A.    Merero Seemong sa Bjale

1.    Tlhatlogo ya Diphetelo tša Bolwetši bja Coronavirus (COVID-19) 

1.1. Kabinete e laeditše hlobaelo ya yona mabapi le tlhatlogo ya palo ya diphetelo tše diswa tša COVID-19 gola Kapa Bohlabela le dikarolong tše dingwe tša Kapa Bodikela. Tlhatlogo ya diphetelo e lebišwa go, magareng ga mabaka a mangwe, go se latele ditshepedišo tša thibelo ya COVID-19 le melao ya Maemotemošo a 1. 

1.2. Kabinete e dumeletše magatotharollo ao a šišintšwego Mmasepaleng wa Boemakepe ba Nelson Mandela (NMB) go rarolla diphetelo tšeo di hlatlogelago godimo tša COVID-19. Kabinete e dumeletše gape gore dikoma di ka tšwelapele ka go latela ditshepedišo tšeo di tiišeleditšwego letsogo ka ntle le Mmasepala wa NMB. Tona ya tša Maphelo, Ngaka Zweli Mkhize, o tla tšea maeto goya Kapa Bodikela go lekola seo se swanetšego go dirwa go namola seemo mafelong a bjalo ka Garden Route. 

1.3. Kabinete e gateletše bohlokwa ba go latela magato a go se hloke dihlare go swana le go hlapa matsogo ka meetse le ka sesepe goba ka go šomiša sanithaesa sa diatla sa go ba le alekhohole, go šielana sekgala le go apara maseke ge o le bathong. Ka moka ga rena re swanetše go thekga boipiletšo bja Mokgatlo wa Lefase wa tša Maphelo (WHO) go thibela diphetelo tše diswa tša COVID-19.

1.4. Ge re batamela sehla sa maikhutšo, re swanetše go gopola gore leuba le le santše le le gona ebile le šoro. Ka gona, re swanetše go efoga go tšea maeto ao a sego maleba, re fokotše go ya mafelong a bohle kgafetšakgafetša go swana le diresturente, dithabene le dipara. Wo mongwe le wo mongwe wa rena o swanetše go netefatša gore o ntšha mahlo dinameng go efoga go phatlalatša baerase ye go ba malapa a rena, kudukudu batšofadi. 

1.5. Re swanetše go šielana sekgala ka nako tšohle ešita le ge re kopana mmogo bjalo ka malapa go keteka maikhutšo. Ka maitshwaro a rena a maikarabelo, re ka kgatha tema ka moka ga rena go lwantšha le go bea ka fase ga taolo phatlalalo ya COVID-19. Kabinete e dumeletše gape go oketšwa ga Maemo a Masetlapelo a Bosetšhaba go fihla ka la 15 Pherekgong 2021.

2.    Intasteri ya Dinamelwa tša Merwalo

2.1. Kabinete e sotše ka bogale maitshwaro a go se latele molao a go ama intasteri ya dinamelwa tša merwalo le go reta magato a ka pejana ka maphodisa go golega bagononelwa gola Gauteng. Kabinete e laeditše mahloko a yona go ba malapa le bašomimmogo ba baotledi bao ba lahlegetšwego ke maphelo a bona ebile e lakaletša bao ba gobetšego pholo ya ka pejana.

2.2. Le ge e le gore re kwešiša dipefelo tša kgatako ya melao ya bafaladi ka tše dingwe tša dikhamphani, dikgaruru ga se tharollo. Kabinete e dira boipiletšo go batho ka moka bao ba amegilego go romela maswenyego a bona mabapi le intasteri ya dinamelwa tša merwalo ditheong tše maleba legatong la gore ba lefeletše ka dikgaruru.

2.3. Tona ya Mešomo le Bašomi Thulas Nxesi o tla eta pele sehlopha sa Ditona tšeo di swaraganego le taba ye ebile o letetšwe gore a romele tšhišinyo ya kgonthe go Kabinete go rarolla dithulano ka moka tša go ama intasteri. 

3.    Tlhabollo ya Mananeokgoparara

3.1. Kabinete e amogela neeletšo ya Sekimo sa uMshwathi sa Kabo ya Meetse ka Bontši gola KwaZulu-Natal, seo se tla fetošago ka botlalo maphelo a malapa a go feta 3 000 mafelong a bjalo ka Albert Falls, Mpolweni, Trustfeed le Nadi.

3.2. Sekimo se ke sona makgoraditsela sa diprotšeke tše dingwe tša dilete tša kabo ya meetse ka bontši seo se tla ralalago dileteng tše tshelela tša mebasepala – Zululand, King Cetshwayo, iLembe, uThukela, uMgungundlovu le Harry Gwala. Kabinete e hlohleletša baholegi ba sekimo se go babalela le go šomiša meetse ka tshwanelo gore se hole malapa ka moka. 

4.    Maikhutšo a go ba le Polokego

4.1. Ge maAfrika Borwa ba tšea nako ya bona go ipshina ka maikhutšo le malapa le bagwera, Kabinete e hlohleletša rena ka moka go dira seo ka maikarabelo. Godimo ga go latela ditshepedišo ka moka tša maphelo go efoga go phatlalala ga COVID-19, re swanetše gape go latela melao ka moka ya tsela go netefatša gore re fihla fao re yago ka polokego. 

4.2. Polokego ditseleng ke maikarabelo a maAfrika Borwa ka moka le gona baotledi ka moka ba hlohleletšwa go se otlele ka lebelo, ba se ke ba nwa madila le go otlela le gore ba se ke ba otlela ka bohlaswa le ka go hloka šedi. 

4.3. Batswadi le baledi ba bana ba hlohleletšwa gore ba se tlogele bana ba le noši nakong ya sehla sa maikhutšo. Ka go šoma mmogo go hlokomelana, re ka netefatša gore re ba le sehla sa maikhutšo sa polokego le sa lethabo.

B.    Diphetho tša Kabinete

1. Pego ya Kgatelopele go tšwa go Sehlophatšhomo sa Magareng ga Ditona (IMTT) Profenseng ya Leboa Bodikela

1.1. Kabinete e dumeletše ditšhišinyo tša IMTT tša go gogelwa morago ga magato a bonamodi ka fase ga Karolo 100(1)(b) gola Leboa Bodikela pele ga ngwaga wa ditšhelete wa 2020/21.

1.2. Kabinete e kgotsofaditšwe ke kgatelopele yeo e dirilwego magatong a bonamodi a mmušo wa bosetšhaba gola Leboa Bodikela, le ge e le gore mošomo wo montši o santše o hloka go dirwa go bušetša sekeng pušo ye maleba mo profenseng.

1.3. Kgatelopele e fihleletšwe go bušetša setšhaba sekeng le khutšo magareng ga bašomi, taolo ya ditšhelete, taolo ya ditlamorago le kabo ya ditirelo. Go bile le kaonafalo dipoelong tša bohlakiši, le go fihla mafelelong ga mengwaga ye tshela ya go theogela fase le go hloka kgatelopele dipoelong tša bohlakiši. Pego ka botlalo e tla hlagišetšwa Palamente.

2.    Sedimošo ka Leanotlhakodišo la Kgwebo (BR Plan) la Khamphani ya Difofane tša Afrika Borwa (SAA)

2.1. Kabinete e sedimošitšwe ka kgatelopele mabapi le phethagatšo ya Leanotlhakodišo la Kgwebo la SAA le ka fao neeletšano ya R10.5 bilione e tla šomišwago ka tshwanelo ka gona go netefatša go atlega ga phethagatšo ya Leanotlhakodišo la Kgwebo. 

2.2. Kabinete e thabetše kgatelopele le go dira boipiletšo go Kgoro ya Dikgwebo tša Mmušo (DPE) go potlakiša phethagatšo ya maihlamelo a bohlokwa go netefatša go tšwelela ga difofane tša bosetšhaba tšeo di hlamilwego ka leswa, tša mafolofolo le tša theknolotši ya go seketša tšhelete. 

2.3. DPE e hlahlilwe go ruma thwalo ya lekgotla la lebakanyana la SAA le go ruma thwalo ya Modirišanimogolo wa Tekatekano wa SAA yeo e beakantšwego ka leswa. Mango e retilwe ka tema ye bohlokwa yeo e kgathilego bjalo ka lekalakgwebo la SAA, go netefatša gore ditirelofofane di dula di le gona ka nako tšohle mmarakeng.

3.    Leano la Bosetšhaba la Boitukišetšo ba Dihla (la Tšhoganyetšo) la Sehla sa Selemo sa 2020-21 

3.1. Kabinete e dumeletše Leano la Bosetšhaba la Boitukišetšo ba Dihla bakeng sa Sehla sa Selemo sa 2020-2021 leo le hlagišitšwego ke Tona ya Tirišano ya Makala a Mmušo le Merero ya Setšo, Ngaka Nkosazana Dlamini Zuma. Leano le le latela diponelopele tšeo di laeditšego gore kgonagalo ya godimo ya dipula tša go feta tša setlwaedi dikarolong tše ntši tša naga di letetšwe. Se se ra gore mafelo a dipula tša selemo go akaretšwa diprofense ka moka tše seswai ka ntle le Profense ya Kapa Bodikela di letetše kgonagalo ye kgolo ya mafula le meoya ya go tšutla. 

3.2. Go phethagatša leano le, magatothibelo a hlomilwe go fokotša ditlamorago tša dikotsi tše ka bago gona tša sehla sa selemo. Leano le le kopantšha sehla sa maikhutšo go thoma ka Dibatsela 2020 go fihla ka Dibokwane 2021, ka baka la ge yona nako yeo e ratwa ke dikgonagalo tša godimo tša dikotsi tša go amana le maemo a boso. Kabinete e lemogile gape gore dikarolo tše dingwe tša diprofense tša thoko ya Kapa di santše di itemogela komelelo ye šoro.

3.3. Kabinete e dira boipiletšo setšhabeng go dira boitukišo bjo maleba kgahlanong le dikotsi tša sehla sa selemo le go netefatša magato a go ba le mohola ao a tla phološago maphelo, go šireletša thoto le mananeokgoparara. 

4.    Tlhako ya Bosetšhaba ya Tlhabollo ya Pholisi

4.1. Kabinete e dumeletše Tlhako ya Bosetšhaba ya Tlhabollo ya Pholisi yeo e tlo hlahlago dikgoro ka moka tša mmušo go thala dipholisi tša tšona tša go fapafapana. Tlhako ye e lebeletše go lekanetša ditshepedišo tša tlhamo ya dipholisi go ralala didiko ka moka tša mmušo. 

4.2. Sengwalwa se se hlatholla magato a go fapafapana ao a swanetšego go latelwa tlhamong ya dipholisi tša mmušo, ao a akaretšago magato a go hlama pholisi, maemo ao a letetšwego; mabaka ao a swanetšego go sekegelwa ge go hlangwa pholisi le dipeakanyo tša ditheo tšeo di swanetšego go hlongwa go dumelela tlhamo yeo e nago le mohola ya dipholisi le ditshepedišo tša phethagatšo. 
4.3. Tlhako ya bjalo ga e netefatše go dira dilo ka tsela ye swanago le tšhomišano tlhamong ya dipholisi. Sengwalwa se se tla hwetšagala ka websaete ya Kgoro ya Peakanyo, Tekodišišo le Tshekatsheko (DPME) ya www.dpme.gov.za.  

5.    Pholisi ya Dineeletšano tša Naga

5.1. Kabinete e dumeletše pholisi ye go phethagatšwa, e lego yeo e nepilego go potlakiša dineeletšano tša naga bjalo ka ye nngwe ya ditsela tša go arabela kgatelopele ye nanyago ya peakanyoleswa ya naga.

5.2. Phethagatšo ye ya pholisi e tla hlola menyetla ya go kwagala go badudi mafelong a bokantle ba toropo le a dinaga magae go kgatha tema ikonoming. E bea dihlohleletšo le go hlahla dineeletšano tša naga ka beng bao ba nago le dinaga tše kgolo. Dihlohloletšo tše di tla ka maikarabelo ao a laoletšwego a maatlafatšo karolong ya beng ba dikarolo tše kgolo tša naga bao ba tla neelanago ka naga.

5.3. Naga yeo e neeleditšwego le magato a pholisi a hlohleletšo a tsamaišwa le kwano yeo e fihleletšwego ke badirišani ba leago ka Lesolo la 2016 la Phakisa go tša Temo, Peakanyoleswa ya Naga le Tlhabollo ya Dinagamagae. Pholisi ye e lokolotšwe gore e fetlekwe ke setšhaba ka Dibokwane 2020.

6.    Pholisi ya Bosetšhaba ka Kgetho ya Baholegi le Kabaganyo ya Naga ya 2020

6.1. Kabinete e dumeletše pholisi, yeo e fanago ka tshepedišo ya go se tšee lehlakore, ya potego le ya go se fihle selo ya kgetho ya baholegi le kabaganyo ya naga mo Afrika Borwa. Pholisi ye e kopantšha mmogo ditshwayotshwayo tšeo di amogetšwego nakong ya phatlalatšo ya yona mathomong a ngwaga ebile e šeditše go rarolla, magareng ga tše dingwe, go se lekalekane ga bong taolong ya naga. 

6.2. E bea pele kabaganyo ya naga go basadi, ka gona e hlohleletša kgatelopele ya basadi ditabeng tša naga. E lebeletše gape le go rarolla dinyakwa tša go fapafapana tša naga goya ka fao di hlagišitšwego ke setšhaba tšweletšong ya temo, madulong a batho, go kopanela naga le tlhabollo ya magae le ya diintasteri. 

6.3. Pholisi ye e šišinya tlholego ya setheo sa go ikema go šetšana le kabaganyo ya naga le go aba peakanyo ya go dira dikgopelo inthaneteng go netefatša gore ga go utwe selo ka botlalo kabaganyong ya naga. 

7.    Seakanywa sa Pholisi ya Mollwane wa Dilo ka Moka (OSBP)

7.1. Kabinete e dumeletše seakanywa sa Pholisi ya OSBP gore e fetlekwe ke setšhaba. Tlhamo ya OSBP e šeditše go lebelela go sepedišwa ga batho le diphahlo magareng ga mellwane ya go tsena ka nageng ya Afrika Borwa le ya dinagamabapi. Ditšhišinyo ka pholising di lebeletše go rarolla pitlagano yeo e hlolago tiego, kudukudu ka bao ba tšeago maeto a go tshela mellwane le bagwebi. 

7.2. Pholisi ye e kgontšha Tlhako ya Dilo ka Moka ya Mollwaneng yeo e amogetšwego ke Kabinete ka 2018. Mo maemong a kontinente, pholisi ye e kgatha tema Maihlamelong a Mopresidente a Bonkgwete ba Mananeokgoparara, ao a gatelago pele kgokagano magareng ga dinaga tša Afrika go rarolla tlhaelelo ya mananeokgoparara le go kaonafatša kgwebišano magareng ga dinaga tša Afrika. Seakanywa se sa pholisi se tla phatlalatšwa kuranteng ya mmušo gore setšhaba se fe ditshwayotshwayo nakong ya kotara ya mathomo ya 2021.

8.    Go Dumelelwa ga Kwano ya Mokgatlo wa Boditšhabatšhaba go tša Bašomi Mabapi le Phedišo ya Dikgaruru le Tlaišo Kwanong ya Bašomi ya 2019 (No. 190)

8.1. Kabinete e dumeletše tlhagišo ya Kwano ya Bašomi ya 2019 (No. 190) Palamenteng gore e dumelelwe. Kwano ye e rarolla dikgaruru le tlaišo, kudukudu mešomong. 
E fana ka tlhako ye hlakilego ya magato le monyetla wa go fetoša sebopego sa mošomo ka go ithekga ka seriti le tlhompho, ntle le dikgaruru le tlaišo. 

8.2. Go dumelelwa ga kwano ye go tsepamišwa le Molaotheo wa Rephabliki ya Afrika Borwa wa 1996. Ge o šetše o dumeletšwe, dipeakanyetšo tša kwano ye di tla tlišwa ka mo nageng le go sepedišana le Molao wa Dikamano tša Bašomi, 1995 (Molao 66 wa 1995).

8.3. Kgoro ya Mešomo le ya Bašomi e šetše e hlamile Molao wa Maitshwaro a Mabotse go Thibelo le Phedišo ya Dikgaruru le Tlaišo Mešomong.

9.    Leanopeakanyo leo le Fetlekilwego la Selete sa Antartiki le Lebopo la Borwa 

9.1. Kabinete e dumeletše leanopeakanyo leo le fetlekilwego go ka phethagatšwa, leo le akaretšago ditshwayotshwayo tšeo di amogetšwego nakong ya ge le phatlalatšwa mathomong a ngwaga. Leanopeakanyo le le fana ka tsamaišo le phethagatšo ya Molao wa Melao ya Antartiki, 1996, (Molao 60 wa 1996), wa go amana le diphatišišo, pabalelo, tšhomišo ye swarelelago ya methopo le taolo ya tikologo go thekga lenaneo la Afrika. 

9.2. Se se kgatha tema Dinepong tša Tlhabollo yeo e Swarelelago, ka go lemoga gore Lebopo la Antartiki le la Borwa ke dikarolo tše bohlokwa kudu tša peakanyo ya klaemete ya lefase ka bophara. Leanopeakanyo le le kgatha tema go magato a tša klaemete le seriti sa tlhago ka go hlohleletša go hlongwa ga mafelo ao a šireleditšwego le go laolwa ka go ikgetha. Lona le phatlaladitšwe ka Hlakola 2020 gore setšhaba se fe ditshwayotshwayo.

10.    Ditokelo tša Botho, Tokologo le Poelano: Pego ya Kgetho ya Mafelo a Bohwa a Nelson Mandela 

10.1. Kabinete e dumeletše tlhagišo ya Ditokelo tša Botho, Tokologo le Poelano: Pego ya Kgetho ya Mafelo a Bohwa a Nelson Mandela go Senthara ya Bohwa bja Lefase ya Ditšhabakopano go tša Thuto, Saenthefiki le tša Setšo gore e lebelelwe le go ngwalwa fase bjalo ka Lefelo la Lefase la Bohwa. Ye ke karolo ya Twantšho ye nabilego le Protšeke ya Tshepedišo ya Bohwa bja Tokologo. 

10.2. Kgetho ye e tliša mafelo a 10 a motho o tee ka o tee diprofenseng tše nne le mebasepaleng ye šupa. Se se emela histori ya rena ya tokologo le ya ditokelo tša botho, ebile e fana ka bohlatse ba dikgato tša go fapafapana tša mogwanto wa tokologo. 

10.3. Kgetho ye e tsamaišana le Leanotlhabollo la Bosetšhaba, leo le gatelelago pabalelo le pušetšosekeng ya mafelošireletšwa. E lemoga gape ke kgonagalo ya mohola wa ikonomi ya boihlamelo go lebeletšwe go hlola mešomo le meputso ka dithomelontle.

C.  Melaokakanywa

1.  Pabalelo le Tlhabollo ya Molaokakanywa wa 2020 wa Molao wa Temo

1.1. Kabinete e dumeletše tlhagišo ya Molaokakanywa wo Palamenteng. Molaokakanywa wo o phumola Molao wa Naga wa Temo, 1970 (Molao wa 70 wa 1970) go kgontšha dinyakwa tša Molaotheo le go fana ka lemanoga le lekalekanego tšhomišong ya naga ya temo.

1.2. Molaokakanywa wo o šireletša ka mafolofolo naga ya tšweletšo ya dijo ka go hlongwa ga Mafelošireletšwa a tša Temo fao e lego gore naga ya temo ye nago le bokgoni bjo bogolo e tla beelwago thoko mererong ya tša temo ebile naga ye nago le kgonagalo ya fase ya tša temo e tla dumelelwa go šomišetšwa merero ye sego ya temo. 

1.3. Phethagatšo ya Molaokakanywa e swaragane le matšhošetši setšhabeng le tšhireletšego ya dijo ka malapeng.

D. Ditiragalo tšeo di tlago

1. Samiti ya Kopano ya Afrika (AU) 

1.1. AU e tla ba monggae wa Samiti ye sego ya Setlwaedi ya Lefelo la Kgwebo ye Lokogilego la Kontinente ya Afrika (AfCFTA) ka la 5 le 6 Manthole 2020, go itokišetša go thoma ga AfCFTA ka la 1 Pherekgong 2021. 

1.2. AfCFTA e nale mehola ye makatšago ya Afrika Borwa ka ge e šoma bjalo ka setlišadiphetogo kgolong ya ikonomi le dipeeletšong. Lefelo la kgwebišano yeo e lokologilego le bula menyetla ya thomelontle ya rena ya diphahlo le ditirelo go mmaraka wa batho ba go feta 1,2 bilione. Bjalo ka Modulasetulo wa AU, Afrika Borwa ke yona e di etilego pele ka go hlohleletša phethagatšo ya AfCFTA.

1.3. Kwano ye e dira gore ikonomi ye kopantšwego le tlhabollo di gatele pele, e kgontšha maatlafatšo ya basadi mo kontinenteng, le go maatlafatša maitekelo a go hlola khutšo le tielelo ka mo Afrika. 

2.  Letšatši la Poelano

2.1. Afrika Borwa e tla keteka Letšatši la Poelano ka la 16 Manthole 2020 ka fase ga morero wo: “Re ngatana ye tee Magatong a Kgahlanong le Semorafe, Dikgaruru tša go Ikala ka Bong le go se kgotlelelane’’. Anke re šomiše letšatši le go ikgafa ka leswa gore re fihlelele kago ya setšhaba le phedišano setšhabeng.

2.2. Šedi ya ngwaga wo ka semorafe e gatelela bohlokwa ba gore motho mang le mang a tšee maikarabelo a go lwantšha semorafe, kgethollo ya semorafe, lehloyo la batšwantle le tše dingwe tša go amana le go se kgotlelelane ka mo nageng. 

3.  Letšatši la Boditšhabatšhaba Kgahlanong le Bomenemene

3.1. Afrika Borwa e tla tsenela lefase ka bophara go keteka Letšatši la Boditšhabatšhaba Kgahlanong le Bomenemene ka Laboraro, 9 Manthole 2020. Letšatši le le lemoša batho ka disenyegelo le ditlamorago tše mpe tša bomenemene, ebile le šeditše go di fediša. 

3.2. Bomenemene ga bo amogelege, go sa kgathale gore bo direga mmušong goba lefapheng la praebete. Bomenemene bo tla ka sebopego se ntši le gona ditiragalo tša go swana le go reka laesense ya go otlela, go lefa pipamolomo gore o tšhabe kotlo ye lego molaong, borukhuhli le maitshwaro a kgahlanong le phadišano, ka moka ke bomenemene. 

3.3. Dikatlego tša phenkgišano ya rena kgahlanong le bomenemene di laolwa ke kamego ya badudi ka moka le ditheo. Ka Dibatsela 2020, Kabinete e dumeletše Leanopeakanyo la Bosetšhaba la Kgahlanong le Bomenemene gore le phethagatšwe le go dira boipiletšo go mang le mang go ba ngatana ye tee go lwantšha bomenemene. Ge o bona se sengwe, bolela se sengwe, bega bomenemene ka go leletša Nomoro ya Mogala ya Bosetšhaba ya Kgahlanong le Bosenyi mo go 0800 701 701. 

E.  Melaetša

1. Ditebogišo

Kabinete e lebiša ditebogišo le go lakaletša bao ba latelago:

1.1. Mohumagadi Tsakani Maluleke, yo a thwetšwego bjalo ka Mohlakišipharephare wa Afrika Borwa go thoma ka la 1 Manthole 2020. Kabinete e mo lakaletša mahlatse maikarabelong a gagwe go netefatša gore go ba le boikarabelo tšhomišong ya didirišwa tša mmušo. 

2. Mahloko

Kabinete e lebiša mahloko a yona go:

2.1. ba lapa, bagwera le bašomimmogo ba sebapadi sa peleng sa Bafana Bafana le moralokamorago wa Mamelodi Sundowns Anele Ngcongca. 
2.2. Setšhaba sa Bogoši bja Bafokeng ka go hlokofala ga Mohumagadi (Mmakgoši), Ngaka Semane Bonolo Molotlegi.
2.3. Setšhaba sa AbaThembu ka go hlokofala ga Mmakgoši wa AmaXhosa Nozamile Sigcawu, mmago Kgoši Mpendulo Zwelonke Sigcawu yo a iketšego badimong.
lapa la Mohlomphegikgolo Kgoši Goodwill Zwelithini ka go hlokofala ga morwa wa gagwe Morwakgoši Lethukuthula Zulu.

F. Bao ba Thwetšwego Mešomong

Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.

1. Mohumagadi Mukondeleli Johanna Mulaudzi bjalo ka Mohlankediphethišimogolwane (CEO) wa Molekanetši wa Maemakepe a Afrika Borwa. 
2. Mohumagadi Ayanda Noah bjalo ka Modulasetulo wa Boto ya Sekhwama sa Bogare sa Enetši, SOC LTD.
3. Morena Loyiso Tyabashe bjalo ka CEO wa Koporasi ya Afrika Borwa ya Nyuklea.

4. Maloko a Khansele ya Lekgotlataolo la Intasteri ya Dikhamphani tsa Praebete tsa Bolotakgoro:
a.    Ngaka Audrey Leah Mofomme (Modulasetulo);
b.    Morena Matome Solomon Ralebipi (Motlatšamodulasetulo);
c.    Morena Humphrey Nhlanhla Ngubane;
d.    Ngaka Sithembile Nombali Mbete; le
e.    Mohumagadi Thandeka Ntshangase.

5. Go oketšwa ga kontraka ya Morena Mbulelo Tshangana bjalo ka Molaodipharephare (DG) wa Kgoro ya Madulo a Batho.
6. Mohumagadi Nomfundo Clementine Tshabalala bjalo ka DG wa Kgoro ya Tikologo, Kagodithokgwa le Boreatlhapi. 
7. Ngaka Annette Theresa Griessel bjalo ka Motlatša Molaodipharephare (DDG): Motsamaiši wa Thulaganyo ya Bosetšhaba kua DPME.
8. Ngaka Nontsikelelo Valencia Tshayingca-Mashiya bjalo ka DDG: Ditirelo tša Tlemano kua DPME.
9. Mohumagadi Dorcas Tshepiso Moahloli bjalo ka DDG: Taolo ya Thoto le Boikarabelo Matlotlong a Bosetšhaba. 

Dipotšišo:
Mohumagadi Phumla Williams – Seboleledi sa Kabinete 
Mogala: 083 501 0139