A.    Merero ye Bohlokwa Seemong sa Bjale

1.    Lesolo la Meento ya Bolwetši bja Coronavirus (COVID-19)  

1.1.    Kabinete e filwe hlohleletšo ke dimilione tša batho ba Afrika Borwa bao ba tšeerego sephetho sa go hlaba meento kgahlanong le COVID-19. Go fihla lehono, go hlabilwe dilekanyo tša go feta 17 milione tša meento kgahlanong le COVID-19. 

1.2.    Kabinete e leboga dihlopha tša sedumedi, gotee le lefapha la dipapadi le bokgabo ka go tsenela masolo a meento go hlohleletša batho go hlaba meento.  

1.3.    Ge batho ka bontši ba hlaba meento, gona go ra gore naga ye e tla theošetša fase maemo a bjale a dikiletšo tša Maemotemošo a Bobedi. Se se tla dira gore ntle le pelaelo ditiragalo tša ikonomi di bulwe ka botlalo gore re kgone go godiša le go hloma mešomo yeo e nyakegago kudu.  

1.4.    Kabinete e santše e gatelela kgoeletšo ye rego gore re fokotše diphetelo tše difsa tša bolwetši, re swanetše gore ka moka ga rena re tšwele pele go apara dimaseke ge re le gare ga batho le go šomiša meetse le sesepe goba sanithaesa sa alekhohole ya go feta 70%, le go tšwelapele go šielana sekgala go phethagatša morero wa naga ye wa go fokotša diphetelo tše difsa.

2.    Lesolo la Vooma Vaccination Weekend go Thoma ka 1 go Fihla ka la 2 Diphalane 2021

2.1.    Kabinete e dira boipiletšo go MaAfrika Borwa bao ba sa hlabago meento le batho bao ba dulago ka mo Afrika Borwa go šomiša monyetla wa Vooma Vaccination Weekend gore o ba hole. Monyetla wo o tla phethagatšwa nageng ka bophara ka Labohlano la 1 le Mokibelo wa la 2 Diphalane 2021.

2.2.    Lesolo la Vooma Vaccination Weekend ke lesolo la go akaretša batho ka moka la bosetšhaba leo le thekgwago ke badirišani ka moka setšhabeng, go akaretšwa le dihlopha tša sedumedi, baetapele ba setšo, bašomi bao ba ipopilego dihlopha le dikgwebo. Go lebeletšwe gore gona mafelelo a beke ye, batho ba go feta 500 000 ba hlabe meento.

2.3.    Wo ke monyetla go batho ba bagolo ka moka go hlaba meento ntle le tefo le ka ntle le go beakanya diketelo mafelong a go hlaba meento a mmušo, a praebete le fao batho ba ikelago ka bobona.

2.4.    Ga go hlokege gore o be le inšorense ya maphelo goba medical aid gore o hlabe moento. Baetapele ba mmušo, ba dikgwebo, ba bašomi le ba dihlopha tša batho setšhabeng ba tla rapa setšhaba ka mafolofolo dikarolong ka moka tša naga gore ba itokišetše tšhireletšo ye tlago le go hlaba moento.  

2.5.    Vooma Vaccination Weekend e ka re thuša go fenya baerase ye e re hlomerego lebaka la go feta ngwaga. Ga gona motho yo a swanetšego go fetwa ke monyetla wo. A re Bolokegeng ka Moka ga Rena.

3.    Ketelo ya Mopresidente Leporogong la Msikaba

3.1.    Mopresidente Cyril Ramaphosa o tšwa go fetleka kgatelopele ya mošomo tlhabollong ya mananeokgoparara kua Leporogong la Msikaba, Lusikisiki go la Kapa Bohlabela ka Labone, 23 Lewedi 2021. Protšeke ye ya mananeokgoparara a go bitša R1,65 bilione e bopa karolo ya protšeke ya N2 Tseleng ya Wild Coast. Ntle le go kgontšha gabonolo leemaema la batho ka go kgokaganya batho ba go dula dinagamagaeng le mafelo a metsesetoropo, leporogo le le tla hlohleletša dipeeletšo le kgolo ya ikonomi. 

3.2.    Tsela ye ya go raragana ya N2 Wild Coast ke ye nngwe ya Diprotšeke tše kgolokgolo tša mmušo tša Mohlakanelwa le tše Logetšwego Maano go akgofiša go gola ga ikonomi maemong a bosetšhaba, a profense le lona felo leo. Kabinete e thabišitšwe ke kgatelopele ya mošomo lesolong la yona la dipeeletšo tša mananeokgoparara, e lego boikokotlelo bjo bohlokwa bja Leano la Tsošološo ya Ikonomi le go Boetšwa Sekeng ga yona (ERRP), ka diprotšeke tše 88 tša go bitša tšhelete ya go feta R2.3 trilione tšeo di sa tlago.

4.    Dikamano tša Boditšhabatšhaba, Bogwebi le tša Boeti

4.1.    Kabinete e amogetše sephetho sa Germany sa go tloša Afrika Borwa lenaneong la yona la mafelo a goba le kotsi ye kgolo ge a etelwa le dithulaganyo tša Amerika tša go amogela baeti bao ba entilwego ka botlalo ka nageng yeo.

4.2.    Le ge go le bjalo, Kabinete e laeditše ka fao e nyamišitšwego ke sephetho sa United Kingdom (UK) sa go tlogela Afrika Borwa lenaneong la naga yeo la dinaga tše lego kotsing ye kgolo go ka etelwa. Ga gona mabaka a go kwagala a go tlogela Afrika Borwa lenaneong leo kudu ka ge re fihleletše tše ntši go lwantšha leuba la COVID-19 le go fokotša ka pela palo ye diphetelo tša malwetši gotee le lenaneo la rena la motlalanaga la go hlaba meento.

4.3.    Kabinete e sedimošitšwe ke Kgoro ya Dikamano tša Boditšhabatšhaba le Tirišano ya Makala ka kgatelopele ye fihleletšwego go tloša Afrika Borwa lenaneong la dinaga tše lego kotsing ya bolwetši. Kabinete e nale tshepho ya gore Mmušo wa UK o tla boela wa lebeledišiša sephetho sa ona se lego kgahlanong le naga ye, seo se sa amego fela intasteri ya boeti eupša se amago gampe dikgwebo go tšwa dinageng tše ka bobedi, malapa le mafapha a mangwe a ikonomi.

5.    Go Boetšwa Sekeng ga Ikonomi 

5.1.    Kabinete e amogetše go tsebagatšwa ga Phothale ya Boingwadišo bja Tahlegelo ya Kgwebo go ngwadiša dikgwebo tšeo di amilwego ke megwanto yeo e diragetšego magareng ga la 9 le la 19 Mosegamanye gola KwaZulu-Natal, Gauteng le mafelong a mangwe ao a amilwego ke megwanto ye.

5.2.    Phothale ye ya boingwadišo e hwetša tshedimošo go tšwa dikgwebong tšeo di amilwego ke megwanto go beakanya bokaone magato a kimollo le go tla ka magato a go rarolla se ao a tlo dirišwago kamoso. Phothale ye ke mokgwa o le noši wa mmušo wo ka ona dikgwebo di ka laetšago ka fao di lobilego ka gona. 

5.3.    Kabinete e dirile boipiletšo go bengdikgwebo ka moka bao ba amilwego ke megwanto go ingwadiša phothaleng ye mo go www.relief4sa.co.za(link is external). Ka go le le ngwe, ba ka letšetša 080 006 00850 go hwetša thušo magareng ga 08:00 le 17:00 gare ga beke.

5.4.    Ka Kgoro ya Tlhabollo ya Dikgwebopotlana, palomoka ya dikgopelo tše 192 go tšwa go bengdikgwebo tše nnyane le tša magareng bao ba amilwego ke mogwanto wo di amogetšwe. Kabinete e thabišitšwe ke gore palomoka ya go lekana R54,2 milione e dumeletšwe gore e abelwe bona bengdikgwebo ba. 

6.    Go Tšwetšwapele ga Difofane tša Tirelo ya Difofane ya Afrika Borwa (SAA) 

6.1.    Kabinete e amogela go tšwetšwapele ga difofane ka SAA, fao go šomago fela maeto a se makae magareng ga Johannesburg le Motsekapa. Khamphani ye ya difofane ya bosetšhaba e tla fofiša batho goya metsemešate ya dinaga tša Afrika go swana le Accra (Ghana), Kinshasa (Democratic Republic of the Congo), Harare (Zimbabwe), Lusaka (Zambia) le Maputo (Mozambique), ebile mafelo a mangwe a mantši a tlo lokelwa ge maemo a mebaraka a kaonafala. 

6.2.    Kabinete e dirile boipiletšo go MaAfrika Borwa ka moka go thekga SAA yeo e beakantšwego ka lefsa, e bago seo se laetšago mathomomayo a paka ye mpsha diphofong tša Afrika Borwa. 

7.    Yuniti ya Maitshwaro a Maleba a Tshepedišo ya Makala a Mmušo, Bobotegi le Thušo ya Sethekniki go tša Kgalemo (PA-EID-TAU)

7.1.    Kabinete e amogetše go tsebagatšwa ga PA-EID-TAU, e bago yuniti yeo e tiišeletšago matsapa a mmušo twantšhong ya kgahlanong le bosenyi Ditirelong tša Mmušo. 

7.2.    PA-EID-TAU e tla bea leihlo go phethagatšwa ga maitshwaro a maleba ditirelong tša mmušo le dipholisi tše kgahlanong le bosenyi go swana le go dira kgwebo le Mmušo, go diragatšwa ga mešomo e mengwe ya go tsentšha meputso, taolo ya kgalemo le go phethagatšwa ga dipego tša bohlakiši tša ka fao batho ba phelago ka gona.

7.3.    Kabinete e dira boipiletšo go bašomedi ba mmušo go ema ka molomo wa lehlabula mo matsapeng a bona a go fediša bosenyi. Ka go no ba batho bao ba eteletšego pele ka go bega ditiragalo ka moka tša go amana le bosenyi bjo bo diragalagong Makaleng le ditheong tša mmušo, re ka kgona go ihlolela bokamoso bjo kaone le go tlogelela bao ba tlago ka morago ga rena bohwa bja goyagoile.

8.    Dikgetho tša 2021 tša Pušo Selegae (LGE)

8.1.    Kabinete e retile bakgethi bao ba tla bego ba kgetha lekga la mathomo ba 1,7 milione bao ba ngwadišitšego ka beke ya go ingwadišetša go kgetha ka la 18 le 19 Lewedi. Go ingwadišetša go kgetha ke mokgwa wo baswa ba laetšago gore ba nyaka go kgatha tema ka gare ga temokrasi ya rena ka go kgetha baetapele mafelong ao ba tšwago go ona.

8.2.    Ka ge baswa ba bopa palo ye kgolo ya setšhaba sa gaborena, Lethabo la baswa go ba karolo ya ditshepedišo tša rena tša dikgetho ke taba yeo re amogelago ka diatla tše pedi le go e hlompha.  

8.3.    Dikgetho tša Pušoselegae (LGE) tša 2021 tšeo di rulaganyeditšwego go swarwa ka la 1 Dibatsela 2021 di fa MaAfrika Borwa monyetla wa go phethagatša ditokelo tša bona tša molaotheo go kgetha baetapele ba bona setšhabeng.

8.4.    Bakgethi bao ba sa kgoneng go kgetha ka Letšatši la Dikgetho le bao ba sa kgoneng go fihla diteišeneng tša go kgetha ka baka la malwetši mebeleng goba bogole ba ka kgetha ka Diboutu tša Moswananoši matšatši a mabedi pele ga Letšatši la Dikgetho. Dikgopelo tša diboutu tša moswananoši di tla bulwa ka la 20 Lewedi 2021 tša buša tša tswalelwa ka la 4 Diphalane 2021 ka iri ya bohlano mathapama. 

9.    Dikgaruru tša go Ikala ka Bong le Polao ya Basadi (GBVF)

9.1.    Kabinete e amogetše kahlolelo tše pedi tša bophelo ka moka tšeo di ahloletšwego Morena Sbusiso Nkosi (36) ka Kgorotsheko ya Godimo ya Lekala la Mpumalanga, ka la 13 Lewedi 2021, ka go kata le go bolaya Mohumagatšana Nomcebo Simelane (23) ka la 5 Lewedi 2020. 

9.2.    Kgorotsheko e ahloletše sekata se le mmolai dikwebo tše pedi tša bophelo ka moka le sekwebo sa tlaleletšo sa go golegwa mengwaga ye meraro ka baka la bohodu, gomme dikwebo tše di a latelana.

9.3.    Ye ke temošo ye tiišeleditšwego letsogo go batho ka moka ba go dira bosenyi bja GBVF gore ba tla golegwa le go lebana le letsogo la molao ka botlalo. Ka go šomišana le maphodisa le mabotho a phethagatšo ya molao, re ka dira gore mekgotha ya rena ka mo nageng le batho setšhabeng ba bolokege ka moka ga bona. 

9.4.    Bega ditiragalo ka moka tša go amana le GBVF maphodiseng goba o letšetše Senthara ya Bosetšhaba ya GBVF mo go: 0800 428 428 goba Mogala wa PHEDIŠO ya Dikgaruru tša Bong mo go: 0800 150 150 / *120*7867#

10.    Boingwadišo bja Manyalo a Setšo

10.1.    Kabinete e lemogile kahlolo ya Kgorotsheko ya Godimo ya Lekala la KwaZulu-Natal tabeng ya go amana le modirakgopelo, Mohumagadi Phumza Ethel Mankayi le baarabedi tabeng ye, Tona ya Merero ya Selegae, Mohumagadi Ntombizakhe Portia Miya le Kantorokgolo ya Kgorotsheko ya Godimo ya Afrika Borwa. Kahlolo ye e kgonthišiša ditokelo tša batho bao ba nyetšwego ka fase ga Molao wa Temogo ya Manyalo a Setšo, 1998 (Molao 120 wa 1998).

10.2.    Kabinete e dira boipiletšo go banyalani bao ba nyalanego ka setšo go yo ngwadiša manyalo a bona a setšo Kgorong ya Merero ya Selegae mo nakong ya dikgwedi tše tharo morago ga ge ba nyalane. Tona ya Merero ya Selegae e okeditše nako ya go ngwadiša manyalo ao a setšo go fihla ka la 30 Phupu 2024. Se se diretšwe go akaretša bao manyalo a bona a sa kago a ngwadišwa mo dikgweding tše tharo tša go nyala ga bona. Go ingwadiša, batho ba swanetše go tliša bohlatse bja ditherišano tša magadi goba lengwalo le afitabiti go tšwa go bao ba nyalanago le dihlatse tša bona, tšeo di laetšago gore lenyalo le bile gona goba le ketekilwe.

10.3.    Go fihla lehono, ke fela manyalo a setšo a 99 491 ao a ngwadišitšwego Kgorong ya Merero ya Selegae ga e sale go tloga mola molao o thomang go tsenywa tirišong ka Dibatsela 2000.

B.    Diphetho tša Kabinete

1.    Khonferense ya Afrika Borwa ya Dipeeletšo (SAIC)

1.1.    Kabinete e dumeletše dithulaganyo tša go beakanya SAIC ye tlago yeo e tlo swarwago ka Hlakola 2022. Khonferense ye e mo ngwageng wa yona wa boraro ebile nepokgolo ya yona ke go goketša dipeeletšo tša go bitša R1,2 trilione mo mengwageng ye mehlano. Lesolo la dipeeletšo le tšwelapele go tlaleletša dikopano tša SAIC tše pedi tša go feta tšeo di atlegilego. Tshedimošo ka botlalo ya khonferense ye le letšatšikgwedi leo e tlo swarwago ka lona di tla tsebagatšwa ka moragonyana.
 
2.    Lenaneo la go Fetogela Kgašong ya Titšithale (BDM)

2.1.    Kabinete e hlalošeditšwe ka lenaneo la naga ye la BDM. Kgatelopele ye e wišago pelo e fihleletšwe go huduša dikarolo tše dingwe tša naga ye go tloga dikgašong tša megala goya go tša titšithale. 

2.2.    Kabinete e dumeletše leanophethagatšo leo le fetlekilwego la mohlakanelwa la go fetošetša megala goya go ditšithale, e lego šetulu yeo e beakanyeditšwego go phethagatša ka botlalo mafelo ao a šaletšego morago pele ga Manthole 2022. Afrika Borwa ke ye nngwe ya dinaga tše ntši mo lefaseng tšeo di ikgafetšego go phethagatša ka bonako protšeke ya go hudugela theknolotšing ya titšithale, yeo pheletšo ya yona e tla bago gore kgašo ya megala e tla tšeelwa legato ke ya titšithale ka 2022.

2.3.    Kabinete e thekgile lemanoga la mohlakanelwa leo le dirišwago go lebeletšwe go akgofiša go rungwa ga go hudugela ga naga ka moka go tloga kgašong ya megala go ya kgašong ya titšithale.

3.    Pholisi ya Bosetšhaba ya Thibelo le Taolo ya go Ima ga Barutwana Dikolong 

3.1.    Kabinete e dumeletše Pholisi ya Bosetšhaba ya Thibelo le Taolo ya go Ima ga Barutwana Dikolong. Pholisi ye e arabela Kahlolelo ya Kgorotsheko ya 2012 yeo e tšeerego sephetho sa kgahlanong le Kgoro ya Thuto ya Motheo mo ditemaneng tše itšego tšeo di bego di dira gore barutwana ba lofišwe go tla dikolong lebaka la mengwaga ye mebedi morago ga go belega.

3.2.    Pholisi ye e fana ka tikologo ya go kgontšha go thekga barutwana le go efoga kgethollo kgahlanong le barutwana bao ba imilego. Pholisi ye e fana gape ka khumanego ya tshedimošo ye feletšego ka botlalo ya thibelo ya go ima; ditlhahlo tša thobamaikutlo le tša tlhokomelo, gotee le go hloma ditheo tša taolo ya pholisi le tša peakanyo.

3.3.    Pholisi ye e šetše e fetile ditherišanong tša motlalanaga ebile e gata ka mošito o tee le melao ka moka ye maleba. 

4.    Kwanelo go Kopano ya 2003 ya Ditšhabakopano ya Setheo sa tša Thuto, tša Saenthefiki le tša Setšo (UNESCO) go Šireletša Bohwa bja Setšo bjo Lego Dikgopolong (ICH)

4.1.    Kabinete e dumeletše kwanelo ya Afrika Borwa Kopanong ya 2003 ya UNESCO go Šireletša ICH. Kopano ye e fana ka monyetla wa go šireletšwa, go lotwa le go hlohleletšwa ga ICH ka mebušo ya go fapafapana ya dinaga tšeo e lego maloko. 

4.2.    ICH e akaretša gare ga tše dingwe ditšo tše lego setšhabeng, tsebo, didirišwa le dibetlwa mo setšhabeng. 

4.3.    Kopano ye e gapeletša mebušo yeo e lego maloko go hlaola, go hlaloša le go hlama magato a maleba go lota bohwa bjo. E hlohleletša gape le dinaga go diriša magato a semolao, a tsamaišo ya sethekniki le a go amana le tša ditšhelete go šireletša le go hlohleletša ICH. Kwanelo ye e tlo hlagišetšwa Palamente gore e dumelelwe.

5.    Kopano ya Ditšhabakopano Kgahlanong le Bosenyi (UNCAC)

5.1.    Kabinete e dumeletše phatlalatšo ya Pego ya Afrika Borwa ya tshekatsheko ka phethagatšo ya Kopano. Afrika Borwa e dumeletše UNCAC ka 2004. Mebušo yeo e lego maloko a kopano ye e sekasekwa goya ka phethagatšo ya kopano ye. 

5.2.    Afrika Borwa e sekasekilwe la mathomo ka 2012 ka phethagatšo ya magato a bosenyi le a phethagatšo ya molao, le gape ka fao e latelago tshepedišo ka gona tšhomišanong ya boditšhabatšhaba. Pego ya phetleko ya bjale ya 2019/20 e šeditše magato a thibelo le go hwetšwa ga dithoto.

5.3.    Magato a a phetleko a hlohleletša tirišano ye agišago ka, gare ga tše dingwe, go fana ka mananeo a thušo ya sethekniki mebušong yeo e lego maloko a kopano ye. 

6.    Go Fegwa ga Afrika Borwa go Swara Letšatši la Lefase la Mabopo le Tiragalo ya go Lebana le Lona (WMDPE)

6.1.    Mokgatlo wa Boditšhatšhaba wa Mabopo o file gape gape Afrika Borwa tumelelo ya go fega go swara WMDPE ka baka la COVID-19. Phego ye go tloga ka Diphalane 2021 go fihla ka Diphalane 2022 e latela ya mathomo ka 2020 ka baka la leuba la COVID-19. 

C.    Melaokakanywa 

1.    Khansele ya Bosetšhaba ka Molaokakanywa wa 2021 wa GBV le Polao ya Basadi (GBVF)  

1.1.    Kabinete e dumeletše phatlalatšo ya Khansele ya Bosetšhaba ka Molaokakanywa wa 2021 wa GBVF ka gare ga Kuranta ya Mmušo gore setšhaba se fe ditshwayotshwayo. 

1.2.    Molaokakanywa wo o arabela tlhahlo ye logetšwego maano go Leanopeakanyo la Bosetšhaba (NSP) ka GBVF leo le dumeletšwego ke Kabinete ka Hlakola 2020. Molaokakanywa wo o šišinya go hlongwa ga khansele ya boetapele ye ikemego go bea leihlo NSP godimo ga GBVF.

2.    Molaokakanywaphetošwa wa Bosetšhaba wa 2021 wa Mello ya Tlhaga (NVFFA) 

2.1.    Kabinete e dumeletše tlhagišo Palamenteng ya Molaokakanywaphetošwa wa Bosetšhaba wa 2021 wa Mello ya Tlhaga. Molaokakanywa wo o hlagišeditšwe Palamente la Mathomo ka 2017 ebile o bušeditšwe morago gore setšhaba se fe ditshwayotshwayo tša sona ka ona.

2.2.    Godimo ga dipeakanyetšo tše dingwe, Molaokakanywa wo o o hloma ditheo lefapheng la mmušo le maemong a setšhaba tšeo di tla šomago mmogo go fediša kotsi ya mello ya tlhaga le go hlohleletša kobamelo ye nago le mohola le phethagatšo ya molao.

2.3.    Mello ya tlhaga ya go se laolege ke yona e hlolago go gwahlafala ga tikologo, tobo ya mešomo, go hudušwa ga batho setšhabeng, le tshenyo ka kakaretšo ya mananeokgoparara, diruiwa, madulo a tšona le diphedi tša go fapafapana.

D.    Ditiragalo tšeo di Tlago

1.    Kopano Tlhabollo ya Mananeokgoparara a go Swarelela ya Afrika Borwa (SIDSSA)

1.1.    Mmušo o tla swara SIDSSA ya 2021 ka Laboraro, 6 le ka Labone 7 Diphalane 2021. Kopanong ye go tla boledišanwa le bakgathatema ba go fapafapana go tsošološa mananeokgoparara ao a tlogo dirwa.

1.2.    Mananeokgoparara a SIDSSA ao a tlogo dirwa a nepile go kgatha tema go hloma diintasteri le go hloma mešomo go ya ka fao go boletšwego ka gare ga ERRP le Leano la Diintasteri leo le Naganišitšwego ka leswa. Magato a go rarolla seemo se ao a hlaotšwego a nepile go rotoša nyakego le go netefatša tsamaišo ye nago le mohola ya bakgathatema ka moka ba mananeokgoparara. Go ukangwa gore magato a go rarolla seemo se a tla thuša gape go bopa ikomomi yeo e tieletšego ka go akgofiša kabo ya mananeokgoparara. SIDSSA ya 2021 e tla swarwa ka fase ga morero wo: “Mananeokgoparara a hlwahlwa bakeng sa tlhabollo, poelosekeng le kgolo ya go akaretša batho ka moka”. 

2.    Kgwedi ya Dinamelwa ya 2021 

2.1.    Diphalane ke kgwedi yeo e kgafetšwego go lebiša šedi ye kgolo mererong ya dinamelwa ka mo nageng. Wo ke ngwaga wa bo-16 mola naga e thomago go keteka Kgwedi ya Dinamelwa. Kabinete e dumeletše morero wa ngwaga wo: “Mmogo, a re swarišaneng go lokiša dinamelwa”. Mmolelwana wa lesolo le ke “Brika Bova: A re phegeleleng peakanyo ye kaonafetšego ya dinamelwa go direla kamoso”.

2.2.    Lefapha la dinamelwa ke karolo ye bohlokwa ya ikonomi maphelong a batho ka mo Afrika Borwa. Ngwaga wo, lesolo le le tla setša go bea sekeng dinamelwa bjalo ka sekgontšhi se bohlokwa go boetša ikonomi ya naga ye sekeng; go lemoša batho le go ba ruta ka polokego ya mehuta ka moka dinamelwa, le go laetša gape dikaonafatšo tšeo di dirilwego peakanyong ya dinamelwa.

2.3.    Kgoro ya Dinamelwa e tla abelana ditiragalo tša kgwedi ye le setšhaba ebile tshedimošo ka botlalo e ya hwetšagala mo go www.transport.gov.za.

E.    Melaetša

1.    Ditebogišo

Kabinete e lebiša ditebogišo tša yona le go lakaletša mahlogonolo go: 

- Sehlopha sa Afrika Borwa sa Diolimpiki tša Bagolofadi ge ba phagamišeditše folaga ya Afrika Borwa godimo ka go thopa dimetale tše šupa ge di kopane – tše nne tša gauta, ye tee ya silibere le tše pedi tše porontshe. Bathopasefoka ba dimetale tše ba Sehlopha sa Afrika Borwa e be e le Ntando Mahlangu (digauta tše pedi), Pieter du Preez (gauta), Anrune Weyers (gauta), Louzanne Coetzee (silibere le porontshe) le Sheryl James (porontshe). 

- Mohumagadi Verity Price, seboledi sa bokgoni le mosepediši wa lenaneo ge a thopile Sefoka sa 2021 sa Dikonokono tša Lefase tša Boswaramarapo tša go Bolela Pele ga Batho. Ke mosadi wa boselela wa go thopa sefoka sa Dikonokono tša Lefase mo mengwageng ye 80 ya go feta le mothopasefoka wa mathomothomo go tšwa Afrika.

- Sehlopha sa The Springbok Sevens, ka go go thopa mogopo wa bone wa Rakbi wa Bolefase wa HSBC wa go bitšwa Sevens Series ge ba fihleletše gabedi difoka tša North America ka go thopa ya bobedi ya diphadišano tše pedi tša HSBC Canada Sevens go la Edmond. 

2.    Mahloko 

Kabinete e lebišitše mahloko a yona go ba lapa le bagwera ba: 

- Prof Hlengiwe Buhle Mkhize (69), Motlatšatona Kantorong ya Mopresidente wa Basadi, Bafsa le Bao ba Phelago ka Bogole. Mo bophelong bja gagwe o itaeditše e le motho wa go šoma ntle le go khutša, molweladitokelo wa phišegelo, wa go lwantšha mmušo wa kgethollo le molweladitokelo tša botho, le motšwalesolo wa go fediša go hloka tekatekano ga bong. 

- Morena Karabo Gungubele (32), morwa wa Tona Kantorong ya Mopresidente, Morena Mondli Gungubele. 

- Mohumagadi Zanele kaMagwaza-Msibi (59), moetapele wa National Freedom Party le Motlatšatona wa peleng wa Saense le Theknolotši, yo a kgafilego bophelo bja gagwe go kgatha tema ya gagwe ya go se tlwaelege le tše mmalwa ka gare ga temokrasi le setšhaba sa gaborena.

- Morena Jolidee Matongo (46), Meyaraphethiši wa Toropokgolo ya Johannesburg, yo a bego a ikgafetše go hloma menyetla bathong ka moka ba Johannesburg le baamegi ka gare ga ikonomi ya motsesetoropo.

F.    Bao ba Thwetšwego Mešomong

Kabinete e thekgile go thwalwa ga Mokomišinare le Motlatšamokomišinare wa Etšensi ya Taolo ya Badudi;

1.    Ngaka Nakampe Michael Masiapato bjalo ka Mokomišinare wa Lekgotla la Taolo ya Badudi (BMA).

2.    Motšenenaremogolo David Chilembe bjalo ka Motlatšamokomišinare wa Ditiro tša BMA. 

Kabinete e kwane le go thwalwa ga maloko a Lekgotla ka go latela kgonthišišo ya mangwalo a bona a thuto le go hlatswa maina a bona ka tsela ye maleba.

3.    Lekgotla la balaodi ba Diphaka tša Bosetšhaba tša Afrika Borwa:
(i)    Mme Pamela Bulelwa Yako;
(ii)    Mme Gertrude Bulelwa Koyana;
(iii)    Mme Nandi Nyameka Mayathula-Khoza;
(iv)    Mme Yolan Friedmann;
(v)    Mme Zukisa Millicent Ramasia;
(vi)    Ntate Jeoffrey Godfrey Mashele;
(vii)    Kgoši Livhuwani Lyborn Matsila;
(viii)    Ntate Lourence Bernad Mogakane;
(ix)    Ntate Fulufhelo Edgar Neluchalani;
(x)    Ntate Ntsako Brian Ngobeni; le
(xi)    Mme Hulisani Helen Mushiane.

4.    Lekgotla la Balaodi ba Setheo sa Afrika Borwa sa Diphedi tša go Fapafapana:  
(i)    Mme Joanne Yawitch; 
(ii)    Mme Beryl Delores Ferguson;
(iii)    Ngaka Pulane Elsie Molokwane;
(iv)    Ngaka Lesley Thulani Luthuli;
(v)    Ntate Paul Graeme Daphne;
(vi)    Moprofesara Azwihangwisi Edward Nesamvuni;
(vii)    Ngaka Mmaphaka Ephraim Tau; le
(viii)    Ngaka Reginald Sethole Legoabe.

5.    Molaodipharephare: Kgoro ya Thuto ya Godimo le Tlhahlo Ngaka Nkosinathi Sishi

6.    Motlatšamolaodipharephare: Dinamelwa tša Mabopong ka Kgorong ya Dinamelwa Ntate Mthunzi Edmund Madiya

7.    Motlatšamolaodipharephare: Dinamelwa tša Ditimela ka Kgorong ya Dinamelwa Ntate Ngwako Wilson Makaepaea

Diyakišišo: Mme Phumla Williams – Seboleledi sa Kabinete 
Mogala wa sellathekeng: 083 501 0139