A. Ezingundabamlonyeni

1. Kusolwa Ukusahlelwa Nokubulawa Kwamaholisa     

1.1. IKhabinethi inyefula ukuthuwelela komukghwa wokusahlelwa nokubulawa kwamapholisa, ithi lokhu akusibuqaba nje kwaphela, kodwana kuyingozi nekuphepheni kwelizwe loke.  Amalunga wesiPholisa seSewula Afrika (i-SAPS) nezinye iimphathimandla eziqalelele ukuthotjelwa komthetho, ekubalwa hlangana nazo neenkhampani zabogadi zangeqadi, zidela ipilwazo qobelanga ukuphephisa thina; nazo-ke ngokunjalo kufanele sizisekele besizivikele.

1.2. IKhabinethi ilithokozele ukweqa msinyana kwamapholisa aphenye bekubotjhwe umsolwa ngecala lokubulawa kwamapholisa amabili weTjingalanga Kapa ngoSondo, ngomhla wama-28 kuMhlolanja wee-2021; amapholisa abuleweko lawo abe adlelezelwa neengidi zawo.  Boke ubulelesi, ekubalwa hlangana nabo nokubulala, angeze bubekezelelwe, ngalokho-ke izelelesi zizakuzunywa zibotjhwe.

1.3. IKhabinethi ibuye yabuka i-SAPS ngokubamba kwayo ikhokheyini yemali engaphezulu kwama-R500 weengidi emkhumbini wokuthiya iinhlambi eligwini le-Saldanha. Ijimelo belidoswa phambili bofokisi besiQhema esiLwisana nobuLelesi obuHleliweko beenDakamizwa, ngokusebenzisana nezinye iinqhema zakwa-SAPS. 

1.4. Bakwa-SAPS babuye babukwa ngokubhudungela imigewu bathathe amabhodlelwana ama-400, alingana nemithamo engaba zii-2 400, yesingamjovo we-COVID-19 ebubekweni obuthileko e-Germiston, e-Gauteng. Amapholisa abuye abamba namasingamaski abe abopha nabasolwa abathathu.

1.5. IKhabinethi ikhwezelela umphakathi ukuthi ubalekele ukuthenga izingamijovo kibogalatjani abafaka ipilo yabantu abangakayeleli engozini. NgomNyango wezePilo, urhulumende selathome ihlelo lokujova simahla elizakufika kiwo woke amaSewula Afrika ajovwa ngokuzithandela kwawo.  Bekube nje, isiGaba soku-1 sehlelo lokujova eendaweni ezikhethelwe ukujovisa kilo loke ilizweli sesihlanganise abantu abangaphezulu kwee-100 000.

2. Amahlungu ngokubhubha komuntu omduna e-Braamfontein, eJwanisbhege

2.1. IKhabinethi idanile ngetjhudu elimbi lokubulawa komuntu omduna emtjhagalweni wabafundi be-Wits University e-Braamfontein, eJwanisbhege ngeLesithathu somhla we-10 kuNtaka wee-2021, begodu iwulilela imbiko umndeni nabangani bakhe. 

2.2. IPhiko eliziJameleko leeNghonghyilo ngamaPholilsa (i-IPID) selithomile ukuphenya ngobujamo ebhubhele kibo indoda ebhubhileko le.

2.3. IKhabinethi ikhwezelele amapholisa ukuthi azithibe lokhuya nakahomeza umphakathi emitjhagalweni begodu uwayelelisa bona angadubuli ngeenhlamvu zamambala.

3. Umgomani Wezavukazana E-Afrika (i-ASF)

3.1. Kubikwe bona kwehle ubuLwele beZavukazana (i-ASF) eMfuleni eTjingalanga Kapa. UmNyango wezokuLima eTjingalanga Kapa sewukuvalile ukuthengiswa nokukhanjiswa kwezavukazana eziphilako eMfuleni, kobanyana kuzokukhandeleka ukurhatjheka kwesifo sezavukanesi.  

3.2. I-ASF sisifo esithelelanako esiphatha izavukazana zekhaya nezommango, kodwana asibaphathi abantu. Nokho-ke iKhabinethi ibawa bona abantu batjheje bayelele bazokwazi ukuvimbela isifesi singarhatjhekeli kezinye iingcenye zenarha.

3.3. Abafuyi bayeleliswa bona ukudla kwezavukazana okuziinsalela bakupheke i-awa ubuncani bakhona ngaphambi kobana baziphe, benzelele ukubulala ingogwana ye-ASF nezinye izifo ezisihlalisela evalweni.

4. Iimbalo ZeNgeniso Yomkhizo weliZweloke (i-GDP) zekota yesine zomnyaka Wee-2020

4.1. IKhabinethi izitjhejile iimbalobalo ze-GDP zekota yesine yomnyaka wee-2020 emenyezelwe liZiko leemBalobalo leSewula Afrika (i-StatsSA) ngeLesibili somhla we-9 kuNtaka wee-2021.  I-GDP yamambala ikhule ngama-6.3%, khulu khulu ngenca yokugedliswa ukuya phambili kwemileyo yokuqinteliswa kwamakhambo. Umphumela walokho utjengise ukuhluma ngamandla kokusetjenziswa kwepahla epheleleko emakhaya. Ngenca yalokhu, emnyakeni opheleleko wee-2020, i-GDP yamambala irhunyele ngama-7.0% — ekumphumela ongcono kinalokho ebekulindelwe.

4.2. Ikoro ekhiqizako ihlume ngama-21.1% ngekota yesine yomnyaka wee-2020. Amakoro amancani alithoba kalitjhumi atjengise ukuhluma (kukhamba phambili ukudla neenselo, iinkoloyi neengcenye zeenkoloyi kunye nezinto ezenziwa ngesimbi nokusasimbi), kanti ukuhluma kwerhwebo (9.8%) bekudoswa phambili kuthengisa kweentolo, kweenkoloyi, ukulungisela abantu ukudla neendawo zokulala. Zokulima zitjengise ukuhluma okuphezulu khulu kwaqobe mnyaka. (13.1% emnyakeni wee-2020) ngenca yobujamo bezulu obuhle nokukhamba kuhle kwezinto ngeentjalo eziziinthorwana, ukulima nokufuya. 

4.3. Malungana nemali esetjenziswako, imali epheleleko esetjenziswa emakhaya iphakeme ngesilinganiso sama-7.5%, kukhamba phambili amarestjurente namahotela; ukudla neenselo ezingasitjwala; ukuzigedla nokuzithabisa.  Imali epheleleko enzinzileko ikhuphuke ngama-12.1% idoswa phambili kufakwa kweemali khudlwana eensetjenzisweni zokuthutha nezokwakha lokhuya imisebenzi yokukhambisa abantu ngeenthuthi zendlela neenthuthi ezithutha ipahla nayiba ngcono nemisebenzi yobunjiniyera beendlela nayithomako.   

4.4. IKhabinethi isese neqiniso lokuthi umnotho uzakuvuseleleka ngamaqalontanzi wamagadango wezepilo kunye nemizamo eragela phambili ngokusebenzisana ngokuhlanganyela hlangana kwakarhulumende, amabhizinisi, abasebenzi kunye nomphakathi ekuphumeleliseni iHlelo lokwAkha kabuTjha nokuVuselelwa komNotho (i-ERRP).

5. UmHlangano nomBukiso  weJima lokuKhuthaza ukuThengwa kwePahla eKhiqizwe eliZweni leKhethu (i-Proudly South African Buy Local Summit & Expo).

5.1. UMengameli u-Cyril Ramaphosa wethule iKulumo engeQakathekileko yeThungelelwano leVidiyo ngeLesibili somhla we-09 kuNtaka wee-2021 engeyehlandla lethoba emHlanganweni nomBukiso waqobe mnyaka weJima le-Proudly South African Buy Local Summit & Expo, ebanjwe  ngaphasi kommongondaba othi “ Ukuqalelela Kwekhethu njengomKhwezeleli wokuHluma komNotho.”  I-Proudly South African iliphiko lomNyango wezeRhwebo, amaBubulo nezePhaliswano.

5.2. Umhlangano weenkhulu lo urhatjhwe bunqopha eenkundleni ezihlukahlukileko zokwazisa nezokuthintanisa umphakathi ngethungelelwano kobanyana bazokuba banengi abantu abazakuhlanganyela kilemikhulumiswano yokubonisana. Umbukiso owenziwe ngethungelelwano lokuthintana ngevidiyo lo unikele iinkhampani ithuba lokwazisa nokutjengisa ipahla yazo nemisebenzi eziyenzako evidiyweni efitjhazana evule ithuba lomhlangano obanjwa ngevidiyo kilabo abafuna ukurhweba.

5.3. IKhabinethi ibawa amaSewula Afrika nabosomabhizinisi ukusekela ipahla nemisebenzi eyenziwe khona lapha ekhethu, khulukhulu ngalesisikhathi sokuvuselelwa komnotho, kobanyana kuzokusekeleka ukuhlunyiswa komnotho nokuvulwa kwemisebenzi.

6. IVakatjho leZikweni loBubeko i-Biovac

6.1. ISekela likaMengameli u-David Mabuza ukhe wavakatjhela uBubeko be-Biovac e-Midrand, e-Gauteng ngeLesibili nakama-2 kuNtaka wee-2021 njengengcenye yomsebenzi weKomidi eyiHlanganisela YaboNgqongqotjhe ngemiJovo ye-COVID-19, eqalelela ukuphunyeleliswa kokwethulwa kwehlelo lokujova.

6.2. I-Biovac Institute, eyifemu yabosokhemisi enzinze eKapa, ihlanganyelwe ubunikazi ngurhulumende nekoro yangeqadi. Yasungulwa ngomnyaka wee-2003 kobanyana izokutjheja amahlelo wokujova ekwakhiweni kwemijovo, nokuqalelela imisebenzi yokubulunga nokusabalalisa imijovo emaziko wokujovela ngokwahlukahluka kwawo.

6.3. Eminyakeni edlulileko le i-Biovac ikghonile ukuzakhela amandla nekghono lokubeka nokusabalalisa imijovo. IKhabinethi yanelisekile ngesandla esize ngaso ekwethulweni kwehlelo lokujova nomsebenzi owenziwa nabanye abosokhemisi ukwenza imijovo ye-COVID-19.

6.4. IKhabinethi ibawa woke umuntu ukuthi ahlale atjhejile begodu aragele phambili ngokulandela imileyo yezepilo yokufaka imaski lokhuya umuntu nakahlangana nabantu abanengi, ahlale ahlamba izandla ngamanzi nesibha namkha asebenzise isihlanzekisi esine-alkhoholi ema-70%, aqalangane nabanye abantu ngamamitha ayi-1.5 ubuncani bakhona, abalekele ukuba lapho kunabantu abanengi khona.  Ukuvimbela ukwehla (ukusahlela) kwehlandla lesithathu le-COVID-19 kusezandleni zethu soke.

B. IinQunto ZeKhabinethi  

1. IsiKhwama seSizo leeMali kubaFundi seliZweloke (i-NSFAS)

1.1. IKhabinethi ibikelwe nguNgqongqotjhe wezeFundo ePhakemeko, zeSayensi nezeTheknoloji uDorh. Blade Nzimande ngeentjhijilo zokutlhayela kwemali yokusekela isikhwama sokusiza abafundi, i-NSFAS. Iintjhijilwezi-ke ziriyadise ukuqedelelwa kokutloliswa kwabafundi bomnyaka wokuthoma eyunivesithi.

1.2. Isifo esirhageleko i-COVID-19 sizithuwelelisile iintjhijilo zalelihlelo lokulekelelwa kwabafundi ngeemali.  Ezinye zazo kube kukuthi umnyaka wefundo kukatelelekile ukuthi ungezelelwe nokwanda kwabafundi abalungele ukulekelelwa sikhwama se-NSFAS ngenca yokuthi ababelethi babo balahlekelwe msebenzi. Ukurarulula lokhu, iKhabinethi ivumele ukungezelela iimali zokusekela, imininingwana yakhona ezakwethulwa ihlathululwe nguNgqongqotjhe uNzimande msinyana ngemva komhlangano lo neembikiindaba.

1.3. IKhabinethi ilayele bona kufuze kwenziwe omunye umsebenzi ukuthola indlela ezakubambelela yokusekela abafundi befundo ephakemeko ngeemali. IKhabinethi solo isazibophelele ngokuqinisekisa ukuthi boke abafundi abakulungeleko ukusekelwa ngeemali tjhiywa ngemva ngenca yokuthi abanamali.

2. Umtlamo wobuJamo bokuLawulwa kweNarha namaTjhuguluko  wokuQatjhiswa kweNarha eendaweni  zomPhakathi.

2.1. IKhabinethi ivumele ukuthi umtlamo woBujamo bokuLawulwa kweNarha namaTjhuguluko wokuqatjhiswa kweNarha eeNdaweni zomPhakathi kungabonisanwa ngawo ukuya phambili nababelani.  Amatjhuguluko aphakanyiswako lapha aletha ihlelo lomthetho elizakusetjenziselwa ukudlulisela inarha yomphakathi ebantwini ubujamo babo bokuqatjhiselwa indawo leyo ebungakasimeleli kuhle kezomthetho.

2.2. Amatjhuguluko lawa azakubuye andise namandla wobunikazindawo bomphakathi kobanyana umphakathi loyo uzokukghona ukuraga iindaba zamasiko, zomphakathi nezomnotho ngokuzikhethela kwawo. Imikhulumiswano yokubonisana le izakugcina ngokubizwa komHlangano omKhulu wokuBonisana ngeNarha osahlelelwako.

3. Ukutholakala Nokuthengwa Komjovo 

3.1. IKhabinethi ibikelwe nguNgqongqotjhe wezePilo uZwelini Mkhize noNgqongqotjhe wezeeMali u-Tito Mboweni ngendima yemikhulumiswano yekontraga yokutholakala komjovo  neenhlangano zabosokhemisi ezihlukahlukileko. IKhabinethi ibonisene ngeminye yemibandela enzima esemakontrageni engakhambisani nomThetho we-1999 wokuLawulwa kweeMali zomPhakathi (umThetho Nomboro 1 womNyaka we-1999) yabe yakuvuma nokuphambuka esele kuvunyelwe liZiko leeMali zeNarha ngoba kubabalelwa ipilo yamaSewula Afrika.

3.2. Ukuphambukokho kumalungana nemibandela yembadalo ukwenza iqiniso lokuthi amaSewula Afrika ayakghona ukuthola umjovo msinyana ngokungakghonakalako.  IKhabinethi isekele imizamo yeZiko leeMali neyomNyango wezePilo ukuthi angaragela phambili ngemikhulumiswano leyo abe abone nokuthi woke umuntu ukghona ukuthola imijovo msinyana.

4. UbuJamo beHlekelele beliZweloke ( i-NSD)

4.1. IKhabinethi ivumele ukungezelelwa kwesikhathi sobuJamo beHlekelele yeliZweloke ukuyokufika nakali-15 kuSihlabantangana wee-2021.  Lokhu-ke kwenziwa ngokweNdinyana 27(5) (C) yomThetho wee-2002 wokuLawula iHlekelele (umThetho 57 wee-2002). UMphakathi ukhwezelelwa bona uragele phambili ngokuthobela yoke imibandela nemilayelo yezepilo ye-COVID-19 kobanyana kuzokukhandeleka ukurhatjheka kwengogwana yalesisifo.

C. ImiThethomlingwa 

1. UmThethomlingwa wezePilo nokuPhepha emSebenzini womnyaka wee-2020   (i-OHS)

1.1. IKhabinethi ivumele ukukhutjhelwa emphakathini komThethomlingwa we-OHS wee-2020 ukobana kulalelwe amazizo neentjhukumiso zomphakathi. UmThethomlingwa lo unqophe ukutjhugulula umThetho we-OHS we-1993 (umThetho 85 we-1993) uthomane nekambiso yamazwe ngamazwe. Godu unqophe nokuqinisa amagadango wezokuphepha emisebenzini ngokwahlukahluka.

1.2. UmThethomlingwa lo uphethe imibandela ehlomisa abasebenzi ngamandla wokwala ukusebenza nakube babona ukuthi basebujameni obuyingozi nobungakaphephi, ngaphandle kokusoziswa baqatjhi babo.

2. Umthethomlingwa Wokuvikeleka kwabaThengi ngeNdawo yokuHlala

2.1. IKhabinethi ivumele ukwethulwa phambi kwePalamende komThethomlingwa wokuVikeleka ngeNdawo yokuHlala.  UmThethomlingwa lo ubulala umThetho we-1998 wamaGadango wokuVikeleka kwabaThengi ngeNdawo yokuHlala (umThetho Nomboro 95 we-1998).  Amatjhuguluko aphakanyiswako lapha abala ukuvikelwa kwabathengi beendawo zokuhlala – ekubalwa hlangana nakho ukulungiswa, ukuvuselelwa, ukutjhugulula nokungezelela endlini esele vele ikhona. Umthethomlingwa lo godu uphakamisa namahlelo wamatjhuguluko ebubulweni lokwakhiwa kwezindlu.

2.2. Minengi imibono neemphakamiso esele zitholakele ngokubonisana nomphakathi kubabelani bebubulo lezokwakha. Umthethomlingwa lo kuzakubuye godu kubonisanwe ngawo ukuya phambili emahlelweni wepalamende ngaphambi kobana uphasiswe ube mthetho.

D. Iminyanya Ezako 

1. ILanga lokoKhuthaza Ngokongiwa kwaManzi lePhasiloke  

1.1. ISewula Afrika izokuhlanganyela nomphakathi wamazwe ngamazwe ekutjhejeni iLanga LokuKhuthaza NgokoNgiwa kwaManzi ePhasini lingoMvulo nakama-22 kuNtaka wee-2021.  Ilangeli liphakamisa ukuphandlululeka ngemiraro yezamanzi ephasini loke beliqalane nokuphunyeleliswa kwemiNqopho 6 yeTuthuko ebambelelako: Amanzi aHlanzekileko neHlwengiso emuntwini woke ngomnyaka wee-2030.

1.2. UmNyango wezaManzi nokuHlwengisa uphume ijima i-#SaveWater ukukhumbuza woke amaSewula Afrika ukuthi elinye nelinye ithosi liqakathekile.  Nanyana izulu likhe lana kuhle kangaka nje mhlapha, ilizwe lekhethweli elingelinye lamazwe wendlala yamanzi lisesengozini yesomiso esithuweleliswa kutjhugulukatjhuguluka kwetlayimethi. 

1.3. IKhabinethi ibawa amaSewula Afrika ukuthi ababalele amanzi ngoba ukudlala ngamanzi namhlanje kungacaphazela iinzukulwani zangomuso. Asibe sizukulwani esitjhejako esaqalelela ingomuso ngezandla zethu ezibambeneko ngokuvala ipompi yokudlala ngamanzi.

E. Imilayezo 

1. Siyabathokozisa 

IKhabinethi ithokozisa abalandelako:

• UMm. uTshepho Faith Koopa, ongusosayensi wezokwelapha wekhethwapha we-Pathology LabOne othole  isikhuthazi  sesivikelamzimba sokuhlola i-COVID-19.   Isikhuthazi sesivikelamzimbesi siyingcenye yeensetjenziswa zokuhlola i-COVID-19 ezethulwa malabhorathri we-LabOne eKhayelitsha, eTjingalanga Kapa ne-Midstream, e-Gauteng. I-PathologyOne ithenge leziinsetjenziswa zokuhlola ngokusebenzisana no-Prince Amon Moagi wesitjhaba sa-Bakgatla eTlhagwini Tjingalanga, ne-Africapacity Investment Group kunye ne-Brawne Capital.

2. Silila Imbiko 

 IKhabinethi iyililela imbiko imindeni nabangani balaba abalandelako: 

• UMm. u-Karima Brown (obekaneminyaka ema-54), umakekere wombikiindaba nomtjhotjhozeli okhethekileko.
• UNom. Peter Matlare (obekaneminyaka ema-61), usomabhizinisi neSekela le-CEO ye-Absa owakhe waphatha iinkhundla eziimbadlwana zabaphathi abaphezulu emabhizinisini ambadlwana weSewula Afrika kunye ne-SABC.
• UNom.  Azwifarwi Dick Ralushi (obekaneminyaka ema-71) umakekere womlwelikululeko. URalushi ubelilunga le-Black Peoples Convention (i-BPC) lapho abe nguNobhala wezokwAzisa khona.  Wayelilunga le-Northern Transvaal Action Committee, eyayingaphasi kwe-UDF, abuye abe lilunga lomtjhotjhaphasi we-Activists of the African National Congress ngaphasi kwephiko lamajoni woMkhonto weSizwe, wona owawungaphasi kwe-Northern Transvaal Rural Machinery. 

F. Ukuqatjhwa

Koke ukuqatjhwa kulawulwa kufakazeleka kweencwadi zefundo ezikhambisana nomsebenzi umuntu aqatjhelwe wona kunye nokuhlanjululwa kwegama lomuntu okufaneleko.

1. UMm. u-Mamogala Jennifer Musekene – oqatjhelwe isikhundla sokuba liSekela likamNqophisiZombelele emNyangweni wezamaKhemikhali nezokuLawulwa kweeNzibi, emNyangweni wezeBhoduluko, zamaHlathi nezeenHlambi.

Imibuzo Ingathunyelwa:
Phumla Williams – UmKhulumeli weKhabinethi 
Iselifoni: 083 501 0139