ka dileteng le ka ditoropokgolong ka moka. 

4.3.    Kopanyo ye e dumeletšwego e tla feletša ka go hlopha leswa ga SEDA (yeo e tlago fiwa leina le leswa ka moragonyana) mabapi le Molao wa Taolo ya Ditšhelete tša Mmušo wa 1999 (Molao wa bo 1 wa 1999) go tšwa go sehlongwa sa Šetule ya 3A go fihla go sa Šetule ya 2.

4.4.    Kabinete e dumeletše go katološwa ga nako ya go šoma ya Lekgotlataolo la SEFA go fihla ka la 31 Hlakola 2022 go kgontšha gore go thomišwe peakanyo ya phetošetšo. 

5.    Melawana le Dipeelano Mabapi le go Sepetša tša Boeti ka fao go Bolokegilego ka Nako ya COVID-19 le ka go Mauba a Mangwe 

5.1.    Kabinete e dumeletše Melawana le Dipeelano tša go sepetša Lekala la Boeti ka fao go bolokegilego ka seemong sa COVID-19 le ka go mauba a mangwe ao a amanago le yona. 

5.2.    Melawana le dipeelano tše di fana ka magato ao a tlwaelegilego a fasefase a tša maphelo le polokego ao a tlogo netefatša gore go ba le go swana go ralala le lekala la tša boeti. A tla akaretša ditirelo tša go swana le madulo, dijo, basepediši ba tša maeto, dikhasino, menyanya le ditiragalo tše dingwe tšeo di amegago. 

5.3.    Bjale re lekana le mebaraka ya boditšhabatšhaba gomme se se tla kgontšha lekala le gore le bulele ka botlalo baeti ba go tšwa dinageng tša boditšhabatšhaba.

6.    Khonferentshe ya Bosetšhaba ka ga Bofaladi le Go Hudugela Ditoropong ka Afrika Borwa

6.1.    Kabinete e thekgile Khonferentshe ya Bosetšhaba ka ga Bofaladi le Go Hudugela Ditoropong ka Afrika Borwa yeo e swerwego ka bidio ya inthanete go thoma ka la 26 go fihla ka la 30 Mosegamanye 2021. Bofaladi le go hudugela ditoropong di bile karolo ya dilo tšeo di beilwego pele tša Melawana ye mene ka ga Setšhaba go thoma ka 2015.

6.2.    Khonferentshe ye e ahlaahlile datha ye e lego gona, tsebo le tshedimošo ka ga diphetogo mabapi le bofaladi le go hudugela ditoropong ka mo nageng. Tshedimošo ya mohuta woo e šoma bjalo ka motheo wa bohlatse wo o tlago šomišwa go dira melawana le mananeo, go akaretšwa peakanyo ka makaleng ka moka a mararo a mmušo.

6.3.    Khonferentshe ye e rulagantšwe ka tirišano le dikgoro tša mmušo tša maleba, setšhaba sa dinyakišišo le badudi. Khonferentshe ye e feleleditše ka go hlongwa ga Seboka sa Tshedimošo le Dinyakišišo ka ga Bofaladi le Go Hudugela Ditoropong go šoma bjalo ka methopo wa tsebo ka nepo ya go thekga mošomo wa tša bofaladi le go hudugela ditoropong. 

7.    Go Kgethwa ga Afrika Borwa Bjalo ka Lefelo la ka Seleteng la tša Boso bja Lefaufaung la Mokgatlo wa Boditšhabatšhaba wa Bofofiši bja Difofane (ICAO)

7.1.    Kabinete e dumeletše le go amogela go kgethwa ga Afrika Borwa bjalo ka Lefelo la ka Seleteng la tša Boso bja Lefaufaung la ICAO. Se se tsebagaditšwe ka morago ga ge Afrika Borwa e hweditše dipoelo tše kaone tša tekodišišo go tšwa go ICAO. 

7.2.    Afrika Borwa, ka go diriša Setheo sa Bosetšhaba sa tša Lefaufau sa Afrika Borwa, e kgethilwe gore e fane ka tshedimošo mabapi le boso bja lefaufaung seo bjalo e lego setlwaedi seo se amogetšwego ke ICAO go dinyakwa ka moka tša bofofiši. 

7.3.    Afrika Borwa e filwe mengwaga ye meraro go kaonafatša bokgoni bja yona bja bjale bjo bonnyane gore e fihlelele dinyakwa tša ICAO. Dinyakwa tše di nyaka gore go šongwe diiri tše 24 mo matšatšing a šupa a beke fao go nago le dihlopha tšeo di hlomilwego tša baakanyi ba tša boso bao ba hlahlilwego le ditsebi tša dinyakišišo ka ga lefaufau. E filwe gape tumelelo ya go dirišana le Khamphani ya Yuropa ka bophara ya Tirelo ya Bašomiši ba Boso bja Lefaufaung ba Bofofiši.

7.4.    Go kgethwa fa go fa Afrika Borwa sebaka sa go godiša lekala la yona la tša mahlale le theknolotši ya boentšeneere le la boitlhamelo, ebile go bea naga ye mo mmepeng bjalo ka mokgathatema wa lefaseng ka bophara ka go mahlale a lefaufaung.

8.    Tumelelano ya Tirišano ya ka Seleteng sa Afrika ka ga Dinyakišišo, Tlhabollo le Tlhahlo tše di amanago le Mahlale le Theknolotši tša Nyutleleara (AFRA)

8.1.    Kabinete e dumeletše gore tumelelano ye e bušeleditšwego (AFRA) ya mengwaga ye mengwe ye mehlano e romelwe Palamenteng. AFRA ke tumelelano ya mebušo ye e hlomilwego ke dinagamaloko tša Afrika go maatlafatša go tšwela pele le go godiša seabe sa mahlale le theknolotši ya nyutleleara go tlhabollo ya ekonomi ya setšhaba ka kontinenteng ya Afrika.

8.2.    Afrika Borwa e bile leloko leo le kgathago tema la AFRA ebile e dirišana le dinagamaloko tše dingwe go tšwetša pele maikemišetšo a tumelelano ka khonthinenteng ya Afrika. 

9.    Molawana wa Bosetšhaba wa Go Rea Dihlapi tša Nageng tša ka Meetseng a Foreše (Ka gare ga naga) 

9.1.    Kabinete e dumeletše Molawana wa Bosetšhaba wa Go Rea Dihlapi tša Nageng tša ka Meetseng a Foreše (Ka gare ga naga) go phethagatšwa. Molawana wo o fana ka seemo sa taolo ye e šomago gabotse ka lekaleng la boreahlapi ka gare ga naga. O bea semmušong ditiro tšeo mo lebakeng le e sego tša semmušo le tšeo di sego tša dumelelwa tša bareahlapipotlana. 

9.2.    Molawana wo, gareng ga tše dingwe, o fana ka gore go hlangwe dihlongwa tša tlhabollo ya taolo ya boreahlapi; thekgo go mananeokabo a boreahlapi bja ka mo nageng ebile o rarolla bothata bja tekatekano le phetošo ya lekala le.

10.    Khalentara ye e Šišintšwego ya Tokollo ya Peleng ya go Phatlalatšwa ga Dipalopalo tša Bosenyi tša Ngwaga wa Ditšhelete wa 2021/22

10.1.    Kabinete e dumeletše Khalentara ye e šišintšwego ya tokollo ya peleng ya go phatlalatšwa ga dipalopalo tša bosenyi tša korata tša ngwaga wa ditšhelete wa 2021/22. Khalentara ye e šišintšwego ya tokollo ya peleng ya go phatlalatšwa ga dipalopalo tša bosenyi ke Phato 2021 go kotara ya mathomo gomme ka Dibatsela 2021 ke go di phatlalatša ga kotara ya bobedi. Dipalopalo tša bosenyi tša kotare ya boraro le ya bone di tla lokollwa ka Dibokwane le Mopitlo 2022. 

C.    Melaokakanywa 

1.    Molaokakanywaphetošwa wa Batšofadi wa 2021

1.1.    Kabinete e dumeletše go romelwa ga Molaokakanywaphetošwa wa Batšofadi wa 2021 gore o tle o alwe ka Palamenteng. Molaokakanywa wo o fetoša Molao wa bjale wa Batšofadi wa 2006 (Molao wa bo 13 wa 2006). 

1.2.    Diphetošo tše di nyaka go maatlafatša magato ao a šireletšago batšofadi. Molaokakanywa wo o kaonafatša ditirelo tše di abelwago batšofadi tša go swana le dithušo tša ditšhelete tša mmušo, maphelo, tlhokomelo ya setšhabeng le ya fao ba dulago gona. 

1.3.    Molaokakanywa wo o šišintšwego o tsebagatša go hlokomela le go sekaseka ditirelo tšeo di abelwago batšofadi. O hlagiša gape gore batšofadi bao ba nago le bogolofadi ba tlošwe mafelong ao a sego a ba lokela goba ao a hlokago pabalelo ya maphelo ka ntle le go hwetša Taelo ya Kgorotsheko.

2.    Sethalwa sa Molaokakanywaphetošwa wa Mekgatlo ye e sa Dirego Letseno (NPO) wa 2021 

2.1.    Kabinete e dumeletšwe go phatlalatšwa ga Molaokakanywaphetošwa wa NPO gore setšhaba se dire ditshwaotshwao ka ga ona. Molaokakanywa wo o fetoša Molao wa bjale wa NPO wa 1997 (Molao wa bo 71 wa 1997). Molao wo o be o hlametšwe go hloma seemo seo se kgontšhago seo go sona di-NPO di swanetšego go hlangwa le go šoma ka botlalo. Dikgoba tše di hlolegilego ge nako e dutše e sepela di hlathilwe, kudukudu mabapi le di-NPO le mekgatlo ya setšhabeng. 

2.2.    Phetošo ye e šišintšwego e rarolla ditlhohlo tšeo di-NPO di lebanego le tšona; e šoma ka go tlaišwa ga di-NPO ebile e nolofatša ditshepedišo tša phihlelelo. E šišinya go hlongwa ga Mongwadiši wa di-NPO ka nepo ya go maatlafatša go aba ditirelo, go hlokomela le go tšwetša pele tlhokego ya sephiri le boikarabelo bja di-NPO.

D.    Tiragalo ye e tlago

1.   Letšatši la Basadi 

1.1.    Mopresidente Cyril Ramaphosa o tla fana ka polelo ya Letšatši la Basadi ka bidio ya inthanete ka Mošupologo wa la 9 Phato 2021, bjalo ka karolo ya go keteka ga Kgwedi ya Basadi ka mo nageng ka fase ga morero wa: “Ngwaga wa Charlotte Maxeke: Re fihlelela Ditokelo tša Basadi”.

E.    Melaetša

1.    Ditebogišo

Kabinete e lebišitše ditebogišo tša yona le mahlatse le mahlogonolo go: 

- Tatjana Schoenmaker, ge a thopile metale wa mathomo wa gauta wa Diolimphiki wa Afrika Borwa ka Tokyo, Japan ka morago ga go phadišana ka papading ya basadi ya go rutha ya breaststroke ya dimetara tše 200 ka nako yeo e robilego rekhote ya lefase. Peleng o thopile metale wa silibere ka papading ya go rutha ya breaststroke ya dimetara tše 100.

- Bianca Buitendag, ge a thopile metale wa silibere ka go makgaolakgang a basadi ka papading ya go sesa ka meetseng (surfing). Diphihlelelo tše di kgahlišago tše ka dipapading tša Diolimphiki ka Tokyo di tlišeditše naga ya rena dimetale tše tharo. 

2.    Mahloko 

Kabinete e lebišitše mahloko go ba lapa le bagwera ba: 

- Morena Shona Ferguson (47), motšweletši wa thelebišeneng (TV) le wa difilimi le modiragatši yo a tsentšego letsogo kudu go hlabolleng ga Intasteri ya difilimi ka mo nageng. 

- Morena Clive Scott (84), mahlwaadibona wa thelebišeneng le modiragatši wa mahlwaadibona yo a tšweletšego dithelebišeneng tša rena mengwaga ye mentši. 

- Morena Pandelani Jonathan Mudziwa Makhado (99), molwelatokologo wa dipolotiki wa mahlwaadibona yo e bilego yo mongwe wa baetapele ba lesolo la twantšho ya dipasa la 1960, yo gape a gafetšego bophelo bja gagwe go ntwa ya go lwela temokrasi le tokologo.

- Mama Thalitha Monica Lebea-Mampuru (87), yo a lwelego a sa lape go lokolla naga ye gammogo le go lwela Afrika Borwa ya go hloka semorafe, ya go hloka kgethologanyo ya bong le yeo e lokologilego. E bile Metherone a mathomo wa Solomon Mahlangu Freedom College (SOMAFCO).

- Morena Geoff Makhubo (53), Mmeyaraphethiši wa City of Johannesburg; moetapele wa go se itirele yo a bego a šoma kudu yo a bego a hlohleletša kabo ya ditirelo. E be e le Moetapele wa Selete wa African National Congress.

- Morena Luthendo Benedict Sigogo (49), Moahlodi wa Motšwaoswere wa Kgorotshekokgolo ya ka Mpumalanga le Mokhomišenare wa Khomišene ya Tirelo ya Molao, yo a bilego le nako ya mošomo yeo e kgahlišago ka lekaleng la phrofešene ya tša molao, gomme e bile mohlohleletši yo a bego a ikgafile wa diphetogo. O šomile gape bjalo ka mopresidente wa Mokgatlo wa Bašomi ba Molao ba Bathobaso.

- Ba lapa le ba leloko ba maloko a Palamente bao ba sa tšwago go hlokofala mo nakong ye e sa tšwago go feta

F.    Bao ba Thwetšwego Mešomong

Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.

1.    Moatbokheiti Nomalanga Petronella Sithole bjalo ka Mohlankedimogolophetiši wa Bolaodi bja Bosetšhaba wa Enetši wa Afrika Borwa.

2.    Mohumagadi Danile Nyakale bjalo ka moemedi wa Koporasetlhabollo ya Diintasteri go Lekgotlataolo la Bagwebi ba Ditaamane ba ka Nageng. 

3.    Lekgotlataolo la Balaodi ba Lekgotlataolo la Merero ya Naga: 
(i)    Mohumagadi Lusanda Nomasongo Netshitenzhe (Modulasetulo);
(ii)    Morena Masopha Moshoeshoe; 
(iii)    Moatbokheiti Anthonie Viviers; 
(iv)    Ngaka James Fraser Bourhill; le
(v)    Mohumagadi Precious Hlengiwe Makoe.

4.    Maloko a Tlaleletšo a Lekgotlataolo la Bolaodi bja Ditaamane le Dimetale tše Bohlokwa bja Afrika Borwa: 
(i)    Morena Virendra Gangaram Magan; le
(ii)    Mohumagadi Ndivhuho Munyai. 

Dipotšišo: Mohumagadi Phumla Williams – Seboleledi sa Kabinete 
Mogala: 083 501 0139