1. Zamvanje NgobuLwele be-Corona Obuqubuke Ngomnyaka wee-2019 (i-COVID-19)

1.1. Emhlanganweni wayo ngethungelelwano levidiyo obegade ubanjwe ngeLesithathu, mhlana ali-10 kuMgwengweni wee-2020, iKhabinethi yemukele umbiko obuyekeziweko womKhandlu oLuleka ngeNgogwana ye-Corona (i-NCCC). I-NCCC yethule iintjhukumiso ezimbalwa mayelana nokuqiniswa kwamagadango wokulinganiswa esiGabeni sokuYelela sesi-3 sokuqinteliswa kwamakhambo nemisebenzi ethileko elizweni loke esinganabungozi obunengi. 

Iintjhukumiso zisekelwe eemphakamisweni ezenziwe mikhakha ehlukeneko nemikhulumiswano yomKhandlu oHlanganyelweko wemiSebenzi nezobuHlakani weliZweloke.  

1.2. Nokho, iKhabinethi iqunte ukutshwilisa ukuvunyelwa kweentjhukumiso lokha nakusajanyelwe umbiko ozeleko wokuhlolwa kwezamaphilo evela eKomidini yezamaPhilo eLuleka uNgqongqotjhe ngeNgogwana i-COVID-19 yomnyaka wee-2019. I-NCCC ilindeleke ukufumana isethulo esizeleko ekuthomeni kweveke ezako. 

1.3. IKhabinethi iyakhombela godu ikhuthaza woke amaSewula Afrika ukuhlonipha nokuzinikela ekuthobeleni amagadango asetjenziswako wokulwisana nokurhatjheka kweNgogwana i-Corona equbuke ngomnyaka wee-2019 (i-COVID-19). Amagadango la afaka hlangana ukuhlanjwa kwezandla kanengi, ukuhlala nokujama maqalanga nokufawa kwemaski lokha umuntu nakahlangana nabanye abantu.

2. IKhamphani yeemBaseli yeliZweloke

2.1. IKhabinethi ibikelwe ngomsebenzi oragako wokuhlelela woke amakoro weembaseli (i-oli nerhasi) wekhamphani yombuso yezamandla amihlobo ehlukahlukeneko, eyaziwa nge-Central Energy Fund. 

2.2. Ukuhlelwa ngobutjha lokhu kuzokwenza bona iinkhamphani ezintathu (i-PetroSA, i-Strategic Fuel Fund ne-iGas) zihlanganiswe zibe yiKhamphani yinye yeemBaseli yeliZweloke. Lokhu kuhlathulula isimemezelo esenziwe nguMengameli u-Cyril Ramaphosa eKulumenakhe yobuJamo beNarha (i-SoNA) yamhlana ali-13 kuMhlolanja wee-2020, ukuhlelwa ngobutjha lokhu  kuhloswe ngakho ukuletha  ihloso etja ngamabubulo wombuso ekusekeleni ukukhula komnotho netuthuko.

2.3. IKhabinethi ivumele isitjhukumiso sokuqatjhwa kwekhamphani yabocwephetjhe evuselelako esebenza ngamahlelo wokuhlanganiswa kweenkhamphani ukuthi ifumane indlela engcono yokusebenza kwekhamphani esele yenziwe yaba yinye i- National Petroleum Company. 

3. ITlhatlha lomThethokambiso wokuLwisana neNturhu eQothele ubuLili obuThileko (i-GBV) eHlelweni leFundo ePhakemeko nokuBandulwa

3.1. IKhabinethi iphasise iTlhatlha lomThethokambiso wokuLwisana neNturhu eQothele ubuLili obuThileko (i-GBV) eHlelweni leFundo ePhakemeko nokuBandula. Itlhatlha lomthethokambiso linqophe ukuqalana nesibalo esiphezulu semilandu ekhambisana ne-GBV emazikweni wefundo ephakemeko.     

3.2. Itlhatlheli lomthethokambiso linikela ngomhlahlandlela wokusebenza kweenhlangano, ikambiso neendlela ekufuze zisetjenziswe maziko wefundo ephakemeko ukukhandela izehlakalo ze-GBV emakhamphasini wawo. Ukungezelela ekwethuleni iinhlangano ezengameleko kilendaba, ubuye ukatelele amaziko la ukuthi ayelelise bekafundise ngemithethokambiso yawo ye-GBV. 

4. UmBiko ngokuSebenza kweMyuziyamu yezoMzabalazo neKululeko [i-Resistance and Liberation Movement Museum (i-RLMM)]

4.1. IKhabinethi iphasise umBiko wokuSebenza ngokuSungulwa kweMyuziyamu yezoMzabalazo neKululeko kwe-RLMM. Imyuziyamu le izokusiza ngokubulungwa komlando womzabalazo wokulwela ikululeko eSewula Afrika.

4.2. Ihlolombono le, eyavunyelwa yiKhabinethi ngomnyaka wee-2015, yayisekelwe phezu komnqopho wePhrojekthi yomZila wamaGugu womZabalazo neKululeko (i-RLHR). I-RLHR inesandla ekuthuthukisweni nekutjhugululweni kobujamo beendawo zamagugu zeSewula Afrika.

4.3. Nasele iphelile, imyuziyamu kuzokubulungelwa kiyo umlandelande wezinto ezimagugu (aphathekako nangaphathekiko) kube nokudenjwa komlando ococwako ofanako, isikhumbuzo sezehlakalo ezimlando ezikhambelana nomzabalazo wekululeko yeSewula Afrika.

5. Ukulondwa kwamaGugu wabaThwa (ama-Khoi nama-San) 

5.1. IKhabinethi iphasise ukuphunyeleliswa kokuLondwa kwamaGugu wama-Khoi nama-San weliZweloke, ekuyiphrojekthi yamagugu welizweloke. Iphrojekthi le izokutshwaya, ikhangise, ibulunge nofana ilonde beyiphakamisele phezulu amagugu wama-Khoi, newama-Nama, ama-Griekwa, ama-Khorana nama-San. Iphrojekthi le isiza ukwamukela umlando weSewula Afrika wangaphambilini obewuthathelwa phasi bewadinywa namamathuba.

5.2. IKhabinethi ibuye iqinisekise ukusebenza komThetho wobuRholi beNdabuko bama-Khoi nama-San wee-2019 (umThetho Nomboro 3 wee-2019), ogunyaza ngokusemthethweni ukuhlonitjhwa kwabarholi bama-Khoi nebama-San.

6. Imigwalo Yeenhlavu Zemali Ezisikhumbuzo Zomnyaka wee-2021 newee-2022

6.1. IKhabinethi iphasise imigwalo nokusatjalaliswa kweenhlavu zemali ezisikhumbuzo zomnyaka wee-2021 newee-2022 ekhutjhwe liBulungelomali eliKhulu leSewula Afrika (i-SARB) neKhamphani ekhiqiza iinhlavu zemali i-South African Mint Company. 

6.2. Ihlavu yesikhumbuzo esatjalalisiweko i-R5 nehlamvu yesiliva erhanyazelako (i-sterling silver) ye-R5, ekghatjiswe ngerhawuda yababutheleli izokukhutjhwa ngomnyaka wee-2021 ngomnqopho wokugidinga umnyaka weKhulu we-SARB. Umlandelande wesiNe Weenhlavu Zemali zeSewula Afrika, ozokukhutjhwa ngomnyaka wee-2022 uzokuba neenhlavu ezaziwa nge-Fourth Decimal Coin Series ze-10 cent, i-20 cent, i-50 cent, i-R1, i-R2 kunye ne-R5.   

ImiThethomlingwa

1. IsiKhibelelo somThethomlingwa weKoro yeeMali somNyaka wee- 2020

1.1. IKhabinethi iphasise ukwethulwa ngePalamende kwesiKhibelelo somThethomlingwa weKoro yeeMali somnyaka wee-2020. UmThethomlingwa lo utjhukumisa ukunikela i-SARB igunya lokuba siPhathimandla sokuRarulula, nokuqinisa amathulusi we-SARB wokulawula ukwenziwa komsebenzi wayo wangokomthetho ngomnqopho wokuqinisekisa ukunzinza kwerherho lezeemali.

1.2. UmThethomlingwa utjhukumisa itlhatlha elitjha lokusebenza ekurarululweni kwemiraro yamaziko weemali, khulukhulu amabhanga, nakafika ebujameni bokuqalana nobudisi beemali. Wethula godu iskimu seSewula Afrika setjhorensi ehlangeneko sokufaka imali, esizokuqinisekisa bonyana abafakiimali babhadelwa iimali zabo lokha ibhanga nayibhalelwako.

1.3. Iskimu esifana nalesi sizokuvikela abafakiimali abanganabubalekelo nokuqinisekisa bonyana kuba nokuphazamiseka okuncani erherhweni leemali nemnothweni jikelele lokha amaziko la azifumana aqalene nobudisi beemali. 

Ukuqatjhwa

Koke ukuqatjhwa kulawulwa kufakazeleka kweencwadi zefundo kunye nokuhlanjululwa kwebizo lomuntu okufaneleko. 

• UMm. U-Sekgothadi Kabelo esikhundleni sokuba mNqophisi ongaThathi iinQunto zokuLawula eBhodini eLawula amaDoyelo weSewula Afrika.

Imibuzo Ingathunyelwa: kuMma uPhumla Williams – umKhulumeli weKhabinethi 
Inomboro kaFunjathwako: 083 501 0139