A. Merero e Bohlokwa Seemong sa Bjale 

1. Polelo ya Maemo a Setšhaba (SoNA)

1.1. Kabinete e amogetše SoNA ya 2022 yeo e adilwego ke Mopresidente Cyril Ramaphosa Tulong ya Kopanelo ya Seboka sa Maloko a Palamente mmogo le Lekgotla la Bosetšhaba la Diprofense yeo e bego e swaretšwe Cape Town City Hall ka Labone la 10 Dibokwane 2022, e lego polelo yeo e amago setšhaba ka moka. 

1.2. SoNA ke tiragalo e bohlokwa khalendareng ya mmušo wa demokrasi ka ge e efa Hlogo ya Khuduthamaga monyetla wa go lebelela seemo sa leago, ikonomi le dipolotiki, le go tsebagatša maano a mmušo a ngwaga woo o sa tšo thomago le go ya pele, gomme a dira se pele ga baemedi ba mekgatlo ya dipolotiki le setšhaba ka bophara. 

1.3. Mo dibekeng tše di tlago, Ditona go tšwa dikgorong tša go fapafapana di tla tsebiša Lenaneo la Go Šoma la mmušo la 2022, leo le tla laolwago ke Polelo ya Tekanyetšo ya Mašeleng yeo e tlo alwago ka Laboraro la 23 Dibokwane 2022 mmogo le ditekanyetšo tša dikgoro ka moka tša mmušo. 

2. Go Kgatha Tema ka Lenaneong la Go Balwa ga Batho ka 2022

2.1. Kabinete e ipileditše go badudi ka moka bao ba dulago ka nageng go kgatha tema ka lenaneong la go balwa ga batho la 2022 leo le thomilego ka Labone la 3 Dibokwane 2022 gomme le tla tšwela pele go fihla ka Mošupologo wa la 28 Dibokwane 2022. 

2.2. Le ke lekga la bone go balwa ga batho go dirwa esale mola demokrasi e thomago, gomme la mafelelo ge go dirwa e be e le ka ngwaga wa 2011. Dipoelo tša Go Balwa ga Batho di raloka karolo e bohlokwa ge go etla kabong ya didirišwa tšeo di hlokegago kabong ya ditirelo mmogo le dihlokwa tša motheo tša setšhaba sa borena.

2.3. MaAfrika Borwa a ka kgetha go tšea karolo ka Go Balweng ga Batho ka mogala, ka khomphutha goba ka go etelwa ka magae ke bahlankedi ba go šoma go bala batho. Go balwa khomphutheng go ka dirwa feela ke bao ba ingwadišitšego inthaneteng pele ga la 5 Dibokwane 2022. 

3. Ditaba tša Morago Mabapi le Bolwetši bja Kokwanahloko ya Khorona (COVID-19) 

3.1. Kabinete e retile MaAfrika Borwa ge a tšwela pele ka maikemišetšo a go lwa le COVID-19, elego seo se thušitšego gore diphetetšo tše diswa di be fase le ge go bile le go tshwenya ga lephoto la bone. 

3.2. COVID-19 e sa dutše e le karolo ya maphelo a rena gomme magato ka moka a tša maphelo le polokego a swanetše a latelwe ka nako tšohle, go balwa le go bula sekgoba, go hlapa diatla le go di tlotša sanithaesa, gape le go apara maske woo o khupetšago molomo le nko ge motho a le gare ga batho. Bjale ka ge kokwanahloko ye ye kotsi e sa tšwela pele go tšea maphelo, meento e sa dutše e le sebetša sa rena se sekaonekaone sa go itefeletša. Ge batho ka bontšhi ba entela, gona re tlo bolokega re le setšhaba. 

3.3. Ge naga e le gare e boela sekeng gannyane gannyane, le ikonomi e bulega gomme dikolo di boetše sekeng moo bana ba tsenago le go ithuta tšatši ka tšatši, Kabinete e ipileditše go batho ka moka bao ba sego ba entelwa bao ba nago le mengwaga ya ka godimo ga ye 12 go yo entela ka pela ka moo go kgonegago. O hloka feela go ya lefelong la go entela, le ge o se wa dira apoinmente, gore o ngwadišwe o be o entelwe mahala. 

3.4. Kabinete e ile gape ya hlohleletša bao ba šetšego ba entetšwe ka botlalo go yo hlabelwa tšhwaana ya go matlafatša mašole a mmele, yeo e thušago go oketša maatla a mmele gore o kgone go fetša mehuta ya dikokwanahloko tša COVD-19 maatla.  

Ditšhwaana tša go matlafatša mašole a mmele di ka hlabelwa mang goba mang yoo a entetšwego moento wa mafelelo kgwedi tše tshela goba go feta tšeo di fetilego. Ka go entelwa ka botlalo, ga re fokotše feela kotsi ya go lwala kudu, go robala bookelong goba lehu, empa re fokotša gape le kotsi ya dikokwanahloko tše dingwe tšeo di ka tlago ka moso.  

4. Pego ya Komišene ya Go Lebelelana le Go Gogwa ga Mmušo ka Nko

4.1. Kabinete e lemogile go tlišwa ga karolo ya mathomo le ya bobedi ya Pego ya Komišene ya Go Lebelelana le Go Gogwa ga Mmušo ka Nko go Mopresidente Ramaphosa bjalo ka kgato e bohlokwa ntweng kgahlanong le bomenetša.

4.2.  Kabinete e tloga e thekga tshepedišo yeo e tla šetšago Mopresidente ge a tla be a ala ditharollo tša go phethagatša ditigelo tša komišene ge a tla be a iša pego yeo e feleletšego Palamenteng pele ga, goba ka la 30 Phupu 2022. 

5. Pego ya Dinyakišišo tša Mabapi le Dikgaruru le Tshenyo ka Kgwedi ya Mosegamanye ka 2021  

5.1. Kabinete le Mopresidente ba amogetše go lokollwa ga pego ya Phanele ya Ditsebi yeo e thwetšwego gore e lebelele leswa karabelo ya mmušo go dikgaruru tša setšhaba, tshenyo le tshenyo ya ka boomo tšeo di rerilwego ka Mosegamanye 2021. Mopresidente o adile pego ya Phanele ya Ditsebi kopanong ya Lekgotla la Polokego la Bosetšhaba ka Labohlano la 4 Dibokwane 2022 gomme a ba a fa tumelelo ya gore pego yeo e phatlalatšwe. 

5.2. Phanele e be e etilwe pele ke modulasetulo elego Moprofesa Sandy Africa gomme e be e akaretša le Moadfokeiti Mojanku Gumbi le Morena Silumko Sokupa bjalo ka maleloko, mola Morena Michael Sarjoo a be a le mongwaledi wa phanele. 

5.3.  Phanele e be e filwe maikarabelo a go lekola makala ka moka a karabelo ya polokego go dikgaruru tšeo bontšhi bja tšona bo diregilego ka KwaZulu-Natal le ka Gauteng, le go tla ka ditigelo tša ka fao bokgoni bja tšhireletšo bo ka matlafatšwago ka gona. Pego mmogo le dintlha tšeo e bolelago ka tšona mabapi le mošomo wo, gape le dihlotlo tšeo di lebaganego le ditirelo tša tšhireletšo, mafapha a phethagatšo ya molao le makala a pušo a maleba, di tla hlahla karabelo ya mmušo.

6. Dikgaruru tša Bong le Polao ya Basadi (GBVF)

6.1. Bjalo ka karolo ya naga ya go lwa le GBVF, Mopresidente Ramaphosa o sa tšwa go sanela Melao e meraro yeo e matlafatšago maitekelo a go lwa le GBVF elego Molao wa Bosenyi le Merero yeo e Amanago le Bjona, Molaophetošwa wa Bosenyi (Melato ya go amana le Thobalano le Merero yeo e amanago le yona) le Molaophetošwa wa Dikgaruru tša ka Malapeng. 

6.2. Kabinete e dumela gore go saenelwa molaong ga melao e meswa ke kgatelopele e kgolo ya go fenya GBVF gomme e ipiletša go Tirelo ya Maphodisa a Afrika Borwa le Botšhotšhisi bja Bosetšhaba go šomiša melao ye ye meswa gore toka e tle e phethagalele bao ba lobilego ba bobona, bagwera goba bašomimmogo ka baka la bothata bjo. 

6.3.  Kabinete e tloga e letetše phethagatšo ya ka pela ya melao ye gore go tle go be le tšhireletšo ka botlalo ya batšwasehlabelo ba dikgaruru le tlaišo.

6.4. Gopola go bega ditiragalo tša GBVF setišing sa kgauswi sa maphodisa ka go letšetša mogala wa mahala wa Crime Stop go 08600 10111 goba mogala wa bošego le mosegare wa GBV Command Centre go 0800 428 428. 

7. Ketelo ya Semmušo go ya Mozambique 

7.1. Kabinete e amogetše go phethwa ka katlego ga Leeto la Semmušo la Mopresidente Cyril Ramaphosa la go ya Ripaboliking ya Mozambique ka Labone la 3 Dibokwane 2022 e le ge a be a memilwe ke Mopresidente Filipe Nyusi, elego Mopresidente wa Ripaboliki ya Mozambique.  

7.2. Ka maemo a gagwe bjalo ka Modulasetulo wa lekala la Dipolotiki, Sešole le Tšhomišano go tša Tšhireletšo ka go Southern African Development Community (SADC), Mopresidente Ramaphosa o etetše mašole ao elego karolo ya Thomo ya SADC ka Mozambique, a ba a tšea karolo ka segopotšong sa ngwaga wa bomasomehlanotharo wa go bolawa ga Ngaka Eduardo Mondlane, mothomi ebile e le Mopresidente wa mathomo wa mokgahlo wa Mozambique Liberation Front (FRELIMO).  

7.3. Mopresidente Ramaphosa mmogo le Mopresidente wa Mozambique ba sekasekile ditaba tša mabapi le tšhomišano ya mebušo ya dinaga tša bobona, tša kontinente le tša lefase, gomme ba bušeletša boikgafo bja bona bja go tšwela pele go šomišana tabeng tša mabapi le mebušo ya bobona. 

8. Samiti ya Yunione ya Afrika (AU) 

8.1. Kabinete e amogetše dipoelo tša Samiti ya AU yeo e bego e swaretšwe Addis Ababa go la Ethiopia ka la 5 le 6 Dibokwane 2022, yeo e bego e lebeletše go tšwetša pele khutšo le tšhireletšo mo kontinenteng gomme e tloga e kgadile ka bogale diphetogo tšeo di sa sepetšanego le Molaotheo tša mebušo ka Afrika. 

8.2. Afrika Borwa e adile Pego ya Pušo ka Afrika ya 2021 Tulong ya Kopano ya AU, yeo e lemogilego tšwelopele ge go etla kopantšhong ya demokrasi le go leba togaganyong ya ikonomi ka Kgwebišano Yeo e Lokologilego ya Kontinente ya Afrika. E ile gape ya digela gore baetapele ba tšee magato a ka pela go šomana le mapheko ao a šitišago tšwelopele bjalo ka tlhokego ya mešomo basweng yeo e golelago godimo, tumelo yeo e nago le bongangele go mohuta o itseng wa dipolotiki, go huduga ga batho ka bontšhi le go se lekalekane goo go ikepetšego ka medu. 

8.3. Ka go theeng mokgwa wo moswa wa tša maphelo a setšhaba, samiti e file kgopolo ya Afrika Borwa tumelelo ya go hlama sekhwama sa karabelo le ditšhišinyo sa karabelo go leuba le gore kontinente e ka itšhireletša bjang go mathata a mangwe ao a ka beago maphelo kotsing.

8.4.  Kabinete e amogetše gape go kgethwa ga Afrika Borwa go ba karolo ya Lekgotla la Khutšo le Tšhireletšo la AU (AUPSC). AUPSC ke lekala la AU la go tšea diphetho leo mošomo wa lona elego go thibela, go laola le go rarolla dithulano. Yona ke peakanyo ya tšhomišanommogo go tša tšhireletšo yeo maikemišetšo a yona elego go sepetša dikarabelo tša ka pela, tšeo di šomago ka go phethagala go maemo a dithulano le masetlapelo ka Afrika. Ebile gape ke kokwane ya Leano la Khutšo le Tšhireletšo ka Afrika, elego leano la go tšweletša pele khutšo, tšhireletšo le boematia ka Afrika. AUPSC e na le maloko a 15 ao a nago le maatla ao a lekanago a go bouta. 

8.5. Baetapele ba Afrika ba tla kopana go la Brussels ka Belgium go tsenela Samiti ya Yunione ya Yuropa (EU) le AU ka la 17 le 18 Dibokwane 2022, yeo e tlo lebelelago mathata ao lefase le lebaganego nao bjalo ka phetogo ya leratadima, gape le mpshafatšo ya khutšo le tšhireletšo. 

9.   African Peer Review Mechanism (APRM) 

9.1.  Afrika Borwa e phethile bodulasetulo bja yona bja Foramo ya Tebeleloleswa ka Sethaka ya Afrika (African Peer Review Forum), elego setheo sa APRM seo maikemišetšo a sona elego go tšweletša pele le go šireletša ditokelo tša botho, kopantšhong ya demokrasi le go hlohleletša pušo e botse le molao ka dinageng tša Afrika.

9.2. Ka tekanyong ya yona ya tekololeswa ka sethaka ya 2021, Afrika Borwa e hweditše ditekololeswa tšeo di kgahlišago ge go etla tabeng ya go latela molao, le makala a tekolo a bjalo ka ditheo tša Kgaolo ya 9, tšwetšopele ya ditokelo tša basadi, tšhireletšo e maatla ya bafaladi le tlhabologo ya mokgwa wa dikgetho, pušotlemano e tiilego, ditshepedišo tša tekanyetšo tša phatlalatša gape le go gola ka lebelo ga mananeo a tšhomišanommogo le boikarabelo. Naga ye e retilwe bakeng sa boetapele bja yona le taolo ya leuba la COVID-19. 

9.3. Dikarolo tšeo di tšweleditšego dingongorego ka tekolong – bjalo ka go golela godimo ga go se lekalekane le tlhokego ya mešomo, bomenetša, ditiragalo tša tlhaselo ya batšwantle le kabo ya ditirelo ya go fokola – di lebeletšwe gomme go mekamekanwa le tšona ka mananeong a togamaano le mmušo. 

10.  Difoka tša Boraditaba tša SADC 

10.1. Kabinete e hlohleleditše boraditaba ba Afrika Borwa go tsenela phadišano ya Difoka tša Boraditaba tša SADC tša ngwaga wa 2022. Difoka di tšweletša pele togaganyo le tšhomišanommogo ya selete sa SADC ebile di lemoga bokgoni bjoo bo tšwelego ka magetla bja boraditaba ba dikuranta, ba go tšea diswantšho, ba thelebišene le ba seyalemoya, gomme di hlohleletša boraditaba ba go tšwa ka dinageng tša SADC go bega ka ditaba tša selete se. 

10.2. Bathopasefoka ba tla tsebišwa ka morago ga Samiti ya bomasomennepedi ya Dihlogo tša Pušo le Mebušo ya SADC. Difomo le melao ya phadišano ya 2022 di ka humanwa go www.gcis.gov.za/newsroom/media-releases/launch-2022-sadc-media-awards-co....

11. Thuto 

11.1. Kabinete e retile barutwana ba marematlou ba 2021 gomme ya leboga batho ka moka bao ba bilego le seabe go tšweleleng ga barutwana le ge ba be ba lebagane le bothata bja COVID-19. Palo ya barutwana ba 897 163 ba ngwadile ditlhahlobo tša marematlou (NSC), elego koketšego ya palo ya ba 2020 ka dipersente tše 76,2.

11.2. Go tšwelela ga barutwana ba marematlou ka dipersente tše 76,4 (76,4%), ka barutwana ba 256 000 bao ba tšweletšego ba na le maloca a go tsena yunibesithi, ke koketšego ya persente ya 0,2 go tloga go dipersente tše 76,2 ya barutwana ba 2020. 

11.3. Kabinete e aketše barutwana ka moka mahlatse le mahlogonolo ge ba tsena legatong le leswa la ka morago ga marematlou. Ka Sekhwama sa Mašeleng sa go thuša Baithuti (NSFAS), mmušo o thekga baithuti bao ba hlokago mašeleng a go ithuta efela ba tšweletšego gabotse, bao ba tšwago malapeng a go ihlokela le ao a nago le batho bao ba šomago efela ba sa kgone go lefela thuto ya godimo, bao ba ratago go ithuta diyunibesithing goba dikholetšheng tša thuto le tlhahlo (kholetšhe ya TVET).

B.  Diphetho tša Mmušo 

1. Dipego tša Gabedi ka Ngwaga tša Tšwelopele ya ka ka moo go Šongwago ka Gona 

1.1.  Kabinete e fetišitše dipego tša gabedi ka ngwaga tša tšwelopele ya ka ka moo go šongwago ka gona tša nako ya go tloga ka la 1 Moranang go fihla ka la 30 Lewedi 2021. Dipego di bopa karolo ya Leanotharollo la Tekanyetšo ya Gare ga Ngwaga la go tloga ka 2019 go fihla ka 2024. Dipego go ya ka magoro a dikgoro di lebelela ditlapele tše šupa tša mmušo le ditharollo tša go amana le tšona tša mmušo wa boselela. 

1.2. Kabinete e amogetše dikarolo tšeo go tšona tšwelopele e bonalago mabapi le dinepo tšeo di beilwego mo sehleng se se lebeletšwego. E lemogile gape le leano la ditharollo tša go tlo šomana le dititelego tšeo di šitišago tše dingwe tša dinepo.   

1.3. Dikopano tša go bolela le boraditaba tša Ditona go tšwa magorong a go fapafapana di tla rulaganywa ke ba GCIS go kgontšha dikgoro go ala dipego tša tšona tša go šoma. 

2. Go Išwa ga Leina la Lefelo la Pleistocene Occupation Ditlhokolong tša Mafelo a Bohwa a Lefase 

2.1. Kabinete e fetišitše go išwa ga maina a tshela a mafelo a Emergence of Modern Humans: Pleistocene Occupation gore a hlokolwe le go ngwadišwa go ba Mafelo a Bohwa a Lefase. A mararo a mafelo a a ka Kapa Bodikela (elego Diepkloof Rock Shelter; Pinnacle Point Site Complex le Blombos Cave); le tee le ka Kapa Bohlabela (Klasies River Caves), gomme a mabedi a ka Kwa-Zulu Natal (Sibhudu Cave le Border Cave). 

Mafelo a, ao mmogo a hlalosago tlholego le phetogophetogo ya batho, a šetše a kgethilwe go ba Mafelo a Bohwa a Bosetšhaba go ya le ka Molao wa Didirišwa tša Bohwa wa Bosetšhaba wa 1999 (Molao wa bo25 wa 1999). A bontšha tatelano ya ka moo batho ba phetšego ka gona mengwaga ye diketekete, gomme le bohlatse bo bontšha le nako yeo go tšweletšego batho ba sebopego sa gabjale. 

2.2. Go išwa ga mafelo a go sepelelana le Molao wa Tumelelano ya Bohwa bja Lefase wa 1999 (Molao wa bo49 wa 1999) woo o okgontšhago dinaga go iša maina a mafelo a tšona bjalo ka karolo ya tsebo ya ka fao batho ba fetofetogileng ka gona. 

3.  Go Katološwa ga Nako ya Seemo sa Masetlapelo sa Bosetšhaba  

3.1. Kabinete e hlaloseditšwe ka mošomo woo o dirilwego ka tšhomišano le Ditheo tša Bosetšhaba tša Tšhomišanommogo le Bohlodi go bona ge eba mokgwa woo taolo ya leuba la COVID-19 e sa hloka gore go be le Seemo sa Masetlapelo sa Bosetšhaba. Dikakanyo di amogetšwe go tšwa dikgorong tša mmušo tšeo di fapafapanego go lekola dikarolo tša tšona tša mošomo tšeo di šetšego di batamela go phethwa. 

3.2. Le ge go le bjalo, morago ga go lemoga gore tše dingwe tša dikgoro tše bohlokwa tšeo di mekamekanago le COVID-19 ga sešo di phetha ditlhophollo tša tšona, Kabinete e fetišitše katološo ya mafelelo ya Seemo sa Masetlapelo sa Bosetšhaba go fihla ka la 15 Hlakola 2020 go ya le ka Karolo 27(5)(c) ya Molao wa Taolo ya Masetlapelo wa 2002 (Molao wa bo57 wa 2002).

4. Sethalwa sa Pholisi ya Theko ya Mohlagase (EPP)

4.1. Kabinete e fetišitše go phalatšwa ga tekololeswa ya EPP gore setšhaba se fane ka ditshwayatshwayo. EPP yeo e mpshafaditšwego e lebeletše go hlola tekatekano ge go etla ditefelong tša fase tša mohlagase go badiriši bao ba golago tšhelete ya tlase, le theko ya mohlagase yeo e sa bitšego go badiriši ba bangwe. 

4.2. Pholisi e tla ka melawanakakaretšo ya theko, mokgwa wa go rekiša mohlagase ka bontšhi le theko ya phatlalatšo, le kabo le mokgwa wa theko ka mabenkeleng. EPP e tla phatlalatšwa ka Kuranteng ya Mmušo gomme e ka humanega websaeteng ya Kgoro ya Diminerale le Enetši (DMRE) go: www.dmr.gov.za.

C. Melaokakanywa

1. Molaokakanywaphetošwa wa Setheo sa Tlhabollo ya Baswa (NYDA) wa 2022

1.1. Kabinete e fetišitše go išwa ga Molaokakanywaphetošwa wa NYDA wa 2022 Palamenteng. Diphetogo tšeo di šišintšwego di lokiša Molao wa NYDA wa 2008 (Molao wa bo54 wa 2008. Molao wa gabjale o fana ka lenaneo leo le fago Tirelo ya Baswa ya Bosetšhaba, thekgo ya baswa gore ba kgathe tema ka ikonoming, ditirelo tša tshedimošo le maele go baswa. 

1.2. Ditokišo tšeo di šišintšwego di matlafatša dikarolo tše itseng tša dikimollo go dihlotlo tšeo baswa ba lebaganego natšo; di hlalosa ka botlalo maemo a sepolotiki a ka fao setheo se tla begago ka ga mešomo ya sona gomme gape di šišinya go oketša maloko a Boto ya NYDA go tloga go a šupa go ya go a lesome. Di kgontšha go thewa ga ditirelo tša NYDA maemong a selegae, kudu go baswa bao ba lego dinagamagaeng bao ba sa kgonego go fihlelela ditirelo tša NYDA bonolo. 

1.3. Ditokišo tšeo di šišintšwego e be e le dipoelo tša dipoledišano tšeo di tseneletšego le batšeakarolo ka moka ka diprofenseng tše senyane. 

2. Molaokakanywa wa Tšhilafatšo ya Mawatle ka Oli (OPRC) (Peakanyo, Karabelo le Tšhomišano) wa 2022

2.1. Kabinete e fetišitše go išwa ga Molaokakanywa wa OPRC wa 2022 Palamenteng, woo o fetišitšwego gore setšhaba se fe ditshwayatshwayo ka wona ka kgwedi ya Diphalane 2019. Dikakanyo tše tseneletšego, tšeo di amogetšwe go tšwa go batšeakarolo ba go fapafapana, di akareditšwe ka Molaokakanyweng.  

2.2. Ge o se no fetolelwa go ba Molao, Molaokakanywa o tla kgontšha go bewa ga melawana le taolo ya karabelo ya naga ge go tla ditiragalong tša tšhilafatšo e ntšhi ya mawatle ka oli mawatleng a naga. 

2.3.  Afrika Borwa e dutše tseleng ya sephethephethe sa mawatle le dikepe yeo e akaretšago Mawatle a India, Atlantic le Lewatle la Borwa, yeo e lego monabo wa go yo fihla karolong ya Antarctic. Se sengwe gape ke gore naga ye ke yona e saenetšego Tumelelano ya OPRC. 

3. Sethalwa sa Pholisi ya Bosetšhaba ya Khudugo ya Bašomi (NLMP) le Molaokakanywaphetošwa woo o Šišintšwego wa Ditirelo tša Mešomo (ESAB)

3.1. Kabinete e fetišitše go thoma ga dipoledišano le setšhaba le batšeakarolo tša mabapi le sethalwa sa sethalwa sa pholisi ya bosetšhaba ya khudugo ya bašomi mmogo le ESAB yeo e šišintšwego. Pholisi e tla ka tekatekantšho gareng ga tšhireletšo ya mešomo ya MaAfrika Borwa mola ebile e lemoga mabokgoni a ikonomi ao a hlokwago ke naga. E lemoga gape le maitlamo a naga go SADC, AU le magato a mangwe a khudugo ya bašomi a boditšhabatšhaba. 

3.2. NLMP e tla ka lenaneo le motheo wa semolao wa go laola ka moo bengmešomo ba ka thwalago batšwantle ka mafelong a bona a mošomo mola ebile le le gare le šireletša ditokelo tša batšwantle. Pholisi e tla ka motheo wa ESAB yeo e šišintšwego. 

3.3. Kabinete e fetišitše gore Kgoro ya Mešomo le Bašomi e ka thoma ka dipoledišano le setšhaba mabapi le pholisi, e lego seo se tlo fago setšhaba le batšeakarolo monyetla wa tla ka dikakanyo tša mabapi le NLMP ya naga. 

4.  Molaokakanywaphetošwa wa Taolo ya Mohlagase 

4.1. Kabinete e fetišitše go phatlalatšwa ga Molaokakanywaphetošwa wa Taolo ya Mohlagase. Molaokakanywa o šišinya ditokišo tša Molao wa Taolo ya Mohlagase wa 2007 (Molao wa bo28 wa 2007). Ditokišo tseo di šišintšwego di katološa lenaneo la taolo la bosetšhaba la intaseteri ya kabo ya mohlagase. Di dira gore naga ya rena le yona e be le mekgwatšhomo ye mekaonekaone mo lefaseng ge go etla mananeokgoparareng a mohlagase le go dira gore Lesolo la go ba Mophatlalatši wa Mohlagase le tsentšhwe tirišong, gammogo le lenaneo la kabo ya dilaesense tša go fehla mohlagase, go o phatlalatša, go o aba le go o rekiša.

4.2. Ditokišo tšeo di šišintswego ke karolo ya magato a go fapafapana ao naga e a tseago go hlama leswa lekala la mohlagase gore go be le kabo ya mohlagase ya go tia ebile ya go tshepiša. Di tla re gape tša matlafatša mokgwatšhomo wa intaseteri ya mohlagase gomme di tle di kgone go hlola tikologo ya go šomela yeo e lokilego gore ikonomi e gole. 

4.3. Molaokakanywa o tla phatlalatšwa ka Kuranteng ya Mmušo gomme o tla humanega websaeteng ya DMRE go: www.dmr.gov.za.

D. Melaetša

1. Ditebogišo 

Kabinete e rometše ditebogišo go: 

1.1.  Kgošigadi Nomandla Dorothy Mhlauli, Modulasetulo yoo a sa tšogo kgethwa wa Ntlo ya Bosetšhaba ya Baetapele ba Setšo le ba MaKhoi-San. Kgošigadi Mhlauli ke mosadi wa mathomo wa go eta pele setheo sa baetapele ba setšo. Yena o kgethilwe morago ga go hlokofala ga Modulasetulo wa peleng, Kgoši Sipho Mahlangu. 

E. Go Thwalwa  

Batho ka moka bao ba thwetšwego mešomong mangwalo a bona a dithuto a tla tiišetšwa le go netefatšwa ka maleba.

1. Maloko a Lekgotla la Taolo ya tša Dithokgwa la Bosetšhaba (NFAC). Kabinete e kwanne le Tona ya Dithokgwa, Boreahlapi le Tikologo go thwala maloko ao a latelago a Boto ya NFAC lebaka la mengwaga e meraro:

a. Mme Nosisa Euticus Nzuza (Modulasetulo); 
b. Ngaka Pulane Elsie Molokwane (Motlatšamodulasetulo);
c. Mme Getrude Mathithwa Nonginzi; 
d. Mme Maropeng Dipitseng Manamela;
e. Morena Bhutinyana Calvin Chirwa;
f.  Mme Phindiwe Keletso Mokoena;
g. Mme Manushka Moodley;
h. Morena Bishop Ngobeli;
i.  Mme Nombuso Mlambo;
j.  Morena Mzwandile Roy Mendu;
k. Morena Sikhumbuzo Sipho Masuku;
l.  Morena Thabo Simon Moloi;
m. Mme Felicity Blakeway;
n.  Morena Jim Matsho;
o. Mme Fefekazi Sefara;
p. Morena Phemelo Sebitlo;
q. Morena Goodman Gcaba;
r.  Morena Nkosipendule Quvile;
s. Morena Sixolile Msayi; le
t. Morena Makale Ngwenya.

2. Ngaka Jennifer Molwantwa – Hlogophethiši ya Komišene ya Diphatišišo tša Meetse. 
3. Morena Petrus Maselaganye Matji – Hlogophethiši ya Amatola Water. 
4. Morena Frans Moatshe – Mohlankediphethiši wa tša Ditšhelete ka Kgorong ya Meetse le Kelelatšhila.
5. Brigadier Mokgadi Bertha Bokaba – Hlogo ya Profense ya Bolaodi go Dinyakišišo tša Bosenyi bjoo bo Rulagantšwego (DPCI) Ka Foreisetata.
6. Brigadier Mathipa Solomon Makgato –Hlogo ya Profense ya DPCI ka Kapa Bodikela.  

Dipotšišo:
Mme Phumla Williams
Seboleledi sa Kabinete go 083 501 0139