A. Merero ye Bohlokwa Seemong sa Bjale

1. Khonferense ya Bone ya Afrika Borwa ya Dipeeletšo (SAIC)

1.1. Kabinete e amogetše thumo ye atlegilego ya khonferense ya bone ya SAIC yeo e bego e swaretšwe gola Sandton Convention Centre, Johannesburg ka Labone, 24 Hlakola 2022, fao go yona babeeletši ba ka mo nageng le ba boditšhabatšhaba ba dirilego dikano tša dipeeletšo tše diswa ka mo nageng ya gaborena.

1.2. Naga ya gaborena e amogetše dikano tša dipeeletšo tše 80 tša palomoka ya go lekana R322 bilione. Se se hlatlošitše palomoka ya dipeeletšo go fihla R1.14 trilione, yeo e sa laetšego fela 95% ya nepo ya dipeeletšo tša rena eupša e re bea maemong a go fetiša R1.2 trilione ya nepo ya dipeeletšo tša rena mo mengwageng ye mehlano ye tlago.

1.3. Maikgafo a a dipeeletšo a kgonthišiša seemo sa naga ya gaborena bjalo ka naga yeo batho ba ka kgethago go beeletša go yona.

1.4. Go fihla gabjale, R316 bilione ya maikgafo ao a dirilwego a beeleditšwe diprotšekeng tše 46 tšeo di phethagaditšwego ka botlalo le tše dingwe tše 57 tšeo di santšego di tšwelapele. Kabinete e lemogile dikano tše di dirilwego kua morago goya le ka fao go filwego pego khonferenseng, tšeo di akaretšago magareng ga tše dingwe mabokgoni a maswa mo mafapheng a go fapafapana go swana le difatanaga, tšweletšo ya dijo, meriana ya ka dikhemising le disenthara tša titšithale.

1.5. Kabinete e ipileditše go mafapha ka moka a setšhaba go thekga magatotharollo a a bohlokwa ge re le gare re šoma mmogo go theoša palo ya godimo ya tlhokego ya mešomo yeo e hlatlogetšego godimo go fihla go 35.3%, goya le ka dipoelo tša Dinyakišišokakaretšo tša Kotara le Kotara tša Dipalo tša Bašomi tšeo di lokolotšwego ke ba Dipalopalo tša Afrika Borwa malobanyana mo. 

2. Phedišo ya Maemo a Masetlapelo a Bosetšhaba 

2.1. Kabinete e amogetše go fedišwa ga Maemo a Masetlapelo a Bosetšhaba ao a tsebagaditšwego ke Mopresidente Cyril Ramaphosa ka Mošupologo, 4 Moranang 2022. Phenyo ye e kgonagetše ka baka la bopelotelele bja MaAfrika Borwa bao ba obametšego magato a polokego a Bolwetši bja Coronavirus (COVID-19) ao a hlamilwego ke mmušo go phološa maphelo le mekgwa yeo batho ba iphedišago ka yona.

2.2. Leuba le goyapele le tla laolwa goya ka Molao wa Bosetšhaba wa Maphelo, 2003, (Molao 61 wa 2003). Seakanywa sa melao ya maphelo yeo e tlo hlamago Molao wa Bosetšhaba wa Maphelo wa 2003 se buletšwe batho ka moka go fihla ka 16 Moranang 2022. 

2.3. Kabinete e gopoditše batho ka moka ka mo nageng go tšwelapele go tšea magato a maleba a thibelo go itšhireletša le go šireletša ba bangwe kgahlanong le diphetelo tša COVID-19. Se se akaretša go hlapa matsogo a rena kgafetšakgafetša ka meetse le ka sesepe goba ka go šomiša sanithaesa sa diatla sa go tswakwa ka alekhohole ya go feta 70%, ka go apara dimaseke tša go pipa dinko le melomo ge ba le ka gare ga meago, ka go šielana sekgala se ka bago mithara o tee, ka go bula mafastere gore go tsene moya le ka go hlaba meento.

2.4. Meento ya COVID-19 e nale mohola ka go thibela malwetši a mašoro, go amogelwa maokelong le go efoga mahu a go hlolwa ke COVID-19. Itšhireletše o be o šireletše le bao o ba ratago ka go etela lefelo la kgauswi le wena la meento gore o yo hlaba moento ntle le tefo, ešita le ge o sena peakanyetšo ya goya go hlaba.

3. Go Hudugela Kgašong ya Titšithale

3.1. Go fegwa ga Letšatši la go Tingwa ga Dikgašo tša Megala go tloga ka 31 Hlakola go fihla ka la 30 Phupu 2022 go fa mmušo nako ye lekanego ya go phethagatša ka botlalo go lokelwa ga mapokisana a dikgašo tša ditšithale (di-STB) go magae ao a ingwadišitšego ka nako ebile a nale maloka a go fiwa ona mapokisana ao pele ga ge dikgašo tša megala di tingwa.

3.2. Kgoro ya Dikgokagano le ya Ditheknolotši tša Titšithale e tla netefatša gore magae ka moka a 507 251 ao a ingwadišitšego pele ga la 31 Diphalane 2021 a hlomeseditšwe dikgašo tše tša ditšithale pele ga la 30 Phupu 2022. Magae a 260 868 ao a ingwadišitšego magareng ga la 31 Diphalane 2021 le la 10 Hlakola 2022 a tlo kgokaganywa dikgašong tša titšithale ka mapokisana a bona a di-STB pele ga la 30 Lewedi 2022.

3.3. Kabinete e nale boitshepho bja gore phethagatšo ya kgato ye e tla thekga tshepedišo ya go fetogela kgašong ya titšithale gotee le maphoto a maemo a godimodimo a diyalemoya ao a tlo lokollwago ka morago.

4. Go Lwantšha Bosenyi le Bomenenene 

4.1. Kabinete e lebogišitše Mokhomišinare wo moswa wa Bosetšhaba wa Maphodisa wa naga, Jenerale Sehlahle Fannie Masemola, morago ga thwalo ya gagwe malobanyana mo ka Mopresidente Ramaphosa. Jenerale Masemola o nale rekhoto ya maemo a godimo ya go fihlelela dimaka go tša sephodisa go ralala Afrika Borwa.

4.2. Kabinete e amogetše ditaelo tša kiletšo tšeo di filwego Yuniti ya Kamogo ya Dithoto ya Lekgotla la Bosetšhaba la Bosekiši (NPA) ka Kgorotsheko ya Godimo ya Gauteng kgahlanong le bao ba amegago go thekga ka ditšhelete go rekwa ga Moepo wa Malahla wa Optimum ka R2.1 bilione ka 2016 ka khamphani ya go laolwa ke lapa la ga Gupta ya go bitšwa Tegeta Exploration and Resources.

4.3. Diphetho tše tša kgorotsheko, tša go laetša lemanoga le nago le mohola la go logelwa maano ke NPA le Lebotho la Sephodisa sa Afrika Borwa la Nyakišišo ya Melato ya Maemo a Godimo, di romela molaetša wo bogale mabapi le mabokgoni a mmušo ao a golelago godimo a go swaragana le go Gogwa ga Mmušo ka Nko le go netefatša gore bao ba amegago ba rwešwa maikarabelo a mediro ya bona – le gape go amoga, go hwetša le go bušetša morago ditšhelete tše utswitšwego.

4.4. Ka gona go dira gore bao ba amegago bosenying ba ikarabele medirong ya bona, Kabinete e amogetše kahlolo ka Kgorotsheko ya Palm Ridge ya Bosenyi bja Kgwebo bja Moswananoši gola Gauteng kgahlanong le molaodi wa peleng wa ditšhelete wa Eskom ka go timeletša R35 milione go tšwa khamphaning ye ya kabo ya mohlagase ka go ithomela mananeotheko a bofora a go sepetšwa ga malahlaka dinamelwa gotee le maitekelo a go hwetša tšhelete yeo e utswitšwego. 

4.5. Bjalo ka phenyo ye bohlokwa mo phenkgišanong ya setšhaba sa gaborena ya go lwantšha bomenemene, Kabinete e amogetše neeletšo ya karolo ya bone ya pego ya Khomišene ya Dinyakišišo ya Tirelo ya Semolao go tsinkelela go Gogwa ga Mmušo ka Nko. Mopresidente Ramaphosa o tla hlagišetša Palamente magatotharollo a go phethagatša ditšhišinyo tša khomišene ge a romela pego ye feletšego ka botlalo ka la 30 Phupu 2022. 

5. Samiti ye sa Tlwaelegago ya Setho sa Troika ya Ditšhaba tšeo di Hlabologago tša Borwa bja Afrika (SADC) 

5.1. Kabinete e amogetše dipoelo tša Samiti ye sa Tlwaelegago ya Setho sa Troika ye swaretšwego gola Pretoria ka Mošupologo wa la 4 le ka Labobedi la 5 Moranang 2022. Afrika Borwa ebile naga ya go swara samiti ye bjalo ka Modulasetulo wa Setho sa SADC go tša Dipolotiki, Boiphemelo le Tirišano ya Tšhireletšego. Monyetla wa naga ye wa go tsorama setulo se o thoma ka Phato 2021 go fihla ka Phato 2022.

5.2. Samiti ye e amogetše, magareng ga tše dingwe, pego ya mošomo wo dirilwego Morerong wa SADC gola Mozambique (SAMIM). Lebotho la sešole la SAMIM le rometšwe ka nageng ya Mozambique go lwantšha matšhošetši le ditiragalo tša dikgaruru tša go dirwa ka boomo. 

6. Ikonomi 

6.1. Kabinete e amogetše tlhatlošo ya kemedi ya kelo ya dikoloto e bago Moody ka ponelopele ya yona ya Afrika Borwa gore e tieletše go tšwa seemong sa go se kgahliše le sephetho sa yona sa go kgonthišiša gore dikelo tša dikoloto tša Afrika Borwa tša kharensi ya nako ye telele ya dinagadišele le ya ka mo nageng di tlogelwa maemong a ‘Ba2’. 

6.2. Tlhatlošo ye e kgonthišiša mošomo wa mmušo wa go bušetša sekeng tielelo matlotlong a mmušo a naga ye, ya go thekgwa ke kgoboketšo ya lekgetho ya go šoma gabotse go fetiša ka fao go bego go letetšwe ka gona. 

6.3. Dipoelo tša lekgetho tša go thoma ka Moranang 2021 go fihla ka Hlakola 2022, di laeditše gore ba Ditirelo tša Lekgetho la Afrika Borwa ba kgobokeditše tšhelete ya go feta R1.5 trilione. Tšhelete ye e laetša kaonafatšo ya 25% mo ngwageng wa go feta le tlhatlogo ya 15% ka ngwaga wa mafelelo pele ga leuba la COVID-19.

6.4. Mmušo o šomiša lekgetho la tlaleletšo go akgofiša go bewa ga dikoloto ka fase ga taolo le go kalokana le dinyakwa tša tšhoganyetšo tša leago, go hlohleletša tlhomo ya mešomo ka Lesolo la Mopresidente la go Thwalwa ga Baswa, le go thekga lefapha la mmušo la tša maphelo.

7. Kgwedi ya Tokologo

7.1. Ngwaga wo Afrika Borwa e keteka Kgwedi ya Tokologo ka Moranang ka tshepho ye mpshafaditšwego ya bokamoso bjo kaone, ka baka la ge e fetile mengwaga ye mebedi ya masetlapelo ka baka la leuba la lefase ka bophara la COVID-19. Letšatši le la Tokologo la Ngwaga ka Ngwaga le tla ketekwa ka Laboraro, 27 Moranang 2022.

7.2. Ka Letšatši la Tokologo go ketekwa le go rolela kefa batho ka moka bao ka go ikuna ga bona tše ntši ba dirilego gore go kgonagale gore re ipshine ka ditokelo tša botho le tokologo yeo e lego ka gare ga Molaotheo wa go hlomphega kudu lefaseng wa Rephabliki ya Afrika Borwa wa 1996.

7.3. Kabinete e dirile boipiletšo go MaAfrika Borwa ka moka go šoma mmogo ge re le gare re tšwelapele ka phenkgišano ya rena ya go fekeetša ditlamorago tša COVID-19. Ka moka re swanetše go kgatha tema ya rena go bušetša seemo sa ikonomi sekeng, ka Leano la Kagoleswa ya Ikonomi le go Boetšwa Sekeng ga yona, le go godiša dikgwebo tše dingwe tše ntši gore di tle di kgone go hloma mešomo ye mengwe ye mentši.

8. Kgwedi ye Kgethwa ya Ramadan 

8.1. Kabinete e lakaleditše setšhaba sa Afrika Borwa sa Mamoslemo Kgwedi ye Kgethwa ya dišegofatšo ya Ramadan. Ramadan e ketekwa ngwaga ka ngwaga go potologa lefase ka dithapelo, go ikuna dijo le ditiragalo tša dipelo tše borutho. Setšhaba sa Mamoslemo ke karolo ye bohlokwa ya ditšo tša rena tša go fapafapana le semelo sa rena sa bosetšhaba.

B. Diphetho tša Kabinete

1. Seakanywa sa Leano la Makgonatšohle sa Tlhabollo ya Bosetšhaba ya Dikgwepotlana tša Mohlakanelwa (NISED) 

1.1. Kabinete e dumeletše go phatlalatšwa ga Seakanywa sa NISED sa Leano la Makgonatšohle gore setšhaba se fe ditshwayotshwayo tša sona. Leanopeakanyo la mathomo la Mohlakanelwa le Bogwebi le Dikgwebo tše Nnyane le amogetšwe ka 2005. Leanopeakanyo le le NISED ya go tla ka morago ga lona le kgontšha Sengwalwa sa 1995 sa Makgoraditsela godimo ga Leanopeakanyo la Bosetšhaba Tlhabollong le Tlhohleletšong ya Kgwebo mo Afrika Borwa.

1.2. Ge e šetše e amogetšwe, NISED e tla tšeela legato Leanopeakanyo la bjale la Mohlakanelwa la Bogwebi le Dikgwebo tše Nnyane. E tla fana ka tlhako ya tsamaišo go bakgathatema ka moka ba bohlokwa ba mo kamanong ye tlhabollong ya dikgwebo tše nnyane. Yona e hlahla magato a tsamaišo ao a tlo hlahlago mananeo ka moka a go thekga dikgwebo tše nnyane.

1.3. Leanopeakanyo le le šetšane le go atiša go kgatha tema ga dikgwebo tše nnyane ka ikonoming ya go lefišwa metšhelo, go fediša magatotshepedišo a go rarela le go hlohleletša go dirwa ga dikgwebo moroba, kudukudu bahlomi ba dikgwebo tše nnyane.

1.4. NISED ke lenaneo leo le hlotšwego ke ditherišano tša motlalanaga gotee le dikgoro tše maleba didikong tša mmušo tša bosetšhaba, tša profense le tša pušoselegae, dikgwebo, bašomi, dirutegi le ditheo tše maleba tša go fapafapana.

2. Go tsenyeletšwa ga Etšensi ya Ditšhelete ya Dikgwebo tše Nnyane (SEFA) le Etšensi ya Tlhabollo ya Dipankaseboka (CBDA) ka gare ga Etšensi ya Tlhabollo ya Dikgwebo tše Nnyane (SEDA)

2.1. Kabinete e dumeletše katološo ya dikgwedi tše 20 ya go kopantšhwa ga makalakgwebo a mabedi, ebago SEFA le CBDA ka gare ga SEDA. Kopanyo ye mathomong e be e theilwe gore e thome go tsenywa tirišong go tloga ka la 1 Moranang 2022. Kopanyo ye e bile ka morago ga gore Kabinete e dumelele kopanyo ye go netefatša gore mmušo o hloma lekalakgwebo le tee leo le tla kgonago go thekga mošomo wa yona wa go thekga dikgwebo tše nnyane go fihla go tša magareng gotee le dikhamphani.

2.2. Katološo ye e dumeletšwego e tla kgontšha Kgoro ya Tlhabollo ya Dikgwebo tše Nnyane go ruma phetleko ya semolao go kgontšha tikologo ye maleba ya pholisi ye theilwego goya ka molao ya go dumelelwa go hlongwa ga lekalakgwebo le tee fela la SEDA. Lekalakgwebo le tee fela leo le tlabetšwego gabotse ka didirišwa le tla kgontšha thekgo ya go se šitišwe ke selo le ya go otlologa dikgwebong tše nnyane go fihla go tša magareng gotee le dikhamphani. Kabinete e dumeletše thwalo ya Lekgotla la Balaodi la Motšwaoswere la SEFA le SEDA.

3. Melawana ya go Amana le Tšhireletšo, Tšwetšopele, Tlhabollo le Taolo ya Tsebo ya Setlogo (IK) 

3.1. Kabinete e dumeletše go phatlalatšwa ga melawana ya IK gore setšhaba se fe ditshwayotshwayo tša sona. Melawana ya IK e tla kgontšha gore go phethagatšwe  Molao wa IK, 2019 (Molao 6 wa 2019).

3.2. Molawana wo o bolela ka tšhireletšo, tšwetšopele, tlhabollo le taolo ya tsebo ya setlogo. O bolela le ka go hlongwa ga ditheo tša bosetšhaba tša IK; taolo ya maloka a IK a batho setšhabeng. O bolela gape le ka go hlongwa ga sebokakeletšo; temogo ya tšeo batho ba ithutilego tšona kua morago; nolofatšo le tsamaišo ya IK. 

3.3. Melawana ye e šišintšwego e swaragane le, magareng ga tše dingwe, go hlongwa ga Komitikeletšo; ditshepedišo tša tumelelo; ngwadišo ya mabokgoni a ditsebi tša IK; ka fao IK e ka humanwago goba ya šomišwa le go boloka diretšistara tša IK. Melao ye e bolela gape le ka magato a go rarolla dithulano.

3.4. Melawana ye e tla phatlalatšwa kuranteng ya mmušo ebile e ka humanwa wepsaeteng ya Kgoro ya Saense le Diphetogo mo: www.dsi.gov.za. Melawanaye e tla hwetšagala gape le ka maleme ka moka sa semmušo.  

4. Tlhaku ya Ditšhabakopano ya Tirišano ya Tlhabollo ye Swarelelago (UNSDCF) ya 2020-2025 

4.1. Kabinete e dumeletše UNSDCF ya 2020-2025 ya Afrika Borwa gore e phethagatšwe. Tlhaku ye e kgontšha tirišano ya maikarabelo magareng ga mmušo, setšhaba ka kakaretšo le kantoro ya Ditšhabakopano (UN) ye lego ka mo nageng ya Afrika Borwa. 

4.2. UNSDCF e hlatholla dikokwane tše nne tša kakaretšo tše tlago pele tše logetšwego maano go akaretšwa (1) kgolo ya go akaretša bohle, ya toka le ya go swarelela; (2) methopo ya batho le diphetogo tša leago; (3) pušo ye nago le mohola, ya go seketša tšhelete le ya go gatela pele goya ka diphetogo; le (4) tielelo ya klaemete le methopo ya tlhago ye laolwago ka mokgwa wa go logelwa maano.

4.3. Dikokwane tše tša go logelwa maano di amana le Leanotlhabollo la Bosetšhaba la naga ye; Ponelopele ya 2030 le Tlhaku ya Paka ya Magareng, le gape le Dinepo tša UN tša Tlhabollo ye Swarelelago tšeo di phethagatšwago ka kantoro ya UN ye lego ka mo nageng ya Afrika Borwa. Phethagatšo ye e tla dirwa ka leano la mohlakanelwa la go rapa didirišwa.

5. Magato a Bosetšhaba Mmasepaleng wa Metsesetoropo wa Mangaung le Mmasepaleng wa Selegae wa Enoch Mgijima 

5.1. Kabinete e dumeletše magatotharollo a go bewa ka fase ga taolo goya ka Karolo 139(7) ya Molaotheo wa Rephabliki ya Afrika Borwa wa 1996; ge e balwa mmogo le Karolo 150 ya Molao wa Taolo ya Matlotlo a Mmasepala, 2003 (Molao 56 wa 2003), ka Mmasepaleng wa Metsesetoropo wa Mangaung le ka Mmasepaleng wa Selegae wa Enoch Mgijima. Bobedi bja mebasepala ye e be e itemogela mafokodi ao a tseneletšego a ditšhelete le a kabo ya ditirelo lebaka le le telele.

5.2. Lekgotlaphethiši la Profense la Freistata le gapeletšegile go bea Mmasepala wa Metsesetoropo wa Mangaung ka fase ga taolo goya ka Karolo 139(5)(a) le (c) ya Molaotheo ka Manthole 2019. Leano la kgapeletšo la ditšhelete la go boetša seemo sekeng le ile la feletša le phethagaditšwe mmasepaleng wo ka 2020. Ka morago ga go šitwa mengwaga ya go feta ye mebedi go phethagatša leano la go bušetšwa seemo sa ditšhelete sekeng nakong ya ge profense e be e tsena seemo se ka bogare, Mmasepala wo wa Metsesetoropo gabjale o beilwe ka fase ga taolo ya bosetšhaba goya ka Karolo 139(7) ya Molaotheo.

5.3. Mmasepala wa Selegae wa Enoch Mgijima le ona o gapeletšegile go bewa ka fase ga taolo ke Lekgotlaphethiši la Profense la Kapa Bohlabela goya ka Karolo 139(5) (a) ya Molaotheo ka 2018. Le ge go le bjalo, morago ga gore mmasepala o šitwe ke go gatela pele go kaonafatša bodiragatši bja ona bja ditšhelete le bja kabo ya ditirelo, Kabinete e tšeere sephetho sa go bea mmasepala wo ka fase ga taolo ya bosetšhaba.

5.4. Phethagatšo ya go bewa ka fase ga taolo goya ka Karolo 139(7) ya Molaotheo e ra gore mebasepaleng ye ka bobedi, mmušo wa bosetšhaba o tla tšea magato legatong la Lekgotlaphethiši la Profense. Mohuta wo wa magato a go bewa ka fase ga taolo ya bosetšhaba ke kgapeletšo ebile a latela tshepedišo ya go swana le ya Karolo 139(5) ya Molaotheo, ntle fela le gore mmušo wa bosetšhaba o tla thoma go rwala maikarabelo a magato a a go bewa ka fase ga taolo. 

5.5. Go kgontšha mošomo wa go thoma go rwala maikarabelo a, Baemedi ba Bosetšhaba ba Kabinete (NCR) ba tlo thwalwa go se goye kae mebasepaleng ye ka bobedi ga yona. Tona ya Ditšhelete o tla nea NCR maatla a go tšea magato ebile o tla thekgwa ke ditsebi tša dihlopha tša magoro a mehutahuta. Go fihla gabjale ga gona sephetho seo se tšeerwego sa go šwalalanya khansele ya mmasepala goya ka Karolo 139(5)(b) ya Molaotheo.

5.6. Magato a go bewa ka fase ka taolo ya bosetšhaba a tlo thoma go šoma morago ga gore sephetho se se phatlalatšwe semmušo kuranteng ya mmušo ka gare ga Government Gazette, le ge go le bjalo, magato a bjale a Karolo 139(5) a tlo tšwelapele go šoma go fihla ka letšatšikgwedi le. Magato a go bewa ka fase ga taolo goya ka Karolo 139(1) ka Mmasepaleng wa Selegae wa Enoch Mgijima a tlo tšeelwa legato ke magato a Karolo 139 (5) (a) le (c), ao a akaretšago gape le go šitwa ga mmasepala wo go fihlelela ditlamegophethiši tša ona. Tona Kantorong ya Mopresidente, Morena Mondli Gungubele o tla re – mmogo le Tona ya Ditšhelete, Morena Enoch Godongwana le Tona ya Tirišano ya Makala a Mmušo le Merero ya Setšo, Ngaka Nkosazana Dlamini Zuma – ba swara tshedimošetšo ya babegaditaba beke ye tlago go hlatholla magato a a go bewa ka fase ga taolo ya bosetšhaba.

C. Ditiragalo tšeo di Tlago

1. Imbizo ya Mopresidente ya Mmotlolo wa Tlhabollo ya Dilete (DDM)

1.1. Mopresidente Ramaphosa o tla swara Imbizo ya Mopresidente ya DDM Mabaleng a Dipapadi a Petrus Molemela gola Mangaung, Freistata ka Labohlano, 8 le ka Mokibelo, 9 Moranang 2022.

1.2. Imbizo ye, ya go swarelwa ka fase ga morero wo: ‘‘Ga go tlogelwe motho morago’’, e tla sekaseka maemo a kabo ya ditirelo ka profenseng, ya lekola kgatelopele ye fihleletšwego mo go DDM, le gape go bea leihlo magatotharollo a bohlokwa le dithulganyo. 

1.3. Imbizo ya Mopresidente ya DDM ke sefala se bohlokwa sa kgathotema setšhabeng ka gobane e fa badudi ba yona monyetla wa go ntšha sa mafahleng le go fa mopresidente monyetla wa go theeletša batho le go ba araba ka tšeo ba llago ka tšona. MaAfrika Borwa ba ka šala morago ditherišano tše le go kgatha tema go tšona dikgokaganong tša leago ka fase ga #PresidentialImbizo.

D. Ditebogišo

Kabinete e lebišitše ditebogišo tša yona le go lakaletša mahlatse go: 

- Morena Nkosinathi Maphumulo, wa go tsebega ka leina la DJ Black Coffee, yo malobanyana mo a thopilego sefoka sa gagwe sa mathomothomo sa Grammy legorong la “Mmino wo kaonekaone/Albamo ya Elektroniki” ka albamo ya gagwe ya mmino ya go bitšwa Subconsciously, kua moletlong wa difoka tša bo-64 tša Grammy tšeo di swaretšwego kua Las Vegas, Amerika.
 

E. Bao ba Thwetšwego Mešomong  

Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.

1. Morena Mpumelelo Tyikwe bjalo ka Mohlankedimogolophethiši le Molaodiphethiši wa Mokgatlo wa Afrika Borwa wa Inšorense ya go Ikgetha ya Kotsi.

Dinyakišo: Mme Phumla Williams – Seboleledi sa Kabinete 
Mogala: 083 501 0139